Lighino Qeemtesi Pattina
(Maat. 18:12-14)
15
Koro kʼaratʼtʼo sooqapa “cʼuppolawhe” kaasakki olho Iyyesuse kollisisi apaqhasenu Uso kula okayi.
2 Naqharray Feresawaadhdhepa korossi Hikke Muuse kollisa ikorussasi hiʼena hasi payeppa isiqhurumrumanki:
“Qhawhu koro cʼuppolawhi akkadhipa isiusundhe qalekka yiʼa.”
3 Hussa maallay Iyyesuse hasi payipa lighnusi nu qallu.
4 “Hunena kittatte qhawho qeemte dhippa sheeghanaki qeemte tootte pati payni tookisa hudhanko kollanpa kollaniisi leqakkooma ye hxurripa qeemte tootisa pattiisi haki tayni saasa isiye gheeqini yaxa?
5 Ittayi payni ihxasoonapa hashshitooma hadhdhasadhuppa okayuttay.
6 Immanne huusu kula okayina dhalitto huusupa Qormaadhdhe huusu kaasakki ooqinipa hasa napayu:
‹Kulay qeemtesi tayyu patiisi antayipa hxasoodhoye hunekka ye qale hxasoodhindha!›
7 “Anhunena payana qhamussa kula qhawho hudhanko kollanpa kollan pare qagha,
cʼuppito karo Haallikkito hole ye woʼenna kaanta qhawho toʼokko cʼuppito Haallikko kula holi payni qhootisa maallay moonthito hxaso dhaqqamma kodhdhamadha.”
Saantipe Patipa Tayamina Lighno Hiisi
8 Nakaleemakka Iyyesuse hasi payi:
“Xiskatakko tootte te saantipaadhdhe asipilho shooshana kodhdhia saantipe hudhdhan sheeghaki qagha,
saantipesi hudhdhanna kittatte tootte napati payni haki tayinti saasa hammakkosi ye hamasadhintipa manne hiisikka ooshipa uuma gheeqi?
9 Itayiti payni dhalitto hiisipa Qormaadhdhe tiisi ye illa holasintipa hasa napayi:
‹Kulay saantipesi tayyu patiisi antayipa hxasoodhoye hunekka yeqale hxasoodhindha.›
10 “Kulay anhunena payana,
qhamussa kula qhawho cʼuppolakko tookko cʼuppito kala holi payni erkampatadhdhe Haallikkitona miintatte hxaso kodhdhamadha.”
Miʼayeesi Patipa Taayyamuna Lighno Huusu
11 Nakaleemakka Iyyesuse hasi payi:
“Qhawho tookko ho miʼaadhe lakki sheegha qagha.
12 Usundhisa lakkina kittatte qaso paappo huusuna inna payi:
‹Appa,
kodhatte taahuna pakayye taayyuusi ye qhootpa yeteexay.›
Hussa maallay paapposi huusundhi kodhattesiisi miʼaadhe huusu lakkinu illena kala qhootu.
13 “Kuyyaqqe qhacʼa tupettay qasosi kodhattesi anu qhooti kaasaasiki sixadhipa piyye sikaapa kula ashshoppa xarkishu.
14 Kodhatesi kaasay ipoghghi tupettay piyyisaasa laaqe dhikitakki lighipa rakkadhe paayyu.
15 Hussa maallay koro piyyisana qaakana kittatte qhawho tookko kapeemi ashshipa qhawusakka qhamunu luumaadhdhe koshninu karo pashito eraku.
16 Usokka kurdhudhesi luumadhe yiʼesiki yiʼenu yooki,
naqharray hussasikka qhawhonu teexna ye qaghi.
17 Xinkissana miʼayeesi dhappitte tuusuusi ihela aripa hasa payuppa hela ghadhoy:
‹Manne paappo haayyuna kodhampawhe hekodhadhapa isiyiʼo yiʼa meʼki qagha.
Naqharray yeesi hassa puffaye ye pogha.
18 Anhaqapa paappo haayyu kula ashshoppa hasa napaya:
«Appa,
moontitopa hola miintatte andhappi;
19 xaynu koru miʼaye haahu paayyame yeye gheeqasti,
naqharray kodhampawhessi haahuna kittatte tookko kula yekodh.»›
20 “Hussa maallay ihhaqipa karo paappo huusu kula ashshoy.
Paapposi huusukka xayto sikaapasaki hiʼipa nuhxorhxu,
nakula sorruppa hekula ghapuppa mayyu.
21 Miʼayeesika inna payi:
‹Appa,
moontitopa hola miintatte andhappi,
xaynu koru miʼaye haahu payame yeye gheeqasti›.
22 Naqharray paapposi kodhampawhe huusuusikki ooqipa hasa napayu:
‹Miinakale laalle xeesa akkapa urkesanku,
ghoqakkonukka tʼukite,
lughgheemakka hxobhaadhdhe nuqadhdha;
23 oyfanakko koopi okaasappa saqhankupa yiinipa hxasooni!
24 Miʼaye haayyu ahxay iffari hantu kapay iqagha,
ahxay ipati naqharray hantu itaayyami› kippayipa hxasoodhe payoonki.
25 “Kuyyaqakusana miʼaye qharito pasho kulakki soofi.
Ipashonu qaakapa manneete kaanta iitʼuyunna ikkitto sonqhitopa dhiito iʼapaqhi.
26 Usokka kodhampawhatte tookkosiki ooqipa hasa napayuppa kasqadhu ‹Ata olissa moʼo?›
27 Kodhampakosikka inna payi:
‹Kulay qasossi haahu patiki holi qaakkoppa,
paappo haahu qhooti nakayhottay uso hiʼinu oyfanakko koopiisi nusaqhu.›
28 Qharunkosi uumi mirooodhipa manne kula xulle iishoy.
Hussa maallay paapposi huusu ghinte kulakki lighipa qhamu xullininu waatadhu.
29 Naqharray miʼaye qharitosi paappo huusuna hasinna payipa nuholasu:
‹Emma ano perrisa kaasay anho kodhadhipa olho ayyela paytiisika apar anu ishuy,
ano peelle haayyu qale hxasoodhenu ghopolhokaki atuyeteexu.
30 Naqharray miʼayeesi haahu ashshipa kodhatte taahuusi xiske mamaasa kala poghghu,
hantu kapay uso iqqaakina oyfana koopisiki anu saqhti.›
31 Paapposika hasinna payipa nuholasu:
‹Miʼaye haayyu,
atho kuyaqqe kaasay yeqale,
olho haayyu kodhdhi kaasay haahu.
32 Qasu haahu ahxay iffari,
hantu kapay iqagha;
ahxay ipati,
hantu kapay itayami,
hussa maallay uuma hxasoodhe ine gheeqasa.›”