Korossi Shoxampakko Yohannise Iyyesuse Kula Eraki
11
Iyyesuse hayossi kolladhampawhe huusu 12 nu itteexi idhdhikkisi tupettay kollisepa thorruyenukki karo kathamaadhe xaysa kaaʼitha qagha kula ashshi.
2 Shoxampakko Yohannise ighghapamipa isi manne shappeetena qaghana kodhmo Kristoosekki apaqhipa kolladhampawhe huusu lakkiisi hasa payuppa nakula eraku:
3 “Hossi apayina iʼokayna ata Atom pilaakko antiqanaani?”
4 Iyyesusekka hasi payipa nu holasu:
“Ashshindhapa olho aʼapaqhte pa ahiiteesi nu qallanku.
5 Taafawhe xaytossi iʼemaadhe,
thonnawheka ishshikkaareppa isi ashsha,
he udhanko lamtʼatte na qaghikka iʼalheesama,
dhakkawhekka iʼapaqha,
koro farikka fartatte ihaqa,
xiyyawhenuka ote xeesasi aththorruya.
6 Qhawho Yeesi ye dhappu hohe poghadhi.”
7 Hessi erkame iʼashshe tupettay,
Iyyesuse hasi payipa qhoota Yohannise waarshossinnu qalle paayyu:
“Ata moʼo eemenuka mandho kula okaayte?
Ata shompokʼussa uruure lellehisti eemenum?
8 Moʼo eemenuka okaayte?
Ata qhawho laalle xeesa urkuyi eemenum?
Kulay koro laalladhe xeesooma urkuya mannadhdhe nukusadheetenakki qaghe.
9 Emma moʼo eemenukka okaayte?
Ata hxuumampakko eemenu?
Ee,
laadhdhi ho hxuumampakkonu ghulaasi eemenukka okaayte kan hunena payi.
10 Kulay hossi ahasa payipa qhoota huusu tooxoy usoa:
‹Haadhi erkampakko haayyu ashshinapa hoosi onke gharisusikki an hoqharaʼitha erakni.›
11 Dhuke an hune qalli:
koro xiskeete dhaladhi kaasanna kittatte qhawho Shoxampakko Yohannisenu ghula ye qaghi.
Naqharray Ahxase Moontitona qhawho koro kaasanna kala qhacʼna usonu ghulla.
12 Ahxase moonthito perre Shoxampakko Yohannisennu paayyatti haka kuyyu saasa aʼise toorab,
he kokkisadhe iʼise tayna.
13 “Moʼo malla payni kollise hxuumampawhate kaasappa Hikke Muusekka haka Shoxampakko Yohannise saasa hxuumi qalle.
14 Lammi akkadhe awwoote payni,
Eliyaasessi apayina iʼokayna Yohanisi uso.
15 Qhawho qhaame apaqha sheegha iʼapaqha!
16 “Dhalathiisi lighno moytottakki an hiʼaasni?
Dhelle mooriteema qakkadheppa peelle huusundhiisi isi ooqapa isi hasa na papayaasikki lighi:
17 ‹An hune file yoqhaaninna huni dhiiththe;
an hune kolaanina huni oyte!›
18 Moʼo malla payni yohannise iʼokayina,
qhooti ye yiʼipa tʼayye woynatteesikka isi ye quki maallay ‹Nasso magha naqagha› kinna paye.
19 Ano Miʼaye Qhawhito an okkayina qhoota yiʼo yiʼipa isa qukte quka maallay hasi yela paye:
‹Haadhi husi ho yiʼopa tʼayye woynatte cʼikadha,
dhaliththo koro kʼaratʼtʼo sooqanapa ho cʼuppolawhatte!›
Ikkodhdhama kapay arnane qhamu dhuke kodhdhesa kodhmo huusundhittakki arame.”
Kathamaadhdhe Qhoota Ye Dhukkaysadhe Maallay Ameethuyi
20 Nakala Iyyesuse kathamaadhdhe inna kitteema dhahxhxootaadhe kisha kodhdhi qhooti ye cʼuppo huusundhina Haallikko kula holonki maallay hasi payipa meethuye paayyu:
21 “Atho kathama Korraze he ooyadha!
Atho katama Peetesaytay he ooyadha!
Moʼo malla payni dhahxhxootaadhissa hune kitta kodhdhamadhekki kathama Tʼirooseppa ho Sitoonassa kodhdhamadhi payni ahxay koro piyyisana hanakki kayle lallatte haqqila laaghannipa tarqo heema sixuppa cʼuppo huusuna kaalla holuy.
22 Hussa maallay An hunena payna,
kuyyaqko qhaqhitattena hunena kaanta dhoxatte koro kathama Tʼirooseppa Setoonenna iwwoyyinay.
23 Atho kathama Kʼifrinahoome,
qila qila ahhe ghulasti?
Naqharray Siʼoolec kitteema aʼodhdhinti!
Dhahxhxootaadhissa ahe kitteema kodhiisikki akatama Setoomessa kodhi payni ahxay kathamissa haka kuyyu saasa ye patu!
24 Hussa maallay an hunena payana:
kuyyaqko qhaqhittattena dhoxatte thaahundhina kaanta the kathama Setoomena iwwoyyinay.”
Kristoosettay Hxaysinko Taayyadhe
25 Nakala hasi payi:
“Pogholho moonthitopa ho piyyatte Appa haayyu,
oli kaasaasi qhoota koro arnanepa arno sheegha qharay bhaththipa miʼaadhenu hiʼaasa maallay anho kaanasa.
26 Ee,
Appa haayyu,
moʼo maalla payni husi woʼoko haahu xeesa hasa kodhdhamadhi.
27 Olho kaasaasi Paappo haayyu ye teexi,
Paappo malettay yaxakka ho Miʼaye ara ye qaghi;
holuppa Miʼaye malettay ho Paappo ara ye qaghi;
yaxakka ho Miʼaye nu hiʼaase woʼi malettay ho Papoosi ara ye qaghi.
28 “Hune he dhooqhqho huneema naqipa tardhanku kaasay ye kula okaya,
Anokka an hune hxaysisnaye.
29 Kʼampara haayyuusi dhooqhadhindhapa yela kolladhanku,
Ano laalakkopa saqakko hayyuka toodhito maallay napse thaahundhinu hxaysinko attayadhinteye.
30 Moʼo malla payni kʼampara haayyu holunthuqha,
dhooqhqho haayyuka hosholoʼaye.”