Iyyesuse Qhamu Pilatʼoose pa Herodiise Miinta itʼtʼuyi
23
Korossi xaytusana qagha kaasay ihhakipa Iyyesusessi ghapuppa Pilatʼoose kula ashshottayi,
2 hasa payoonkippa kasasonki:
“Qhawhu waarsho haanisiki dhappisipa iʼiyana Kʼesaarenu kipirro olomuri,
holuppa iʼiyana:
‹Ano hoKristoose kodhi Nukusapa› isiqalladhanaki annahxafni.”
3 Pilatʼooseka hasi payipa Iyyesusessi kasqadhu:
“Ato nukusa Ayhutatte?”
Iyyesusekka ina payina:
“Qhamusa atho payti kula.”
4 Pilatʼooseka rafisampawhesi kʼeesadheete pana waarshoss ina hasinna payi:
“Ano qhawhuna dhappitte tootteka anunatayu.”
5 Naqharray usundhe hasi payeppa qalliite haxasi nuholasonki:
“Qhawhu piyye Kalilannu ki paayipa haka hassa saasa piyye Yihuta ka ki yehagha suna xayto kaasay korossi paqhatuyi.”
6 Pilatʼooseka iʼolissaasi apaqh ina qhawhusa qhamu iqhawho piyye Kalilana kodhdhisa arenu toomoomatte ki ikasqadhi.
7 Pilatʼooseka Iyyesuse qhamu piyye Herodiise rafisinu okayisa iʼari tupettay uso kulakki eraki.
Xinkissana Herodiise katama Iyyerusaalemennaki qaghi.
8 Herodhisekka kuyaqqe kishana qhooti Iyyesusessi hiʼe woʼi maallay ihiʼ ina ihxasoodhi,
qhoota huusu kaaʼita qhooti apaqhi maallay idhdhahxhxoote kodhanaka qhamu iʼhiininuki kippadhi.
9 Olho kishasiki Usona kasqadhe,
naqharray Uso olho toʼokokaki yenuholasuka.
10 Rafisampawhe kʼeesadheete pa korossi tooxaka qhooti xaytusana qaghi maallay uumi kokisepa isi Uso kasaasa
11 Herodhisekka korossi orxankito illakki kodhdhipa Uso dhafoy,
isina xikkapa laalle kaanastateesika urkeesupa Pilatʼoose kula holasu.
12 Kuyyaqakusana Herodiise pa Pilatʼoose iʼilla ghare,
moo maallay payni qharaʼita ille shikka.
13 Pilatʼooseka rafisampawhesi kʼeesadheete pa hessi koro rafisa pana waarshossiki iʼilla holasipa hasa napayu:
14 “Aʼiyankuna:
‹Qhawhu waarshossiki dhappisi› pa yekula okaasanku,
anokka hune miinteema ankasqadh ina olhu dhappipa namaalla kasaasanku olho toʼokkokka anunatayuka.
15 Herodhisekka qhooti dhappitte tootteka yenatayu maallay ihholipa inekula holasu,
qhamo ahiite kula qhawhu olho farteema Uso hxafasnaasi ye kodhdhuka,
16 hussa maallay anuso tubhbh ina pa hxurra.”
17 [Olhu namaallay hasa payi,
Pilatʼoose perko perkooma kuyyaqako paale fasikanna koro shappamana kittatte qhawho tokkosi innuishighaayya.]
18 Waarsho kaasay hasi payipa illeqale riiru:
“Qhawhusaasi patispa Barpaanesi ine ishighay!”
19 Barpaneka qhawho katama kitteema maghno hakisipa qhawho poghupa shapamu uso.
20 Pilatʼooseka Iyyesusessi qhooti ishighe woʼi maallay ihholipa isinuqallana,
21 naqharray usundhe kaasay hasi payeppa riironki:
“Maskʼalaama dhis!
Maskʼalaama dhis!”
22 Pilatʼooseka tara izxaki holi hasa napayu:
“Moo ikodhi?
Kulay ano qhawhuna dhappitte Uso farasnay toottekaki anunatayu,
hussa maallay antubh ina pa Uso hxurra.”
23 Naqharray usundhe maskʼalakkooma qhamo adhisninu uumi riirepa waatadhonki.
24 Hussa maallay Pilatʼoose qhamosi ikasqadhe kulakki qhaqhitte naqhaqhi.
25 Qhawhossi maghno hakisipa qhawho poghupa shapamu qhamunu ishighninu isiwaatadhasika nuishighu,
naqharray Iyyesusessi qhamo woʼoko huusundhi kulakki likkasipa nuteexu.
Dhisame Iyyesuse
26 Iyyesusessi iʼakkeppa isiʼashshankitana,
qhawho piyye Kʼerenanna hoSimioone ana payi hopiyye hinaseete nu okaaayyasiki ghapepa qhamu Iyyesuse kala maskʼalakko dhooqhninu kittesonki.
27 Koro kisha Iyyesuse kaleema ashsha.
Hissana kittatte xiske ooyapa isihela eero tubhaki qagha.
28 Naqharray Iyyesuse usundhe kulakki laaghami emmadhupa hasa napayu:
“Hune xiske katama Iyyerusaalemenna,
pukkaqate taahundhi pa miʼaadhe haahundhinu ooyindha dhiishay yeemalla oloʼooye.
29 “Lammi kuyyaqako anapayn ina ‹Mahne pa porko yedhalu pa ghadhme yeshurashonki hehe poghadheki› okayina.
30 Xinkissana ippayina nk ina ‹Akko ghuppe ine sappeema dhoghindha,
ghadhdheka ine bhadha›.
31 Aapayini kaarkko kʼapasiki ihasa kodhe payni,
kaarkko haxawiisi saghghi malaali konne tannu?”
32 Qhawho lakki hedhappitte kodhesiki Uso qale paaxenu ashshettay.
33 Xayto Kʼeraniyo annapayina ihxafenna maskʼalakkoomi dhise,
korossi maghno kodhiisikka tookkoosi miskitto kaaqila,
tookkoosi ka pixatho kaaqila dhisonki.
34 Iyyesusekka ippayina:
“Appa hayyu!
Olhu kodheesi yeareye nuhxur!”
Korossi orxankitoka laalle tuusunaki itʼa kʼuradhe.
35 Waarshoka ishshikkaarippa isiʼeema,
rafisampawheka hasi payeppa is ina palashoodha:
“Koro pileesi idhdhinnisi,
apayini dhukkeema Uso Kristoosesi Haallikko Uso qholadhi payni,
into iʼhedhiniisisa.”
36 Korossi orxankitoka ina kula iitʼuyipa isina palashodhanki,
tʼayye woynatte makashasika nuteexonkipa isihasa napapaayya:
37 “Ato nukusa Ayhutatte payni into hedhiniisis.”
38 Pukaqate tuusuna sappe qharaʼita hasa payoonkippa tooxonki:
“Husi nukusa Ayhutatte.”
39 Qhawho lakkisi maghno kodhdhipa dhisamonk ina kittatte tookko hasi payipa isidhakisa:
“Ato Kristoose qaandhi?
Into hedhiniisispa ineesika dhinnisoy.”
40 Tookko kapay hasi payipa toʼokosisi dheehu:
“Qhaqhite illelighaasi akadhana Haallikkoosi atughaapti?
41 Ine dhappitte taani ankoni maallaki qhaqhitte inegheeqasasi anʼakkani,
naqharray qhawhu olho toʼokosikaki yedhappu.”
42 Holuppa Iyyesusena hasa paayyu:
“Iyyesuse,
kuyyaqako Ahxase taahu okaytina oloyetaymoodhi.”
43 Iyyesusekka hasina payi:
“Dhuke anhoqalli,
kuyyuki Ayeqale Kenneteema qaghinti.”
Farte Iyyesuse
44 Xinkissana saate tappi kula qaghitinu paayyatti haka saate kollan saasa qhaatʼe kaasakki tukkani,
45 oqhqhayeka iʼimti,
laallesi Manne Kʼulkʼullawhatte kala akaaratika ghutapa kalasasi lakkisa illena kala kaaghamti.
46 Iyyesusekka ikkitto dhammattaakki ooqamipa hasa paayyu:
“Appa hayyu,
haadhi,
napse Tayyusi xarghgho haahusa anteexi!”
Ihhasa payi tupettay napse tuusuka ina lighti.
47 Qhawhossi koro orxankito qhawho dhippa rafisa olissa kodhdhamadhisiki hiʼipa hasa paayupa Haallikkoosi kaanasu:
“Dhukeema qhawhu qhawho dhappitte yenaqaghti!”
48 Koro olissaasi eemenu xaytusaasa illeema holi kaasay olissa kodhdhamadhiisi ihiʼena eeridhe ihela tutubhepa isiooyankipa mannadhdhe huusundhi kula holonki.
49 Naqharray xiske Iyyesusessi arapa piyye Kalilannu haqonkipa isina kala ashshanki xayto sikaapasi shikkaarepa olissa kodhdhamadhaasi isieemanki.
Maayte Iyyesuse
50 Qhawho piyye Ayhutattena Koro-Qhaqhite-Qhagha na kittatte tookko kodhdhi qhawho pare qaghapa hokʼalpe xeesa sheegha Yoosefe ana payi qagha.
51 Ikkodhdhitama kapay qhawhusa sulopa kodhmossi koro qhaqhitte-qhaqha qale ye kodhdhuka.
Usokka qhawho katama piyye Ayhutattena Armatiya ana payina,
uso qhawho Ahxase Haallikkitoosi kippadha.
52 Qhawhusaka Pilatʼoose kulakki ashshipa pukkagho Iyyesuse qhamunu teexninu kasqadhu.
53 Pukkaghosiisi odhasupa latʼanakkottay marupa ashshoy awrukko ghannate ahawlenu qhotipa qhawhossi apar isiolonamayusa maayu.
54 Olissakka kuyyaqako hxaysinko koro Ayhutattenu anagharsadhi,
arpena kalapte ikodhdhi.
55 Xiskesi piyye Kalilannu haqepa Iyyesuse kaleema isiʼashshaka Yoosefe qalli ashshepa hawlesi eemonkipa pukkaghosika qhamu amalaala maayisi hiʼonki.
56 Mannadhe huusundhi kula qaghakkonkipa shitto oshooqa pa sh ina nko pukkaghonu gheeqasasi gharsadhonkipa qhamosi taanpe Ayihutatte kula kuyyaqako hxaysinkitonaka hxaysadhonki.