Fartate Haqe Iyyesuse
28
Kuyyaqako hxaysinkito illiqhqhi tupettay torppana kuyyaqako payyootatte Sanpatana sinkatho awnettay Mariyaamessi piyye Mektelappa Mariyaame tootte hawle eemenu ashshi.
2 Tutuppe piyye uuma leehi,
erkampatte Pogholhitokka montikki oodhdhippa awrukkosi hawleete saappeete qaghaasi laaghippa nasaappa qakkadhi.
3 Erkampatisana miinte tiisi ghawwaqakko kulakki na bhaqhti!
Laalle tiisikka qhamo aspitati piqti.
4 Korossi hawle tiqadhakka qhooti erkampattesi ghaape maallay ixottoladheppa koro farri kula kodhdhonki.
5 Erkampattessikka xiskesina hasina payti:
“Hune ologhaapemma Iyyesusessi adhisi qhama gheeqtesa an upadhiye.
6 Uso qhamosi qalli kula fartatte ihaqima hassa ye qaghi,
Okayapa xaytossi ana maayisi eemonku.
7 Lammi an hune qalliye hermathottay ashshindhapa kolladhampawhe huusunu hasa payankuppa qallanku:
‹Uso fartatte ihaqi,
piyye Kalila kulakki hune intawni,
haahakka Uso hiinte.›”
8 Xaysa tupettay xiskesi ghaapkopa hxaso dhammattakki hoqhqheppa kolladhampawhenu qhamu qallinenu waadhettay ashshonki.
9 Iyyesusekka hattakki onkate na lighghipa hasana payu:
“Nakayho ihune kodhdha!”
Usundhdhekka nakulakki itʼtʼyeppa luhhe naghapadhonkipa nu ssakathonki.
10 Iyyesusekka hasina payi:
“Olo ghaape!
Ashshindhapa qassawhe hayyu qhamu piyye Kalila kula ashshinenu qallankuma haahakki ye hiineye.”
11 Xiskesi ikkolladhampawhe kula ashshankina korossi hawle tiqadhana kittatte tookke tookke katama kulakki ashsheppa olho kodhdhamadhi kaasaasi intawampawhe kʼesadheetenu qallonki.
12 Rafisampawhessi kʼeesadheetepa xaadhighghesi piyyatte illay illaholeppa suladhonki tupettay folissaadhesi tiqadhenukki kodhatte dhamma teexeppa hasana payonki:
13 “Hasa payapa waarshonu qallanku:
‹Ine an piʼaaninaki kolladhampawhe huusu awne okayeppa inena kalla kereqonki›.
14 Apayni rafisampako piyyatte oliisi apaqhi payni,
qhamu ye huneema rakko okaasninu ine tomooma annu qallinaaye.”
15 Hussa maallay folissaadhesi kodhattesiisi iʼakkadheppa qhamossi anu qalli kula kodhonki,
haka kuyyu saasa olissaasi koro Ayhutattena kitteʼita athorruyi.
Iyyesuse Kolladhampawhe Huusunuki Armadhi
16 Kolladhampawhe hudhdhanpa toʼonsikka qhamo Iyyesuse nu qalli kula ghupo piyye Kalilana qagha kulakki ashshe.
17 Iʼuso hiʼenna innu sakate,
naqharray tookke tookke qhamu Uso kodhdhisa yenu aramu.
18 Iyyesusekka xayto kolladhampawhe na qaghe kulakki okayipa hasana payu:
“Moontitopa piyyate humna rafisatte Yeesiki teexami,
19 lammi waarsho piyye qhaatʼete qaaka kaasay kula ashshindhapa makaxko Paappopa ho Miʼaayyate pana ho Nasso Kʼulkʼullitottay shoxatte shoxankupa kolladhampawhe haayyu kodhanku.
20 Olissa an hune hayi kaasaasi qhamu konnenu kollisanku!
Haadhi Anokka hagha dhikkate piyye qhaatʼete saasa kuyyaqakko kaasay hune qale an kodhdhiniye.”