Qhamu Malke Iyyesuse Oohamti
17
Kuyyaqako tappi tupettay Iyyesuse Petʼiroosepa Yaykʼoope pana qaso Yaykʼoope Yohannise pattakki he kala ooqipa ghupo sikaapa saappeema hadhdhu.
2 Ihhaaha qaghana usundhe miinteema malke na oohami,
miinte thuusukka qhamo oqhayyatte na hxusi,
laalle thuusuka napiqippa qhamo hammakito haahi.
3 Haattay Muusepa Eliyaase he Uso qale qalladhaasi hiʼonki.
4 Petʼiroosekka Iyyesusena hasina payi:
“Pogholho haayyu,
xaysa ghayye iʼinena xeesaye awwoa payni kaassito issex tookko Hoosi,
tookko Muusenu,
tokkoka Eliyaasenu an ghupadha.”
5 Usokka ihhannay olissaasi qalleete ghayyana urratte piqakki okayipa usundhe bhadhi,
urratisana kittatte ikkitto hasa payiki qhasikadhi:
“Miʼayeesi hayyu an usottay hxasooodhipa isan cʼikadha haadhi husi Usoye Usona apaqha!”
6 Kolladhampawhesikka iʼikkitusaasi apaqhenna qhooti uuma murruke maallay iklpeppa miintetttay piyye kula kahhonkki.
7 Naqharray Iyyesuse usundhe kulakki okayipa xargho huusuttay ghaghappadhoppa hasa na payu:
“Olo ghaapemma haqa!”
8 Usundhekka iʼqila haqeppa emmadhonkina Iyyesuse malettay qhawho pile ye hionki.
9 Ighghuposinnu oodhdhana Iyyesuse hasina payipa usundhe hayu:
“Ano Miʼaye Qhawhito fartatte hakan haqani saasa oli ahiiteesi yaxanukka ina qallonku.”
10 Kolladhampawhessikka hasi payeppa Uso kasqadhonki:
“Emma kollisampawhe Hikkatte moonukki iyyena Eliyaase qharitteema okayna?”
11 Usokka ihholipa hasa na payu:
“Karayka Eliyaase iʼokaynapa olho kaasaasi gharisu.
12 Naqharray an hunena iyyana:
Eliyaase xayna qharaʼita iʼokayina olhu woʼe kaasasikki na kkodhe dhiishoy ye uso upadhonki.
Holuppa Ano Miʼaye Qhawhitokka usundhettay rakko akkadhe ye gheeqasa.”
13 Xaysa tupettay qhamu qhoota shoxampako Yohannise torruyisa innu xulti.
Iyyesuse Miʼaye Kamaqe Naqaghtisikki Dhinisi
14 Iwwaarshosi kula holenna qhawho tookko okayipa Iyyesusena luhhe kaleema ghulladhuppa hasa payu:
15 “Akko Pogholho haayyu,
maʼala thaahu,
miʼaye haayuusi qhararsadhma kamaqettakki ghapamipa isi qootʼo hiʼaye,
kuyyaqe kisha hatteemi rannayipa qandheemakka isi xullayya.
16 Kolladhampawhe haahu kulakka anokayittay,
naqharray dhinise ye alkasonki.”
17 Iyyesusekka hasi payipa nuholasu:
“Hune he dhukkaysadhe dhapte;
dhalatha xonkololku ata haka para saasa an hune qale qaakni?
Haka para saasa an hune dhuupanni qhari?
Into miʼayissa ye kula okaasa!”
18 Iyyesusekka nassosi maghaasi iqheeripa miʼayesina lihasu,
miʼayesikka haattay dhinu.
19 Xaysa tupettay kolladhampawhe huusu qawnikki na kapa itʼtʼuyeppa kasqadhonki:
“Emma Ine moʼomaallakki nassusa maghaasi lihase ini alkasooni?”
20 Usokka hasina payi:
“Qhooti dhukkaysadhe hunena qhacʼti maallay,
dhuke an hune qalli,
dhukkaysadhe ibhbhite senaficʼatte kula ghaqitiki ashsheeghteppa ghupuna payanku:
‹Xayna haqpa xaysa korasa ashsho› payni iʼashshina.
Olho hune malaalla toʼokkokka yeqaghni.
21 Naqharray nasso hasa ligha yiʼo male ghissadhetakki ye kodhdhu payni ye lighni.”
Iyyesuse Lanki Fartepa Haqamakko Huusu Qalli
22 Kolladhampawhe huusu ippiyye Kalilasa illaholenna Iyyesuse hasinna payi:
“Ano Miʼaye Qhawhito xarghghe koritosa aye likasnipa teexu.
23 Usundhekka iyye poghnanki,
naqharray kuyyaqako isxanna fartatte an haqana.”
Usundheesikka uuminu dhakaati.
Kipirro Manne Kʼulkʼulawhattena Mure
24 Iyyesusepa kolladhampawhe ikkatama Kʼifrnahoomena hxafe tupettay koro Manne Kʼulkʼulawhattena kipirro qhitʼasa Petʼiroose kulakki okayipa hasa na payu:
“Kollisampakko haahundhi kipirroa Manne Kʼulkʼulawhattena ye teexni?”
25 Usokka ina payi:
“Eʼe ittexna.”
Petʼiroose immanne kula qaaki tupettay Iyyesuse iʼintoosipa hasa payuppa kasqadhu:
“Ato Simoone mali ho lighti?
Nukusaadhdhe piyyina miʼaadhe huusundhinaki kipirro sooqem koro pileete”
26 Petʼiroosekka hasi payipa nuholasu:
“Koro pilete.”
Iyyesusekka hasinna payi:
“Eeppa Miʼaadhe huusundhi kipiroosi yemure payyo.
27 Naqharray qhamu ini usundheesi kuththumatte kodhdhinennu paso kula ashshapa sherqhossi ahxaarettay ghappiisi ghaasay,
hxaarite qharitteema ghapamtiiasi yukapa pako anna qhashti payni pirraadhdhe anna tayintiye,
pirradhdhisaasi akkappa qhoota hayyupa haahu teexay.”