Iyyesusesi Pilatʼoose Kulaki Ashshonkittay
15
Sinkato awnettay intawampawhe kʼesadhdheete xaadhighepa kollisampawhe hikkatte pana Koro-Qhaqhitte-Qhagha kaasay illay issuladhe tupettay Iyyesuseesi ishshapeppa ashshonki Pilatʼoosenu likkasonkippa teexonki.
2 Pilatʼoosekka Iyyesusena hasina payipa kasqadhu:
“Atho nukusa Ayhutatte?”
Usokka inna payi:
“Qhamusa atho payti kula.”
3 Rafisampawhe kʼeesadhdheetekka olho kisha maallaki Uso kasase,
4 Pilatʼoosekka ihholi lanka hasa payuppa kasqadhu:
“Olho meʼinu qhamu ho kasasesi eema!
Ata olho toʼokkokka hela holasmu?”
5 Naqharray Iyyesuse olho toʼokoka qhooti ye holasu maallay Pilatʼoose idhdhahxhxi.
Iyyesuseema Qhaqhitte Farttatte Ana Qhaqhi
6 Kuyyaqako paʼalattena koro shapamana kittatte qhawhu waarsho kasqadhiisi ishighe tampe thuusu.
7 Xinkisana qhawho Parpaane ana payi ho paqhato haqsipa ho koro poghghe qale shapamukki qagha.
8 Waarshokka qhamosi kolladhi kula Pilatʼoose kulakki itʼtʼuyipa qhamunnu ishighninu kasqadhu,
9 Pilatʼoosekka hasi payipa nu holasu:
“Nukusa Ayhutatteesikki an ishighnipa hune hxurrana awoʼanku?”
10 Olhunna maallay hasa payi,
intawampawhe kʼesadhdheete Iyyesusessi yokkuntettay qhamu likkaseppa teexonkiisa qhooti ari maallay.
11 Naqharray intawampawhe kʼesadheete waarsho qhamu Pilatʼoose kasqannipa qhoota huusu kapa Parpaanesi aishghunukki nyarise,
12 Pilatʼoosekka ihholi lanka hasa payuppa waarshoosi kasqadhu:
“Lammi nukusa Ayhutatteesi mala hune paasinika woote?”
13 Usudhekka hasi payeppa riironki:
“Maskʼalaama dhis!”
14 Pilatʼoosekka inna payi:
“Moʼo maallay ata?
Olisa moʼo idhdhappi?”
Usundhekka:
“Dhis!”
Kinna payeppa uuma riironki.
15 Pilatʼoosekka waarsho hxaseesenukki payipa Parpaanesi ishighuppa;
naqharray Iyyesusesi thubhbhasoppa korossi dhisnanu likkasuppa teexu.
Folisaadhdhe Iyyesusena Inna Xikke
16 Korossi orxankito Iyyesusessi qhawhossi piyye rafisa Praytoriyon anapayna mannete ghinteemi xulleeseppa koro orxankito pileesikka illa holasonki.
17 Laalle idhdhaasikka urkesonki,
qhatʼmekka illamaronkippa pukkaqateema nuqadhdhonkippa
18 namiinta kahhonkippa hasa napayonki:
“Nukusa Ayhutatte,
nakayho ihho kodhdha!”
19 Pukaqateesikka thollakotta natubhbhonkippa waaweka na tuffonki,
dhafkotakka namiinteema ghughulladhonkippa nussakatonki.
20 Inna xikke tupettay laallesi idhdhaasi inna yukeppa laalle thuusu urkeesonkippa maskʼalakkooma dhisenu ashshonkittay.
Dhisame Iyyesuse
21 Paappo Aleksantroseppa ho Rufoose qhawho piyye Kʼerenanna ho Simiʼoone ana payi ho piyye hinaseetenu okaaayasiki tayeppa qhamu maskʼalakko Iyyesusessi dhooqhnenu kittesonki.
22 Haahanu Iyyesuseesi iʼakkeppa xayto Pukaqate qhawhito ana payi Kolkoota kula ashshonkittay.
23 Kaarkko raqa kerpe ana payiisia tʼayye woynattesa nu lahxeppa qhamu qukninu nu teexonki;
naqharray Uso yequku.
24 Xaysa tupettay Idhdhiseppa laallaadhe huususikka qhamu yaxa yaxa akkani arenu itʼa na kʼuradhonkipa qhootadhonkib.
25 Iyyesuseesi sinkato saate issexnaki dhise.
26 Tooxe olhosi akasasitta hiʼaasa he iyyana:
“Nukusa Ayhutatte.”
27 Uso qalekka koro maghno kodhi qhawho lakkiisi okaasonkippa tookkoosi miskitto kaaqila tookkoosikka pixato kaaqila dhisoonki.
28 [Kʼaalessic iyyana:
“Maghampawhe qali dhihamipa hxuumatta qallami Onke hasa lighattakki dhikkatti.”]
29 Koro onkeʼita lighghaka pukkaqte lelehisapa isi dhaqghisapa hasa napapayu:
“Eheehe,
Ato hossi Manne Kʼulkʼullawhe pullapa kuyyaqako issexsa ghupadhay!
30 Into maskʼalana oodhdhipa he dhinisay!”
31 Qhamussa kula intawampawhe kʼeesadheetepa kollisampawhe hikke Muusenakka inna xikkapa isi illena papaya:
“Koro pileesi idhdhinnisi;
naqharray pukkaqe thuusuusi dhinise ye alkasu!
32 Into Uso Nukusa Israʼeelatte Kristoose payni maskʼalana iʼoodhdhama an Uso dhukkaysanaaniye.”
Hessi Uso qale dhisamekka isi dhaghghisa.
Farte Iyyesuse
33 Kuyyaqate saate thappinu paayyatti haka saate kollan saasa piyye qhaatʼe kaasakki tukkani.
34 Issaate kollan hxaftina Iyyesuse ikkitto dhammattakki hasa payipa riiru:
“Eloohe,
Eloohe,
laama sapakʼtaani!”
Aʼishigha payni:
“Waako haayyu,
Waako haayyu!
Moʼo maallakka ye hxurti?”d
35 Korossi xaytusana shikkaarana kittatte koro tookko iʼolisaasi apaqhina ippayana:
“Haadhi Eliyaasi ooqi!”
36 Usundhena kittattekka qhawho tookko soripa olho saaqhe ligha akkuppa qukte makashae kitta qadhdhuppa qhamu qukninu hayrikooma ghapsisuppa Iyyesusenu teexuppa hasa payu:
“Salapa Eliyaase iʼokayi isi Uso oodhdhasana eemni!”
37 Xaysa tupettay Iyyesuse ikkitto dhammattakki riiripa napse thuusu hela teexu.
38 Laallesi Manne Kʼulkʼullawhatte kittatte akaratikka ghutapa kalasaasi lakkisa illena kalla kaaqamti.
39 Qhawhossi koro orxankito qhawho dhippa rafisa Iyyesusena miintatte shikkaara qhamu riiripa napse thuusu teexusa ihhiʼ ina hasi payi:
“Dhukeema qhawhu Miʼaye Haallikkito!”
40 Xinkisana xiske xayto sikaapasi shikkaareppa isi eemanki;
usundhisana kittatte Maryaame Katama Mektelappa yaaye Yoosappa the qaso huusu Yaykʼoope Mariyaame pana Saloome na qale qagha.
41 Usundhisa Iyyesuse ippiyye Kalilanna qaghana,
Hessi Uso kala ashshapa isnnu kodhadha.
Holuppa he Iyyesuse qale Kathama Iyyerusaaleme kula okaye xiske pilawhe he kishaki qagha.
Maayame Iyyesuse
42 Olisakka kuyyaqako hxaysinko koro Ayihutattenu ana gharsadhina kalapte kodhdhamadhi
43 Xinkisana korossi Ayihutatte qhaqhitte qhaqhana kittatte qhawho tookko ho kaanasami Ahxase Haallikkitoosi kippota tiqithadha Yooseffe ana payi piyye Armatiyannu okayi;
yeghaapuna Pilatʼoose miinteema iitʼuyipa qhamu pukkaqo Iyyesuseesi anu teexninu kasqadhu.
44 Pilatʼoosekka hasi payipa dhahxhxu:
“Ata malaali miinakalte fari!”
Qhawhossi koro orxankito qhawho 100 rafisa ooquppa hasana payu:
“Inta iffarina iʼoladhi?”
45 Qhamu farisa iwwaannithosi koro orxankito qhawho 100 rafisana apqhi tupettay Yooseffe qhamu pukkaqosiisi akkini nupayu.
46 Laalle maaytatesikka pithamuppa maskʼalakito saappeete oodhasuppa qhatʼtʼu,
laallesi maaytatettay maruppa awrukko dhaqamma ho hawlenu aqhotipa agharisusa maayu.
Awruko dhaqqammaasikka laaghuppa hawlesiisi kʼupoy.
47 Mariyaame Mektelawitepa Mariyaame yaaye Yoosa qhamu axankasa maayisiki eeme.