Xiskattossi Iyyesusesi Shittottay Shiinti
12
Paalessi Ayihutatte ana Faasika kaanasina kuyyaqko thappi gheyyana,
Iyyesuse ghodhdhe Piththaaniya kulakki ashshi.
Kathamissakka hossi Iyyesuse Alazaresi fartatte na haqisi.
2 Haamakka eesse nu gharisonki,
Marthakka haahakki kodhatti;
Alazarekka korossi Iyyesuse qale yiʼonu qakkadhi qali qaghi
3 Xinkissana Mariyaame shiththo xeesa ho kaarko nartoosenna akodhdhi xortho uuma na shoosha ho nithirto karo hxafnaasikki pilkʼathettay akkitipa Iyyesusena lughghe shiinippa kaso hiisittakka na ooshi.
Shithusana oshoqno huusukka mannessi hoqhqhu.
4 Kolladhampawhatte kittatte tookko hossi Usoosi likkasnapa teexu Yihutasi piyye Askʼorootana
5 ippayina:
“Shiththuusi tinaare dhippa izzaxsa alasnipa kodhathissasi atookollonu qhooto payni moʼo mala payna?”
6 Uso Olhunnu hasa qalladhi,
teekollosikki qhararsadhi qandhimma qhooti kerqko kodhdhipa keratʼitessi ana kkodhaththe yakiisi idhdhooqhana nakittatte kodhaththe shaghadhe kolladhu maallay.
7 Iyyesusekka hasi payi:
“Kuyyaqko maytatenu qhooti yeghgharisti maallay hxura.
8 teekollo kuyyaqqe kaasay hune qaleye;
naqharray Ano kuyyaqqe kaasay hune qale qaandhi.”
9 Xinkissana koro Ayhutattena kittatte he kisha Iyyesuse qhamu ghodhdhe Pithaaniyanna qaghiisikki areppa nakula okayonki;
olhinu okayekka Iyyesusesi hiʼenu patta qandhimma Alazaressi fartatte haqisisikka hiʼenu.
10 Naqharray Rafisampawhessi kʼeesadheete Alazare poghenuki suladhe.
11 Hussakka fartatte haqe huusuttay koro Ayhutattena kittatte he kisha qhooti Iyyesuse dhukkaysadhe maallay.
Iyyesuse Kaanaste Dammattakki Iyyerusalame Kula Xulli
12 Haqhayna korossi Paale Faasika kaanasenu okayina kittatte he kisha Iyyesuse qhamu Iyyerusaaleme kula okaayisikki apaqhe.
13 Aahxe maytʼateesika ghapadhonkippa Usoosi akkadhenu ikkitto dhammattay isi hasa payapa lighonki:
“Hosayna!
Ho makaxko Pogholhitottay okaaya!
Nukusa Israʼeelate hohe poghadhi!”
14 Iyyesuse iʼashshankito qaghanaki miʼaye harratsa hxafipa nasaappa hadhdhu,
hussakka Olhunna maallay hasa kodhdhi,
15 hxuumassi hasa paayyamipa tooxamoy qhamu dhikkanninu:
“Atho kathama Tʼiyyoone,
Iyerusalame olo ghaapi,
lammi Nukusa haahi miʼaye harratte sappeemi hadhdhinisipa okayu!”a
16 Kolladhampawhe huusunu olissa yenu xulu,
naqharray Iyyesuse kaanastettay immoontho kula hadhdhi tupettay qhamu qhoota huusu kaaʼitha tooxamipa kodhdhamadhussa ihela taayna.
17 Kuyyaqkossi Iyyesuse Alazaresi hawleete ooqipa haqisunna korossi nakanta qagha kaasay qhoota Iyyesusekki thorruyi.
18 Koro kisha Olhunnu Iyyesuse kula okayi dhahxhxootessi ikodhdhi qhooti apaqhe maallay.
19 Xinkissana Feresaawadhdhe iʼillena payenna:
“Kulay waarsho piyye qhaatʼete kaasakki nakala ashsha!
Ine olho to’okkokka kodhe qhamu ine alkasni ahiʼanku?”
Iyyesuse Qhoota Farte Thuusu Kaaʼitha Qhamu qalli
20 Korossi kuyyaqko paalatena sakatenu karo Iyyerusalame ashshina kittatte tookke tookke koro kirikate na qagha.
21 Usundhekka qhawho piyye Kalila kathama Peethesaytana qaaka ana payi Filipʼoose kulakki okayeppa hasa napayonkippa kasqadhonki:
“Qhawho haani,
Iyyesusessika hiʼe wooni!”
22 Filipooseka iʼashshi Intriyaasenu qallu;
usundhe lakkikka ashshonki Iyyesusenu qallonki.
23 Iyyesuse hasi payipa nu holasu:
“Lammi Ano Miʼaye Qhawhito saathessi anna kaanasamnikki hxafi.
24 Dhuke dhuke an hune qalli,
ibhbhithe kaspitaakkito piyyeemakki puqqitipa isi ye kʼapu payni isisakki ghayyina,
naqharray ikʼapti payni ibhbhe kishakki awshinti.
25 Qhawho qagho huusu cʼikadha ihela dhapna;
naqharray qhawho qagho huusuusi piyye qhaatʼina hela shikka kapay qagho perre ye hume sheekennakki uso tiqadha.
26 Qhawho yeesi kodhadhe woʼa qagha payni iyye kala okaya,
kodhampakko haayyukka xaytossi Ano qaghinakki ye qale kodhdhini;
ho yeesi kodhadhaasikka Paappo hayyu iʼuso kaanasna.
27 Nakalakka Iyyesuse ihholi hasa payu:
“Hantu napse thayyu iyyela cʼannakʼamtina malampayni?
Appa hayyu saatinna kala ye dhiniskka payyni?
Qhamu anu hasa payyninnu olho anna maallay okay rakko sathinna ya hxafnannuyye.
28 Appa haayyu,
makaxko haahuusi kaanas!”
Xaysa tupettay ikkitto hasa paayyakki moonthonu okayi:
“Makaxko haayyusi an kaanasi,
holuppa an kaanasna!”
29 Korossi Xaysana shikkaara ikkittussaasi iʼapaqhina iʼiyana:
“Ghawwaqko hereʼi!”
Tokkekka ippayki:
“Erkampatte nu qalladhi.”
30 Iyyesusekka hasi payipa nu holasu:
“Ikkittu qhoota haahundhinukki okayi dhiishay qhoota haayyu maalla qandhikka.
31 Lammi kuyyaqkossi qhaatʼissa ana qhaqhitte qhaqhni hantu;
Orriththossi piyye qhaatʼi kaasay rafisakka kuyyaqkossi seetto kula ana kʼuri hantu.
32 Anokka kuyyaqkossi an piyyinna saappeete qila qila payipa isa hadhdhana koro kaasaasi karo haayyu kulakki an kiikni.”
33 Iyyesuse Olhunnu hasa qalladhi qhamu farte mala lighay farri hiʼaasenu.
34 Korossikka Iyyesusenna hasi na payi:
“Ine olho tampeema tooxamipa apaqhani Kristoose perre ye hume sheeghekki qaakni,
naqharray atho malaala payti ‹Miʼaye Qhawhito piyyinna saappeete kanasame Uso gheeqasa›?
Miʼayissa Qhawhito yaxa?”
35 Iyyesusekka hasina payi:
“Hantu kuyyaqqe qhacʼana hammakko hune qale qaghi;
thukkanko qhamu ye huna hxafninnu ahammakito qaghankunna hammakussattay lalaghamindha;
qhawho thukkankito lallaghama qhamu aha kula ashshi ye ari.
36 Qhama miʼaadhe hammakkito kodhdhintennu ahhammakito qaghankunna hammakussattay dhukkaysadha.”
Iyyesuse ihusasi qalladhi tupettay iʼashshipa naqharray dhapatu.
Koro Ayihutatte Hantuka Iyyesusesi Ye Dhukkaysadhonki
37 Iyyesuse koro Ayihutatte miinteema idhdhahxhxootadhdhe kisha kodhakakki payni ye Uso dhukkaysadhonki.
38 Hussakka kʼaalessi hxuumampakko Isayaseb payi
“Pogholho,
olho an qalliniisi yaxa dhukkaysadhi?
Humna Haallikkitokka yaxanukki armadhi?”
qhamu dhikkanninu.
39 Holuppa Issayaase ye dhukkaysadhonki maallay hasi payipa nu qallu;
40 “Ehxhxe huusundhittay qhamu ye hiineppa saqqe huusundhittay hela thaayonkippa usundheesi dhinisunnu Haallikko ehxhxe huusundhi inna taafisi,
saqqe huusundhdhikka inna kʼupi.” c
41 Issayaase Olhu na maallay hasa qalladhi qooti kaanaste Kristoose hiʼinu.
42 Ikkodhdhitama kapay rafisampawhe koro Ayhutattena he kisha Iyyesusesikki dhukkaysadhe,
naqharray Feresaawadhdhe manne ghissootattena ye usundhe lihasne maallakki ighghapeppa qhamu dhukkaysadhesi ye hela qallonki.
43 Olhu na maallay hasa kodhekka kaanaste Haallikkitona kaanta kaanaste qhawhitoosi qhooti cʼikadhe maallay.
44 Iyyesusekka ikkitto dhammattaakki hasa payi:
“Qhawho ye dhukkaysadha yeesi patta qandhimma hossi yeesi erakitaka idhdhukkaysadha.
45 Qhawho yeesi hiʼa hoyeesi erakisikka ihiʼa.
46 Qhawho ye dhukkaysadha kaasay thukkankito qhamu ye qaakni maallay Ano hammakko an kodhdhipa karo piyye qhaatʼi kula okaayya.
47 “Ho kʼaale thaayyu apaqhipa isi kodhmito ye nakesussa hona qhaqhitte qhaqhna Ano qaandhi,
Ano olh anna maalla okayi piyye qhaatʼesi dhiniisisenu dhiishoy qhaqhitte na qhaqhenu qandhikka.
48 Qhawho yeesi ye akkadhipa Kʼaale thayyusikka ye akkadhi hona qhaqhitte qhaqhna qagha,
hussakka kuyyaqko dhikkattattena kʼaalessi Ano qalladhikki na qhaqhitte qhaqhna moʼo maallay payni,
49 Ano pukkaqte thaayyuna humna haayyuttay anu qalladhi,
naqharray olissa an payipa hussa an qalladhi hayossi Paappo hayyu ye eraki ye teexi.
50 Hayo huusukka qagho perre ye hume sheeghe qhamu kodhdhisa an ara;
hussa maallay olhussa an qalli ho Pappo haayyu ye qalli patta.”