Iyyesuse Kolladhampawhesi Hudhanko Taxanpa Lakkissi Qhamu Eraki
10
Xaysa tupettay Pogholho Iyyesuse koro pile qhawho hudhanko taxxanpa lakkisiki qholadhi,
katamaadhepa xayto Uso nakula ashshini kaasa kula qhamu ashshinenu qhawho lakki lakki kodhdhuppa he qharaʼita eraku.
2 Holuppa hasa na payu:
“Lammi ghimakko ikkisha,
naqharray kodhampawhe ghimakkusana he qhacʼa.
Hussa maallay Paappo ghimakkito kodhampawheesi qhamu ghimakko huususa padhawnipa erakunnu waatadha.
3 Qhamo qemmeete an ooshe kittaʼita hune erakniye;
lammi ashshindha.
4 Aʼonkeema haqankunna olho toʼokkokka ina sheeghadhonku,
karatʼitekka,
porsakka,
hxopekka olosheeghadhe,
onkatte qhawhooma xasenukka oloshikkaari.
5 Manne anna xullite kaasanna qhariteema ‹Nakayho manninu ikkodhdha› paya.
6 Apayni qhawho nakayho cʼikadha mannisana qagha payni nakayhussa haahundhi usoosiki kodhdhini,
naqharray hasakki ye kodhdhu payni nakayhussa hune kulaki holli.
7 Qhawho kodhadha hxayye uso gheeqasa.
Hussa maallay mannisa anna xullitenna olho ahune teexiisi yiʼindhapa quktesikka qukankupa haama ghayyonkuma manne tokkenu manne tookke kula olo aʼashshe.
8 Katamaadhdhe kaasa kula aʼashshiteppa koro isihune akkadha payni olissa ahune teexisi yiʼindha.
9 Koro katamissana udhdhamaasikka dhinnisindha,
koritokka napayana ‹Ahxase Haallikkito ihune kula itʼtʼuyti›.
10 Naqharray katamaadhdhe qagha kaasa kula aʼashshiteppa isi yehune akkadhe payni mooritte katamissana qagha kula lighapa hasana payanku:
11 ‹Haadhi lammi tullupakko katama haahundhina luhhe haanina qaghaasi an hela his-hisni,
naqharray Ahxase Haallikkito qhamu hune kula iitʼuytisa arindha!›
12 Anhunena iyyana,
kuyyakussana kataminna kaanta qhaqhitte katama Setoomena iwwoyyinay.”
Katamaadhdhe Qhooti Yeʼdhukaysadhonkinu Adheehi
(Maat. 11:20-24)
13 “He ooyadha atho katama Korraze,
he ooyadha atho katama Peetesaytay!
Moʼo malla payni dhahxhxootaadhdhissa akatamaadhdhe hahundhisa kodhdhamadhekki katama Tʼirooseppa Sitoonassa kodhdhamadhi payni ahxay koro piyyisana kedhdhaki kayle lallatte haqqila laaghadheppa tarqo sappeema qakkadhonkippa cʼuppo huusundhina kala holonki.
14 Hussa maallay kuyyaqako qhaqhitatena hunena kaanta dhoxatte koro katama Tʼirooseppa Sitoonenu iwwoyyinay.
15 Ato katama Kʼifrnahoome moonto qila ahe ghulasti?
Naqharray Sioolea kitteema aʼodhdhinti.”
16 “Qhawho hunena apaqha yelaki apaqhi,
qhawho huneesi ye akkadhi kaasay yeesiki ye akkadhi,
hoyeesi ye akkadhikka ho yeesi erakisikka ye akkadhi.”
Kolladhampawhesi Hudhanko Taxxanpa Lakki Ihxasoodheppa Holonki
17 Kolladhampawhessi hudhanko taxxanpa lakkissi inni hxasoodhanaki holleppa Iyyesusena hasa payonki:
“Pogholho haani Nassidhdhe maghoomakaki Makaxko Haahuuttay ine hayami”
18 Iyyesusekka inna payina:
“Orriththo immontikki qhamo ghawwaqikito bhaqhipa isi puqqanaki anhiʼi.
19 Lammi qhama tawwidhdhepa kayto oghadhintenu,
parakaraadhdhe haahundhi kaasa sappeemakka humna rafisatte anhune teexi.
Olho hune kottanakka ye qaghi.
20 Ikkodhdhitama kapay qhoota nassidhe maghaasi lihhaste maallay olo hxasoodhemma qhoota makaxxe haahundhisi moontooma tooxi maallay hxasoodhindha.”
Iyyesuse Hxaso Huususi Qhamu Hiʼaasi
(Maat. 11:25-27; 13:16-17)
21 Xinkissana Iyyesuse Nasso Kʼulkʼulotakki hxasoodhipa hasa payu:
“Pogholho moontitopa ho piyyatte Appa haayyu,
oli kaasaasi qhoota koro arnanepa koro arno sheegha qharay bhattipa miʼaadhenu hiʼaasa maallay anho kaanasa.
Ee,
Appa Haayyu,
momaalla payni husi woʼoko haahu xeesa hasa kodhdhamadhi.
22 Olho kaasaasi Paappo haayyu yetteexi,
Paappo malettay Miʼaye qhamu yaxa kodhdhisa yaxakka hoara ye qaghi,
Paappokka qhamu yaxa kodhdhisa Miʼaye malettay ho ara ye qaghi.
Holuppa yaxakka ho Miʼaye nuhiʼaase woʼi malettay ho Papoosi arra ye qaghi.”
23 Nakaleemakka Iyyesuse kolladhampawhe huusu usundhe patta iʼqawni qaghana nakulakki laaghammipa hasa napayu:
“Husi hune hiitesi ehxhxe hiina hehe poghadhe.
24 Anhunena payana,
hxuumampawhepa nukusaadhdhe kisha husi hune hiiteesi hiʼi woʼemma naqharray yehiʼonki,
husi hune apaqhteesikka apaqhi woʼemma naqharray ye apaqhonki.”
Qhawho Xorxittosi Piyye Semariyanna
25 Kuyyaqako tookko kollisampakko Hikkatte Iyyesuse teemmenu haqipa hasa napayuppa kasqadhu:
“Kollisampako haayyu,
qagho perre yehume sheeghena tayadhenu moʼo an konni?”
26 Iyyesusekka inna payina:
“Matʼaafa Tampattesa moʼo athooxi?
Malaala napaptipa isiho xula?”
27 Qhawhossikka ina payi:
“Tampatte,
‹Haallikko Pogholho haahuusi saqakko haahu dhukkatettay,
napse taahu dhukkatettay,
humna haahu dhukatettay,
ghadhko haahu dhukatettay cʼikadha,
holuppa Qormitto haahuusikka qhamo pukkaqate taahu kula cʼikadha› kippayti”b
28 Iyyesusekka inna payina:
“Pare aholasti,
lammi athokka ashshapa hasa kodhama qagho perre yehume sheeghenaka tayadhintiye.”
29 Naqharray kollisampakkosi hikkatte qhooti hegharise woʼi maallay hasi payipa Iyyesusessi kasqadhu:
“Emma ghormitto haayyu yaxaʼ?”
30 Iyyesusekka hasi payipa nu holasu:
“Qhawho tookko hokatama Iyyerusaalemennu karo Iyyarko ashshapa iʼonkate qaghana qalmalaadhdhe nalighghonkippa lallaadhe nashaghonkippa itubhbhayye tupettay ho dhikkadha helahxurokippa ashshonki.
31 Tutuppe kʼeesitto tookko iʼonkisana lighghana qhawhossi atubhbhipa akʼurrusikki hiʼi,
olho toʼokokka yenu kodhunna nakaaʼita lighghuppa ashshooy.
32 Qhamusa kula qhawho tookko hosanynye Lewinna kodhdhiki onkisana lighgha,
usokka qhawhossiisi ihiʼipa olho toʼokkokka yenu kodhunna nakaaʼita lighghupa ashshooy.
33 Naqharray qhawho piyye Semmariyanna iʼonkisana lighghana qhawhossisi ihiʼina iqhararsadhi.
34 Nakula iitʼuyuppa payshe huusuusi zaytepa tʼayye woynatettay nashoxuppa kacʼarettay inna shshapi tupettay harre tuususa hadhdhasuppa karo manne hayhito narafi kula ashshoy xulleesuppa olho uso gheeqasa kaasaasi nukodhu.
35 “Haqhayna sinkatho tinaare lakki yukuppa paapposi manne hayhititonu teexuppa hasa na payu:
‹Qhawhuusi ye udhansadhpa pirraadhdhe anna padhawtikaki qagha payni kuyyaqako anhollina anho murraye›.
36 Eeppa lammi qhawhusa izzaxna kittatte qhawhusa qalmalaadhdhe tubhbhepa kʼuroonkinu hunkaki ghormitto kodhdhinaki holighti?”
37 Kollisampakosi hikkatekka hasi payipa nuholasu:
“Qhawhusa qhararsadhi” Iyyesusekka inna payina:
“Atokka ashshapa qhamussa kula kodhay.”
Iyyesuse Ho Maartapa Ho Mariyaamenna Manneete
38 Iyyesuse kolladhampawhessi huusu illay iʼashshipa ghodhdhe tootate hxafoy.
Xaysana xiskatakko tootte tana Maarta payiki hiisina manneema hayhunkottay Uso akkadhi.
39 Isisaka qase tana Mariyaame payikki sheeghti,
qasisa tiisikka Iyyesusena luhhe kaleemi qakkatipa Kʼaale Uso kollisisi isi apaqhasay.
40 Naqharray Marta yiito ghaqe qali tardhiti,
hussa maallay Iyyesuse kulakki okaytipa hasa na payi:
“Pogholho haayyu qase thaayyu kodhmo kaasay yeema pattaki hxurtipa isan tardhana ayehiʼappa kʼampayay?
Maʼala qhamu yekʼarkʼaritinu nu qalli”
41 Naqharray Iyyesuse hasina payipa nuholasu:
“Maarta,
Maarta atho olho kishattakka rakkatipa isatukurkuray,
42 naqharray olho toʼoko pattakki gheeqasa,
Mariyaame olho xeesasi qhooti qholladhiti maallay olissaasi qhawho naʼakkina ye qaghikka.”