Onke Karo Haallikkito Korottay Ashshay
14
Nakaleema Iyyesuse hasi payi:
“Saqqe haahundhi irrakkadhe hxure Haallikkoosi dhukkaysadha,
yeesikka dhukkaysadha.
2 Manne Paappo hayyuna xayto anna qaakni hokisha qagha,
hasakki ye kodhdhu payni ahxay anu hune qallinikka,
kapay hantu an ashshinapa huneesi xayto gharisa.
3 An ashshipa hune xayto gharisa tupettay xaysa Ano qaghisa qhama qaakintenu an hola okaya hune akka.
4 Onke xaytussa kula ana shshinisikka aʼarranku.”
5 Thomaasekka inna pay:
“Pogholho hayyu,
xayto anna ashshinti ini arrenna,
emma onkisaasi malaala arre alkasnani?”
6 Iyyesusekka hasi payipa nu holasu:
“Ano onkepa dhuke pana qagho,
yaxakka ye taakki ye kodhdhu payni qhawho Paappo kula okayna ye qaghi.
7 Yeesikka arte payni ahxay Paappo hayyusikka aʼarranku,
naqharray hantunu paayyatti aʼarranku,
xayna qharraʼitha ahiitekka.”
8 Filipoosekka inna pay:
“Pogholho hayyu,
Paapposi ine hiʼaasma iʼine hxafnaye.”
9 Iyyesusekka hasi na payipa nu holasu:
“Atho Filipoose hasa ghqqi an hune qale qaakipa isi athu ye arti?
Qhawho yeesi hiʼi,
Paappoosikka ihiʼi,
emma atho malaala iiti ‹Paappo ine hiʼaas?›
10 Ano qhama Haallikko Paappota qaghipa Haallikko Paappokka isi yettay qaghaasi athu dhukkaysatti?
Kʼaali an hune qalli thaayyu qandhikka,
naqharray ho kodhmo kaasay kodhapa isi yettay qaaka Paappo Haallikko hayyu.
11 Ano qhama Paappottay qaghipa Paappokka isi yeettay qaghaasi dhukkaysadha,
taakki kodhmo haayyuttay dhukkaysadha.
12 Dhuke,
dhuke an hune qalli,
qhawho ye dhukkaysadha kodhmo Ano kodhiisikka konni,
laadhdhi ho husinna ghulaasikki konni,
moʼo maalla payni Ano Paappo kulakka an ashshini.
13 Paappo qhamu Miʼayettay kaanasamninu olho makaxko Hayyuttay aghissate kaasay an hune konna.
14 Olho kaasakka makaxko Hayyuttay aghissate payni an hune konna.
Kipposi Iyyesuse Qhoota Nasso Kʼulkʼullito Kaaʼita Teexi
15 “Ayye cʼikadhanku payni hayo haayyusi atiqithananku.
16 “Ano Paapposikki an ghissani,
Usokka dhiktisampakko pile ho perre ye hume sheeghe kaasay hune qale ghaakna ihhune teexni.
17 Usokka Nasso dhukatte,
koro piyye qhaatʼinna qhooti ye hiʼuppa ye ari maallay akkadhe ye alkani,
naqharray Uso qhooti hune qale qaaknipa hunena kittatte kodhadhu maallay hune aʼarranku.
18 “Miʼaadhessi yaayepa paappo ye sheeghe kula qawni anu hune hxurrima an holapa hune kula okaayya.
19 Kuyyaqqe qhacʼa tupettay koro piyye qhaatʼinna yeye hiinika,
naqharray hune aye hiinanku,
Ano qhoota ho qagho sheegha kodhdhinu hunekka qaghotaka qaakinte.
20 Ano qhamu an Paappo hayyuta qaghipa,
hunekka isa yettay qaghankuppa Anokka isa hunettay qaghasa kuyyaqkussana aʼarranku.
21 “Qhawho yeesi cʼikadha ho hayo haayyusi akkadhapa isi kodhmito nakeesa,
qhawho yeesi cʼikadhakka Paappo haayyukka iʼuso cʼikadha,
Anokka an uso cʼikadha,
annu hiʼasnakka.”
22 Yihuta pile ho piyye Askʼorontana ye kodhdhu hasi na payi:
“Pogholho haayyu,
koro piyye qhaatʼinnu athu he hiʼasunna ineesi mala he hiʼasinti?”
23 Iyyesusekka hasi payipa nu holasu:
“Qhawho yeesi cʼikadha Kʼaale thaayyusikki tiqthadhi,
Paappo haayyukka iʼuso cʼikadha;
Inekka an uso kula okaynanippa na qale qaakkoni.
24 Ho Yeesi ye cʼikadhi kʼaale thayyusikka yetiqthadhi;
kʼaalissa ahantu apaqhte the Paappossi ye erakina dhiishoy thayyu qaandhi.
25 “Hantu an hune qale qaghana oli hasa lighomaasikki an hune qalli.
26 Holuppa Paappo haayyu Dhiktisampakko Nasso Kʼulkʼullo immakaxko haayyuttay erakni kapay olho kaasasikki hune kollisni,
olho Ano hune qalli kaasaasikka ihunena thaayisna.
27 Nakayho an hune hxurri;
nakayho haayyu an hune teexni!
Nakayhussa ano hune teexni ho piyye qhaatʼi hune teexti kula qaandhi.
Saqqe haahundhi ini rakkadhonki holuppa inni ghaponki!
28 “Qhama hunena payi ‹Ano an ashshinapa hola hune kula okaayyasa› aʼapaqhte.
Ahxay ayye cʼikadhanku payni Paappo hayyu qhooti yela ghuli maallay Uso kula ashshe hayyuttay ahxasonanku.
29 Kuyyaqaku olissa kodhdhamadhina qhama dhukkaysatennu,
hantu ye kodhdhamadhunna qharaʼitha an inthoosipa hune qalla.
30 Xeere Orriththossi hassa piyye qhaatʼi rafisa na okayni qhooti itʼtʼuye maallay xaynu koru olho kisha anu hune qale qallani.
Naqharray uso yeesi rafise ye alkasni;
31 Naqharray qhama Paappo haayyu cʼikadhisa koro piyye qhaatʼinna qhamu arrinu,
Paappo haayyu olhu ye hayi kaasaasi an dhikkisna.
Haqapa xayna ashshini!