Ho Kaasanna Ghula Yaxa?
18
Xinkissana kolladhampawhe Iyyesuse kulakki okayeppa hasa payonkippa kasqadhonki:
“Ahxase Moontitona ho kaasannu ghula yaxa?”
2 Iyyesuse miʼaye takkassaasikki ooqipa usundhe kitta shikkaarashuppa hasa na payu:
3 “Dhuke an hune qalli,
apayni huni oohamonkuppa miʼaadhe kula kodhdhanku payni Ahxase Moonthitosa mo’o kakki payni huni xullinte.
4 Qhawho miʼayi kula pukkaqte thuusu hela takoosa Ahxase Moonthitona usokki ho ghula.
5 Qhawho makaxko hayyuttay miʼayiisi akkadha yeesikki akkadhi.
Qhawho Dhappisatte He Tiqthadhe
6 “Yaxakka ihhisi takkumma yeesi dhukkaysadhana kittatte toʼokko dhappisnana kaanta qhutʼme yooqheteesikki aʼamooma na shapnipa pasooma kʼurupa loqhadhu paynikki woyyina.
7 Piyye qhaatʼi qhooti koro kuththumti maallay ihhe ooyatti;
karaykka olho koro kuththumna okaye yena haqhinti,
naqharray qhawho kuththumatisannu onke kodhdha ihhe ooyadhi!
8 Apayni xargho taaki luhte thaahu ho dhappisa payni hela ghoxpa kʼuray,
xargho lakki taakki luhhe lakki ashsheeghintipa hatte perre ye hume sheeghessa kʼuramanna kaanta qhurtʼanakko taaki thonnakko akkodhdhintipa qagho kula xullakki ho woyya.
9 Apayni ehxtte thaahu ho dhappisa payni hela yukpa kʼuray,
ehxhxe lakki ashsheeghintipa haththe ye ime sheeghtisa kʼuramanna kaanta ehxtte tootte ashsheeghintipa qagho kula xullaki ho woyya.
10 Hisi takkummana kittatte tookkoosi qhamu huni dhafintennu he tiqthadhindha.
Moʼo maallay payni erkampatadhdhe huusundhi moonthito qagha Paappossi hayyu moonthito qaghana miinteesi kuyyaqko kaasakki na eeme,
11 Ano Miʼaye Qhawhito olho anna maallay okayi he patteesi gheeqenu.”
Qeemtessi Pattipa Tayaminna Lighno Hiisi
12 “Into ye qalla?
Qhawho tookko ho qeemte dhippa sheeghanaki toʼotte na patti payni tookissa 99 qarakkooma ye hxurrippa toʼotissa pattiisi gheequ?
13 Dhuke an hunena payi,
qeemtissa pattiisi ittayi payni qeemmissa ye pattonki 99 na kaanta tissa ittayittay uumi hxasoonni.
14 Qhamusa kula Paappossi haahundhi moonthito qaagha hisi takkumma xayna qaghana kittatte qhawho toʼokko qhamu panni ye woʼikka.
Koro Ille Dhappi Qhamu Moʼo Kodhe Usundhe Gheeqasi
15 “Qharunko taaki qaso haahu hola dhappi payni atho patta na kula ashshapa dhappitte thuusuusi nu qallay,
ihhola apaqhi payni ahollay qharunko taaki qaso haahu kodhay.
16 Naqharray ye hola apaqhu payni misikirunko qhawho lakki taaki qhawho isextay qhooti dhuke kodhdhi maallay qhawho lakki taakki qhawho isax ghapadhpa na kula ashshoy.
17 Apayni usundhenakka ye apaqhu payni ashshapa manne kristananu qallay,
apayni manne kristananakka ye apaqhu payni,
qhamo qhawho ye Haallikko aripa cʼuppolakkooma dhiha.
18 “Dhuke an hune qalli,
olho appiyyatte shapte kaasay moonthitoka ho shapami ikkodhdhini,
olho appiyyatte ishighte kaasay moonthitoka ho ishghami ikkodhdhini.
19 Holuppa an hunena iyyana hunena kittatte qhawho lakki piyyinna ille xulipa olho tookko kasqadhonki payni,
Paappo hayyu moonthito qagha innu konna.
20 Qhawho lakki taaki qhawho isaxki Makaxko hayuttay illa holi payni,
Anokka usundhena kittatte an taayamni.”
Qhoota Hxurakito
21 Xinkissana Petʼiroose Iyyesuse kulakki okayipa hasa na payuppa kasqadhu:
“Pogholho haayyu,
qharunko taaki qaso haayyu yela dhappi payni meʼtakki annu hxurri?
Ata taxxantam?”
22 Iyyesusekka inna payi:
“Hudhanko taxxaasi taxxattay na hohola dhiishoy taxxata patta anu hola payni.
23 Hussa maallay Ahxase Moonthito nukusasi kodhatte aylaadhe kodhadhettay dhihaasikki lighti.
24 Pogholhossi idhdhihe paayyina kodhampakko ho kodhaththe uuma kishaa naqaghtikki okayi.
25 Kodhampakkussa olhu murri qhooti ye sheeghi maallay,
naxaye thuusupa dhelle huusu pana olhu sheeghi kaasaasi qhamu lassinipa kodhathisaasi numurunnukki pogholhossi uso hayi.
26 Naqharray ayliththossi Pogholhosinna luhhe kaleemi ranipa hasa payuppa waathadhu:
‹Maʼala Pogholho haayyu,
okoto ye dhuupadhma kodhaththe yela qagha kaasaasi an ho murraye.›
27 Pogholhossikka iqhqhararsadhipa kodhaththessi kaasaasi nu hxuruy.
28 “Naqharray ayliththusa haahanu illighipa isi ashshana qhawho pile hu illettay kodhadheppa tiinaare pirre 100 nu pasanusikki tayipa haamakata niikuppa hasa na payu:
‹Kodhaththesi anho pasaniisi ye mur.›
29 Qhawhossi iʼillettay kodhadhekka ayliththosinna luhhe kaleemi ranipa waathadhu:
‹Akko maʼala thaahu okoto patta ye dhuupadhma anho murraye!›
30 Naqharray uso yenu dhuupadhuma laadhdhi ighghapasipa haaki pasante thuusu murri saasa manne shappeetesa xullesasu.
31 Kodhampawhe tookke kapay iʼolissaasi hiʼenna uumi azaneppa ashonki olho kodhdhamadhi kaasaasi Pogholhossi huusundhinu thorruyonki.
32 Pogholhossikka ayliththossi innu kodhaththe dhamma hxuriisi iʼooqasipa hasa na payu:
‹Atho kodhampakko maghakku,
qhoota ye waathatti maallay kodhathissay hola qagha kaasaasikki anho hxuri,
33 Qhamussa ano hohxuri kula athokka aylitussa aʼilletttay kodhattennu hxure ye ho gheeqasi?›
34 Hussa maallay Pogholhossi inna miiroodhipa pasantessi naqagha kaasaasi haaki murri saasa shapasu.
35 “Lammi hunekka koro pilenukki saqkottay huni hxurunku payni Paapposi hayyu moonthito qaghakka qhamussa kulakki hune konni.”