Farte Alazare
11
Qhawho tookko ho Alazare ana payikki ghodhdhe Mariyaameppa te qharumte tiisi Marta Pittaaniyana qaakapa isi udhama qagha.
2 Maariyaamissakka thessi Pogholho Iyyesusena lughgheesi shiththottay shiintipa kaso hiisitakka na ooshi,
Alazarissa udhamakka alawho hiisi.
3 Alawwe huusukka hasi payeppa Iyyesuse kaleema koro erakkonki:
“Pogholho,
haani kulay qhawhossi acʼcʼikatti iʼudhama.”
4 Iyyesusekka olissaasikki apaqhipa hasa payu:
“Udhankussa,
Miʼaye Haallikkito qhamu na kannasamni pana kaanaste Haallikkitonu dhiishoy ho farteema uso hxafasna qandhikka.”
5 Iyyesusekka Martapa qase thiisi Maariyaame pana alawho huusundhi Alazaresi icʼcʼikadha.
6 Ikkodhdhitama kapay udhanko Alazaresi iʼapaqhi tupettay xaytossi qaghisa kuyyaqko lakki nakayi.
7 Xaysa tupettay kolladhampawhe huusuna hasi na payi:
“Hollipa karo piyye Yihuta kula ashshini.”
8 Kolladhampawhe huusukka inna payenna:
“Kollisampako,
koro Ayhutatte,
kuyyaqqe qhacʼana qharaʼitha hatapatonukki ihhooma awrughghe sixadhenna hantuka ahollay haaha kula ashshonay?”
9 Iyyesusekka hasi payipa nu holasu:
“Xayto kuyyaqte haannay saathe 12 qaandhi?
Qhawho kuyyaqte ashsha Hammakkoosi piyye qhaatʼinna qhooti hiʼi maallay ye kuththumadhi.
10 Naqharray qhawho awne ashsha qhooti hammakko ye sheeghi maallay ikkuththumadha.”
11 Iyyesuse olissaasi innu qalli tupettay inna payi:
“Dhaliththo haani Alalazare ippiʼaadhi,
anokka an ashshinapa piʼathatte uso haqisa.”
12 Kolladhampawhe huusukka inna paye:
“Pogholho haani,
ippiʼaadhi payni idhdhinna.”
13 Iyyesuse qhoota farte Alazare kaaʼitha ihasa qalladhi,
naqharray usundheesi qhawho qhoota piʼaththessi arafi kaaʼitha qalladhakki nu lighi.
14 Hussa maallay Iyyesuse toomoomatte inna payi:
“Alazare kulay iffari,
15 hune qhama dhukkaysattennu haaha dhapadhe thaayyuttay an hxasodha.
Ikodhama hantu uso kula ashshini.”
16 Xinkissana Titimosessia anaThomaase payika kolladhampawhe tokkate inna payi:
“Ineka qhama na qale farrinaninnu okayapa Uso qale ashshini.”
Iyyesuse Qhamu Fartatte Haqepa Qagho Kodhdhi
17 Iyyesuse Alazaresi amaayipa kuyyaqko salax hxafaso tupettaakki okayi.
18 Kathama Pittaaniyakka kathama Iyyerusaalemenu kilo methire izzex kulaghaqikki sikaapi.
19 Maarthapa Mariyaamena alawho huusundhi qhooti inna fari maallay koro Ayhutatte ho kisha usundheesi dhiktisenu na kula okayi.
20 Maartha okaye Iyyesusesikki apaqhtipa Uso akkadhenu naqharray lighi,
naqharray Mariyaame manneemi haqhti.
21 Maartha Iyyesusena inna payti:
“Pogholho,
Atho hassa qagha payni ahxay alawho haayyu ye farri,
22 naqharray hantukka Haallikko olho aghghissatti kaasay qhamu ho teexniisi an ara.”
23 Iyyesusekka inna payi:
“Alawho haahi fartatte ihaqna.”
24 Maarthakka inna payti:
“Kuyyaqko dhikkattattena fartatte qhamu haqnisa an ara.”
25 Iyyesusekka inna payi:
“Fartate haqepa qagho Ano,
qhawho yeesi dhukkaysadha iffarikakki payni qaghotakki qaakni,
26 qhawho yettay qaakapa isi yeesi dhukkaysadha kaasay mooka payni ye farri,
husiisi adhdhukkaysadhay?”
27 Isekka inna payti:
“Ee Pogholho,
Atho hossi piyye qhaatʼi kula okayna,
Kristoose Miʼaye Haallikkito qhama kodhdhitisa an dhukkaysadha.”
28 Maartha ihhasa qallatti tupettay iʼashshiti qase thiisi Maariyaamesi ghinaqkooma ooqippa hasa na payi:
“Kula Kollisampakko iʼokayipa isi he gheeqa.”
29 Mariyaamekka iʼolissa apaqhtina hattakki haqtipa Iyyesuse kula ashshoy.
30 Xinkissana Iyyesuse xaytossi Martha nahxaftinakkki gheyyima ghodhdhe kula haannay ye xulu.
31 Korossi Ayhutatte iseesi dhiktisapa manneete kala isinna qale qaghakka Maariyaame haattay iʼhaqti lighinnakki hiʼeppa ippayinankinna hawlessi Alazare kulakki ashshintipa ooyo maallay ihaqeppa nakala ashshonki.
32 Maariyaame xaytossi Iyyesuse naqaghi kulakki okaytipa Uso hiʼinna lughghe kala inna rantipa hasa na payi:
“Pogholho haayyu,
Atho hassa qagha payni ahxay alawho hayyu ye farri.”
33-34 Iyyesuse Mariyaame iʼooyapa korossi Ayhutatte naqale okayikka isinna qale ooyana qhooti hiʼi maallay uumi kittekata innu dhakattipa olhu payni dhapuppa hasa paayyuppa kasqadhu:
“Xankasa ammaayte?”
Usundhekka inna payenna “Pogholho,
okayipa eemoy.”
35 Iyyesusekka ilmaami hayyisi.
36 Hussa maallay koro Ayhutatte ipaayyanna:
“Qhamu immala cʼikadhi eemindha.”
37 Usundhissana kittatte koro tookko tookko ippayana:
“Qhawhu taafakkito ehxhxe qhaashi tannu qhawhu qhamu ye farri kodhe ye alkasni?”
Iyyesuse Alazaresi Fartati Haqisi
38 Iyyesusenukka laanka issaqkito uuma nu dhakattipa hawle kula ashshoy;
hxohxnussa hawleetekka awrukkottakka kʼupi.
39 Iyyesuse inna payi:
“Awrukussa na akka!”
Qhawhossi farina alawte thuusu Maartha inna payiti:
“Pogholho haayyu,
iffari tupettay kuyyaqko salaxki hxafi maallay hantu ihxinawa.”
40 Iyyesusekka inna payi:
“Anuhela payu adhukkaysati payni kaanaste Haallikkito ahiinti?”
41-42 Korossikka awrukkossiisi inna aki tupettay Iyyesuse moontho kulakki emmadhipa hasa payu:
“Appa,
qhoota aye apaqhti maallay kalatha ihho kodhdha;
kuyyaqko kaasay qhama aye apaqhintisa an ara,
naqharray hantu olho annu hasa payi,
koru yela kaanta qagha qhamu Atho ye erakitisa qhamu dhukkaysanenu”.
43 Xaysa tupettay,
ikkitto dhammattaakki hasa payi:
“Alazare,
hassa kula ligh!”
44 Alazaressi farikka xarghghepa lughghe huusu xaytossi ana qhatʼinakki hawleete lighi;
miinte thuusuka xaytossi ana kacʼarettay mariinaki ghayyiti;
Iyyesusekka inna pay “Ishighapa hxurrankuppa iʼashshi!”
Koro Ayhutattekka Qhamu Iyyesuse Poghenu Asuladhe
45 Korossi Ayhutatte Mariyaame dhikitisenu okayina kittatte he kisha olho Iyyesuse kodhiisikki hiʼeppa Uso dhukkaysadhonki.
46 Naqharray usundhissana kittatte tookke tookke iʼashsheppa olhossi Iyyesuse kodhi kaasaasi Feresaawadhdhenu qallonki.
47 Hussa maallay rafisampawhessi kʼeesadheete pana feresaawadhdhe Korossi-qhaqhite-Qhaqhasikki illa holaseppa hasa payonki:
“Qhawhu qhooti dhahxhxootaadhe kodhi maallay mala an pasnanikki woyya?
48 Hasa hxurri payni koro kaasay Usoosikki dhukkaysanni,
koro piyye Roomennakka iʼokaynapa Manne Haallikkitopa waarsho haanisi patisu.”
49 Naqharray usundhissana kittatte qhawho tookko ho perrisana kʼeesito kʼeesadheete ghula ana payi Kʼeyyaffa hasi payi:
“Hune olho toʼokkokka huni arte;
50 hu koro kaasay pannina kaanta qhawho tookko qhoota koro kaasay maallay fari payni huneesi olho woyya qhamu kodhdhi huni hela taayte?”
51 Usokka pukkaqte thuusuna qaandhikki qalladhima perrisana uso qhooti kʼeesito kʼeesadheete ghula kodhdhi maallay Iyyesuse qhamu waarsho Ayhutatte maallay fare Uso gheeqasisa hiʼaasenukki hxuuma qalladhi.
52 Koro piyye Ayhutattenu patta qandhikki farrima miʼaadhesi Haallikkito illenakala pullamesi illa holasepa thoʼoke kodhenu.
53 Kuyaqkusanu paayyatti Iyyesusesi poghenukki suladhe.
54 Xaysannu koru Iyyesuse koro Ayhutattenu yehe hiʼaasukka,
naqharray usundhena kittatte illighipa kathamassi Efreme ana payi piyye mandhitona kaanta qagha kula ashshoppa kolladhampawhe huusu illay haama oladhu.
55 Paalessi Faasikay koro Ayhutattenakki itʼtʼuyi,
paalissay qharaʼitha koro kisha he alheesenukki karo Iyyerusaalemme kula ashshi.
56 Korossikka Manne kʼulkʼullawhessi kitteemi shikkaarepa Iyyesuse paalissa kula qhamu okayniisi isi tiqitadha maallay hasi illena papaye:
“Mali hune lighti,
Iyyesuse hassa paali kula ye okayni?”
57 Rafisampawhe kʼeesadheete pana Feresaawadhdhe qhamu Iyyesuse ghapnennukki woʼeppa xaytunna qaghiisi qhawho ara qagha payni qhamu innu hiʼasninu waarsho kaasaasi hayonki.