Xiskattossi Maastipa ghapami
8
Xaysa tupettay Iyyesuse karo ghupo Ekerkito kulakki ashshi.
2 Haqhayna sinkato awunetay Manne kʼulkʼullawhesinna ghinte kulakki holipa okayu,
waarsho kishakka Uso kula okayi,
Usokka iqakkadhipa isi usundhe kollisa.
3 Kollisampawhe hikkatepa Feresawadhdhe xiskatho maastiisiki ghapeppa okayonki waarshossi kitteema shikkaarashonkippa,
4 Iyyesusena hasa payoonki:
“Kollisampakko,
haadhi kulay xiskattu immaasannakki ghapamti,
5 xiskatto hasa lighaasi awurughettay qhamo ahattapnipa apoghunu Muuse hikkea taanisa iʼine hayina,
Atho qhoota hiisi moʼo appayti?”
6 Olhunnu hasa payekka olhu usottay ghapnekki na gheqadhe,
naqharray Iyyesuse ikuruyipa ghoqakkottay piyye tooxe paayu.
7 Inna hohollepa isi Uso kasqadhana qili payipa hasa na payu:
“Hunena kittatte qhawho apar ye cʼuppo kodhdhu qharitteema iʼawrukko akkapa hathape paayu!”
8 Xaysa tupettay ihholipa kurruyuppa piyyeema tooxoy.
9 Usundhdhekka iʼolissaasi apaqhenna xaadhighenu paayyatti toʼon toʼonki lallaghammeppa ashshonki,
hussa maallay Iyyesusekka xiskathosi Usona kaanta shikkaaray qale pattaakki qawni haqhi.
10 Xaysa tupettay Iyyesuse qili payipa xiskathosinna hasa payu:
“Atho xiskattu,
ata korossi he kasasi ahaati qaghi?
Qhawho heema qhaqhitte qhaqhi ye qaghi?”
11 Iseka hasi na payti:
“Pogholho hayyu,
qhawho toʼokokakki ye qaghi”;
Iyyesusekka inna payina:
“Anokka anu heema qhaqhitte qhaqhniye ashsha,
xaynu koru lanka cʼuppoosi olo kodhi.”
Iyyesuse Qhamu Hammakko Qhaatʼeete Kodhdhi
12 Iyyesuse ihholipa korossina hasa payu:
“Ano hammakko piyye qhaatʼete,
qhawho yeesi dhukkaysadhi kaasay hammakko qaghito itayannima tukkankito kittatte ye qaakni.”
13 Feresaawadhdhekka hasinna paye:
“Atho qhoota haahu qallati maallay olha qalliti dhuke qandhikka.”
14 Iyyesusekka hasi payipa nu holasu:
“Ano an qhoota hayyu qallakka payni,
qhamo an ahanu okayipa hola isan ahakula ashshinasi qhoota ari maallay qallithe thaayyu dhuke,
naqharray hune qhama ahanu okayipa hola isan xankasa ashshinasi huni arte.
15 Hune dhihattoote sakankitotaakki aqhaqhitte qhaqhte,
Ano qhawho toʼokoomakka anu qhaqhitte qhaqhnikka.
16 Qhaqhitessi an qhaqhakka payni,
Pappossi haayyu ye eraki qhooti ye qale qaghipa Ano patta isi anu kodhdhu maallay qhaqhitte thayyu the dhukate.
17 Misikirunko qhawho lakkna dhuke qhamu kodhdhissa hikke thaahundhissa atooxi.
18 Hussa maallay ho qhoota haayyu qalla Ano,
holuppa Pappossi ye erakikka qhoota hayyusiki qalli.”
19 Xinkissana usundhekka hasi na payeppa kasqadhonki:
“Paappo haahu ahaate?”
Iyyesusekka ina payina:
“Paappo hayyupa yeesi huni arte;
yeesikka arte payni ahxay Paappo haayyusikka aʼarranku.”
20 Iyyesusekka olissaasi Manne kʼulkʼullawhatte ghintatte xayto satʼinessi ana kkodhaththe yakina kaantaakki qaghipa isi koro kollisanakki hasa qalladhi.
Kapay xxeere huusu haannay ye hxafonki maallay qhawho toʼokkokka ye Uso ghapu.
21 Iyyesusekka ihholipa hasa na payu:
“Ano an ashshina,
hunekka ayye gheeqenanku,
nagharray cʼuppo haahundhi illikka farinte dhiishay xayto Ano qaghi kula okaye huni alkasinte.”
22 Rafisampawhessi Ayhutattekka hasi illena papaye:
“Olissa ippayina ‹xayto Ano na ashshini kula ashshe huni alkasinte› payyo huusu ata ihhe poghnam?”
23 Iyyesusekka hasi na payi:
“Hune he hassa piyye qhaatʼinna,
Ano ho kutanu okayi,
hune he qhatʼinna,
Ano ho qhaatʼinna qandhikka.
24 Olho anna maallay hunena iyyina cʼuppo haahundhi illakka farrinte,
Ano yaxa qhama kodhdhisakki huniye aronkuppa ye dhukkaysadhanku payni cʼuppo haahundhi illakka farinte.”
25 Usundhdhekka inna payenna:
“Ata atho yaxa qhari?”
Iyyesusekka inna pay:
“Yaxa qhama kodhdhisa qharitteema an hune qalli.
26 Ano olho an hunena qallinipa qhaqhitte huneema qhaqha olho kisha ansheeghi,
ikkodhdhitama kapay hoye eraki dhukampakko,
Anokka olho an Usona apaqhisikki an piyye qhaatʼinu thorruy”
27 Naqharray usundheesi qhoota Haallikko Appa kaaʼitha qhamunnu qalladhisa yenu xulu.
28 Hussa maallay Iyyesuse hasi payipa nu holasu:
“Xinkessi Ano Miʼaye Qhawhitoosi qila qila paastenna Ano Uso qhama kodhdhipa olhossi Paappo hayyu ye kollisi patta isa qalla dhiishay Ano pukkaqte thayyuttay qhama anu kodhdhisa xinkisana aʼarranku.
29 Hossi ye eraki ye qalli qaghi,
Anokka kuyyaqko kaasay kodhmo Uso hxaseesa qhoota kodhi maallay qawni yeye hxurika.”
30 Iyyesuse ihasa qalladhina koro kisha Usoosi dhukkaysadhi.
Ayilunko Cʼuppitona kaalla Ashoote Lighe
31 Iyyesusekka korossi Ayhutatte Usoosi dhukkaysadhina hasi na payi:
“Apayini hune Kʼaale thayyuttay qaaka payni karayka kolladhampawhe hayyukka kodhdhinte.
32 Dhukeesikka aʼarranku,
dhukissakka ashoote ihhune lihasinti.”
33 Naqharray usundhe hasi na paye:
“Ine sanynye Aprihaame yaxanukkakki ayle ini kodhoonina,
emma Atho malaa aʼitina ‹ashoote allighinte›?”
34 Iyyesusekka hasi payipa nu holasu:
“Dhuke,
dhuke an hune qalli,
qhawho cʼuppo kodha kaasay ayle cʼuppito.
35 Aylitho kuyyaqko kaasay ahxke manneete qale ye qaakikka,
naqharray miʼaye manneete kuyyaqko kaasakki ahxke huusu qale qaaki.
36 Hussa maallay apayni Miʼaye ashoote hune lihasi payni karayka dhuke ashoote allighinte.
37 Kulay qhamo asanynye Aprihaame kodhdhitessa an hune ara,
emma naqharray qhoota Kʼaale thaayyusi huni akkatte maallay poghe Ayyela woote.
38 Ano olho an Paappo hayyuna kaanta hiisikki an thorruy,
naqharray hune olho appaappo haahundhina apaqhtesikki akkotte.”
39 Usundhdhekka hasi payeppa nu holasonki:
“Paappo haani Aprihame”,
Iyyesusekka hasi na payi:
“Ahxay dhelle Aprihaamekka kodhdhite payni kodhmo Aprihaame kodhisikka kodhinte.
40 Naqharray Ano dhukkeessi an Haallikkito apaqhisi qhoota an hune qalli maallay poghe ayyela woote,
Aprihaame kapay hasa ye kodhdhukka.
41 Lammi hune kodhmo paappo haahundhinakka kotte.”
Usundhdhekka inna payenna:
“Ine maasawhe qandhikka!
Paappo toʼokko an sheeghni,
Ususakka Haallikko.”
42 Iyyesusekka hasi payipa nu holasu:
“Ahxay Haallikko Paappo haahundhi kodhdhi payni Ayye cʼikananku,
Ano hassa kula qhama okayninu Uso ye eraki dhiishoy Ano humna haayyuttay anu okayukka.
43 Ata qalliithe thayyu moʼonukki ye hune xulti qhari?
Olho an qalliisi qhoota huni apaqhe woote maallay qaandhi?
44 Hune dhelle paappo haahundhi Seetʼanay,
dharraʼo paappo haahundhinakki akkodhe woote,
uso kedhdhannu ho napsadhdhe paaxa,
dhuke qhooti yena qaghti maallay dhuke qale dhalunko ye sheeghikka,
iʼayyaasi qalladhana pukkaqte thuusunakki qalladhi moʼo maalla payni uso ayyolakko paappo ayyay.
45 Naqharray Ano qhoota dhukkeesi thorruy maallay huniye dhukkaysatte.
46 Keenni hunena kittatte qhawho yela payinana ‹Ato cʼuppolakko› iqagha?
Apayni dhuke an qalladhi payni moʼonukki huni ye dhukkaysatte?
47 Qhawho Haallikkito,
Kʼaale Haallikkitoosikki apaqhqhasi,
lammi hune olho anna maallay Kʼaale Haallikkitoosi huni apaqhaste qhoota he Haallikkito huni kodhdhonku maallay qaandhi?”
Iyyesusepa Aprihaame
48 Korossi Ayhutattekka hasi na payi:
“Olissa an hola payni Atho qhawho piyye Semmariyanna,
nasso magha hola qagha pare qaandhi?”
49 Iyyesusekka hasi payipa nu holasu:
“Nasso magha yeyela qaghima paappo hayyusikki an kaanasi,
na qharray hune ayye palamisanku.
50 Ikkodhdhitama kapay Ano kaanasteesi anu gheeqikka,
qhamo an kanasamniisi ho woʼapa isi qhaqhitte qhaqhna pilakko qagha.
51 Dhuke dhuke an hune qalli:
qhawho Kʼaale thaayyusi tiqtadha mookka payni ye farrikka.”
52 Korossi Ayhutattekka hasi na payi:
“Qhamu nasso magha hola qaghisa tannukka an arri,
Aprihaamekakki faripa hxuumampawhekka farroonkinna,
Atho mala iitina ‹Qhawho Kʼaale thayyusi tiqthadha moʼoka payni ye farri›.
53 Kati Atho paappossi haani fari Aprihaamenukka ghulti?
Hxuumampawhekka iffarrenna emma Atho yaxa ahe kotti?”
54 Iyyesusekka hasi payipa nu holasu:
“Ano hekanasa payni kaanastisay the thaythekki kodhdhinti,
hoye kanasna Paappo hayyu,
Usokka hossi hune paytenna ‹Waako haani.›
55 Ikkodhdhitama kapay hune Usoosi huni aronku,
Ano kapay an ara,
Anu arikki an payni payni qhamo haahundhi aayyampolakko an kodhdhini,
Ano kapay an Uso arapa Kʼaale thuusuusikka isan tiqtadha.
56 Paappo haahundhi Aprihaamekka kuyyaqko haayyusi qhamu hiinipa hxasodhonukki dharraʼi;
hiʼukapa hxasoodhoy.”
57 Xinkissana korossi Ayihutatte hasi na payi:
“Atho haannay perko hudhanko hxupi kakki athu hxafasunna malaala iitina Aprihaamesikka an hiʼi?”
58 Iyyesusekka inna pay:
“Dhuke dhuke an hune qalli!
Ano Aprihaame haannay ye dhaladhunna qharaʼitha an qaghi,
hantukapa karo mintaʼithakka an ghaqna.”
59 Hussa maallay korossi Ayihutatte Uso haththapenukki na awwurughghe sixadhe,
naqharray Iyyesuse ehxhxeemate inna dhapadhipa Manne kʼulkʼullawhesinna lighuppa ashshoy.