Iyyesuse Kolladhampawhe Huusu Hudhdhanpa Lakkissi Qhamu Eraki
(Maat. 10:5-15; Mar. 6:7-13)
9
Iyyesuse kolladhampawhe hudhdhanpa lakkiisikki illeema ooqipa qhamu nassidhdhe maghaasi lihasneppa udhanko kaasannakka koro dhinnisonkinukki humnapa rafise nuteexi.
2 Qhamu Ahxase Haallikkitoosi koronu torruyneppa heudhdhamaasikka dhinnisonkinu usundhe eraku,
3 hasakka napayu:
“Aʼonkeema haqankunna tollakko taakinti porsa taakinti kalqe taakinti kodhatte taakinti laalle oohadhattekaki ikodhdhinti payni olo dhooqhadhe.
4 Mannissa ahayhinkotta naxullitena haka lighinte saasa haama ghayyindha.
5 Naqharray koro yehune akkadhi payni katamisaasi hela hxurapa nakittatte lighanku,
alighankunakka qhamu misikire na kodhdhininu tullupakko lughghe haahundhina hela hishisapa ashshonku.”
6 Qhamossi inna payi kula usundhekka illigheppa inni ote xeesa kollisapa he udhdhamaasikka isi dhinisana ghodhdhadhe kaasa kulakka aʼashshonki.
Herodiise Qhamu Ote Iyyesuse Apaqhi
(Maat. 14:1-12; Mar. 6:14-29)
7 Koro tookko tookko qhooti payina Shoxampakko Yohannise fartatte haqi maallay Herodhisesi piyye Gelila rafisa olho kodhdhamadhi kaasaasi iapaqhina imurukipa olhu qallini dhapu.
8 Koro tookkoka ipayana:
“Eliyaase holipa armadhu” koro hubhakka ippayana:
“Hxuumampawhe kedhdhanaki qhawho tookko fartatte haqi perinna.”
9 Herodhisekka hasi payipa isi Uso hiʼe woʼa:
“Yohannisena payni anona pukkaqate ghoxasina ata qhawhu apayina olho kaasaasikki kodhadhipa Isathorruya hunka?”
Iyyesuse Qhamu Qhawho 5,000 Yiʼashi
10 Erkampawhesi huusu xaytossi erkamenu iholleppa olhu kodhe kaasaasi Usoosi qallonki.
Usokka usundheesi pattaki ooqipa xaytossi katama Peetesaytana kaanta koro yenaqaghi kula ashshottay.
11 Waarshokka xayto Iyyesuse naqaghiisi iʼaripa nakala ashshoy.
Usokka iʼusundhe akkadhipa qhoota Ahxase Haallikkito kollisu,
koro udhankito dhinko woapa Uso kula okayu kaasakka dhinnisoy.
12 Xayto iʼawnuyina kolladhampawhessi hudhdhanpa lakki Uso kulaki itʼtʼuyeppa hasa napayonki:
“Xaytu anna qaghni qhooti mandho kodhdhi maallay koru ghodhdhadhi xayna kaaʼita qagha kula qhamu ashshinipa yiʼopa xayto raftate gheeqadhunnu helahaqis.”
13 Naqharray Iyyesuse ina payina:
“Olhu yiineesi hune nuteexa” usundhekka inna payenna:
“Ine kulay dhilantakko hxupinpa hxaaritte lakki pattaki ansheeghni,
Hussa maallay apayini ini ashshooni nayiʼo pitamaani payni waarshu kaasannu yehxafnikka.”
14 Korusakka tʼiire patta qhawho 5,000 kula qaghitti.
Hussa maallay Iyyesuse kolladhampawhe huusuna hasina payi:
“Korusaasi qhawho hudhanko hxupin hxupinsa qhootapa qakkatteesanku”
15 Kolladhampawhe huusukka qhamossi Uso napayi kulaki korossisi qakkateese.
16 Xaysa tupettay Iyyesuse dhilantakkosi hxupinpa hxaaritte lakkisi iʼakkipa moontoqila emmadhuppa Haallikkoosi kalataysadhuppa ghoodhuppa qhamu korossinu qhootnenu kolladhampawhe huususa teexu.
17 Koro kaasay iyyiʼipa dhalaxu tupettay kolladhampawhessi huusu ghodhanaadhesi na kalla haqhe kʼunna hudhdhanpa lakkiisiki nakalla haqise.
Petʼiroose Iyyesuse Qhamu Yaxa Kodhdhisaki qalli
(Maat. 16:13-19; Mar. 8:27-29)
18 Xaysa tupettay Iyyesuse Uso pattaki qawni ghissadha,
kolladhampawhekka Uso qalli qaghe,
hasa payuppa usundhe kasqadhu:
“Waarsho yaxa Iyyela payi?”
19 Usundhekka hasi payeppa nu holasonki:
“Koro tookko ‹Shoxampakko Yohannise›,
koro hubhakka ‹Eliyaase›,
koro tookkoka ‹hxuumampawhessi kedhdhanaki qhawho tookko fartatte haqi› Ihola payi.”
20 Usokka ina payina:
“Emma hune yaxa yela payte?”
Petʼiroosekka inna payina:
“Ato Kristoose Haallikkito.” a
21 Iyyesusekka olissaasi yaxanukka qhamu yeqallinenu uumi kokisipa usundhe hayu.
Iyyesuse Fartepa Haghe Huususikki qalli
(Maat. 10:38-39; 16:24-28; Mar. 8:34-38; Lukʼ. 14:25-27)
22 Holuppa:
“Ano Miʼaye Qhawhito rakko dhamma akkadhe yegheeqasa,
xaadhighghe piyyatepa intawampawhe kʼesadheete pana kollisampawhe Tampattekka iyyedhafnanki,
iyyepoghnanki,
ikkodhdhitama kapay kuyyaqako isxanna fartatte Anhaqana.”
23 Holuppa usundhe kaasanna hasa payu:
“Qhawho yekala ashshanto woʼa qagha payni ihe marmadhipa maskʼalakko huususikka dhooqhadhoppa kuyyaqako kaasay yekaleema okayu.
24 Moʼo malla payni qhawho qagho huusuusi pinnisadhe woʼa kaasay ihela patisa,
naqharray qhawho yemaallay qagho huusuusi sarpisapa isihela teexa ippinnisadha.
25 Qhawho piyye qhaatʼi kaasakki tuusu kodhdhinapa napse tuusuusi dhapu taakinti hela qhacʼasu payni moʼonu gharra?
26 Qhawho yetta pana Kʼaale tayyuttay palama kaasay Ano Miʼaye Qhawhitokka kuyyaqakosi kaanastte tayyupa kaanaste Paappo Haayyuttay erkampatadhdhe kʼulkʼullawhe illi okaayana anusotta palamna.
27 Dhuke anhune qalli,
koru xayna shikkaarana kittatte tookke tookke Ahxase Haallikkito iʼokaayana haki hiine saasa heye farrinekki qagha.”
Oohame Lighno Iyyesusenna
(Maat. 17:1-8; Mar. 9:2-8)
28 Iyyesuse iʼolissaasi qalladhina kuyyaqako sette tupettay Petʼiroosepa Yohannise pana Yaykʼoopeesikki he kala ooqipa ghissootenu ghupo sappeema hadhdhu.
29 Ighissadhana miinte tuusukka naoohami,
laalle tuusukka qhamo ghawwqakito ibhbhaqhti.
30 Qhawho lakki,
usundhisakka Muusepa Eliyaase Uso qalle qalladha.
31 Heesi kaanastettay armadhekka Iyyesuse qhamu katama Iyyerusaalemesa farriisiki ille qale torruyadhe.
32 Kuyyaqakusana Petʼiroosepa hessi Uso qalle qaghaasi piʼaate ghapipa piʼadhonki,
ihaqenna kaanaste Iyyesuseppa qhawho lakki he Uso qale qalladhaasiki hiʼe.
33 Korossi Iyyesusena kaanta qaghakka illaghamipa ashshonna Petʼiroose Iyyesusena hasinna payi:
“Kollisampakko haayyu,
xaysa ghayye iʼinena xeesayye kaassitto izzax an ghupanna:
tookko Hoosi,
tookko Muusenu,
tokkoka Eliyaasenu” olhu qalladhisikka ye hela sheeghi.
34 Iʼolissaasi qalleete ghayyana urratte okayipa usundhe bhadhi,
iʼurratte kitteema xullena ighghaape.
35 Urrattesina kittatte ikkitto iyyana:
“Haadhi Miʼayesi haayyu an qholladhi husi Usoye Usona apaqha” dhakaadhi.
36 Ikkittusa iqhaskadhi tupettay Iyyesuse pattakki xaytusaasa haqhi,
kolladhampawhessi huusuna kittatte hessi Uso qale qagha olhossi ixinkisana hiʼe kaasaasi yaxanukka yeqalonki.
Iyyesuse Miʼaye Nasso Magha Naqaghiisi Qhamu Dhinisi
(Maat. 17:14-18; Mar. 9:14-27)
37 Haqhayna sinkatho ighuposinu oodhdhe tupettay waarsho kisha okayipa Iyyesuseema lighghu.
38 Xinkissana waarshossinna kittatte qhawho tookko hasa payipa riiru:
“Kollisampako haayyu,
miʼaye toʼokusa ansheeghiye akko maʼala yedhiniis.
39 Lammi nassusa magha tutuppe inna haqi payni iriirasapa piyyeema hela kʼurupa isina ronpo elisa,
isi dhitasatesapa pishko napapayshesoppa iuuma qootʼuyi tupettay isi hela hxuri.
40 Kolladhampawhe haahu nassusa maghaasi qhamu inna lihasnenu annu qalli naqharray ye alkasonki.”
41 Iyyesusekka hasi payipa nu holasu:
“bHuni dhukkaysadhe dhapte dhalata qonkololku ata haka para saasa an hune qale qaakni?
Haka para saasa an hune dhuupanni?
Into miʼayisa haahuttay hassa kula okay.”
42 Miʼayesittay iʼokaayatte qaghana nassossi magha piyyeemi ranisipa dhitansatteesu,
naqharray Iyyesuse nassossi lokmadhiisi iqhqheeripa miʼayesiisi dhinisuppa paappo huusunu teexu.
43-44 Iyyesuse kolladhampawhe huusuna hasinna payi:
“Oli an hune qallittay ina azanonku,
Ano Miʼaye Qhawhito xarghghe koritosa aye likasnipa aye teexu.”
45 Naqharray usundheesi qallitisay yenu xulukka,
qhamu ye hela taaynenu olissa inna bhadhdhami,
qhamu ye holleppa kasqadhonkinukka ighghaape.
Hokaasannu Qula Yaxa?
(Maat. 18:1-5; Mar. 9:33-37)
46 Kolladhampawhe usundhena kittatte yaxa qhamu ghulisa arenuki ille tamaakkadhe.
47 Naqharray Iyyesuse dhihattootte saqqe huusundhina inna aripa miʼaye takkassattay okayuppa hekapeema shikkaarashuppa hasa payu:
48 “Qhawho yaxakka homiʼayi takkassaasi makaxako Haayyuttay akkadha,
Yeesikki akkadhi,
hoYeesi akkadhikka hoYeesi erakisikki akkadhi.
Qhawho hune kaasanna kalla qhac’a hokaasannu ghullaki uso.”
49 Xaysa tupettay Yohannise Iyyesusena hasinna payi:
“Pogholho haayyu,
kulay qhawho toʼon inassidhdhe magha Makaxko Haahuttay lihasanaki an hiinipa qhooti yeine qale kodhdhu maallay nadhawrasaani”
50 Naqharray Iyyesuse ina payina:
“Olona dhawrase,
moʼo maalla payni hoye hune toori kaasay hune qaleye.”
Koro Piyye Semmariyana Qhamu Iyyesusesi Akkadhe Iishi
51 Iyyesuse kuyyaqakosi immoonto kula na ashshini qhooti itʼtʼuyi maallay katama Iyyerusaaleme kulakki ashshankonu qhaqhadhipa haqu.
52 Erkampawhe he uso qhara’ita ashshinasikka eraku,
usundhekka olho tookko tookko nu gharisenu ghodhdhesi piyye Semmariyanna kittatte qagha kulakki ashsheppa xulloonki.
53 Naqharray koro piyyisana qhamu ghodhadhisana kitta’ita lighinipa karo Iyyerusaaleme kula ashshoosi qhooti are maallay ye Uso akkadhonki.
54 Kolladhampawhessi huusuna kittatte Yaykʼoope pa Yohannise koro Samariya qhamu Iyyesusessi akkadhe iishesa ihiʼe tupettay hasinna paye:
“Pogholho haani,
[Eliyaasec qhamu hatte oodhasi kula] montikki qhamu hatte oodhintipa koruusi dhillonu anhayinana awoʼay?”
55 Naqharray Iyyesuse usundhe kulaki laaghghamipa hasa napayuppa qheeru:
“Qhamu nasso hunka hunena kittatte qaghisa huni artte,
Miʼaye Qhawhito olhu namaallay okayi qagho qhawhitosi dhinisenumma patisenu qandhikka”
56 Xaytusana ihaqeppa ghodhdhe pilatte kula ashshonki.
Rakko Koro Iyyesuse Kalla Ashshasa Hxafna
(Maat. 8:19-22)
57 Iyyesuse kolladhampawhe huusu illi i’onkaʼita ashshankito qaghana qhawho tookko Iyyesuse kula okayipa hasa na payu:
“Xayto Ato na kula ashshinti kaasay anokka an hoqale ashshina”
58 Iyyesusekka hasi payipa nu holasu:
“Kaqalle hxohxonidhdhe ishsheeghe,
aaghe moontitokka mannaadhdhi sheeghe.
Naqharray Ano Miʼaye Qhawhito xayto anna hxaysanikkaki anu sheeghi.”
59 Uso qhawho tookito ina payina:
“Yekala okay” Naqharray qhawhuusi inna payina:
“Pogholho haayyu,
qhariteema qhama ashshinipa paappo haayyu maaayyasanu ye pay.”
60 Iyyesuse hasi payipa nu holasu:
“He farresi hehuusunndhi farre qhamu maynenu hxur.
Naqharray atho ashshapa Ahxase Haallikkito torruyay.”
61 Hantukka qhawho pilakko holipa hasa napayu:
“Pogholho haayyu,
ano ho kaleema ashshankoosi awoʼama naqharray qhariteema qhama ashshinipa ahxke haayyu nakaysadhanu ye ee pay”
62 Iyyesusekka hasinna payi:
“Qhawho iqhotana xarghghotta irfe ghapapa holu konankonnaye isi eemadha Ahxase Haallikkitonu yeqheeqasikka.”