Oohame Iyyesuse
9
Nakaleemakka Iyyesuse hasi napayi:
“Dhuke an hune qalli,
Ahxase Haallikkito ihhumna dhammattay okaayanna haki hiine saasa koru xayna shikkaarana kittatte tookke tookke heye farrineki qagha.”
2 Kuyyaqako thappi tupettay Iyyesuse Petʼiroosepa Yaykʼoope pana Yohannise pattaki ooqipa ghupo sikaapa saappeema hadhdhuppa usundhe miinteema oohamu,
3 Laalle thuusuka qhawho piyyatte laalle shoxa ye shoxnippa piqase alikasunna kutay qhooti uuma piqti maallay ehxhxeete korito bhaqhti.
4 Eliyaasepa Muuse Iʼiyyesuse qale thorruyadhana hiʼonki.
5 Petʼiroosekka Iyyesusena hasi napayi:
“Kollisampakko haayyu,
xaysa ghayye iʼinena xeesayye!
Kaassito izzax:
tookko Hoosi,
tookko Muusenu,
tokkoka Eliyaasenu an ghupanna.”
6 Qhooti uuma murruke maallay Petʼiroose olhu qalladhisikka ye hela sheeghi.
7 Xaysanna urratte okayipa usundhe bhadhi,
urrattisana kittatte ikkitto iyyana:
“Miʼayeesi haayyu an cʼikadhi haadhi husi Usoye Usona apaqha.”
Dhakaadhi.
8 Haattay ihhela kapaʼitha xayto emmana Iyyesuse malettay qhawho pileesi ye hiʼonki.
9 Ighghuposinnu oodhdhankina Ano Miʼaye Qhawhito haka he farenna kittatte haqani saasa oli ahhiitetesi yaxanukka olo qalleki napayipa usundhe hayu.
10 Kʼaalessi innu qalliisi iʼapaqheppa saqqeema ghappadhonki;
ikkodhdhitama kapay “he farenna kittatte haqe” qhamu moʼo kodhdhi isi illena kakasqadhanki.
11 Usundhekka hasi payeppa kasqadhonki:
“Kollisampawhe hikkatte moʼo maallakki iyyena Eliyaase qhariteema okayna?”
12 Iyyesusekka hasi napayi:
“Pare karayka Eliyaase qharriteemi okaynipa olho kaasaasi gharisu.
Emma Ano Miʼaye Qhawhito qhamo rakko kisha akkanipa dhafamo kaaʼitha moʼo maallaka tooxi?
13 Naqharray an hunena iyyana:
Eliyaase kulay iʼokay,
usundhekka qhamosi aqhoota huusu tooxi kula olhu woʼe kaasaasi na kodhonki.”
Iyyesuse Miʼaye Nasso Magha Naqaghiiski Dhinisi
14 Ihholleppa kolladhampawhe tookkesi kula holonkinna waarsho kisha usundhena kaanta qagha,
kollisampawhe Hikkatekka kolladhampawhe huusu illi isi ille tamakadha.
15 Hattay waarsho kaasay Iʼiyyesusessi hiʼina immurukipa dhahxhxuppa heru Uso miinteema keamuppa nuxasu.
16 Iyyesusekka hasi payipa kasqadhu:
“Olisa moyto saappeete aʼille tamakkatte?”
17 Waarshussana kittatte qhawho tookko hasi payipa nu holasu:
“Kollisampako haayyu,
kulay miʼaye haayyu nasso maghakko ho koro muumisattay yela ghapamipa ho kula okayattay.
18 Inna haqi payni piyyeematti ranisipa ronposikka pakkeete isinna elisa.
Ilgheesikka isi illa qhumapa pishkoosika inna haxosapa isi pukkaqo kula kodhi;
kolladhampawhe haahu qhamu na nassusa magha lihasne nu qalla,
naqharray ye alkasonki.”
19 Iyyesusekka hasi payipa nu holasu:
“Huni dhalathi dhukkaysadhe dhapte,
ata haka para saasa an hune qale qaakni,
haka para saasa an hune dhuupanni qhari?
Into miʼayisattay ye kula okaya.”
20 Miʼayesitakka Uso kulaki okayettana nasso maghakosika Iyyesusesi taynittay piyyeemi kʼuripa isi dhiththansadhapa piyyatti kankaladhepa ronposi elise paayyu.
21 Iyyesusekka paapposi miʼayatteesi hasi payipa kasqadhu:
“Udhanku ippayina mala qaghitiki na oladhi?”
usokka hasa inna payi:
“Miʼayunkotakki paayyipa
22 pogheka isinna woʼapa kuyyaqe kisha hattepa qandheema isi kʼurrayya,
naqharray ihho alkasamna payni akko maʼala thaahu ine qhararsadhpa kʼarkʼaray!”
23 Iyyesusekka inna payina:
“‹Ihho alkasamna payni› ka iiti atam?
Qhawho dhukkaysadhanu olho kaasay innu alkasama.”
24 Haattay paapposi miʼayatte hasi payipa riiru:
“Dhukkaysadhesi an dhukkaysadha,
nagharray xayto dhukkaysadhe yela qhacʼitisa Atho naye kʼarkʼar.”
25 Iyyesusekka waarsho ihhermmathottay okaayanaki hiʼipa hasa payuppa nassossi maghaasi qheeru:
“Atho nasso dhakakopa mumanakku miʼayina qhamana lighintipa lankanaka na hole hxuranuki anho qheeri!”
26 Nassossi maghakka ikkitto dhammattakki riiripa miʼayessiisi idhdhithansi tupettay na lighu,
miʼayessikka qhamo pukkaqito kula qhooti kodhdhi maallay koro kishanu ho fari innu lighi.
27 Naqharray Iyyesuse miʼayesina xargho inna ghapipa haqisunna miʼayeesika ihhaqipa shikkaaru.
28 Iyyesuse immanne kula qaaki tupettay kolladhampawhe huusu hasi payeppa qawni Uso kasqadhonki:
“Emma moʼo maallaki nassusa maghaasi ini lihase alkasooni?”
29 Usokka hasi payipa nu holasu:
“Nasso hasa ligha ghissootepa [yiʼo male ghissadhetta] patakki lighni.”
Iyyesuse Qhoota Fartepa Haqe Huusu Kaaʼita Lankka Iqqalladhi
30 Xaytusana ihhaqeppa piyye Kalilattay lighghonki;
Iyyesusekka xaytusa ina qaghesi yaxakka qhamu arri ye woukka.
31 Iyyesuse kolladhampawhe huusuna hasi napayipa kollise paayyu:
“Ano Miʼaye Qhawhito xarghghe koritosa Ayelikasnipa ye teexu,
usundheka Iyyepoghnanki,
Iyye poghe tupettay kuyyaqako isxanna fartatte an haqana.”
32 Naqharray usundheesi qallithisay yenu xulukka,
ikkodhitama kapay kasqadheesi ighghaape.
Ho Kaasannu Ghula Yaxa?
33 Iyyesusepa kolladhampawhe huusu kathama Kʼifrnahoome kulakki okaye.
Iyyesusekka immanne kala xulli tupettay kolladhampawhe huusuna hasinna payipa kasqadhu:
“Keenni saqhqhara assanito qaghankunna moyto sappeete aʼille tamakatte?”
34 Naqharray usundhe iʼonkatte qaghana qhooti payena:
“Ho kaasannu ghula yaxa?”
Pa ille tamakadhonki maallay ikʼkʼampaye.
35 Usokka iʼqakkadhdhi tupettay kolladhampawhe huusu hudhdhanpa lakkisiisi iʼooqipa hasana payu:
“Hunena kittatte qhawho yaxakka hohe inthoose woʼa qagha payni koro kaasanna kala hohe keetasapa isi koro kaasannu kodhadha kodhdha.”
36 Miʼaye takkassatakki okayuppa usundhe kitteema shikkaarashupa sakaradhuppa:
37 “Qhawho miʼaadhina kittatte miʼaye tokkoosi makaxko haayyuttay akkadhi yeesiki akkadhi,
qhawho yeesi akkadha kaasakka yeesi qandhimma hossiye erakiisiki akkadhi.”
Qhawho Ye Inne Toori Kaasay Inne Qalle
38 Yohannise Iyyesusena hasina payi:
“Kollisampakko haayyu,
kulay qhawho toʼon innassidhdhe magha makaxko Haahuttay lihasanaki an hiini,
naqharray qhooti ye inne qale kodhdhu maallay anna dhawrasni.”
39 Naqharray Iyyesuse hasina payi:
“Ho makaxko Hayyuttay dhahxhxoote kodhapa isi hattay olho magha yeema qallana ye qaghni maallay hxurapa olo na dhawrasi;
40 Qhawho ye ine toori kaasay ine qaleye.
41 Dhuke an hune qalli,
qhoota haayyu kodhdhite maalla,
qhawho qhoota hayyu paypa isi qandhe kakki hune teexa hxayye huusu ye dhapnika”.
Qhawho Dhappisatte Kalla He Tiqithadhe
42 “Qhawho yaxakka hisi takkumma ye dhukkaysadhana kittatte qhawho tookko dhappisnana kaanta qhutʼme yooqhetesiki aʼamooma na shapnipa pasooma kʼuramu payni nu woyyina.
43 “Apayni xargho haahu ho dhappisa payni hela ghoxpa kʼuray,
xargho lakki ashsheeghintipa Kehanameema kʼuramana kaanta qhurtʼanakko akkodhintipa qagho kula xullaki ho woyyina.
44 [Kehaname payyo xayto soporqhokka yena farri,
hatteka isi yena imti.]
45 “Apayni luhte thaahu ho dhappisa payni hela ghoxpa kʼuray,
luhte lakki ashsheeghintipa Kehanameema kʼuramanna kaanta thonnakko akkodhdhintipa qagho kula xullaki ho woyyina.
46 [Kehaname xayto soporqho yena farri hatteka isi yena imti.]
47 “Apayni ehxte thaahu ho dhappisa payni hela yuk,
ehxtte lakki ashsheeghintipa Kehanameema kʼuramana kaanta ehxtte tootte ashsheeghintipa Ahxase Haallikkito kula xullaki ho woyyina.
48 Kehaneme xayto soporqho yena farri,
hatteka isi yena immti. a
49 “Qhamu sooqho teexakkosi gharisi kula qhawho kaasay hattettay ghare uso gheeqasa.b
50 “Sooqho ixxeesa,
naqharray soorno sooqhunkitosiki dhappi payni motaka soorasinte?
Hunena kittattekka soorno sooqhito iʼqaghi,
illa xulapa nakayhottay qaakkonku.”