Iyyesuse Koshshitto Xeesa
10
1 Nakaleema Iyyesuse hasi payi:
“Dhuke,
dhuke an hune qalli,
ho keero qeemmeetena mankaxxettay ye xullipa isi xayto pilettay xulla kereqkopa ho koro sara.
2 Naqharray ho mankaxxeta xulla hussa koshshito qeemmeete.
3 Hossi mankaxxe tiqadhakka usoosi innu qhashna,
qeemmekka ikkitto huusuusi inna ʼapaqhna.
Usokka qeemme huususi makaxe huusundhittakki ooqinipa nu inthawuppa liqqakko kula lighuttay.
4 Qeemme huusuusi illihasi tupettay na qharaʼitha intawnipa isi ashsha,
usundhekka qhooti ikkitto huusu na are maallay inna kala ashshina.
5 Ikkitto pileesi qhooti ye are maallay inna qhara ghoranna dhiishay yena kala ashshine.”
6 Iyyesuse lighnussaasikki nu qalli naqharray usundhe olissa innu qalliisi yehela thaayonki.
7 Hussa maallay Iyyesuse ihholipa hasa na payu:
“Dhuke dhuke an hune qalli,
Ano mankaxxe qeemmeete;
8 heyela qharaʼitha okaye kaasay kerqpa he koro sara;
hussa maallay qeemmekka ye usundhena apaqhonki.
9 Mankaxxe ana xulli Ano;
ho karo haayyutta xulla kaasay idhdhinna,
ixxullinakka illighnakka xayto ana koshnikka ittayna.
10 Kereqko olhunnu okayi kerquntepa saqhe pana patisenu patta;
naqharray Ano qhamu qagho tayyanneppa qaghussakka nuna qunnu.
11 “Koshshito xeesa Ano;
koshshitto xeesakka qagho huususi qhoota qeemme huusu maallay isarpisapa teexu.
12 Koshshitto qeemmesi hxayyettay kosha qeemmissa qhoti ye husu kodhdhonki maallay ooshe na okaayya payni ihela xurapa isi ghoradha,
oosheka qeemmisana na ghappappa isi pulliti.
13 Koshshitussa Olhu nu maallay ghoradhi qhooti koshshitto dhukatte ye kodhdhuppa qeemmenu isi yehe ghadhi maallay.
14,15 “Koshshitto xeesa Ano.
Qeemme hayyusikka an ara,
usundhekka iyye ara hussakka qhamossi Paappo hayyu yeesi aripa anokka isa Uso ara kula.
Qhoota qeemme hayyu maallakki qagho haayyusi an sarpisnapa hela teexa.
16 Qeemme pile he keerunna kittatte ye qaghekki qagha;
usundhissasikka okaase ye gheeqasa,
usundhekka ikkitto haayyusi iʼapaqhna,
qeemme irpanko to’oke kodhdhonki,
koshshittokka thoʼoko ikkodhdhini.
17 “Qagho haayyu an hela teexniisi qhoota an holli akkadha maallay Paappo haayyu iyye cʼikadha.
18 Qagho haayyusi woʼoko hayyutakka an hela teexni dhiishoy yaxakka hoyela akkina ye qaghi,
qagho haayyusi teexepa holu akkadhenukka ghulno an sheeghi,
hayyusakka Paappo hayyunaki an akkadhi.”
19 Qallithissanna paayyatti koro Ayhutattena kittatte hantukka ille qhoqhoote kodhdhamdhi.
20 Usundhisana he kisha ippayankinna:
“Usona nasso magha na qagha,
issaroodhana moʼo mallakki anna apaqhaste?”
21 Naqharray tookke ippayankinna:
“qalliithe hasa lighay the qhawho nasso magha na qaghina pakito lighay qandhikka,
nasso magha qhawho taafina ehxhxe qhaashi alkana?”
Koro Ayihutatte Qhamu Dhukkaysadhe Malaale
22 Kathama Iyyerusaalemenna Paalessi Manne kʼulkʼullawhe ana qhawthumise akaanasiki hxafi;
xinkissakka kathanko.
23 Iyyesuse Manne Kʼulkʼullawhessinna ghintatte Kaassitto Selemoonenakki lallaghami.
24 Kuyaqkusana koro Ayhutatte Uso kulakki okayeppa qhorronkippa hasa na payonki:
“Haka para saasakki aghadhkottay patta ine olthisinti?
Atho qhama Kristoose kodhdhitisa toomooma ine qalli.”
25 Iyyesusekka hasi payipa nu holasu:
“Ano an hune qalli naqharray hune huni dhukkaysatte,
kodhmo an makaxko Paappo hayyuttay kodhi uso qhoota haayyu hiʼaasa.
26 Naqharray hune qhoota qeemme hayyu huni kodhdhonku maallay huni dhukkaysatte.
27 Qeemme haayyu ikkitto haayyusi iʼapaqhna,
anokka usundheesi an ara,
usundhekka iyyekala okayna.
28 Ano qagho perre ye hume sheegheki annu teexni,
hussa maallay moʼoka payni ye pane,
yaxakka xarghgho hayyuna yeesiminippa akku.
29 Paapposi haayyu usundheesi ye teexi olho kaasanna qhooti ghuli maallay yaxakka xarghgho huusuna usundheessi akke ye alkasnikka.
30 Anopa Paappo haayyu toʼoke.”
31 Xaysa tupettay koro Ayhutatte Iyyesusesi hattapenukki iholeppa awrughghe sixadhonki
32 Iyyesusekka inna payina:
“Kodhmo Paappo hayyuna xeesa ho kishakki an hune hiʼaasina,
emma kodhmo hunka maallakki aye hattappinte?”
33 Korossi Ayhutattekka hasi payipa nu holasu:
“Kodhmo xeesanu qandhimma olho anna maallay ho hathape wooni qhoota Haallikkooma pako dhaghsathito qallatinu,
hussakka Atho qhawho akkodhdhitipa isa qaghnna Waako ahhe kotti maallay.”
34 Iyyesusekka hasi payipa nu holasu:
“Hikke thaahundhisa ‹hune waakidhdhe an payi›a ye paayyamuppa tooxamoy?
35 Lammi Matʼaafa Kʼulkʼulloosi oohe ye alkasamni,
Matʼaafa hessi Kʼaale Haallikkito nu okaytina waakidhdhe payipa ooqu payni,
36 emma hossi Paappo Kʼulkʼulleessipa piyye qhaatʼi kula eraku ‹Ano Miʼaye Haallikkito› qhooti ana payi maallaki ayyela iitenna Haallikkoomati Kʼaale dhaghsatito aqqallatti?
37 Apayni kodhmo Paappo hayyunakki anu kodhi payni olo ye dhukkaysadhe.
38 Naqharray an kodha payni yeesikakki hunidhukkaysatte payni kodhmo haayyu an kodhittay ye dhukkaysadha;
hussa maallay Paappo qhamu yettay kodhdhipa Anokka Paappo hayyuta kodhdhasa aʼarrankuye.”
39 Usundhekka iholleppa isi Uso ghape woʼa,
naqharray Uso xarghghe huusundhina ippinnipa ahshshoy.
40 Iyyesuse iholi kolle Yortanoosenna tahxhxuppa xaytossi qharro Yohannise nashoxatte shoxi kula ashshoppa haama oladhu.
41 Koro kishakka Uso kula okayuppa isi hasa paya:
“Yohannise dhahxhxoote toottekakki ye kodhu,
naqharray olhossi qhawhu kaaʼitha iqqalladhi kaasay dhuke.”
42 Xaytusanaka koro kisha Iyyesusesi dhukkaysadhi.