Yihuta Ihhesiipisi
27
Sinkatho awnettay intawampawhe kʼeesadheetepa xaadhighghe piyyatte kaasay qhamu Iyyesuseema qhaqhitte fartatte qhaqhasnenukki suladhe.
2 Xaysa tupettay Iyyesuseesi ishshapeppa ashshonki qhawhossi piyye rafisa Pilatʼoose ana payinu likkasonkippa teexonki.
3 Yihutassi Askʼorootay qhamu iyyesuseema qhaqhitte qhaqhisa iʼhiʼina dhihattoote kitteemi xulli,
ashshoppa pirre hudhankosi izzaxisi intawampawhessi kʼesadheetepa xaadhighghesi piyyatenu holasuppa hasa na payu:
4 “Qhawho dhappitte yenaqaghtiisi qhoota fartenu likkasipa teexa maallay an dhappi.”
Naqharray usundhe hasi payeppa nu holasonki:
“Emma ineesi moʼo ine rakkisi?
Hxaso haahu!”
5 Usokka pirradhesiisi Manne Kʼulkʼullawhe kaleemi hela yakipa ashsho hesiipisuppa faru.
6 Intawampawhessi kʼesadheetekka pirre hudhanko izzaxsi iʼakkeppa hasa payonki:
“Kodhati xorto kʼeeqhtate qhooti kodhdhiti maallay kodhatte Manne Haallikkitosa lahxe yegheeqasi.”
7 Hussa maallay iʼillena laaghadheppa ashshonki xayto hawle chullatenu kodhdhinaasi qhawho sighghe dhoopana pitamoonki.
8 Hussa maallay haka kuyyu saasa xaytusana “Pasho kʼeeqhtate” anapayi.
9 Onke hasa lighattay hxuumassi Ermiyaasettay payamiki dhikkadhi:
“Xorto Usoosi kodhdhina dhelle Israeelate nu ghapadhe pirre hudhanko izzaxki akkepa
10 qhamosi Pogholho ye hayi kula pashossi qhawho sighghe dhoopana teexonki”.a
Iyyesuse Pilatʼoose Miinteemi Itʼtʼuyi
11 Xinkissana Iyyesuse qhawhossi piyye rafisa miinteemi itʼtʼuyi,
qhawhossi piyye rafisakka hasi payipa Iyyesuseesi kasqadhu:
“Ato Nukusa Ayhutatte?”
Iyyesusekka hasi payipa nuholasu:
“qhamussa atho payti kula.”
12 Naqharray intawampawhe kʼesadheetepa xaadhighghe piyyatte iʼuso kasasana olho toʼokkokka ye holasu.
13 Xinkissana Pilatʼoosekka inna payi:
“Qhamu olho meʼe maallay ho kasaseesi atu apaqhti?”
14 Uso kapay qhawhossi piyye rafisa haki dhahxhxini saasa kissesi ana itʼoosina olho tookkoka ye holasu.
Iyyesuseema Qhaqhitte Fartate Ana qhaqhi
15 Qhawhossi piyye rafisa kuyyaqako paalatena waarsho koro shappamana kittatte qhawho tooko qhamunu ishighenu nakasqadhi payni ishighe aata huusu.
16 Xinkissana qhawho maghno kodhettay aramapa isi shappama ho Parpaane anapayi qagha.
17 Hussa maallay Pilatʼoose korossi haama illaholiisi hasi payipa kasqadhu:
“Yaxaasiki an hune ishighni woote?
Parpaaneesim,
Kristoosesi Iyyesuse anapayiisi?”
18 Olhu namaallay hasa payika Iyyesuseesi yokkunte maghattay qhamu likkaseppa teexonki qhooti ari maallay.
19 Pilatʼooseka iqakkattesi qhaqhitatena qakkadhana naxaye tuusu hasi paytipa uso kula erkasami:
“Awni qhoota qhawhusa kaaiʼta ulsinke qhooti ye rakkise maallay dhappitte maley innana oloku kodhu.”
20 Naqharray intawampawhe kʼesadheetepa xaadhighghesi piyyatte waarsho qhamu Parpaaneesi aine ishgha Iyyesuseesi kapay apogha paynipa waatatamunukki gharise.
21 Pilatʼoosekka lanka iholi hasa payuppa waarshossiisi kasqadhu:
“Emma qhawhu lakkina hunkasikki an hune ishighni?”
Waarshokka:
“Parpaaneesi” :
kippayipa nuholasu.
22 Pilatʼoosekka ina payi:
“Emma Kristoosessi Iyyesuse ana paysi malaala an pasini?”
Waarsho kaasay hasi payipa nuholasu:
“Immaskʼalaama dhisama!”
23 Pilatʼoosekka hasi paypa waarshossiisi kasqadhu:
“Moʼo malla ata!?
Olissa mudhappi?”
Naqharray usundhe hasi payeppa uuma riironki:
“Maskʼalakkooma idhdhisama!”
24 Hussa maallay Pilatʼoose iʼolissaasi eemina paqhatho pattama olho gharra qhamu ye qaghisa iʼaripa qandhe yeteexa payuppa xarghghe huusu korossi miinteema hela shoxuppa hasa payu:
“Ano farte qhawhuna anuna qaghikka,
naqharray hune he iyya idhdhisa hxaso haahundhi!”
25 Waarshosi kaasay hasi payi:
“Kʼeeqhte tuusu iʼinepa miʼaadhe haanisa kodhdhita.”
26 Xinkissana Pilatʼoose Parpaanesi iʼishighipa nu hxurru,
Iyyesuseesi kapay itubhbhasi tupettay qhamu dhisamninuki likkasipa nu teexu.
Folissaadhe Qhamu Iyyesusena Xikke
27 Xinkissana qhawhosi piyye rafisana folissaadhe huusu Iyyesusessi ighapepa huusuna ghinte kula ashshonkittay,
folisadhdhe kaasaasikka uso kapa illaholasonki.
28 Laalle tuusuusi na akkonkippa laalle idhdhaasi urkeesonki.
29 Qhatʼme illamaronkippa pukkaqateema nu qadhdhonki,
hayrikoosikka qhamu miskitottay ghapaninu kodhonkippa isinna miinta kikilipapa isinna xikkapa isi hasa nakkodhdha:
“Nukusa Ayhutatte nakayho iʼho kodhdha!”
30 Waaweka isina tuffa,
hayrikosikka na akkonkippa pukkaqatettay isina tubhbha.
31 Inna xikke tupettay laallesi idhdhaasi ina yukeppa laalle tuusu urkeesonkippa maskʼalakkooma dhisenu ashshonkittay.
Maskʼalaama Dhisame Iyyesuse
32 Immanne qhawhossi piyye rafisana ghintatte lighattana qhawho piyye Kʼerenanna ho Simioone ana payiisiki tayeppa qhamu maskʼalakko Iyyesuse dhooqhninu kittesonki.
33 Xaysa tupettay xayto aishigha payni meqhte pukkaqate qhawhitona ana payi Kolkootanakki hxafe
34 Haahakka Tʼayye woynate te ana tiigho tʼiipi qhamu qukninu nu teexonki,
b naqharray Uso illokodhipa hela iishoy.
35 Immaskʼalakkooma dhise tupettay laallaadhe huusuna itʼa inna kʼuradheppa qhootadhonki.
36 Nakapeema qakkadhonkippa isi tiqadha.
37 Tooxe he olhossi akasasittay hiʼaasa he iyyana “Husi Nukusassi Ayhutatte Iyyesuse” maskʼalakito qharo sappeema shoqhonki.
38 Qhawho lakki he koro sara tookkoosi miskitto kaaqila tookkoosikka pixxatho kaaqila Iyyesuse qale dhisoonki.
39 Koro onkeʼita lighghaka isinu pukaqaane lelehisapa isi dhaghisapa isi hasana papaya:
40 “Ato hossi Manne Kʼulkʼullawhe pullapa kuyyaqako izzaxsa ghupadhay,
into dhuke ato Miʼaye Haallikkito payni he dhinis;
into maskʼalakito oodhdhi!”
41 Qhamusa kula intawampawhe kʼeesadheetepa kollisampawhe Tampattepa xaadhighghe piyyatekka illeemi holleppa isina xikkapa isi hasa nakodhdha:
42 “Koro pileesi idhdhinnisi,
naqharray pukkaqate tuusuusi dhinise ye alkasu!
Into Uso Nukusa Israeelatte payni maskʼalakito saappeete iʼoodhdhama an Uso dhukkaysannaaniye!
43 Uso Haallikkosikki peepadhipa isi iyyana ‹Ano Miʼaye Haallikkitoye› apayni Haallikko iwwoʼa payni into iʼuso dhinisa!”
44 Qhamusa kula korossi koro sarapa Uso qale dhisamuka isi dhaghghisa.
Farte Iyyesuse
45 Saate tappinu paayyatti haka saate kollan saasa piyye qhaatʼe kaasakki tukkani.
46 Saate kollan ihxhxaftina Iyyesuse ikkitto dhammatakki hasa payipa riiru:
“Eloohe,
Eloohe laama sapakʼitaanic!”
Aʼishigha payni “Haallikko Hayyu!
Haallikko Hayyu!
Moonukka ye hxurti?”
47 Korossi haaha shikkaarana kittatte koro tookko tookko iʼolissaasi apaqhina ipaayyana:
“Eliyaase ooqi kulay!”
48 Hattay korossina kittatte qhawho tookko isoripa olho saaqhe lighaasi akkupa qukte makashti kitteema qadhdhuppa hayrikito qharooma shapuppa Iyyesuse qhamu qukninu nu ittʼoosu.
49 Tookke kapay hasi paye:
“Into salapa Eliyaase iʼokayipa isi Uso dhinisana eemni!”
50 Iyyesuse ikkitto dhammattakki holi riiruppa napse tuusuusi hela teexu.
51 Xinkissana karratto Manne Kʼulkʼullawhatte kittatte qagha ghutapa kalasa iʼillakkisa illena kalla kaaqami,
piyyeka illehti,
awrughe siimminekka ighghoghodhame.
52 Hawlaadhekka iqhaqhashameppa koro farrina kittatte kʼulkʼullawhe kisha fartatte haqonki.
53 Hawlaadheetekka lighonkippa fartatte haqe Iyyesuse tupettay katamassi kʼulkʼullawwi kula ashshonkippa koro kishanu armadhonki.
54 Hossi folisaadhdhe dhippa rafisapa korossi uso qale Iyyesuseesi tiqadhakka piyyessi leehapa olhossi kodhdhamadhi kaasay ihiʼenna uumi murrukeppa hasa payonki:
“Dhukeema qhawhu Miʼaye Haallikkito!”
55 Xiske kishaki xayto sikaapasa shikkaarippa olho Usooma kodhdhamadhaasi isi eema;
usundhisakka hessi piyye Kalilannu hxafepa olho gheeqasattay isi Iyyesusenu kodhadha.
56 Usundhisana kittatte Mariyaamesi piyye Mekdhelanapa Mariyaame yaaye Yaykʼoopepa teYoosa pana yaaye dhelle Zeptiwoosenaki naqale qagha.
Maayyame Iyyesuse
57 Xayto iʼawnuyanna qhawho shorokitto ho Yooseffe ana payi ho piyye Armatiyaasenu okayi qagha,
usokka kolladhampako Iyyesuse.
58 Qhawhusakka Pilatʼoose kulaki ashshipa pukkaqo Iyyesusessi nakasqadhu,
Pilatʼoosekka qhamanu teexninu hayo teexu.
59 Hussa maallay Yooseffe pukkaqosiisi iʼodhdhasipa laalle piqattay marupa,
60 awruko hawlenu uso qhothasadhisa maayu,
xaysa tupettay awrukko dhaqamma laaghuppa hawlesittay kʼupoppa ashshoy.
61 Mariyaame piyye Mektelappa Mariyaame toottessi,
hawlisana miintatti qakkadhe.
62 Haqhayna sinkatho kʼidhamena intawampawhe kʼesadheetepa feresawadhdhe Pilatʼoose kulakki ashsheppa hasana payonki:
63 “Ho kanasamti!
kulay qhawhossi koro dhappisa haannay ye faruna qharaʼita olhossi ippayina ‹Kuyyaqako isxana fartatte an haqanasiki› an hela taayni.
64 Hussa maallay kolladhampawhe huusu qhamu ye pukkaqusa kereqneppa :
‹Haadhi Iyyesuse fartatte ihaqi› korito payoonki maallay kuyyaqakko izzax saasa qhama hawlissa kokisnipa tiqadhonu hayo tex,
apayni hasakki olokodhu payni dhappisessi qharraʼitana kaanta te xay tupettay uumi ghulinti.”
65 Pilatʼooseka inna payi:
“Haadhi folissaadhe hune tiqanna ashsheghankuye,
ashshindhapa qhamo arte kula tiqtatesonku.”
66 Hussa maallay iʼashsheppa awrukkossi hawleete saappeete qaghasa maatama shoqhonkipa hawlesiisi folisadhdhesittay tiqtatesoonki.