Lighno kodhambhakko Hayyitito
16
Iyyesuse kolladhampawhe huusuna hasi napayi:
“Qhawho shorokitto hokodhambhakko manne huusuusi nurafisa sheegha qagha,
koro shorokitosina hasa napayu:
‹Kulay kodhampakkosi haahu kodhatte taahuusi iʼhola xarkisha.›
2 Shorokitosikka kodhampakosi huusuusi hekulakki ooqasipa hasa napayu:
‹Ata olissa manhola kalla apaqhi?
Xaynu koru atho kodhambhakko haayyu kodhdhe qhooti yeho gheeqasti maallay warakʼatesi akkodhatte kodhmota kotti nathooxtiisi yeholas.›
3 “Kodhampakosikka saqako huusuna kata hasi payi:
‹Hantu lammi paappo mannina kodhmito iyye ghorana moye woyya?
Qhotenu meelle anu sheeghi,
koro kalaʼita kukutadhe iyye palamisa.
4 Kʼampayama,
olho ankoniisi ano araye,
apayini kodhmunaki iyyeghori payni koro manne huusundhi kula yeakkannasiki angharsani.›
5 “Hussa maallay korossi kodhatte paappo manneetena naqaghti kaasaasiki hekula ooqipa qhawho payyootatena hasa payu:
‹Keenni kuurro paapposi manneetena meʼeki hola qagha?›
6 Usokka ina payina:
‹Kulay zayte sighte dhippa yela qagha› kodhampakosikka inna payina haadhi firmasi aʼille xulankuna afaramtiye qakkadhipa zayte sighte hudhanko hxupin payappa tooxayi.
7 Qhawho lankasika iʼooqipa hasa napayuppa kasqadhu:
‹Hola kantana,
kuuro paappo manneetena malaghaqitiki qagha?›
Usokka hasinna payipa nuholasu:
‹Kaspo feʼisa dhippa yela qagha› kodhampakosi manne rafisa ina payina haadhi firmasi aʼilaxulankuna affaramtiye feʼisa hudhanko setten payipa tooxoy.
8 Paapposi manneetekka kodhampakosi huusu maghakkosinaki hayyunko huusu upadhipa dhahxhxu.
Olissakka koro Haallikkitona kaanta miʼaadhe perrina kodhmo huusundhi piyyatettay qhamu hayyunko sheeghesaki hiʼaasi.
9 “Hussa maallay anhunena iyyana kuyyaqko kodhatte maghnito hunena humtina dhalitto manne perre yehume sheeghessa hune akkannasi pukkaqte taahundhinu kodhatissattay gharsadha.
10 “Qhawho olho tiikkissattay dhukkaysatami olho dhammatakka hodhukkaysatami ikodhdhini.
Qhawho olho tiikkissattay yedhukkaysatamu olho dhammatakka yedhukkaysatami.
11 Emma apayni shorokunko piyyina rafisetakki huni dhukkaysatamonku payni shorokunko dhukatteesi yaxa dhukkaysannapa huneema teexu?
12 Holuppa apayni shorokunko qhawho pilakkito takki huni dhukkaysatamonku payni shorokunko haahundhiisi yaxa hune teexna?
13 “Ayle pogholho lakkinu kodhadhe ye alkasi.
Tookkoosi ishshikkina tookkoosi kapay ic’cʼikanna,
taakinti tookkoosi ikkaanasna tookkoosi kapay idhafna.
Haallikkopa kodhattenu kodhampawhe kodhdhe huni alkasinte.”
14 Feresawaadhdhekka koro kodhatte cʼikadha qhooti kodhdhe maallay olissa Iyyesuse qalladhi kaasaasi iʼapaqheppa dhafonki.
15 Naqharray uso hasinna payi:
“Hune korito miintatte koro pare qagha ahe kotte,
Haallikko kapay saqqe haahundhiisi iʼara,
qhawho korito miintatte hokaanasami ligha Haallikkito miintatte hoshikkami.”
Qhoota Hikkatepa Qhoota Akkeete
(Maat. 11:12-13; 5:31-32; Mar. 10:11-12)
16 “Tampepa Hxuumampawhe haka Shoxampakko Yohannise saasa pattakki torruyame,
xaysa tupettay otessi Ahxase Haallikkitona xeesaasiki athorruyi,
qhawho kaasay Ahxasisa kula xullenukki kokisadhi.
17 Ikkodhdhitama kapay Tampatte toxite tiikisay haqhnanna kaanta moontopa piyye lighghina payniki woyyina.
18 “Qhawho naxaye tuusu ishighapa pilattesi isi akka kaasay immaasa,
qhamussa kula qhawho naxaye aʼishighiisi akkika immaasa.”
Alazarepa Qhawho Shorokittosi
19 Nakaleemakka Iyyesuse hasi payi:
“Qhawho shorokitto ho laalle xaffate te idhdhay te xorto nashooshisi urkuyaki qagha,
usokka qhawho kuyyaqako kaasay innu ghartipa isi hxasotta qaaka.
20 Qhawho teekolakkosi Alazare ana payi kapay ho pishko huusu kaasay napayshoodhipa isi mannessi shorokititona ghintate rafa.
21 Qhawho teekolakkosi yiitoosi koro yiʼina kalla ghodhanaadhdhe hayyasiki yiʼe woʼi.
Harrekka uso kulaki okayeppa isinna payshesi huusuusi kʼeeqha.
22 Xaysa tupettay qhawho teekolakkosi iffari,
erkampatadhdhekka iʼakkeppa Aprihaame kapeema ashshonkittay.
Qhamusa kula qhawho shorokitosikka iffaripa amaayu.
23 Qhawho shorokitosikka iSioolattea kittatte qootʼodhatte qaghana ishshokkipa sikapnooma Alazare ho Aprihaamena kaanta qaghaasi hiʼu.
24 “Usokka hasi payipa riiru:
‹Appa haayyu Aprihaame,
akko maʼala taahu yeqhararrsadh!
Hassa hatte sipinana kittatte anqootʼo hiʼiye Alazareesi yeʼerakpa ghotakko huusuusi iqandhe kitteema qadhdhapa qarrapko hayyusi yela shalalisu.›
25 “Naqharray Aprihaame hasinna payi:
‹Miʼaye haayyu,
atho perre haahu apiyyatte qaqtina iho ghartipa olho xeesa kaasaasi akkadhay,
Alazare kapay qhamu olho maghaasi akkadhisa into hela taay,
uso kapay hantu hassaki hxasoodhina atho kapay qotʼito kittatte aqaghti.
26 Olho uuma haxa,
koro inena kaanta qaghapa isi hune kula lighghe woʼa qhamu yealkasni,
holuppa koro hunena kaanta qaghakka ine kula qhamu yetahxinenu,
inepa hunena kittatte poolle dhaqqammaki qagha.›
27 “Qhawho shorokitosikka hasi payi:
‹Akko appa haayyu Aprihaame,
maʼala Alazaresi qhamu ammanne paappo haayyu kula erakintinu anho waatadha,
28 dhelle paappo haayyuna qhawho hxupinki qagha,
usundhekka xaytu qotʼito kula qhamu ye okaynenu iʼashshipa nuqallu.›
29 “Naqharray Aprihaame hasi payipa nuholasu:
‹Usundhena kaanta matʼafaadhdhe Muusepa hehxuumampawhatte qaghaye i’usundhissana apaqhase.›
30 “Qhawho shorokitosikka ippayina:
‹Appa haayyu Aprihaame,
kulay hasa qandhimma qhawho tookko fartatte haqanapa ashsho nu qallu payni cʼuppo huusundhina kulla ihhollanki.›
31 “Aprihaamekka inna payina:
‹Apayini olhu Matʼaafadhdhe Muuseppa hehxuumampawhatte nu qalleesiki ye apaqhonki payni qhawho fartatte haqanapa ashsho nu qallu kaki payni yedhukkaysane.›”