16
“Oli an hune qallikaasay,
dhukkaysadhe thaahundhi qhamu ye hunena lellehintinnu.
2 Manne huusundhi ghissotattena ihune lihasnapa hune ghoronki,
laadhdhi hissa hune paaxnakka xeere he Haallikkonu kodhadha innu lighintikki okayna.
3 Olhunnu hasa hune konnekka yeesippa Paappo haayyusikka qhooti ye arennu.
4 Olissa kaasay an hune qalli kuyyaqko olissa hxafina qhama ahela taaytenu,
naqharray xayna qharaʼitha qhoota an hune qale qaghi maallay oliisi Anu hune qallukka.
Kodhmo Nasso Kʼulkʼullito
5 “Hantu Ano hossi ye eraki kulakka an ashshini,
ikkodhdhitama kapay hunena kittatte qhawho yela payina ‹Aha kulakka ashshinti?›
pa isi ye kasqadha ye qaghi.
6 Ikkodhdhitama kapay qhoota hussa kaasay an hune qallinu saqqe haahundhi azanetaakki hunena hoqhqhe.
7 Naqharray Ano dhuke,
dhuke an hune qalli,
ashshankussa Ano ashshini ihune woyya,
Anokki anu ashshu payni Dhiktisampakkussa ye okayni,
naqharray Ano ashshi payni Usoosikki an hune erakni.
8 Xinki uso okayina qhoota cʼuppitopa qhoota pare qaaghetepa qhoota qhaqhittattesikki koro piyye qhaatʼinnu armathesni
9 Qhoota cʼuppito yettay qhooti ye dhukkaysadhe maallay.
10 Qhoota pare qaaghinkitokka karo Paappo haayyu kula qhoota an ashshini maallay xaynu koru huni ye hiʼinte.
11 Qhoota qhaqhitateka,
hossi piyye qhaatʼi rafisaasa qhooti innna qhaqhamtinu.
12 “Ahxay olho an hune qallini ho kisha qagha,
naqharray qhooti dhihadhe thaahundhini kutay maallay anu hune qallini,
13 Xinke Nasso Dhukatte okayina dhuke kaasa qhama artekki hune konni.
Uso hu qallanikka hossi apaqhiisi dhooshay ho pukaghatuusuna qhooti ye kodhdhu maallay Uso olho karo mintaʼitha kodhdhamanaasiki ihune qallini.
14 Uso hossi hayyu kodhdhiisikki akkinipa hune qallu maallay iyye kaanasna.
15 Olho ho Paappo haayyuna kodhdhi kaasay hayyu,
hussa maallakki an hunena payi ‹Hossi haayyu kodhdhiisikki akkinipa hune qallu.›
Azanepa Hxaso
16 “Kuyyaqqe qhacʼa tupettay huniye hiʼinte,
holuppa kuyyaqqe qhacʼa tupettay aye hinaku.”
17 Kolladhampawhessi huusuna kittatte tookke tookke iʼillenapapaya:
“Olissa ippayi ‹kuyyaqqe qhacʼa tupettay huni ye hiʼinte,
kuyyaqqe qhacʼa tupettay aye hiinanku› holuppa olissa ippayi ‹Paappo kulakkian ashshini› moʼo?
18 Lammi oli ‹kuyyaqqe qhacʼa tupettay› ippayi moʼo?”
Olissa iqalladhi ye ine xulu kippayeppa illena kakasqadhonki.
19 Iyyesusekka qhamu Uso kasqadhe woʼeesi iʼupadhipa hasa na payu:
“Olho annu ille kakasqate,
ata hossi Ano hunena payi ‹kuyyaqqe qhacʼa tupettay huneye hiinte,
holuppa kuyyaqqe qhacʼa tupettay aye hiinanku maallay?›
20 Dhuke,
dhuke an hune qalli,
hune aʼoynaku,
rirankukka,
naqharray koro piyye qhaatʼinna ihxasoonna;
hune kapay aʼazananku,
naqharray azane thaahundhi hxasoomaki hune holti.
21 Xiskatto kuyyaqko dhaleete nahxafi payni qhuqhaythettakki uuma rakkatti,
naqharray idhdhalti tupettay qhooti hassa piyye qhaatʼisha miʼaye dhaladhi maallay ihxasoodhdhappa rakko hiisisikka isi hela thaymooti.
22 Qhamussa kula hune hantu aʼazananku,
naqharray Ano qhoota holi hune hiʼa maallay saqqe haahundhi ihxasoona,
hxaso haahundhisikka hohunena akkina ye qaghi.
23 “Xinkissana olho tokkokka huni yela ghissadhinte;
dhuke dhuke an hunena payi,
olho amakaxko hayyutta Paapito ghissatte kaasaasi ihune teexna.
24 Haka hantu saasa makaxko hayyuttay olho tho’okkokka huni ghissadhonku,
ghissadhama ihune teexamnaye,
hxaso haahundhika hohoqhqhi ikodhdhini.
25 “Haaka hantu saasa lighnotakki an hune qalli,
xaynu koru kuyyaqko lighnottay anu qallanikki okayina;
naqharray qhoota Paappo hayyu kaaʼitha tomooma an hune qallini.
26 Kuyaqakusana makaxko hayyuttay aghissananku,
Anokka ‹Paapposi an hune ghissana› anu hunena paynikka.
27 Moʼo malla payni Paappo pukkaqt thuusuna qhooti hune cʼikadhi maallay,
Paappo Olhu na maallay hune cʼikadhi qhoota yeesi cʼikatepa holu qhama Haallikkito kaanta okayiisi dhukkaysadhankunu.
28 Paappo haayyuna kaantakka lighipa karo piyye qhaatʼi kula okaya;
hantu kapay piyye qhaatʼiisi an hxurrapa Paappo haayyu kula ashsho.”
29 Kolladhampawhessi huusu hasi na paye:
“Haadhi,
hantukka kulay lighnottay qandhimma tomooma qallati;
30 Atho qhama olho kaasay artipa yaxakka hoosi kasqadhe ye gheeqasisa hantu an upanni,
hussakka Haallikkito kaanta qhama lightipa okaayyassa qhama dhukkaysananikki ine kodhi.”
31 Iyyesusekka hasi payipa nu holasu:
“Hantu lammi adhukkaysatte?
32 Kuyyaqko hune kaasay xayto anna okayte kula ghoradhinteppa Yeesi patta qawni hxurankukki okaynna,
hussakka hantu;
ikkodhdhitama naqharray Paappo haayyu qhooti ye qale qaghi maallay qawni anu haqhni.
33 Olho anna maallay hussasi hune qalli,
qhama yettay kodhdhinteppa nakayho tayadhankunnu;
ahassa piyye qhaatʼinna aqaghankuna rakko huna dhaghghapna;
naqharray kookkisadha,
Ano piyye qhaatʼisi an puttiye.”