Iyyesuse Qhamu Kolladhampawhe Huusuna Lughghe Shoxi
13
Iyyesusekka Paalessi Faasikanna qharaʼitha piyye qhaatʼinu karo Paappo huusu kula kuyaqkunna ashshini qhamu itʼtʼuyisa iʼaripa hessi huusu qhaatʼinna cʼikadhisi,
haka dhikkate saasa cʼikadhoy.
2 Iyyesusepa kolladhampawhe huusu iʼesse yiʼana,
miʼayeesi Simiʼoone piyye Askʼorootana Yihuta ana payi qhamu Iyyesuse likkasnipa teexunnu Orriththo saqako huususa dhihattootte magha inna xullesi.
3 Iyyesuse Paappo huusu humna kaasay qhamu nu teexipa Haallikkito kaanta lighuppa okayu,
holuppa isi karo Haallikkito hollasi iʼara.
4 Hussa maallay xaytossi iʼesse yiʼina ihhaqipa laallessi iʼurkuyiisi hela xawwadhuppa laalle takkassa akkadhuppa kuudheʼitha shappadhu.
5 Xaysa tupettay Iyyesuse maahxato ho ana shoxomiisikki akkipa na qandhe hoqquppa kolladhampawhessi huusuna lughghe shoxe paayyu,
kacʼaressi ishshapadhittakka isi na lughghe oʼoshoy.
6 Iyyesuse simiʼoonessi ana Petʼiroose payi kula iʼokayina Petʼiroose inna payi:
“Pogholho haayyu,
Atho yela lughghe shoxna?”
7 Iyyesusekka inna pay:
“Ano olho an hantu kodhiisi athu arti,
hatupettay kapay ahela thaaynay.”
8 Petʼiroosekka inna pay:
“Mookka payni Atho lughghe haayyusi athu shoxinti!”
Iyyesusekka hasi payipa nu holasu:
“Lughghe haahuusikki anu shoxu payni haayyu kodhdhe athu alkasinti.”
9 Simoʼoonessi ana Petʼiroose payi inna pay:
“Pogholho hayyu,
hasi kodhdhiti payni lughghe patta qandhimma xarghghepa pukkaqatekka yela shox.”
10 Iyyesusekka inna pay:
“Qhawho pishko huusu kaasay shoxomi ho xeesa qhooti kodhdhi maallay lughghe patta shoxame uso gheeqasa;
hantu qhawho tookko malettay hune kaasay he xeesooma.”
11 Iyyesuse hossi Usoosi likkasnapa teexu yaxa qhamu kodhdhisa qhooti ari maallaki na payina:
“Hune kaasay he xeesooma qaandhi.”
12 Iyyesuse lughghe shoxesi inna dhikkisi tupettay laalle thuusuusikki urkesadhuppa holu xayto huususa qakkadhuppa hasa na payu:
“Qhamo ammoʼo hune kodhdhisa ihune xullay?
13 Hune ‹Kollisampakkopa Pogholho› ayyela payte,
karay Ano Kollisampakkopa Pogholho;
hussa maallay pare ayyela payte.
14 Lammi Ano kollisampakkopa Pogholho haahundhi an kodhdhipa lughghe hunena shoxa payni,
hunekka lughghe illena shoxe hune gheeqasa.
15 “Ano qhama huneesi kodhi kula hunekka qhamussa kula qhama kodhdhintennu lighno an hune hiʼaasi.
16 Dhuke dhuke an hune qalli,
ayle pogholho huusunu ye ghuli,
qhawho aʼerakikka hussa erakinu ye ghuli.
17 Olissa kaasaasikka arteppa kodhmito nakesanku payni hune hehe poghate.
18 “Hune kaasaasi qandhikka an qalli,
Ano he an qholadhiisi an ara,
naqharray kʼaalessi Matʼaaffe Kʼulkʼullawhatte kittatte tookito iyyanna:
‹Hossi ye qale yiʼakki parakaruntettay ya haqi›a qhamu dhikkadhintinu.
19 Oli ye kodhamadhunna qharaʼitha an hune qalli idhdhikadhi tupettay yaxunte thaayyuttay qhama dhukkaysadhintenu.
20 Dhuke,
dhuke an hune qalli,
qhawho ho ano erakiisi akkadha yeesiki akkadhi,
ho yeesi akkadha ho yeesi erakisikki akkadhi.”
Iyyesuse Qhamu Yaxa Uso Likkasnipa Teexusikki Qharritteema qalli
21 Iyyesuse ihasa payi tupettay saqakito innu dhakaadhipa hasa payu:
“Dhuke,
an hune qalli,
hunena kittatte qhawho tookko iyye likasnapa ye teexu.”
22 Kolladhampawhe huusukka qhamu yaxa qallisa qhooti ye aronki maallay usundhe ille eʼemmi.
23 Usundhisana kittatte tokkossi Iyyesuse uuma cʼikadhi Uso nakantaakki qakkadhi.
24 Simiʼoonessi ana Petʼiroose payikka usoosikki ghudhdhipa na payu:
“Qhoota haaxa qhamu qalli into na kasqadhi.”
25 Usokka uumi Iyyesuse kula xighghipa hasa na payuppa kasqadhu:
“Ata Pogholho hayyu yaxa likkasnapa ho teexu?”
26 Iyyesusekka inna payi:
“Qhawhussa an dhilantakko ghoodhdhipa wotʼettay ooshapa qhumthasakki uso.”
Hasa na paynittay dhilantakkoosikki ghoodhdhipa watʼettay oshuppa Yihutassi piyye Askʼoronthay miʼaye Simiʼoonessi qhumthasu.
27 Yihutakka iqhummadhi tupettay Seetʼana minakale inna xulli.
Iyyesusekka inna payi:
“Olissa akkodhe wootiisi miinakale kodhi.”
28 Iyyesuse qhoota moyto qhamu qalladhi hessi naqale yiʼonu qakkadhanna kittatte yaxanukka ye xulu.
29 Yihuta qhooti ho kodhatte xawwadha kodhdhi maallay kolladhampawhessi huusuna kittatte tookke tookke olho kuyyaqko paalatenu gheeqasa qhamu xorighininu taakinti xiyyawhenu qhamu pirradhdhi qhoninuki hasa payikki nu lighti.
30 Yihutakka dhilantakkossiisi qhummadhinittay hattakki lighipa ashshoy.
Xinkissana xaytokka awne.
Hayo Qhawthito
31 Yihuta illighipa ashsho tupettay Iyyesuse hasi payi:
“Hantu Ano Miʼaye Qhawhito an kaanasami,
Haallikkokka Yettay ikanasami.
32 Haallikko yetta kaanasami payni Ano Miʼaye huususikka he qaleemi ye kaanasni,
holuppa hattakki ye kaanasni.
33 “Dhelle hayyu,
kuyyaqqe kisha an uhune qale ghayyini,
hunekka aye gheqnanku;
rafisampawhessi koro Ayhutattena qhamossi anna payi:
‹Xayto ano ashshi kula okaye hune alkasinte kula› hunenaka hasa an hunena payi.
34 “ Qhama pukaqate pukkaqatte ille cʼikatenu hayo qhawthito an hune teexni;
hussakka qhamo ano huneesi cʼikadhi kula hunekka ille cʼikadhindha.
35 Pukkaqte pukkaqteemakka aʼille cʼikatte payni hussattay kolladhampawhe haayyu qhama kodhdhitesa koro kaasay ihune arra.”
Iyyesuse Qhamu Petʼiroose Uso Marmannikki Qharriteema qalli
36 Xaysa tupettay Simiʼoonessi Petʼiroose ana payi Iyyesusena inna pay:
“Pogholho hayyu,
ahakulakka ashshinti?”
Iyyesusekka hasina payipa nu holasu:
“Ano hantu xayto anna ashshini kula ye kala okaye athu alkasinti,
naqharray hatupettay aye kala okaynay.”
37 Petʼiroosekka inna payi:
“Pogholho hayyu,
hantu moʼomallakki ho kala okaye anu alkasni?
Ano qagho hayyusi ho maallay alikkasnapa teexa.”
38 Iyyesusekka hasi payipa nu holasu:
“Atho qagho haahuusi yeemaallay alikkasnappa teexay?
Dhuke,
dhuke anho qalli lukkalakko ye quughunna qharaʼita izzaxtaakki aye marmadhinti.”