Iyyesuse Qhoota Akkeeti Kollisi
10
Iyyesuse haahanu ihhaqipa piyye Yihuttay kolle Yortanoosenna afeete qagha kula ashshoy.
Waarshokka ihholipa xayta xaytanu Uso kapeema illa holu,
qhamosi qharo kula usundhe kollisu.
2 Feresawaadhdhe tookke tookke themmenukki Uso kula okayppa hasa payonkippa kasqadhonki:
“Qhawho naxaye thuusuusi ishshighenu ippayamti?”
3 Iyyesusekka ina payina:
“Emma Muuse qhootisa kaaʼita moʼo ihhune hayi?”
4 Usundhekka hasi payeppa nu holasonki:
“Muusea kulay qhawho warakʼate ishighatte innu teexi payni ishigheesi qhamu alkasninu ippayi.”
5 Iyyesusekka ihholi hasa na payu:
“Kulay Muuse dhikkitno saqqe haahundhi fafe maallakki hikkisi hune tooxi.
6 Naqharray ‹qharraʼita Haallikko tʼiirakkopa xiskatho kodhipa uumu›b,
7 Hussa maallay qhawho paappopa yaaye thuusuusi ihhela hxurrapa naxaye thuusu illay isi toʼoke kodhdhe.
8 Usundhe lakki pishkko tookko ikkodhdhine,
xaysanu koru usundhe pishko tookko dhiishay lakki qandhikka.
9 Lammi he Haallikko tookke illa kodhiisi qhawho inni illena kalla reehu.”
10 Immanne kula holenna kolladhampawhe ihholleppa qhootisa kaaʼitha Iyyesusesi kasqadhonki.
11 Usokka hasi napayi:
“Qhawho naxaye thuusu ishighipa isi pilate akka immaasa;
12 qhamussa kula xiskatho xalho hisiisi ishighappa isi pilakko akkadhikka immaasa.”
Iyyesuse Qhamu Miʼaadheesi Saki
13 Iyyesuse qhamu ghaghapanninukki koro miʼaadhettay Uso kula okayi,
naqharray kolladhampawhe inna dheehadhe.
14 Iyyesusekka iʼolisaasi hiʼina ighghithipa hasana payu:
“Miʼaadhe iyye kula okayeppa olo dhawrase,
Ahxase Haallikkito qhooti hisi hasa lighoomanu kodhdhiti maallay.
15 Dhuke an hune qalli,
qhawho Ahxase Haallikkitoosi qhamo miʼayyatte ye kodhdhu yena xullinikka.”
16 Miʼaadhesiisi sasakaradhoppa xarghgho huusu nasaappa ghapadhuppa sakkoy.
Qhawho Shorokittosi
17 Xaysana ihhaqipa isi ashshana qhawho tookko herapa okayu nakala ghulladhuppa hasana payu:
“Xorxiththo kollisampakko haayyu,
qagho perre yehume sheeghe tayadhenu moʼo an konni?”
18 Iyyesusekka hasina payi:
“Moonuka xorxiththo yela payti?
Haallikko toʼokko male xorxiththo ye qaghiye.
19 Atho hayidheesi aʼaray,
usundhisaka:
‹Olo poghi,
olo maasi,
olo kereghi,
ayya olo masakkari,
korossi olo tataki,
paappo haahupa yaaye thaahuusi kaanas.›”c
20 Qhawhossikka inna payina:
“Kollisampako haayyu,
hayidhdhisa kaasaasi miʼayunkonuka paayyipa isan tiqithadha.”
21 Iyyesusekka iʼeemmi cʼikadhoppa hasana payu:
“Olho toʼoko pattakki hola haqhi:
ashshapa olho ashsheeghti kaasaasi lassoppa kodhaththissaasi xiyyawhenu qhootoma shorokunko Moonthito illa holisikka tayadhintiye.
Xaysa tupettay yekala okayay.”
22 Naqharray qhawhossi iqqallithisaasi apaqhina uumi asani,
qhooti shorokunko dhamma sheeghi maallay na maghipa ashshoy.
23 Iyyesusekka illaghghammi he kaaʼita xayto emmuppa kolladhampawhatte hasa payu:
“Koro kodhaththe dhamma sheeghanu Ahxase Haallikkito kula xulle uuminu haxti!”
24 Kolladhampawhe huusukka qallithisattay idhdhahxhxe,
Iyyesuse kapay ihholi hasana payu:
“Dhelle haayyu,
koro kodhaththeema hxaso kodhanu Ahxase Haallikkito kula xulle uumi haxti!
25 Shorokitto Ahxase Haallikkito kula xullinana kaanta kaala bhaaqhe marfatena xullinaki woyyina.”
26 Kolladhampawhekka uumi dhahxhxeppa isi hasa illena papaya:
“Lammi yaxa dhine alkasna?”
27 Iyyesuse usundhe kulakki emmadhipa hasana payu:
“Oli qhawhonu ye alkasami,
Haallikkito kaanta kapay hasa qandhikka,
Haallikkottay olho kaasay iʼalkasama.”
28 Petʼiroosekka inna payina:
“Haadhi inne olho kaasakki an hela hxurripa isa ho kala ashshaani.”
29 Iyyesusekka ihholipa hasa payu:
“Dhuke an hune qalli,
qhawho qhoota Hayyupa qhoota Wenkelatte maallay mannessi takki qassawhepa qharummaadheesi takki alawweesi takki paappopa yaayesi takki miʼaadheesi takki pashshe kaasaasi hela hxuri,
30 ghoghore perri hantunna illa qhawho mannaadhdheesi qassawheesi qharummaadheesi alawweesi yayyadheesi miʼaadhepa pashshe xarghgho dhippa iʼakkanni;
piyye qhaatʼe qhawtawhessi okayinanaka qagho perre ye hume sheeghena hoye taayyani ye qaghi.
31 Naqharray koro kisha ho inthawi ikkeenna,
koro keetikka iʼinthawna.”
Iyyesuse Isxi Qhoota Fartepa Haqe Huusu qalli
32 dIyyerusaaleme kula iʼashshapa isi onkatte qaghana,
Iyyesuse innu inthawipa isi ashshana kolladhampawhe uumi dhahxhxeppa he uso kala ashshakka ghaaponki.
Holuppa kolladhampawhe hudhdhanpa lakkiisi qawni he kula ooquppa hasa payuppa olho Usooma kodhdhamanaasi nu qallu:
33 Hasakka na payu:
“Haadhi Iyyerusaaleme kulakki an ashshini,
Ano Miʼaye Qhawhitoosi intawampawhe kʼeesadheetepa kollisampawhe Hikkattenuki ye likkasneppa ye teexonki.
Usundhekka qhaqhitte farttatte Iyyeema qhaqhneppa koro ye koro Ayhutatte kodhdhunu Ye likkasonkippa Ye teexonki.
34 Usundhekka Iyyela xikkinanki,
waawekka yatuffonki,
ye karafonki,
Iyye poghnankika,
naqharray kuyyaqako issxi tupettay fartatte an haqana.”
Kasqo Yaykʼoopepa Ho Yohannise
35 Xinkisana dhelle Zeptiwoose,
Yaykʼoopepa Yohannise Uso kula okayipa hasa na payonki:
“Kollisampako,
olho anhola kasqanni kaasay qhama ine kodhintinukki an hola wooni.”
36 Usokka ina payina:
“Moʼo an hune konninukka woote?”
37 Usundhdhekka inna payenna:
“Kuyyaqako kaanastte Thaahuna inena qhawho tookkoosi miskitto kaaqila tookkoosikka pixatte kaaqila qhamo hola qaakkaninu inne pay.”
38 Iyyesusekka ina payina:
“Olho aghghisateesi huni artte.
Rakkossi ano akkni ye qale akkadhepa shoxattesi an shoxaniisi ye qale shoxadhe aʼalkasnanku?”
39 Usundhdhekka inna payenna:
“Ee,
an alkasnaani.”
Iyyesusekka ina payina:
“ Rakkossi ano akkni ye qale akkanakku,
shoxattissa an shoxaniisikka ashshoxananku,e
40 naqharray miskittopa pixatte thaayyu kaaqila qakkadhe hinnu gharsamtinu dhiishoy Ano qaandhiki teexna.”
41 Kolladhampawhesi hudhdhan iʼolisaasi apaqhenna Yaykʼoopepa Yohanniseema inna miiroodhe.
42 Iyyesusekka illeemi usundhe ooqipa hasana payu:
“Rafisampawhessi koro ye koro Ayhutatte kodhdhunna payama qhamo irrafisepa inthawampawhe huusundhi qhamu humnattay usundhe rafisesa aʼaranku.
43 Naqharray hune qhamussa kula kodhe ye hune gheeqasti;
husana kaanta qhawho hunena kittatte ghule woʼa qagha payni ihhuneesi kodhampako kodhdha.
44 Laadhdhi qhawho hunena ghule woʼa,
iqhqhawho kaasannu aylle kodhdha.
45 Qhamusa kula Ano Miʼaye Qhawhitokka qhamu koro ye kodhaninu qandhimma koronu qhama kodhannipa he kishanu napse thayyuusi murra kodhapa teexanukki an okayi.”
Iyyesuse Qhamu Qhawho Taafakkossi Pertʼemewosena Ehxhxe Dhinisi
46 Xaysa tupettay kathama Iyyarko kulaki okaye.
Iyyesusepa kolladhampawhe huusu waarsho kisha illi ikkathama Iyyarkona kittatte lighghana qhawho taafakko miʼaye Tʼemewoose ho ana payi Pertʼemewoose ho onkate hinaseete qakkadhapa isi santipaadhdhe ghisadha qagha.
47 Usokka Iyyesuse Naazrate qhamu kodhdhisa iʼarina hasi payipa riire paayyu:
“Miʼaye Taawite Iyyesuse,
akko maʼala thaahu ye qhararsadh!”
48 Koro kishakka:
“Kʼampay!”
Kinna payipa qheeru.
Uso kapay hasi payipa uuma riiru:
“Akko Miʼaye Taawite maʼala thaahu ye qhararrsadh!”
49 Iyyesusekka ishshikkaarippa hasana payu:
“Into ooqa.”
Usundhekka qhawho taafakkossinna inna payenna:
“Lammi kokisadhpa haqamma ihho ooqaye.”
50 Usokka laalle ihhela k’uripa haquppa Iyyesuse kula okayu.
51 Iyyesusekka ina payina:
“Moʼo anho konni wooti?”
Qhawho taafakkossikka inna payina:
“Kollisampakko haayyu,
xayto hiʼe an woʼi.”
52 Iyyesusekka ina payi:
“ Dhukaysadhe thaahu ihho dhinistiye ashsha.”
Qhawhossikka haattay xaytoosikki hiʼipa Iyyesuse kala onkaʼitha ashshoy.