Xiskatto Xiyyatesi Kokisatipa Qissadhina Lighno Hiisi
18
Iyyesuse kolladhampawhessi huusu qhamu kokisanneppa kuyyaqako kaasay ghissadhonki maallaki illighnuusi nuttorruyi.
2 “Taanynyiito toʼon ho Haallikkoosi ye ghaapipa koroossikka isiye kaanasiki katama toʼonna qagha.
3 Katamisana kittattekka xiskatakko xiyyatte qagha,
isekka kuyyaqako kaasakki tanynyitusa kula aʼashshitipa isi hasana papaya:
‹Parakara haayyuusi ye itʼtʼoospa rakko haayyusika yeʼemmay!›
4 Tanynyitusakka kuyaqqe kishana qalliite tiisisi yena apaqhunaki oladhi,
xaysa tupetta kapay hasi payipa hela ghadhoy:
‹Haallikkoosikaki anu ghaapuppa korossikka isi anu kaanasi payni,
5 xiskaththo xiyyatti qhooti ye rakisti maallay rakko hiisisi annu emminama apayni hasaki anu kodhu payni kuyyaqako kaasakki hoholtipa isiye rakkisay›.”
6 Pogholho Iyyesusekka hasinna payi:
“Olho taanynyitto maghakusa payiisi hela sheghindha.
7 Emma Haallikko hessi qholadhipa awnepa kuyyaqate isi Uso kula riirapa isi ghissadhanu qhaqhitte yenu qhaqhni kati?
Usundhe kʼarkʼarenu iʼolanna payyo?
8 Kulay anhunena payana haattakki waannipa nu qhaqhu,
naqharray kuyyaqako Ano Miʼaye Qhawhito anpiyyi kula okayina dhukkaysadhesi an tayna tannu?”
Lighno Feresawititopa Qhawhossi Kʼaratʼo Sooqana
9 Nakaleemakka Iyyesuse korossi pukkaqate tuusundhina koro pare qagha hekodhapa koro hubhaasi kapay isi dhafasikki emmipa lighnusi nu qallu.
10 “Qhawho lakki ghissootenu Manne kʼulkʼullawhe kula ashshi,
qhawho tookko feresawito,
qhawho tookko hokʼaratʼtʼo sooqa.
11 Feresawitosi ishshikkaaripa qhoota pukkaqate tuusunu hasa payuppa ghissadhu:
‹Haallikko haayyu,
ano qhamo koro hubha kula:
ho koro sara,
homagha,
homaasa,
taakinti qhamo qhawhu kula hokʼaratʼtʼo sooqa qhoota anu kodhdhu maallay anho kalataysadha.
12 Ano torppana kittatte kuyyaqako lakki ayiʼo male ghayyipa isan ghissadha,
olhan tayadhi hudhdhannaka tookko anateexa›.
13 “Naqharray qhawhossi kʼaratʼtʼo sooqa xayto sikaapasi shikkaarippa montaqila emmadhekaki ye woʼu,
naqharray uuma hela eero tutubhipa isi hasa paya:
‹Haallikko haayyu,
ano cʼuppolakkoye akko ye hxur!›”
14 Iyyesusekka inna payi:
“Kulay anhunena payana qhawhusa lakkina qhawho Haallikkito miintate pare kodhdhipa manne huusu kula qaakkoy qhawhossi kʼaratʼtʼo sooqama feresawito qandhikka.
Moʼo malla payni qhawho pukkaqate tuusu kaanasa kaasay itakuyna,
hohe takkoosa kapay ikaanasamna.”
Iyyesuse Qhamu Miʼaadhe Takkumaasi Saki
(Maat. 19:13-15; Mar. 10:13-16)
15 Iyyesuse qhamu ghaghapadhininukki koro miʼaadhe hanna dhaladhettay Uso kula okayi,
kolladhampawhe iʼolissaasi hiʼenna korossisa inna dheehadhe.
16 Naqharray Iyyesuse miʼaadhessi he kulakki ooqipa hasa payu:
“Miʼaadhe iyye kula okayeppa olo dhawrase,
Ahxase Haallikkito qhooti hisi hasa lighoomanu kodhdhiti maallay.
17 Dhuke anhune qalli:
qhawho ahxase Haallikkitoosi qhamo miʼayatte ye akadhu kaasay yena xullinikka.”
Rafisampakko Shorokitto Koro Ayhutattena
(Maat. 19:16-30; Mar. 10:17-31)
18 Rafisampawhessi koro Ayhutattena kittatteki qhawho tookko okayipa hasa napayuppa kasqadhu:
“Xorxito kollisampakko haayyu,
qagho perre yehume sheeghenna tayadhenu moʼo an konni?”
19 Iyyesusekka hasinna payi:
“Moonukka xorxito yela payti?
Haallikko toʼokko malekki xorxito ye qaghiye.
20 Ato hayidhdhesi aʼaray,
usundhisakka:
‹Olo maasi,
qhawhoosi olo poghi,
olokereqi,
aayya olo masakari,
paappo haahupa yaaye taahuusi kaanas.›a”
21 Qhawhossikka inna payi:
“Hayidhissa kaasaasi miʼayunkonuka paayyipa isan tiqitadha.”
22 Ihhasa payina Iyyesusekka iʼapaqhipa hasa napayu:
“Hasa payni olho toʼoko hola haqhi,
ashshapa olho ashsheeghti kaasaasi lassoppa kodhattisaasi xiyyawhenu qhootoma shorokunko Moontito illa holiisika tayadhintiye.
Xaysa tupettay ye kala okayay.”
23 Naqharray qhawhossi iqallitisaasi apaqhina qhooti shorokunko dhamma sheeghi maallay uumi azani.
24 Iyyesusekka qhawhossiisi iʼeemipa hasa payu:
“Koro shorokunte kisha sheeghanu Ahxase Haallikkito kula xulle uumi nuhaxti!
25 Shorokitto Ahxase Haallikkito kula xullinana kaanta kaala bhaaqhe marfatena xullina kiwoyyina.”
26 Koro qallitisay apaqhi ippayana:
“Lammi yaxa dhine alkasna?”
27 Iyyesusekka ippayina:
“Olho qhawhonu ye alkasami Haallikkottay iʼalkasama.”
28 Petʼiroosekka inna payina:
“Haadhi Ine olho ansheeghni kaasakki an hela hxurripa hokala isana shshaani.”
29 Iyyesusekka hasinna payi:
“Dhuke an hune qalli,
qhawho Ahxase Haallikkito maallay,
manneesi taakinti naxayeesi taakinti qassawhepa qharummaadheesi taakinti paappopa yaayeesi taakinti miʼaadheesi hela hxuri,
30 perrina xarghgho uuma ghula,
holuppa perrisa okaynanakka qagho perre yehume sheeghena hoyetayanni ye qaghi.”
Iyyesuse Qhamu Fartepa Haqe Huusu Kaaʼita Izzxa qalli
(Maat. 20:17-19; Mar. 10:32-34)
31 Iyyesusekka kolladhampawhe hudhdhanpa lakkissi qawniki he kula ooqipa hasa na payu:
“Haadhi Iyyerusaaleme kulakki an ashshini,
olhossi hxuumampawhe qhoota Ano Miʼaye Qhawhito kaaʼita tooxe kaasay idhdhikkana.
32 Korossi Ayhutatte ye kodhdhunukki iyye likkasneppa ye teexonki,
usundhekka iyyela xikkinanki,
iyyedhaghisnanki,
waawekka ya tuffonki,
33 yekarafonki iyye poghnankikka naqharray kuyyaqako izxana fartatte anhaqana.”
34 Naqharray usundheesi olissa Uso qalladhi kaasay yenu xulukka,
olhu payikka yenu aramu,
qhamu qhoota moyto kaaʼita qalladhikka ye aronki.
Iyyesuse Qhamu Qhawho Taafakko Dhinisi
(Maat. 20:29-34; Mar. 10:46-52)
35 Iyyesuse ikkatama Iyarkonna kaanta itʼtʼuyina qhawho taafakko ho onkatte hinaseete qakkadhapa isi santipaadhdhe ghissadha qagha.
36 Taafakkossikka waarshossi onkaaʼita lighghaasiki apaqhipa hasa payuppa kasqadhu:
“Ata olissa moʼo?”
37 Usundhekka inna payenna:
“Kulay Iyyesuse Naazrateki xaynaʼita lighgha”
38 Taafakkossikka hasi payipa riiru:
“Miʼaye dhaawite Iyyesuse,
akko maʼala ye qhararrsadh!”
39 Korossi naqharaʼita ashshakka:
“Kʼampay!”
Kinna payipa qheeru.
Naqharray uso hasi payipa uumatte riiru:
“Akko Miʼaye dhaawite maʼala ye qhararrsadh!”
40 Iyyesusekka ishshikkaaripa qhawhossiisi qhamu Uso kula okaasnenu usundhe hayu,
iʼuso kula okaynna hasinna payi:
“Moʼo anhokonnika wooti?”
41 Taafakkossikka inna payi:
“Pogholho haayyu,
xayto hiʼe awwoʼi!”
42 Iyyesusekka inna payi:
“Emmadhi!
Dhukkaysadhe taahu ihho dhinistiye.”
43 Taafakkossikka haattakki xayto hiʼipa Haallikkoosi inni kaanasana haquppa Iyyesuse kala ashshoy,
waarsho olissaasi hiʼi kaasay Haallikkoosi kaanasu.