Iyyesuse Xaytossi Ana Paale Taasatte Kaanasi Kulakki Ashshi
7
Xaysa tupettay koro piyye Ayhutattena qhooti Iyyesusesi poghe woʼi maallay piyye thuusundhiisi ihela hxuripa ashshoy isi piyye Kalilanna lallaghama.
2 Xinkissana Paalessi Taasattea koro Ayhutatte kaanasekki itʼtʼuy,
3 Hussa maallay qassawhe Iyyesuse Uso kulakki okayeppa hasa na payonki:
“Kolladhampawhe haahu kodhmo Atho kottiisi qhamu hiinennu haqapa piyye Yihuta kula ashshoy!
4 Qhawho liqqakko itha he hiʼase woʼa bhadhamtettay ye kodhadhi,
Athokka olissa akkottiisi piyye qhaatʼenu hiʼaase ho gheeqasa.”
5 Olhu namaallay hasa napaye qassawhe huusukkakki qhooti Ye Uso dhukkaysadhonki maallay.
6 Iyyesusekka hasi napayi:
“Xeere haayyu haannay ye tamonki,
naqharray huneesi kuyyaqqe kaasay he hune ghare.
7 Koro piyye qhaatʼinna huneesi shikke ye alkasnikka,
naqharray Ano qhoota an kodhmo huusundhi magha naqalli maallay iyye shikka.
8 Hune paalissa kula ashshindhama xeere Hayyu haannay qhooti yeyela hxafoonki maallay Ano paalisa kula anu ashshini.”
9 Uso hasi napayi tupettay piyye Kalilassa inna kala hahqi.
10 Naqharray qassawhe huusu paalessi kula iʼashshe tupettay Uso yehe hiʼaasunakki paalessi kula ashshi.
11 Rafisampawhessi koro Ayhutattena xayto paalattena qaghakka hasi payeppa isi gheeqanki:
“Emma hantu Qhawhussa ahaati qaghi?”
12 Waarshoka qhoota huusu kaaʼita xash-xashetakki uuma illeema qaladhe,
koro tookko tookko ipayana:
“Uso kulay qhawho xeesa!”
tokke tookke kapay ippaya:
“Hasa qandhikka,
kulay ikoro dhappisa!”
13 Ikkodhdhitama kapay waarsho rafisampawhe koro Ayhutattesi qhooti ghaapi maallay qhawho toʼokokkakki qhoota huusu kaaʼitha leqakoitha ye qalladhukka.
Iyyesuse Xaytosi Paalatenakki Kollisi
14 Apaalesinna kittatte qaghana Iyyesuse Manne kʼulkʼullawhe kulakki hadhdhipa korossi kollise paayu.
15 Korossi Ayhutattekka hasi payipa isi dhahxhxa:
“Ata,
qhawhu manne kollinkitosa ye xullunna oli kaasaasi malaali are alkasi?”
16 Hussa maallay Iyyesuse hasi payipa nu holasu:
“Ano kulay olho an koro kollisi ho Paappo Hayyu ye erakina dhiishay hayyu qandhikka.
17 Qhawho woʼoko Haallikkitoosi kodhe woʼa qagha payni kollinku haayyu ho Haallikkito taakinti ho pukkaqte thayyuna qhamo ikodhdhissa iʼara.
18 Qhawho pukkaqte thuusunu qalladha pukkaqte thuusuusikki kaanase woʼi,
naqharray qhawho hossi usoosi eraki qhamu ikkaanasamnisi woʼa dhukampakko,
ayyakka yena qaghti.
19 Muuse hikkeesi ihune teexi qaandhi?
Naqharray hunena kittatte qhawho toʼokokkakki ho hikkissasi tiqthadhi ye qaghi.
Olho anna maallay poghenu ye gheeqte moʼo?”
20 Waarshossikka hasi napayipa nu holasu:
“Orriththo hola qagha,
yaxa hosi poghe woʼa?”
21 Iyyesusekka hasi na payipa nu holasu:
“Ano kodhmo tookko an kodhi payni hune kaasay kodhmusattay adhahxhxanku.
22 Tampe karazatte Muuse hune teexi,
ikodhdhitakka payni tampissay appadhdhe haahundhi kaakkorukki taayyamti dhiishay Muuse kaakkoru qandhikka,
hunekka kuyyaqako hxaysinkitona isa koro karazanku.
23 Lammi tampe Muuse qhamu ye haqhinti maallay kuyyaqko hxaysinkitona isa karazanku payni,
Ano kuyyaqko hxaysinkitona qhawhito dhakinte thuusu kaasaasi isan dhiniisisa payni moʼo mallakka ayyeema miiroote?
24 Qhaqhitte dhukatteesi qhaqha dhiishay olo korito miinte eemeppa isa lighatettay qhaqhitte qhaqhanku.”
Iyyesuse Kristoosem Kristoose qaandhi?
25 Korossi kathama Iyyerusaalemenna qaghana kittatte koro tookko tookko hasi payi:
“Qhawhossi ipoghe woʼeppa isi gheeqa husi Uso qaandhi?
26 Haadhi Uso leqakko’itha iqqalladhi,
usundhekka olho toʼokkokka yena payonki!
Illakka rafisampawhe Uso qhamu Kristoose kodhdhisa ara tannu?
27 Ikkodhdhitama kapay qhawhu ahanu qhamu okayisa ine anaraani,
naqharray Kristoose ahanu qhamu okaynisa qhawho ara ye qaghikka.”
28 Hussa maallay Iyyesuse Manne kʼulkʼullawhatte ghintatte ikkollisana ikkitto dhammattaakki hasa payi:
“Yeesi ayye aranku,
ahanu qhama okayisakka aʼarranku,
naqharray Ano woʼoko Hayyuttay anu okayukka,
Hoyeesi ye eraki dhukampakko,
naqharray hune huni arte.
29 Ano kapay qhooti Uso ye erakipa okaayya maallay Usoosi an ara.”
30 Hussa maallay ghape inna woʼe,
naqharray xeere Huusu haannay qhooti yena hxafoonki maallay qhawho toʼokkokka xarghghottay ye Uso ghappadhu.
31 Naqharray waarshossinna kittatte koro kisha hasa payipa Usoosi dhukkaysadhu:
“Apayni Kristoose iʼokayi payni milikitadhdhe qhawhu kodhina he ghulasi iʼkonna?”
32 Feresaawadhdhekka,
koro xashxashettay qhoota Iyyesuse qalladhasikki apaqhe.
Hussa maallay usundhe pana inthawampawhe kʼeesadheete Iyyesuse ghapenukki korossi Manne kʼulkʼullawhe tiqadhaasi erake.
33 Iyyesuse hasi napayi:
“Xeere qhacʼa pattaakki an hune qale sallima hossi ye eraki kulakki an ashshini.
34 Hunekka ayye gheeghqnaku,
naqharray huni ye tayinte,
xayto Ano naqaghi kulakka okaye huni alkasinte.”
35 Hussa maallay rafisampawhessi koro Ayhutattena hasi illena papaye:
“Ine qhamo ini Uso taaynennu ata aha kulakki ashshini thannu?
Ata peri iʼashshinapa korossi Ayihutatte piyye Kirikatte kittaʼitha pullami pana korossi koro ye koro Ayhutatte ye kodhdhuusi kollisunna?
36 Ata olissa ippayina ‹Aye gheeqnanku,
naqharray huniye tayinte,
xayto Ano qaghi kula okaye huni alkasinte› payyo moʼo?”
Qelho Qandhe Qaghitona
37 Kuyyaqkossi ana paale dhikkisina Iyyesuse ishshikkaaripa ikkitto dhammattay hasa paayyu:
“Qhawho dheepoodhi qagha payni iʼokaayyapa yela kanta qandhe quku,
38 qhamossi Matʼaafadhdhe Kʼulkʼullawhe qalle kula:
‹qhawho yeettay dhukkaysadhi qandhe qaghito nakittatte lighnab›”
39 Olhu na maallay hasa qalladhikka Nasso Kʼulkʼullossi koro Usottay dhukkaysanna akkanni kaaʼitha,
Iyyesuse qhooti kaanaste kula ye hadhdhu maallay Nasso Kʼulkʼullo haannay ye teexamukka.
40 Hussa maallay waarshossinna kittatte koro tookko tookko qallithisaki apaqhipa isi hasa paya:
“Dhuke hxuumampakkossi aʼiyina iʼokayna husi Uso.”
41 Koro tokkokka iʼiyana “Husi Kristoose” naqharray koro hubhay ippayana:
“Kirstoose piyye Kalilannukki okayni?
42 Kristoose qhamu issanynye Taawitena kittatte dhalanipa kathama Taawite Peteleheemenu okayussa Matʼaafac kitteema olo tooxu intaa?”
43 Hussa maallay qhoota Huusuna saappeete koro iʼille qhoqhoti.
44 Tookke tookke Usoosikki ghape woʼe,
naqharray qhawho toʼokkokka ho xarghottay Uso ghappadhi ye qaghika.
Rafisampawhessi Ayhutatte Dhukkaysadhe Iishe
45 Xaysa tupettay korossi Manne kʼulkʼullawhe tiqadhakka iholleppa Rafisampawhessi kʼeesadheete pana Feresaawadhdhe kula holonki,
usundhekka inna payenna:
“Ata moonukki huni okaasonku?”
46 Korossi zape tiqadha hasi payipa nu holasonki:
“qallithe qhawhussa qalladhi kula qhawho apar qhamo huusu qalladha ye qaghikka.”
47 Naqharray Feresawadhdhessi hasi na paye:
“Hunekka peri atatakamte?
48 Inta rafisampawhe taaki feresawadheete kittatte qhawho Usoosi dhukkaysadha iqagha?
49 Karayka waarshu tampe Muuseesi ye ari ho qhiicʼami.”
50 Feresawitoosi karro Iyyesuse kula ashshi Nikʼotimoose ana payikka hasi na payi:
51 “Qhamo hikke thaani kula qhawho tookko kissate malse olo nu qallunna qharaʼitha olhu kodhi ye aramunna qhaqhitte ana qhaqha inta?”
52 Usundhdhekka hasi na paye:
“Athoka peri qhawho piyye Kalilana?
Hxuumampakko piyye Kalilanna qhamu ye haqinissa qhottosadhpa ihho xulta.”
53 Xaysa tupettay qhawho kaasay karo manne huusu kulakki qaaki.