Ghissoote Iyyesuse
17
Iyyesuse olissaasi qalladhi tupettay moontho kulakki eemmadhdhipa hasa payu:
“Appa,
saathessi ihxaftiye,
Miʼaye Haahu qhamu ihho kaanasninu Miʼaye Haahuusi kaanas;
2 olho anna maallay kaanastikka hessi annu teexti kaasannu qagho perre ye hume sheeghe qhamu annu teexninu koro kaasay sappeema ghulno nu teexti.
3 Hossi Atho patta Haallikko dhukatte kodhdhitisippa Iyyesus Kristoosessi Atho eraktiisi qhamu areennu husi qaghossi perre ye hume sheeghenna.
4 Ano kodhmossi ayye textiisi an dhikkisipa hasa piyye qhatʼinna ho kaanasa.
5 Appa haayyu,
kaanastessi piyye qhaatʼi ye umamonkinna qharaʼitha anho qale sheeghittay hantukka Atho he kapeema ye kaanas.
Iyyesuse Kolladhampawhe Huusunukki Ghissadhi
6 “Koru hassa piyye qhaatʼinna aqholtipa ye teexannu makaxko haahuusi annu hiʼaasi,
usundhekka haahu,
holuppa yeesi teexay,
usundheka Kʼaale thaahuusi ittiqthadhe,
7 olho kaasaasi qhamu Atho ye teextisa hantu iʼare.
8 Kʼaalessi ayye teextisi Anokka usundheesikka teexi,
usundhekka iʼakkadhe,
qhamu an dhukeema holakanta okayisakka iʼare,
qhamu Atho ye eraktisakka dhukkaysadhonki.
9 Hessi Atho ye teexti haahu qhooti kodhdheppa yeesi teexa maallay usundheesiki an gshissadhi dhiishay piyye qhaatʼinu anu ghissadhi.
10 Ho haayyu kodhdhi kaasay Haahu,
Ho haahu kodhdhi kaasay Haayyu,
Anokka usundhetakka an kaanasami.
11 Xaynu koru Ano piyye qhaatʼinna anu qaknikka,
naqharray usundhe hassa piyye qhaatʼinna,
Ano ho kulakki an okayni,
Appa haayyu Kʼulkʼullito,
hisi ayye teextikka qhamo haani kula thoʼokke qhamu kodhdhinennu makaxkossi haahu ayye teextittay usundhe tiqadha.
12 Ano xinkessi an usundhe qale qakina makaxkossi Haahu ayye teextittakki an usundhe tiqadhi,
hussa maallay Kʼaalessi Matʼaafa Kʼulkʼullito qhamu dhikkantinu Miʼayeesi panna malettay usundhena qhawho pati ye qaghikka.
13 Hantu Ano ho kulakka okayni,
an hassa piyye qhaatʼinna qaghana olho anna maallay hasa qalladhi hxaso Haayyu usundhettay ho hoqhqhi qhamu kodhdhininu.
14 Ano Kʼaale Thaahu an usundheesi teexi,
Ano hoqhaatʼinna qhamu anu kodhdhu kula usundhekka he piyye qhaatʼinna qhooti ye kodhdhonki maallay koro piyye qhaatʼinna iʼusundhe shikka.
15 Olho maghana kalla qhama usundhe tiqadhintinu dhiishoy piyye qhaatʼinna qhama usundhe lihasintinu anu ho ghissadhi.
16 Ano ho piyye qhaatʼinna qhamu anu kodhdhu kula usundhekka he piyye qhaatʼinna qandhikka.
17 Kʼaale thaahu dhuke maallay dhuke Thaahuttay usundhe kʼulkʼullessi.
18 Atho qhama apiyye qhaatʼissa ye erakti kula Anokka piyye qhaatʼe kulakki an usundhe eraki.
19 Usundhe dhukettay he kʼulkʼullawhe qhamu kodhdhinenu Ano qhoota huusundhi maallakki anhe kʼulkʼuleesi.
Iyyesuse Koro Dhukkaysadha Kaasannukki Ghissadhi
20 “Kolladhampawhe haayyunu patta qandhimma he usundhena Kʼaale apaqheppa yeesi dhukkaysadhonki kasannu an ghissadha.
21 Ano olho anna maallay ghissadhi usundhe kaasay qhamu toʼoke kodhdhinennu,
holuppa Appa Atho qhama yettay qaktipa Anokka isan hottay qagha kula usundhekka inettay qhamu qaknenu,
qhamo aye eraktisa piyye qhaatʼekka qhamu dhukkaysanennu.
22 Ine qhama toʼoke kodhdhini kula usundheka toʼoke qhamu kodhdhinenu kaanasteesi aye teexti anokka usundheesika teexi.
23 Ano olhannu Ghissadhi,
Ano usundhettay,
Athokka Yettay qhama kodhdhiti kula usundhekka thoʼokke qhamu kodhdhinennu,
holuppa qhamo Atho ye eraktipa cʼikno ayeesi sheeghtittay usundheesikka cʼikadhossa piyye qhaatʼe qhamu arrenu.
24 “Appa,
piyye qhaatʼe ye uumamunna qhara’itha qhoota ayye cʼikatti maallay kaanaste ayye teextiisi qhamu hiinennu,
hessi Atho ye teextikka xayto Ano qaghina qhamu ye qale qaaknenukka woʼi.
25 , Ho pare qagha kodhdhiti Appa haayyu,
piyye qhaatʼe yeho are,
naqharray Ano an ho ara,
hiisikka qhamo Atho ye eraktisa iʼare.
26 Cʼiknussa Atho yettay cʼikatti qhamu usundheesikka kodhdhinipa Anokka usundhettay kodhdhanu qhamu hosi arrenukka an usundhe kodhi,
holuppa qhamu arenukka an usundhe konni.”