Iyyesuse Kaanastte Dhammatakki Kathama Iyyerusalame Kula Xulli
11
Iʼiyyerusaaleme kula ittʼuyeppa ghodhdhadhesi Ghupo Ekerkitona kaanta qagha Petefaakepa Pittaaniya hxafonkinna Iyyesuse kolladhampawhe huusuna kittatte qhawho lakkisiki ooqipa hasana payuppa eraku:
2 “Ghodhisa hunena miinatte qagha kula ashshindha;
xaytusana ahxafte payni,
hattay miʼaye harratte the ashapi apar qhawho yena hadhdhusa hxafinteyye ishighappa hassa kula okasankuttay.
3 Yaxakaki hunena iyyana:
‹Moonukka ishighte?›
Pa isi hune kasqadha payni napaya :
‹Pogholhonu qhooti gheeqasti maallay ihhollapa minakalte holasu.›”
4 Usundhekka iʼashsheppa miʼayesi harratte the onkatte kaanta manneete ghinteema ashapiisi tayonkippa ishighonki.
5 Koro xaytusana shikkaarana kittatte tookke tookke hasi payeppa kasqadhonki:
“Miʼayisa harratte moʼo ihhune kontinukka ishighte?”
6 Usundhdhekka olhossi Iyyesuse napayiisi innu qallenna korossikka iʼusundhe hxuri.
7 Miʼayeesi harratteesikka Iyyesuse kulaki okaasseppa laallaadhdhe huusundhiisikka nasaappeema qafonkippa Usokka nasaappa qakkadhu.
8 He kisha laallaadhe huusundhiisiki onkeema qafe,
tookkeka qharre kaareete xeesumaski qhiitʼeppa isi qafanki.
9 Koro inthawipa ho keeti kaasay:
“Hosayna!a
Homakaxko Pogholhitottay okaaayya ho sakami!!
10 Ahxasesi paappo haani Taawite okayna the sakamti;
Hosayna moonthitoka ikkodhdha!”b
Ki ppayeppa isi riira.
11 Iyyesusekka Iyyerusaaleme hxafnittay hattay ghinte Manne Kʼulkʼullawhatte kulaki xulipa olho xaytusana qagha kaasaasi iʼeemi tupettay xayto qhooti awnuyi maallay kolladhampawhessi hudhdhanpa lakki illi ghodhdhe Pittaaniya kula ashshonki.
Iyyesuse Qhamu Karkossi Pelese Ana Payisi Qhiicʼi
12 Haqhayna sinkatto ighghodhdhe Pittaaniyanu holankina Iyyesuse ippuffi.
13 Usokka kaarkko laasite ligha ho anna pelese payi ho aahxe uuma naraadhesikki sikapnonu tayipa yaxaaray awshitakko na qaghna payuppa na kula ashshoy;
naqharray inna kanta hxafina leeqosi kaarkko pelesatte na awshi qhooti ye kodhdhu maallay aahxe malettay olho pile yena tayukka.
14 Hussa maallay Iyyesuse karkossi pelesatena hasi na payi:
“Xaynu koru yaxakka ini hola awshitakko haahu yiʼu!”
Ihhasa payina kolladhampawhe olisaasi iʼapaqhe.
Iyyesuse Koro Manne Kʼulkʼullawhatte Moore Xorghadhaasiki Lihasi
15 Iyyerusaaleme kulaki okaye,
Iyyesusekka ghinte Manne Kʼulkʼullawhatte kula okayipa koro moore lassadhapa isi xorghadhaasi lihhase paayyu;
koro piradhdhe oohadhana tʼarabheesadhe,
koro qalalo lassadhanaka qakkathaane lallaaghoy.
16 Yaxakka qhamu ye mahxaththo dhooqhanppa ghinte Manne Kʼulkʼullawhattena lighghunu inna koxhxhi.
17 Hasakka payupa usundhe kollisu:
“‹Manne Hayyu waarsho kaasannu manne ghissootatte kipaayyame› olo payuppa atooxoy?
Naqharray hune horro keriqe na bhadhdhameka kotte.”c
18 Iʼhhasa qalladhana inthawampawhesi kʼeesadheetepa kollisampawhe Hikkatte qhooti apaqhe maallay qhamu malaala poghnenukki na onke gheeqadhe paayye,
naqharra waarsho kaasay qhooti kollinko huusuttay dhahxhxi maallay ighghaape.
19 Xayto iʼawnuyi tupettay Iyyesusepa kolladhampawhe huusu kathamana kittatti lighghe.
Kollinko Kaarkko Pelesatena Tayyami
20 Haqhayna sinkatto isanoʼita ashshankina kaarkkosi pelesate kala xissenuki haxawipa hiʼonki.
21 Petʼiroosekka olhossisi ihhelataayipa Iyyesusena hasa payu:
“Ii!
Kollisampako haayyu,
ata kulay karkosi pelesatte aqhicʼiti ihhaxawi!”
22 Iyyesusekka ihholipa hasana payu:
“Haallikkoosi dhukkaysadha.
23 Dhuke anhune qalli,
yaxakaki saqakottay dhukkaysannapa ye he ghadhu male ghupuna napayu:
‹Xaytuna roppamipa ashsho kala passo kitta haththapama› payni innu kodhdhamanna.
24 Hussa maallay olho aghghisatte kaasaasi qhama akkatesa akkotteppa dhukkaysadhanku payni ihhune kodhdhamanna.
25 Paappo haahundhi moonthito qaaka cʼuppo haahundhiisi qhamu hune hxurrinu hunekka aghghissootenu shikkaarttenna qhawho hunena dhappi isi qagha payni nu hxurakko hxura.”
26 [“Naqharray huneki qhawho hunenna dhappinu huni hxurakko hxurte payni,
Paappo haahundhi moonthito qaakakka cʼuppo haahundhiisi ye hune hxurri.”]
Kasqo Iyyesuse Humna Hunkattay Qhamu Kodhadhi Kaʼita itʼtʼuyi
27 Ihholleppa karo Iyyerusaaleme kula okayonki,
Iyyesusekka isi Manne Kʼulkʼullawhe kaaʼitha lallaghamana intawampawhe kʼesadhdheetepa kollisampawhe Hikkatte pana xaadhighghe Uso kulakki okayeppa
28 hasa payonkippa kasqadhonki:
“Ghulno hunkatakka oli kaasaasi kotti?
Husiisi qhama kontinu yaxa ho ghulno teexi?”
29 Iyyesusekka hasi napayi:
“Anokka kasqo tookko anhune kasqanni;
hunekka ye holasa,
Anokka oli hasa lighoomaasi ghulno hunkattay qhama kodhisa an hune qallinaye.
30 Into ye holasa;
shoxatte Yohannise moontonukki okaytim?
Qhawhto kaanta?”
31 Usundhdhekka hasi payeppa illena laaghadhonki:
“‹Moonthonukki okayti› anna payni payti ‹Eeppa moʼo maalla huni dhukkaysadhonku?›
Ki inena payni.
32 Emma ‹Qhawhto kaanta› ki an paynaani?”
Qhamu ye hasa paynenu waarsho kaasay Yohannisesi hxuumampakko dhukkattesa qhooti dhihadhi maallay ighghaape.
33 Hussa maallay:
“Ini arrika” ki ppayeppa Iyyesusenu holasonki.
Iyyesusekka inna payi:
“Lammi Anokka ghulno hunkattay qhama oli kaasaasi kodhisa anu hune qallinikka.”