Iyyesuse Humna Hunkattay Qhamu Kodhadhisa Kasqonu itʼtʼuyi
(Maat. 21:23-27; Mar. 11:27-33)
20
Kuyyaqako tookko Iyyesuse ghinte Manne kʼulkʼullawhattena iwwaarsho kollisapa ote xesaasi isi torruyana intawampawhe kʼesadheetepa kollisampawhe Hikkatte xaadhighghe illay Uso kula okayi.
2 Usundhekka hasi payeppa Uso kasqadhonki:
“Into ine qalli,
oli kaasay humna hunkataakki akkotti?
Humnisasi yaxa ho teexi?”
3 Usokka hasi payipa nu holasu:
“Anokka kasqo tookko an hune kasqanni into ye qalla,
4 Shoxatte Yohannise montikki okaytim korito kaanta?”
5 Usundhdhekka hasi payeppa illena laaghadhonki:
“‹Montikki okayti› annapayni payni ‹Eepa moonu isi huni dhukkaysadhonku?›
Kiʼinena payni.
6 ‹Korito kaanta› kannapayni payni Yohannise qhamu hxuumampakko kodhdhisa waarsho kaasay qhooti dhukkaysadhi maallay koro awrughettakki ine hatapni.”
7 Hussa maallay hasi paye ppa nuholasonki “Ahanu qhamu okaytisa ini arrikka”.
8 Iyyesusekka inna payina:
“Lammi Anokka oli kaasaasi humna hunkattay qhama kodhisa anu hune qallinikka.”
Korossi Dhishto Woynatte Hxaayyansadhina Lighno Huusu
(Maat. 21:33-46; Mar. 12:1-12)
9 Xaysa tupettay Iyyesuse lighnusiki iwaarshonu torruye paayi:
“Qhawho toʼonki dhishto woynatte dhishadhipa koro qhotadhanu hxayyuppa karo piyye pile kula ashshoppa kuyaqqe kisha oladhu.
10 Xinkesi ana awsho woynatte yuuti ihxafna qhamu ashshinipa awshossi woynatte nu akunu kodhampakko huusuusi korossi qhotadha kula eraku,
naqharray korossi qhotadha kodhampako huusuusi ittubhbhepa heneqitte hela ghoronki.
11 Nakaleemakka kodhampako pileesiki eraki,
usoosikka itubhbhepa palamisonkipa xarghghe heneqitte ghoronki.
12 Hantukka ihholipa kodhampakko izxasi eraku,
hussasikka itubhbhepa payshesonkippa lihasokippa kʼuronki.
13 Xaysa tupettay paapposi dhishto woynattena hasi payi:
‹Xaynu koru mankonni?
Miʼayesi haayyu an cʼikadhiisiki anerakini,
yaxaaray Miʼaye haayyuusi ikaanasnanki!›
14 Naqharray korossi qhotadha miʼayesiisi ihiʼenna hasi payeppa suladhonki:
‹Husi kulay dhaxaalmakko huusuye,
okayapa poghnipa pashusakka iʼineesi haqha!›
15 Hussa maallay pashosi dhishto woynattena kittatte lihasonkipa poghonki.
“Lammi paapusa dhishto woynattena qhotampawhisaasi mali paasini?
16 Tannuy paapusa dhishto woynattena iʼokayna qhotampawhisaasi bheqhupa,
dhishtusa woynateesikka koro pilenu teexu.”
Korossi iʼolissaasi apaqhina hasi payi:
“Olho hasa ligha ikkodhdhamadhe hxura!”
17 Iyyesusekka usundhe kulakki emmadhipa hasa payu:
“‹Emma awrukkosi koro manne ghubhadha dhafi,
uso kirito paayyootatea kodhdhu› payamipa tooxamoy b moʼo ihiʼaasi?
18 Qhawho awruku sappeema rani kaasay immusuqhsuqhna,
qhawho awrukusa uso sappeema laaghami iyyoqhamna.”
Kasqo Qhoota Kipirro Qhaqhe Kaaʼita itʼtʼuyi
(Maat. 22:15-22; Mar. 12:13-17)
19 Kollisampawhe hikkattepa intawampawhe kʼesadheete qallitisay teusundhe ligha qhamu kodhdhitisa iʼareppa ghape isinna woʼa,
naqharray waarshosikki ghaape.
20 Iyyesusessi qhamu ghapnepa rafisampakito rafise tuusupa humna huusu kula likasonkipa teexonkinuki woʼeppa olhu pako huusuna qalladhittay tʼalafenu korossi koro pare qagha hekodhaasi illaytakkonu nakula erakkonki.
21 Hessi aʼillaytakkonu erakikka iʼashsheppa hasa payoonkippa Uso kasqadhonki:
“Kollisampako haani,
Ato qhama dhukkeesi torruytipa isa koro kollisappa yaxanuka isi atulighghatipa onke Haallikkito dhukateesika isakkoro kollisasa an araani.
22 Emma Kʼesaarenu kipirro kappare igheeqasam yegheeqasi?”
23 Naqharray Uso dhohmunte tuusundhisiki inna ʼaripa hasa na payu:
24 “Into tinarettay okayapa ye hiʼasanku,
santipina tooxe haaxa pana qhawhusa naqagha yaxi lighi?”
25 Usundhekka:
“ho Kʼeesaarekki naqagha” kipayeppa nu holasonki,
Usokka inna payi:
“Lammi ho Kʼesaareesi Kʼesaarenu teexa,
ho Haallikkitoosikka Haallikkonu teexa.”
26 Hussa maallay qalliitesi ikoro minteema qalladhittay tʼalafeesi ye alkasonki,
laadhdhi qalliitesi Uso nu holasitakki dhahxhxeppa hela kʼampayonki.
Qhoota Fartate Haqepa Qhoota Akkeete
(Maat. 22:23-33; Mar. 12:18-27)
27 Setukʼawaadhesi payana koro farri haqamakko yesheeghina kittatte koro tookko tookko Iyyesuse kula okayipa hasa napayuppa kasqadhu:
28 “Kollisampako,
Muuse kulay hasi payipa tooxoyc ‹Apayini qhawho tookko miʼaye yedhalunna fari payni qaso huusu inna xayisasana xullapa qharunko huusunu sanynye ghaqqu.›
29 Eeppa lammi manne tookkatte shambho taxxanki qagha,
usundhissana kittatte qharunko naxaye iʼakkipa miʼaye yedhalunna faru.
30 Honakala qaghakka naxulluppa ye miʼaye dhaluna faru.
31 Hoʼisxakka qhamussa kulakki na xulli,
usundhisa taxxan kaasay onke hasa lighattakki naxuxuleppa miʼaadhe yedhalonkina farronki.
32 Dhikkatate naxayesika iffarti.
33 Lammi usundhisa taxxan qhooti aʼakke maallay kuyyaqako koro farri haqina naxaye taaxakki kodhdhinti?”
34 Iyyesusekka hasi payipa nuholasu:
“Koro piyye qhaatʼete qaaka iʼakkapa isi akkadha,
35 naqharray koro fartatte haqanapa piyye qhaatʼesi okayinana isi qaakna ye akkini,
ye akkannikka.
36 Erkampattadhdhe kula qhooti kodhdhe maallay xaynu koru yefarrineka,
miʼaadhe haqamakito qhooti kodhdhe maallay usundhe Miʼaadhe Haallikkito.
37 Muuse qhooti hattesi ghusakito kittatte sipinana kaaʼita hasi payipa tooxoy:
d‹Ano Waako Aprihaameppa ho Yisihaakʼe pana ho Yaykʼoope› payyo huusuttay koro farri qhamo ihaqanisaki hiʼaasi.
38 Kaasay Usottay heqagha qhooti kodhdhe maallay Uso Waako koro qaghitona dhiishay ho koro farrina qandhikka.”
39 Kollisampawhe hikkatena kittatte tookke tookke inna payenna:
“Kollisampako,
olho xeesa athorruyti.”
40 Xaysanu koru qhawho shahxumipa Usoosi kasqadhu ye qaghikka.
Kristoose Miʼaye Haaxa?
(Maat. 22:41-46; Mar. 12:35-37)
41 Xaysa tupettay Iyyesuse hasinna payi:
“Keenni koro moonuki payina:
‹Kristoose miʼaye dhaawite›?
42 Moʼo malla payni,
dhaawite pukkaqate tuusuna Matʼaafa Kodhatatena e
‹Pogholho,
Pogholho haayyuna hasinna payi:
43 parakaradhe haahuusi
luhhe haahu kalay hakan laaghni saasa
yela miskitto koray qakkadh.›
44 “Lammi dhaawite Usona Pogholho payi payni mali miʼaye huusu kodhdhe alkasni?”
45 Koro kaasakka iʼusoosi apaqhasana kolladhampawhessi huusuna hasinna payi:
46 “Helaallaadhdhe sikaapoma urkeesadhapa isi xayto kaasay ashshanko woʼapa xayto mooratenakka isi xasatto cʼikadha,
manne ghissootattena kalakka xayto kaanasami,
holuppa manne anayiʼo gharisinakka qakkatte kaanasamti gheeqana kalla hetiqitadhindha
47 Usundhisakka mannadhdhe xiske tʼiire nafaritinaki heneqqe kodhe,
koronu he hiaasenukka ghissoote tuusundhiisi issisikapoosa,
korussa qhaqhitte maghaki akkanni!”