Iyyesuse Qhawho Taafakkosikki Dhinisi
9
Iyyesuse iʼonkaaʼitha lighghana qhawho ho taafakko kodhdhipa dhaladhuusikki hiʼi.
2 Kolladhampawhessi huusu hasi payeppa Usoosi kasqadhonki:
“Kollisampakko,
ata qhawhu cʼuppo yaxa kodhitaakki taafakko kodhdhipa dhaladhu?
Ata cʼuppo huusutam,
ho ahxke huusu kodhettay?”
3 Iyyesusekka hasi payipa nu holasu:
“Qhawhu hu taafakko kodhdhipa dhaladhu kodhmo Haallikkito qhamu usottay armaninu dhiishoy uso takki ahxekke huusu cʼoppo ye kodhnki.
4 Hantu tiisi xayto kuyyaqte kodhdhina hossi ye erakina kodhmo huusu kodhe ye gheeqasa,
awne he yaxakka ye nakkodhadhe alkanikki okayna.
5 An hassa piyye qhaatʼinna qaghana Ano hammakko qhaatʼnna.”
6 Ihhasa payi tupettay piyyeemi wawte tufipa piyyaththe kʼapashuppa taafakkosinna ehxhxe huusuusi cʼoqhoolottay shiinuppa
7 hasa na payu:
“Ashshapa qandhessi hxohxno Selihoomesa shoxomay.”
(Selihoome payyo ho erkami) Hussa maallay qhawhossika iʼashshipa shoxamuppa ho eemadha holu.
8 Ghormaadhe thuusupa korossi qharo ighghissadhana uso hiʼaka hasi pay:
“Qhawhu hossi onkate qaqakkadhapa isi ghighissadha qaandhi?”
9 Koro tookko ipaya:
“Ee,
Taafakkossi uso.”
Koro tookko kapay iʼiy:
“Usoosikki lighima uso qaandhi.”
Naqharray uso ippayi:
“Qhawhussa kula ano.”
10 Korossikka inna payina:
“Emma ehxhxe haahu malaali ihho qhaashame?”
11 Usokka hasi payipa nu holasu:
“Qhawho ho Iyyesuse ana payikki wawteesi piyyettay lahxipa ehxhxeettay yela shiinuppa hasa yela payu:
‹Ashshapa qandhessi hxohxno Selihoomesa shoxamay› anokka ashsho shoxomapa xayto hiʼe alkasa.”
12 Usundhdhekka inna payenna:
“Emma hantu qhawhussa ahaati qaghi?”
Usokka inna payi:
“Xaytuna qaghiisi anu ari.”
13 Xaysa tupettay korossi qhawho taafakkossisi ighghapeppa Feresaawadhdhe kula ashshonkittay.
14 Iyyesuse qhawhussana huehxhxe huusuusi cʼoqhoolottay na shiinipa dhinisuy kuyyaqko hxaysinkitona.
15 Feresaawadhdheesikka ihholleppa hasa payoonkippa uso kasqadhonki:
“Emma malaala eemadhe alkasti?”
Usokka inna payi:
“Cʼoqhqhollottakki yela ehxhxe shiinipa ashshoppa shoxama,
xaysa tupettay xayto hiʼe alkasa.”
16 Feresaawadhdheete kittatte koro tookko tookko ipayana:
“Qhawhu kuyyaqko hxaysinkitoosi qhooti ye kaanasi maallay ho Haallikkito kaanta okayi qandhikka.”
Naqharray koro tookko hasi payi:
“Emma qhawhu cʼuppolakko ikkodhdhi payni malaali dhahxhxoote kodhe alkanni?”
Hussana paayyatti iʼille qhoqhqhoote.
17 Hussa maallay iholleppa qhawho taafakkossinna hasa payoonkippa kasqadhonki:
“Emma atho qhoota qhawhussa aʼiiti ehxhxe iyye qhashi kaaʼitha moʼo appayti?”
Usokka inna payina:
“Uso hxuumampakko!”
18 Rafisampawhessi koro Ayhutattena qhawhussa qhamu taafakko kodhdhipa xaysa tupettay ehxhxe huusu mala nu qhashamonkiisi haki ahxke huusu ooqasneppa kasqadhonki saasa ye dhukkaysadhonki.
19 Hussa maallay hasi payeppa ahxke huusuusi kasqadhonki:
“Miʼayeesi haahundhi appayte taafakko ikkodhdhipa dhaladhu husi uso?
Emma hantu malaali xayto hiʼe alkasi?”
20 Ahxke huusukka hasi payeppa nu holasonki:
“Qhawhu miʼaye haani,
holuppa qhamu taafakko kodhdhipa dhaladhussa an araani,
21 naqharray qhamu yaxa nu ehxhxe qhaashipa xayto hiʼe alkasusa ini arrekka,
hussa maallay usona kasqadhama uso qhawho bhahxipa qhoota huusu kaaʼitha hela qalle iʼalkasnaye.”
22 Ahxke huusukka Olho inna maallay ghaapeppa hasa payoonki,
rafisampawhessi koro Ayhutattena,
qhawho Iyyesusena “Kristoose” payipa qallukki qagha payni manne ghissootattena alihasna qhooti payeppa ille gharonki maallay.
23 Hussa maallakki ahxke huusu hasa paye:
“Usoosi kasqadhama uso qhawho bhahxiye.”
24 Hussa maallay qhawho taafakkosisi lanki ooqeppa kasqadhonki:
“Atho qhawhu dhuke qalladhpa Haallikko kaanasay,
qhawhusa qhamu cʼuppolakko kodhdhisa ine an araaniye.”
25 Usokka hasi payipa nu holasu:
“Ano qhawhusa qhamu cʼuppolakko kodhdhisa anu arikka,
kapay olho toʼoko pattakki an ari,
hussakka qharro qhama taafakko kodhdhipa hantu kapay isa xayto hiʼa.”
26 Usundhdhekka hasi na paye:
“Mali ho paasi?
Ehxhxe haahu malaali ihho dhiniisi?”
27 Usokka inna payi:
“Saqharay an hune qalli,
naqharray apaqhe huni woote,
hantu Moʼo mallaka holte isaye kasqadhanku?
Kati hunekka kolladhampawhe huusukka kodhdhe woote?”
28 Usundhdhekka hasi payeppa uso dhaghghisoonki:
“Athokki kolladhampako Huusu dhiishoy,
ine kolladhampawhe Muuse,
29 Haallikko Muuse qale qhamu qalladhisa an araani,
naqharray qhawhu ahanu qhamu okayisa ini arrikka.”
30 Qhawhossikka hasi payipa nu holasu:
“Qhawhusa ahanu qhamu okayisa are malaale thaahundhi ikoro dhahxhxisay,
emma naqharray ho ehxhxe haayyusi ye qhaashi Uso.
31 Haallikko cʼuppolawhatte qhamu yena apaqhisa an araani,
naqharray qhawho Usoosi kaanasapa woʼoko Huususikka isi kodhdhana inna apaqha.
32 Piyye qhaatʼe haaki uumamennu paayyatti qhawho taafakko kodhdhipa dhaladhunna ho ehxhxe qhaashi apar olo apaqhukka.
33 Qhawhu kapay Haallikkito kaantaakki ye okayu payni ahxay oliisi kodhe ye alkasni.”
34 Usundhdhekka:
“Atho hossi pishko haahu kaasay cʼuppota lahxamti qhari dhaladhay atho ine kollisna?”
Kinna payeppa manne huusundhi ghissootattena kala ghinte kata lihasonki.
Koro Saqqe Nalule
35 Qhawhosiisi qhamu manne ghissootattena kaalla lihaseesi Iyyesuse iapaqhipa na kula okayuppa hasa na payu:
“Miʼaye Qhawhitosi adhukkaysadhay?”
36 Usokka hasi payipa nu holasu:
“Pogholho hayyu,
qhama dhukkaysaninu Uso yaxa?”
37 Iyyesusekka inna payina:
“Xayna qharaʼitha ahiiti,
hantukka hussa hooma qalladha Uso.”
38 Qhawhossikka:
“Pogholho hayyu,
an dhukkaysanna” kippayipa nu sakatu.
39 Iyyesusekka ippayina:
“Koro ye xayto hiʼi qhamu ihiininu ho xayto hiʼakka qhamu ye hiininukki an qhaqhittenu hassa piyye qhaatʼi kula okayi.”
40 Xinkissana Feresaawadhdheesi Iyyesusena kaanta qagha qallithisasikki apaqheppa hasa payoonki:
“Eeppa kati ine taafawhe?”
41 Iyyesusekka inna payi:
“Taafawhe akkodhdhite payni ahxay cʼuppo ye hune kodhdhu;
naqharray hune qhoota aʼiitenna xaytossi an hiʼaani maallay cʼuppo haahundhi hune qalli qaakni.”