Iyyesuse Kulunko Dhukatte Dishtakko Woynattena
15
“Kulunko dhukatte dishtakko woynattena Ano;
ho dhishshikka Paappo haayyu.
2 “Saante yela saappeete qaghappa isi ye awshiti Paappo haayyu ighghoxnapa kʼuru;
naqharray saante awshaasi qhamu uuma awshintinukki gharisni.
3 Kʼaali ahune qallittay hantu hune he gharte.
4 Yettay qaakindha,
Anokka huneetakka qaakni.
Saante kulo woynattena saappeetekki ye qaghti payni qawni qhamu ye awshti kula hunekka yettaakki huni qaakte payni awshe huni alkasinte.
5 “Ano kulunko Dishtakko woynattena,
hunekka saanne hayyu,
ho awshe kisha awsha hussa hossi yetta qaakapa anokka isa usotta qaaka,
naqharray yeemalettay olho toʼokkokka kodhe hune alkasinte.
6 Ho yettay ye qaaki qhamo santate aghoxnipa akʼuruppa xaxawu,
saanne hasa lighooma aʼila holasnapa haththe kitteema aayyakkuppa sha’onki.
7 Yettakka qaakteppa kʼaale thaayyukka isi hunetta qaaka payni olho woote kaasay ghissadhama attayanankuyye.
8 Awsho kisha awshite payni hussattay Paappo hayyu ikaanasamna,
hunekka qhama kolladhampawhe haayyu kodhdhitesakka ahiʼasnanku.
9 “Paappo haayyu qhamu yeesi cʼikadhi kula anokka an hune cʼikadhi,
hussa maallay cʼikno haayyuttay qaakindha.
10 Ano qhama hayo Paappo hayyuna tiqitadhipa cʼikno Huusuttay isa qaaka kula,
hunekka hayo Hayyuusika kotte payni cʼikno Hayyutaka qaakinte.
11 “Hxasu hayyu an hune qalli qhamu ihune qale kodhdhinipa hxaso haahundhikka hoqhqho kodhdhunnu.
12 “Hayo haayyukka qhamo Ano hune cʼikadhi kula hunekka qhama ille cʼikadhintennu.
13 Qhawho qagho huususi qhoota dhaliththo huusu maallay hela sarpisapa isi teexinu cʼikno ghula ye qaghi.
14 Hunekka olho an hune hayisika kotteppa dhikkisaku payni hune dhalitto hayyu.
15 “Xaynu koru ayladhdhe anu hunena payni,
ayle olhu Pogholho huusu kodhiisi ye ari,
naqharray Ano olhossi Paappo haayyuna an apaqhi kaasay qhoota hune qalli maallay hune dhaliththo haayyu.
16 Ano hune qholadhi dhiishoy hune huniye qholladhonku,
qhama ashshinteppa awshe kisha awshankuppa awshisa haahundhika ho perre ye hume sheeghe kaasay qaaka kodhdhunnu an hune xawwadhi.
Hussanu olha makaxko hayyuttay Apaappona ghissatte kaasaasi iʼhune teexna.
17 Lammi oli an hune hayi qhama ille cʼikadhintenu.
Iyyesuse Qhoota Shikke Piyye Qhaatʼinna Kaʼiti qalli
18 “Koro piyye qhaatʼinnakki hune shikka payni hunena qharaʼitha qhamu yeesi shikkessa arindha.
19 He hassa piyye qhaatʼinnakka kodhdhite payni qhamo koro piyye qhaatʼinna icʼikadhe kulakki hune cʼikanne ahxay,
naqharray qhoota he hassa piyye qhaatʼinna huni kodhdhonkuppa Ano usundhena kittatte hune reehadhopa hune qholadha maallay koro piyye qhaatʼinna ihune shikkina.
20 Hossi an hunena payi ‹Ayle pogholho huusunu ye ghuli› hela taaayya.
Yeesiki ghoghore payni huneesika ihune ghoghora,
Kʼaale thaayyusikki ittiqithadhe payni Kʼaale thaahundhisikka ittiqithanna.
21 “Hossi ye erakiisi ye are maallay qhoota haayyunu oli kaasakki hunena konne.
22 Ahxay anokki anu okayuppa usundheesi qalla payni cʼuppo yenu kodhdhini,
naqharray hantu qhoota cʼuppo huusundhinu olhu qalline ye sheeghe.
23 Hoyeesi shikka Paappo haayyusikka ishshikka.
24 Kodhmo qhawho pile ye kodhdhukka usundhe kitteema Anu kodhdhu payni ahxay cʼuppo yenu kodhdhini,
naqharray hantu olissa kaasay ihiʼe tupettay yeesippa Paappo hayyusikka ishshikke.
25 Hussakka kʼaalessi hikke thuusundhisa payamti a‹Thayte ye shikke› pa tooxamoy qhamu dhikkadhintinu.