Qhawhossi Dhappisatte Kalla Hetiqitadhe
(Maat. 18:6-7; 21-22; Mar. 9:42)
17
Iyyesusekka kolladhampawhatte hasinna payi:
“Olho koro kuttumnana okaye yena haqhinti,
naqharray qhawho kuttumatisanu onke kodhdhina ihe ooyi!
2 Qhawho hisi takkummana kittatte tookko dhappisnana kaanta qhutʼme yooqhetesiki amoma hela shapnipa pasooma hekʼuruki nuwoyyina.
3 Hussa maallay pukkaqate taahundhina hetiqitadhindha!
Qaso taakinti qharunko haahu hola dhappi payni dheh!
Apayini dhappitte tuusu nudhakaadhi payni nuhxur!
4 Kuyyaqako tookko tara taxxantaakki ihola dhappipa holu tara taxxanttay ho kula okayuppa:
andhappi payu payni nu hxur.”
5 Erkampawhesi huusu Pogholho Iyyesusena inna payenna:
“Dhukkaysadhe ine padhaw!”
6 Pogholho inna payina:
“Apayini dhukkaysadhe ibhbhite senaficʼate kula ghaqittikki asheeghtepa xiltakunna payankuna roppamipa ashshoy paso kitteema dhishshama payni ihune eʼesana.”
Kitte Aylitito Gheeqama
7 Nakaleemakka Iyyesuse hasi payi:
“Kenni hunena kittatte qhawho aylito pasho qhota taakinti ho qeemme kosha sheegha payni aylitusa huusu haana xayto kodhmitonu iʼokayina haattay okaypa xaysa qakkadhapa yiito yiʼoy inna payna?
8 Laadhdhi hussana kaanta:
‹Okayipa esse yeghaqay,
holuppa haka aneesesi yiinipa quka saasa gharsadhapa kodhadhay,
xaysa tupettay athokka ayiinappa qukayye› yena payi?
9 “Emma qhawhusa aylitusa innu kodhmo dhikkisi tupettay ho kalataysanna ihune ligha?
10 Hussa maallay hunekka qhamussa kula olho ahune hayi kaasaasi kuyyaqako akkottepa dhikkisankuna:
‹Kodhmosi inena gheeqamaasi qhoota konni maallay ine aylaadhesi kaanaste ye ine gheeqase› paya.”
Iyyesuse Qhawho Hudhdhan He Lamtʼattay Qappameesi qhamu Alheesi
11 Iyyesuse ikkatama Iyyerusaaleme kula ashshana piyye Semmariyapa piyye Kalilanna kittaʼita illighghi.
12 Ighghodhdhe tootate hxafina koro udhanko maghakko ana lamt’ea payi naqaghi qhawho hudhdhanki uso kula okayipa sikaapnooma shikkaaronki.
13 Hasa payonkippa ikkitto dhammattay riironki:
“Pogholho haani Iyyesuse ine qhararrsadh.”
14 Iyyesusekka iʼusundhe emmipa hasa napayu:
“Ashshindhapa pishko hahundhiisi kʼeesadhdhenu hiʼasanku!b”
Usundhdhekka ihaanna ashshankito ghayyankina udhankosi maghna iʼalheesame.
15 Usundhisa dhinnena kittatte qhawho tookko qhamu dhinisa ihela ari tupettay ikkitto dhammattakki riiripa Haallikkoosi inni kalataysadhana holuppa
16 Iyyesusesena luhhe kaleema naranu,
usokka qhawho piyye Semmariyana.
17 Iyyesusekka hasinna payipa kasqadhu:
“Korossi alheesami qhawho hudhdhan qandhi?
Emma qhawhusa kollan ahaati qaghe?
18 Qhawhusa piyye pilenu okayi malettay qhawho holipa Haallikkoosi kalataysadhu ye qaghikka?”
19 Xaysa tupettay Iyyesuse qhawhossina inna payina:
“Haqpa ashshoy,
dhukkaysadhe taahu ihho dhinistiye.”
Okayte Ahxase Haallikkitona
(Maat. 24:23-28; 24:37-41)
20 Feresawaadhdhekka hasi payeppa Iyyesusessi kasqadhonki:
“Ahxase Haallikkito paraki okayinti?”
Usokka hasi payipa nuholasu:
“Ahxase Haallikkito onke koronu armadhattay ye okayintikka,
21 korokka ‹Ahxase Haallikkito kulay hassaki qaghti› taakkinti ‹Xaysa koranaki qaghti› payeesi yealkasni.
Moʼo malla payni Ahxase Haallikkito haadhi hunena kittati qaghti.”
22 Nakaleemakka Iyyesuse kolladhampawhessi huusuna hasinna payi:
“Kuyyaqqe annattay Ano Miʼaye Qhawhitoosi hiʼenu wointekki okayna,
naqharray huni hiʼinte.
23 Apayni koro hunena payana ‹Haadhi kulay Kristoose hassaadhi!›
Taakinti ‹Xaysa koranaki qaghi!›
Payni olona kala ashshe.
24 Qhamo ghawwaqako moontito ibhaqhi payni xaytoosi hinaasenu haka hinaase saasa haahisi kula okaye Ano Miʼaye Qhawhitonaka hasi kodhdhinti.
25 Naqharray olissa ye kodhamadhuna qhara’ita Ano Miʼaye Qhawhito rakko kishasiki an akkanipa dhalati hantu qaghakka yeshikkoy.
26 “Qhamossi perre Noohena kodhdhidhi kula okaye perre Ano Miʼaye Qhawhitonakka qhamussa kulakki kodhdhinti.
27 Noohe haki markapeema xullini saasa koro iyyiʼapa isi quka,
iʼille akkapa isi ille akkateesa,
perrisana qandhe patitatte iʼokayeppa olho kaasaasi patisonki. c
28 “Qhamusa kula perre Lootʼenakkad koru yiʼapa isi quka,
isi pitmadhapa isi lassadha,
dhishtosikka isi dhishadhapa mannadhdhessikka isi ghuppatadha.
29 Naqharray kuyyaqakosi Lootʼe piyye Setoomena kittatte lighina hatte pana tiinee moontiko qhamo irrawito dhipipa olho kaasaasi patisi.
30 Kuyaqakusa Ano Miʼaye Qhawhito naximbhaninaka qhamussa kulaki kodhdhini.
31 “Kuyyaqakusana qhawho manneete saappeete qagha maahxatto manneete kalla qaghaasi akkenu inni oodhdhu,
qhawho pashito qaghakka manne kula inni qaaku.
32 Into naxaye Lootʼesi helataaya!
33 “Qhawho qagho huusuusi pinnisadhe woʼa kaasay ihela dhapna,
kapay qhawho qagho huusuusi hela likkasipa teexu ippehsanna.
34 Kulay anhunena payana kalapkusana qhawho lakki hoore toʼotate ille qale rafna,
qhawho tookko iʼakkamna,
tookko ihaqhna.
35 Xiske lakki illeqalli yooqhne,
tootte iʼakkamnay,
tootte ihaqhnay.”
36 [“Qhawho lakki pashito ille qale kodhmo kodhanna,
qhawho tookko iʼakkamna,
qhawho tookko iʼhaqhna.”] f
37 Usundhdhekka hasi payeppa Uso kasqadhonki:
“Pogholho haani,
ata aha kula?”
Usokka inna payi:
“Allaqatho xayto oloku naafarisaami illaholi.”