Iyyesusena Fartate Haghe Huusu
24
Torppana kuyyaqako payyootatena sinkatho iqhaayyana xiske ihaqepa shittosi igharsadhesi dhooqhadhonkipa hawle kula ashshonki.
2 Awurukosi hohawleete saappeete laaghamisiki taye.
3 Ihawle kitteema oodhdhena pukkagho Iyyesuse hawles ina kittatte ye qaghi.
4 Ihaana dhahxete qaghana,
qhawho lakki helalladhe ehxhxeete korito bhagha urkesadheki tutuppe okayipa usundhe kapeema shikkaaronki.
5 Xiskesika ighapepa piyyekata kurruyonk ina korossi hasinna payi:
“Moo malla ki aqhawho qaghaasi koro farr ina kittatte gheeghete?
6 Uso hassa ye qaghima ihaki!
Olhossi ippiyye Kalilana qaghana ihune qallisi helataaayya,
7 ‹Ano Miʼaye Qhawhito xarghghe cʼuppolawhatesa sarpepa teexamepa dhisame pana kuyyaqako izxana fartatte haqe yegheeqasa› kihunena payi”
8 Xiskesika olhossi Iyyesuse nu qalliisi ihelataaye.
9 Xaytosi hawleetenuka holonkipa olissa kaasaasi kolladhampawhessi hudhdhanpa toʼon pana koro pilenuka torruyonki.
10 Olissaasi hoerkampawhe Iyyesusenu qallika Mariyaamesi piyye Mektela pa qhawhossi manne Herodiisena hayo haayya Kuuza ana payina naxaye tuusu Yohaana pa yaaye Yaykʼoope Mariyaame pana xiske pilawheesi naqale qagha.
11 Kapay olissa usundhe nuqalle qhootinu tantawre lighi maallay yenadhukkaysadhonki.
12 [Naqharray Petʼiroose ihaki hawule kula sorruppa ashshoy,
ixayto hawuleetena hxaf ina ikahipa hawlesiisi emmuna laalle xaffateesi apukaghota mari tegh ina qaghito qaghaasiki hiʼi,
olissa kodhdhamadhiisi innidhahxhxana manne kula holu.]
Iyyesuse Kolladhampawhesi Huusuna Kittate Qhawho Lakkinuki Armadhi
13 Kuyyaqakusana kolladhampawhessi Iyyesusena kittatte qhawho lakki haqpa ghodhdhesi Emahoose ana payi katama Iyyerusaalemenna kala kilo metire hudhdhanpa toʼon kulaqaghi sikaapa kula isiʼashsha.
14 Usundhekka olhossi kodhdhamadhi kaasaasiki hakisepa isailleqale torruyadhanki.
15 Iʼolissaasi torruyadhapa isiʼillena laaghadhana Iyyesuse usundhe kulakki iitʼuyipa usundhe qale ashshe paayyu.
16 Naqharray qhamu Uso kodhdhisa yeupadhonki.
17 Usokka hasi payipa usundhe kasqadhu:
“Keenni saqharay aʼonkate qaghankuna olissa maillaqale torruyate?”
Usundhekka iazanepa shikkaaronki.
18 Usundhisana kittatte qhawho Kʼelopʼa ana payi hasi payipa nuholasu:
“Intaa Ato hayhitopa olho katama Iyyerusaaleme kitteema kodhdhamadhiisi isiatuapaqhti?”
19 Iyyesusekka ina payina:
“Ata olissa moo kodhdhamadhi qhari?”
Usundhekka hasi payeppa nuholasonki:
“Qhoota Iyyesuse Naazrate Haallikkopa koro kaasanna miintatte kodhmo pana qalliitettay hxuumampakko haxa kodhdhi kaaʼita.
20 Rafisampawhe kʼeesadheete pa intawampawhe haani Iʼuso ghapepa qhamu anaqhaqhitte fartatte qhaqhninu likkasonkipa teexonkipa amaskʼalakkoma dhisu,
21 ahxay ine an iyaanina Uso Israʼeelesiki pehisnipa nakippo kodhaani,
ikkodhdhitama kapay olissa ikodhdhamadhi tupettay kuyyu kuyyaqako izzaxki kodhdhi.
22 Holuppa xiskesi ineqale qaghana kittatte tokkeka ineesi dhahxhxisoonki,
usundhisaka sinkanu awnetaakki haqepa hawle kula ashshonki,
23 naqharray pukkagho huusuusi idhdhape,
holonkipa iʼiyank ina erkampatadhdhe heiyana hoqagha ikodhdhisiki arayeta hiini.
24 Inena kittattekka koro tookko tookko hawlesi kulakki ashshipa qhamosi xiskesi torruye kula pukkaghosiisi dhapponki.”
25 Iyyesusekka hasinna payi:
“Hune koro yehela ollotaayte,
saqqe haahundhittay olhossi hxuumampawhe torruyeesika isihuni dhukkaysate.
26 Kristoose rakku kaasaasi akkadhepa kaanaste tuusu kula hole intaa ye Uso gheeqasti?”
27 Xaysa tupettay matʼafaadhe Muuse pa matʼaafaadhe hxuumampawhattenu paayyupa kʼaalessi Matʼaafadhdhe Kʼulkʼulawhe kitteema qhoota Huusu athooxi kaasaasi nutorruyupa nuxulisu.
28 Usundhdhekka ghodhdhessi ina kula ashshesa iʼituʼyena Iyyesusekka hoghodhisana sarp ina innulighi.
29 Naqharray usundhe hasi napayeppa uuma waatadhonki:
“Xayto iʼawnuyaye okayipa ineqale rafayi”.
Hussa maallay usundhe qale rafenu manne kula xullu.
30 Usundhe qale yiʼo kapeema qakkadhupa dhilantakko akkuppa Haallikkoosi ikalataysadhi tupettay ghoodhupa nuteexu.
31 Xinkissana ehxhxe huusundhdhikka naqhaashamonkipa Iyyesuse qhamu kodhdhisa upadhonki,
naqharray Uso ehxhxeemati nadhapadhi.
32 Usundhekka iʼillena papaayyankina:
“Keenni saqharay anonkate qaghanipa Matʼaafa Kʼulkʼulito kittatte isi Kʼaale ineqallana saqqe haani hxasoottay yeʼinena hoqhqhonki?”
33 Saatissanna usundheka hattakki holleppa katama Iyyerusaaleme kula ashshonki,
ihhaaha hxafenna kolladhampawhessi hudhdhanpa toʼon heʼillahole hiʼonki.
34 Usundhdhekka ina kula okayena hessi haaha qaghakka hasi napaye:
“Kulay Pogholho Iyyesuse dhukkeematteki iʼhaki!
Simioonenuka armadhu!”
35 Kolladhampawhe lakkisika olho onkeema kodhdhamadhi pa Pogholho Iyyesuse dhilantakko akkipa ghoodhuna malaala qhamu upadhesika nutorruyonki.
Iyyesuse Kolladhampawhe Huusunu Qhamu Armadhi
36 Usundhdhekka haannay qalliitessisi yedhikisonk ina Iyyesuse pukkaqatuusunaki okayipa usundhe kitteemate shikkaarupa hasa napayu:
“Nakayho ihune kodhdha.”
37 Naqharray usundhe koro kaaradhe hiʼi qhoota innulighi maallay immurrukepa ghaapkottay hoqhqhonki.
38 Naqharray Iyyesuse hasinna payi:
“Moo malla ka amuruktepa isaasaqakko lakkittay dhihadhanku?
39 Haadhi xarghghepa luhhe Hayyuusi eemindhapa qhamu Ano ankodhdhisa yeupadhanku,
into yeghapadhindhapa yeʼemonku,
momaalla payni qhama yehiite kula nasso sakanko pa meghqheesi yesheeghika.”
40 Hussasiki napayipa xarghghe pa luhhe Huususi nuhiʼaasu.
41 Usundhdhekka qhooti hxasopa dhahxhxootettay hoqhqhe maallay dhukkaysadhesi immalaale,
Iyyesusekka ina payina:
“Yiʼo asheeghanku?”
42 Usundhekka hxaare takkaayyayi teakayilapipa [sakmo] innuteexe.
43 Usokka ina ʼakkadhipa usundhe miinteema yioyi.
44 “Xinkesi anhune qale qaghana anhunena payi kʼaalessi aqhoota Hayyu Matʼaafadhdhe Tampe Muusepa heHxuumampawhate pana Matʼaafa Kodhatate kitteema athooxi kaasay dhikkadhe gheeqasa haadhi tiisi.”
45 Xaysa tupettay qhamu Matʼaafa Kʼulkʼuloosi ihelataaynenuki nutorruyipa nukʼalpe qhaashu.
46 Hasakka napayu:
“Kristoose qhamu iffarripa kuyyaqako izxana farrtate haqusa qharritemi tooxamti,
47 Makaxko Huusuttay cʼuppito kala holleppa hxurakko tayadhenu kathama Iyyerusaalemenu paayyatti haka waarsho piyye qhaatʼete qagha kaasannu qhamu athorruyninukki paayyamti.
48 Hunekka heolissa torruyaka akkodhdhinte.
49 Haadhi,
kippossi Paappo Hayyu huneesi teexnisi Ano anhune eraknaye;
hunekka humnasi ghuta moontito haka a’urkuyte saasa katama Iyyerusaalemesa ghayyindha.”
Moonto kula Hadhdhe Iyyesuse
50 Xaysa tupettay Iyyesuse kolladhampawhe huusuusikki ooqipa katama Iyyerusaalemenna kittatte lighutapa haka ghodhdhe Bittaaniya saasa ashshottayi,
xarghghe huususikka hakila hakisupa nusakkoy.
51 Ininusakkannaki nakanta moonto kula hadhdhu.
52 Usundhekka innusakatepa hxaso dhammattay katama Iyyerusaaleme kula holonki,
53 Haallikkoosika isikanasankipa kuyyaqako kaasay ghintate Manne kʼulkʼullawhate yedhappadhayi.