Kodhmo Erkampawhatte
1
1-2 Atho Towfiloose,
Iyyesusena kollise thuusupa kodhmo huusu haka kuyyaqakossi inna moontho kula akkamni saasa ikkodhipa hayossi Huusu Nasso Kʼulkʼullottay erkampawhessi qholadhinu teexiisi xayna qharraʼita matʼafassi payyottattesa an ille kala ghadheesipa ho tooxo.
3 Rakko kishaasikka akkadhuppa iffari tupettay ho qagha qhamu kodhdhisa olho ahiʼi kishattay toomoma usundheesi he hiʼaasu,
kuyyaqako 40 isi nnu aʼarmadhapa qhoota Ahxase Haallikkito usundhe kollisu.
4 Iʼusundhe qale qaghana hasi payipa nu hayu teexu:
“Kathama Iyyerusaalemenna olo lighemma kippossi Paappo hune teexi an hune qalliisi tiqithadhindha.
5 Moʼo maalla payni Yohannise shoxatte qandheetetakki koro shoxi,
naqharray hune kuyyaqqe qhacʼa tupettay Nasso Kʼulkʼullotakki ashshoxatte shoxadhinte.”
Iyyesuse Moonto Kulaki Akkami
6 Usundhekka illeemi holeppa hasa na payonkippa kasqadhonki:
“Pogholho haani,
xeeressi anna Israeelenu Ahxase holasinti hantu?”
7 Iyyesusekka hasi payipa nu holasu:
“Xeerepa perressi Paappo humna rafise thuusuttay xawwadhiisi are huni alkasinte.
8 Naqharray xinke Nasso Kʼulkʼulo hune saappeema odhdhina humuna akkadhinte.
Xinkisana kathama Iyyerusaalemeppa piyye Yihuta kaasappa piyye Semmariyappa haka piyye qhaatʼe saasa misikiraadhdhe Hayyukka kodhdhintte.”
9 Ihhasa payi tupettay usundhe inni eemanakki moontho kula akkamipa urratte na ehxhxeete bhadhi.
10 Uso iʼakkamapa usundhekka moontho qila isi eemana qhawho lakki he laallaadhe piqooma urkuyekki usundhe kapeema shikkaaripa
11 hasa na payonki:
“Hune koro piyye Kalilaana,
moonukka shikkaarteppa isa moontho qila eemadhanku?
Iyyesusissa moontho kula iʼakkamana ahiite,
qhamussa hantu ahiite kula hollippa holu.”
Matiyasessi Yihuta Kapeema Aqholli
(Kol. 109:8; Maath. 27:3-10)
12 Xaysa tupettay xaytossi Ghupo Ekerkitto ana payinu karo katama Iyyerusaaleme kula holonki,
ghupusakka kathama Iyyerusaalemenna kaalla onke kuyyaqako hxaysinkito kula ghaqikki sikaapi,
(hussa payyo kilo metire tootte kula ghaqqi).
13 Kathama Iyyerusaaleme kula holonkipa mannessi manneete saappeete qaghasa hadhdhonki,
usundhisakka:
Petʼiroosepa Yohanniseppa Yaykʼoopepa Intiriyaasepa Filpoosepa Thomaasepa Pertʼilemoosepa Maatiwoosepa miʼaye Ilfiyoose Yaykʼoopepa Simiʼoonesi piyye thuusunu yooka pana miʼaye Yaykʼoope Yihuta.
14 Usundhe kaasay saqako toʼokotakki kodhdheppa ghissotettay isi kokisadhanki,
usundhe qalekka xiske tooke tookepa yaye Iyyesuse Mariyaame pana qassawhe Iyyesuseka na qale qagha.
15 Xinkissana Petʼiroose koro dhukkaysadha qhawho 120 kula ghaqiti hxafna kitteemi shikkaaripa hasa payu:
16 “Koro haani,
qhawhussa koro Iyyesuse ghapnanu inthawi qhoota Yihutay,
Kʼaalesi Matʼaafa Nasso Kʼulkʼullo pako Taawithettay qhariteema qallamti dhikkadhe gheeqasa,
17 Yihutakka ho ine qale dhihamipa kodhmuusi kodhadhenu faroote isi sheegha ahxay.
18 Naqharray uso kodhaththessi kodhmo huusu maghana anu teexitakki xayto hawleete pithmadhipa qhumpure puqquppa illena kalla kaaqamuppa marqime na tuqhamoonki.”
19 Olissa kodhdhamadhikka koro kathama Iyyerusaalemenna qaaka kaasanukki qhaskadhi,
pashusanakka pakko huusundhittay Akeltaama payonkippa makaxonki,
hussa payyo Xayto Kʼeeqhtate.
20 “Olissakka olhu na maallay hasa kodhdhi,
Matʼaafa Kodhdhathatesa qhooti hasa payamtipa tooxamoy maallay:
‹Manne huusu iqqone;
qhawhoka innina qaaku›a holuppa
‹tanynyunte thuusikka qhawho pile inna akkadha.›b
21 “Hussa maallay hessi xinke Pogholho Iyyesuse ine qale qaaki kaasanna ine qale qaghana kittatte qhawho tookko qholle gheeqasa.
22 Hussakka haka Shoxampakko Yohannisenu paayyattipa haka kuyyaqako Pogholho Iyyesuse moontho kula hadhdhi saasa korunna kittatte qhawho tookko ho fartatte haqamakko ine qale masakara kodhdhe gheeqasa.”
23 Xaysa tupettay qhawho lakkisikki itʼtʼoose,
usundhissana tookko:
Parsapaase taakkinti Iyostʼoosesi Yooseffe ana payipa Maathiyaasesiki itʼtʼoose.
24 Hasa payoonkippa Haallikko ghissadhonki:
“Pogholhossi koro kaasanna saqqe huusundhiisi ara,
qhawhu lakkina kittatte yaxaasika qholladhiti?
25 Olho anna maallay ho ghissannikka qhawho okaynapa kodhmossi Yihuta hela hxuripa xayto huusu kula ashshoosi kodhuppa qherakko erkampankito akkadhuusi ine hiʼas.”
26 Itʼaasikka ikʼkʼurenna Maathiyaasenukki lighi,
hussa maalla Maathiyaasekka erkampawhe 11 qale dhihamo.