Qapame Iyyesuse
18
Iyyesuse ihasa payi tupettay kolladhampawhe huusu illakki karo foqholho Kʼetironena afe kula tahxhxi.
Kolladhampawhe huusu illay xayto dhishto naqaghi kitta xulloonki.
2 Iyyesusepa kolladhampawhe huusu kuyyaqqe kisha qhooti xaytusasa illa hollayye maallay Yihutassi Uso likkasnapa teexu xaytusaasi iʼara.
3 Yihutakka korossi Feresaawadhdhe erakenukki inthawipa xayto dhishto naqaghi kula okayu,
usundhisakka foolisadhdhepa koro zape tiqadha pana intawampawhe kʼeesadhdheete,
fanusadhepa hammakko pana maahxe orxankito iʼdhdhoqhadhe.
4 Iyyesusekka olho na kodhdhamana kaasaasi iʼaripa naminta lighuppa hasa na payu:
“Yaxa gheeqte?”
5 Usundhekka inna paye:
“Iyyesuse Naazrateesikki an gheqni.”
Usokka inna pay:
“Qhawhusa Ano.”
Yihutassi likkasnapa teexukka naqali shikkaari.
6 Iyyesusekka:
“Qhawhussa Ano” inna pay tupettay konankonnayye ixxigheppa piyya’itha rannonki.
7 Iyyesusekka hasi payipa lanka usundhe kasqadhu:
“Yaxa gheeqte?”
Usundhekka inna paye:
“Iyyesuse Naazrateesikki an gheqni.”
8 Iyyesusekka:
“Qhawhussa Ano an hunena payi kulay,
yeesikka gheqte payni hiisisi hxurapa iʼashshe.”
9 Hussakka Kʼaalessi iyyanna:
“Appa,
korossi aye teextina kittatte qhawho thoʼokkokka anu patisu” qhamu dhikkantinu.
10 Simïʼoon Petʼiroose qhooti pillawo dhamma sheeghi maallay iyyukadhipa kodhampakkossi rafisampakko kʼeesadheetena qhamte miskitte qhaqhu;
kodhampakkussanakka makaxko huusu Malkoose ana payi.
11 Iyyesusekka Petʼiroosena inna payi:
“Pilawwo haahuusi konkoneema qadhdhadh,
quktessi rakkito Paappo hayyu ye teexisi anu qukni?”
Iyyesusesi Qhawho Anapayi Hanna Minteemi Itʼtʼoose
12 Xaysa tupettay koro orxankito pana korossi koro orxankito haya pana kodhampawhe koro Ayhutattena zape tiqadha Iyyesusesi ighapeppa shaponki.
13 Qharriteema sooghossi Kʼeyyaffa kodhdha Haanna kulakki ashshettay,
perkusana Kʼeyyaffa kʼeesito kʼeesadhe kaasanna ghula.
14 Kʼeyyaffakka xayna qharaʼithaa hasi payipa koro Ayhutatteesi dhihamu:
“Qhawho tho’okko korito saappeete farra payni iʼwoyyay.”
Petʼiroose Qhamu Paayyootema Iyyesusesi Marmadhi
15 Simiʼonessi ana Petʼiroose payipa kolladhampako tookko Iyyesuse kaleemi ashshe.
Kolladhampakko tokkussa kʼeesittossi kʼeesadhe kaasanna ghula qhooti uso ari maallay Iyyesuse qali karo mannessi kʼeesito kʼeesadhe kaasanna ghulana ghinte kula xulli,
16 naqharray Petʼiroose ghintatte seetottay qhooti shikkaari maallay kolladhampakko tokkossi kʼeesitto kʼeesadhe kaasanna ghula uso ari sheththessi mankaxxe tiqadhanukki qallipa Petʼirooseesi xulleesu.
17 Sheththessi zape tiqadhakka Petʼiroosena inna payti:
“Kolladhampawhe Iyyesusena kittatte tookko atho qaandhi?”
Naqharray uso inna payi:
“Ano qandhikka.”
18 Xayto qhooti oshooni maallay kodhampawhepa Rafisampawhessi koro zape tiqadhana dhilxeesikki hoghadheppa nakapa shikkaaronkippa isi folsadha,
Petʼiroosekka usundhe kapeemi shikkaaripa isi folsadha.
Iyyesuse Qhamu Kʼeesitto Kʼeesadhenu Ghula Minteema itʼtʼuyi
19 Xinkisana kʼeesittossi kʼeesadhdhe kaasanna ghula Iyyesusesi qhoota kolladhampawhe Huusupa kollise Thuusu kaaʼitha iʼuso kasqadhi.
20 Iyyesusekka hasi payipa nu holasu:
“Ano piyye qhaatʼenu toomoomatte annu qalli,
koro Ayhutatte kaasannukka manne huusundhi ghisootatte inna illa holesapa Manne kʼulkʼullawhattekka kuyyaqqe kaasakki an usundhe kollisi dhishoy olho toʼokkokka ho an bhadhamtettay qalladhi ye qaghi.
21 Emma moʼo mallakka ayyeesi kasqatti?
Hissa anu qallana apaqhenna kasqadhama olho an qalliisi usundhe iʼaraye.”
22 Iyyesuse ihasa qalladhina rafisampawhessi korossi zape tiqadhana he xaysanna shikkaarana kittatte qhawho tookko hasi payipa Iyyesusessi kanaqsadhu:
“Kʼesito kʼeesadheete ghulanu hasa annu holasinti?”
23 Iyyesusekka inna payi:
“Kʼaale maghakka qalladhi payni into olissa magha an aqalladhiisi ye qalli,
naqharray pare an qalladhi payni moʼo mallakka ayye kanaqsatti?”
24 Xaysa tupettay Haanna Iyyesusessi shapanne illakki karo kʼeesittossi kʼeesadheete ghula Kʼeyyaffa kula eraki.
Marmadhe Petʼiroose The Laankappa The Isxay
25 Simiʼoonessi Petʼiroose ana payi ishikkaaripa isi folsadhana koro tookko inna iyyana:
“Athokka kolladhampawhe Iyyesusenna kittatte tookko qaandhi?”
Usokka:
“Ano qaandhi” kippayipa marmadhoy.
26 Kodhampawhessi kʼeesitto kʼeesadhdhe kaasanna ghulana kittatte qhawhossi Petʼiroose na qhamte ghoxina dhaliththo kodhdhi hasi na payi:
“Iyyesuse qale xayto dhishtitona aqaghanna anu hohiʼi?”
27 Petʼiroose iholi lanka marmadhunna lukkalakkokka hattakki quughi.
Iyyesusesi Pilatʼoose Kulaki Ashshettay
28 Xaysa tupettay Iyyesusesi qhawhossi ahxase piyye Roomenna rafisa Kʼeyyaffa kulakki lihaseppa ashshonkittay,
xinkisana xaytokka sinkanko,
koro Ayhutatte Orpossi Paale Faasikannu asaqhisi yiʼe qhooti usundhe gheeqasti maallay qhamu ye lokmannenu qhawhossi piyye Roome rafisana ghinteema ye xullonki.
29 Hussa maallay Pilatʼoose inna kala lighipa hasa paayyuppa usundhe kasqadhu:
“Qhawhuusi moʼo mallakka kasaste?”
30 Usundhdhekka inna paye:
“Qhawhu olho maghaasikki ye kodhu payni ahxay hokula ini likkasne.”
31 Pilatʼoosekka inna payi:
“Hune pukkaqte thaahundhina akkapa qhamo hikke thaahundhisa naqhaqhitte qhaqhanku.”
Korossi Ayhutattekka inna payina:
“Ine qhawho poghe ye ine payamu”
32 Olhunnu hasa kodhdhitikka Iyyesuse qhamu farte mala lighattay farri kʼaalessi qallamti qhamu dhikkadhintinu. b
33 Pilatʼoosekka Iyyesusesi iholi ghinte kula ooqasuppa hasa na payuppa kasqadhu:
“Atho nukusa Ayhutatte?”
34 Iyyesusekka inna payi:
“Ata olissaasi pukkaqte thaahunakka paytim koro qhoota hayyu hoqalli?”
35 Pilatʼoosekka ihholipa hasa na payu:
“Ano Ayhutawito inta?
He karo haayyu ho likkaseppa ho teexonki inthawampawhe kʼeesadheetepa dhaliththo haahu;
emma olissa moʼo adhdhappiti?”
36 Iyyesusekka inna payi:
“Ahxase thaayyu hassa piyye qhaatʼinna qandhikka,
ahxay hasi kodhdhiti payni rafisampawhe koro Ayhutattena qhamu yeye ghapnennu kodhampawhe haayyu iyye qhipamna,
naqharray Ahxase thaayyu hassa piyye qhaatʼinna qandhikka.”
37 Pilatʼoosekka inna payi:
“Eeppa Atho nukusa payyo?”
Iyyesusekka hasi na payi:
“Ano qhama nukusa kodhdhissa atho qalli,
Ano olho annu dhaladhipa hassa piyye qhaatʼi kula okaya qhoota dhukateesi qallenu,
qhawho dhukate kaanta okayi kaasay Kʼaale thayyusi iʼapaqha.”
38 Pilatʼoosekka hasi payipa kasqadhu:
“Dhuke payyo moʼo?”
Xaysa tupettay Pilatʼoose iholi koro Ayhutatte kula lighuppa hasa na payu:
“Ano dhappitte thoʼothekakki anu natayu,
39 naqharray qhamo kollinko haahundhi kula kuyyaqko Paale Faasikanna kuyyaqko kaasay koro shappamana kittatte qhawho tokkosi an hune ishshighaayya,
hussa maallay,
Nukusa Ayhutattesikka an hune ishighnina awwoʼanku?”
40 Usundhe ihole hasa payoonkippa riironki:
“Ye kodhdhinti Usoosi qandhimma!
Parpaneesi ine ishigh!”
Naqharray Parpaane qhawho maghakko.