Nasso Kʼulkʼullo Kolladhampawhema Odhdhi
2
Xinkesi Paʼale Kuyyaqako Hudhanko Hxupin hxaftina kolladhampawhe kaasay xayto toʼokkoomi illa holnena,
2 tutuppe ikkitto pimpe dhammana kulakki moonthonu okayipa mannessi usundhe na kalla qaagheesi hoqhqhu.
3 Qarrappe he halapko hattate lighooma nu armadhonki,
illena kalla qhoqhotamonkippa usundhe kaasasa odhdhonki.
4 Usundhe kaasakka Nasso Kʼulkʼullottay hoqhonkippa qhamossi Nasso Kʼulkʼullo nu teexi kula pakke pile pilettay qalladhe payyonki.
5 Korossi Ayhutatte Hallikko ghaapa piyyadhe kaasannu okayi kathama Iyyerusaalemenakki qaaki.
6 Iʼikkitusaasi apaqhenna koro kisha illa holipa usundhekka pakke korussa qalladhittay isi qalladhana iʼapaqheppa dhahxhxonki.
7 Uumi dhahxhxeppa olhu qalline dhaponkippa isi hasa kodhdha:
“Koru hasa qalladha kaasay ho piyye Kalilanna qandhi?
8 Emma malali pakke piyyadhe haanittay qalladhe?
9 Ine koro piyye Perteppa ho piyye Metippa ho piyye Elameteppa ho piyye Mesepetʼomiyappa ho piyye Yihutappa ho piyye Kʼepedhokʼiyappa ho piyye Pantʼoseppa ho piyye Isiyappa
10 ho piyye Firkiyappa ho piyye Pinfiliyappa ho piyye Kiptʼatteppa he waradhadhessi Lipiyay piyye Kʼerenanna kaanta qaghana isan qaakaani,
ine he koro Ayhutatte kodhdhinipa kathama Roomenu okayaani pana karo dhukkaysadhe koro Ayhutatte kula okayinikka an qaghaani,
11 holuppa koro piyye Kʼertʼeseppa ho piyye Arapatenakka hassaki qaghi,
koru kodhmo Haallikkito dhamaasi ippakke piyyadhe haanittay qallanaki an apaqhaani!”
12 Hussa maallay koro kaasakki uuma dhahxhxipa olhu qallini dhapuppa isi hasa kodhdhapa isi ille kakasqadha:
“Ata oli moʼo?”
13 Koro tookko tookko kapay hasi payipa usundhe dhafoy:
“Tʼaje woynate qukepa hxhxaayyodhonki!”
Qalliithe Petʼiroose
14 Xinkissana Petʼiroose hessi hudhdhanpa toʼon qali shikkaaripa ikkitto dhammattay waarshosinna hasa payu:
“Hune koro piyye Yihutappa koro kathama Iyyerusaalemenna qaaka kaasay oli kodhdhamadhiisi qhama arintennu qallithe thayyusi yela apaqha,
15 haadhi hantu xaytho hannay sinkatho saate issex maallay qhamu hune payte kula koru ye hxhxaayyoodhu.
16 Naqharray olhu na maallay hasa kodhdhitika olhossi hxumampako Iyuʼeelea hasa payipa qalladhukki dhikkadha.
17 Haallikko hasi payi:
‹Kuyyaqako dhikkatattena hasi kodhdhinti,
Nasso Hayyuusi qhawho kaasa sappeema an elisni,
shampdhidhepa ihhaadhdhe haahundhikka hxuumi qallanne,
koro bhahxikka olho karo minttte kodhdhamanaasikki hiine,
xaadhigheka ulseenki ulseenne.
18 Kodhampawhe hayyu tʼiirepa xiske saappeema
Nasso Hayyusiki an elisni,
usundhekka hxuumi qallane.
19 Ghuta moonthitokka dhahxhxootaadhe,
kaalla piyyatekka milikitadhe an hiʼaasni,
kʼeeqhtepa hattepa qhayyanqhayho kuutate armanna.
20 Kuyyaqakosi dhammapa kaanasami koro ghaapisa Pogholhito ye okayunna qharaʼitha,
oqhqhayekka iʼimnay,
leeqokka kʼeeqhte kulakki iidhni.
21 Qhawho makaxko Pogholhito
ooqa kaasay idhdhinna.›
22 “Hune koro piyye Israʼeelattena,
into qalliiti an hune qalliisi apaqhasindha!
Hune pukkaqate thaahundhina qhama arte kula Iyyesuse Naazratena moʼunte thuususi qhama artenu Haallikko Usottay hune kitteema kodhmidhe kaanomapa dhahxhxootaadhdhe pana milikitadhdhe kodhetakki arasi.
23 Haallikko hasappo huusu kedhdha puqaspa arno huusu qharrotta qhawhuusi illikkasipa hune teexu,
hunekka xarghghe maghampawhatettay maskʼalama dhisakuppas pogganku.
24 Naqharray Haallikko fartatte humna ina patiisipa Uso haqisu,
moʼo maalla payni farte Uso ghapepa haqhase ye alkasukka.
25 “Taawithekka b qhoota Huusu hasi payi:
‹Pogholhoosi kuyyaqako kaasay miinte thayunakki an hiʼi,
Uso yela miskito kaaqila maallay anu ghaapni
26 Lammi saqakko hayyu ihxhxasoodha,
pako hayyukka hxasotaakki hoqhqhi.
Holuppa pishko tayyu farrakka kippotakki qaakni,
27 moʼo maalla payni napse thayyuusi Siʼoole kiteema athu hxurinti,
Kʼulkʼullitto Haahuusikka hawle kaleema qhamo ikʼkʼapnipa haqhunu athu kodhintikka.
28 Onke qaghitoosi ayye arasti,
ye qale qaghe haahuttay hxaso hayyu hoqhqho ikkodhini.›
29 “Koro hayyu,
qhawhossi appaadhdhe haani kedhdhana kittatte tookko kodhdhi Taawithe ana payi qhamu faripa amaayupa hawle huusukka haka kuyyu saasa isi inena kittatte qaghasa toomoma an hune qalli.
30 Naqharray Taawithe qhooti hxuumampakko kodhdhi maallay kʼaalessi kippito Haallikko na payina ‹qhawho tookkosikki an sanynye thaahuna qakkatte poghluntate saappeema qakateesni›c pa akutte nuxuluusi iʼupadhi.
31 Hussa maallay Kristoose qhamu xayto koro farrisa ye haqhnipa sakanko huusukka hawle kaleeema ye kʼapni qharriteemi hiʼipa qhoota fartatte haqe huususi thorruyu.
32 Haallikko Iyyesusisi fartati haqisi,
olisanu ine kaasay misikkiraadhe.
33 Haallikkito miskito kaaqila qakkadhuppa kaanasamu tupettay kippossi Nasso Kʼulkʼullito Paappona akkuppa oli hantu aʼhiiteppa aʼapaqhasteesi elisu.
34 Lammi Taawithe moontho kula qhamu ye hadhdhusa uso pukkaqate thuusuna hasi payipa qallu:
35 ‹Pogholho Pogholho hayyu Kristoosena inna payi,
paarakaradhe haahuusi lughghe haahu kallay haghi holasni saasa yela miskitto kaaqila qakkadh.›d
36 Lammi Iyyesusessi hune maskʼalakkooma dhisteesi Haallikko qhamu Pogholhopa Kristoose kodhisa waarsho Israʼeelatte kaasay dhukkeema iʼari!”
37 Korossika iqallithisaasi apaqhina saqqe huusundhi qhootina ghappathamme maallay Petʼiroosepa erkampawhe tookessina hasina paye:
“Koro haani lammi moʼo an konaani?”
38 Petʼiroosekka inna payina:
“Haallikko kula holapa,
cʼuppo haahundhi qhamu hune hxuramninu pukkaqate pukkaqateema makaxko Iyyesus Kristoosettay shoxatte shoxadhanku,
teexakko Nasso Kʼulkʼullitoosikka akkadhinteye.
39 Kʼaalessi kippito hunepa dhelle haahundhi pana korossi Haallikko Pogholho haani he kula ooqni xayto sakaapana qagha kaasannu.”
40 Qallithe kishaasi onke pile pilettay nu torruyuppa dhihamu:
“Miira dhalatha maghakusa okaynana kalla he pinisa!”
41 Usundhisana kittatte he Kʼaale dhukkaysadhe shoxatte shoxadhonki,
kuyyaqakusana qhawho 3000 kulaghaqiki usundheema padhaawamu.
Toʼokunko Koro Dhukkaysadhana
42 Usundhdhekka kollinkossi erkampawhatti apaqheppa toʼokunkosi isi sheeghapa yiʼoosika isi ille qale yiʼapa ghissotettay isi kokisadha.
43 Xinkissana erkampawhe dhahxhxootadhepa milikitaadhe qhooti kodhe mallay koro kaasassa ghaapkko hoqhqhi.
44 Hessi dhukkaysadha kaasay toʼokunkotakki ille qale qaake,
olhu sheeghe kaasakka ho usundhe kaasanna.
45 Pashshepa olhu sheegheesi isi lassapa kodhaththeesi qhawho kaasannu qhamu gheqastisa isi teexanki.
46 Kuyyaqako kaassy toʼokunkottay Manne K’ulk’ullawheema isi illa hollayyapa,
hxasopa saqakko xeesattay mannadhdhe huusundhinakka isi ille qale yiʼo yiʼayyanki.
47 Pogholhoosikka isi kalataysadhapa koro kaasakka isi usundhe kaanasapa Haallikkokka koro dhinaasi kuyyaqakko kuyyaqakooma isinna padhaawa.