Lighno Hessi Pasho Dhishto Woynatte Hxayyansadhena
12
Nakaleemakka Iyyesuse hasi payipa lighnottay oliisi qale paayyu:
“Qhawho toʼonki dhishto woynatte dhishadhi,
usokka pashossi dhishto woynateesi ohinuppa hxohxnossi ana awshe woynatte tʼipniisikka qhotoppa gharisu,
thayho awrugheete na ghupadhu.
Xaysa tupettay pashossi dhishto woynateesi koro qhothadhanu hxayyuppa piyye pile kula ashshoy.
2 “Xeeressi ana awsho woynatte yuuti ihxhxafenna qhamu ashshinpa awshosi woynatte nu akkunu aylito huusuusi korossi qhothadha kula eraku.
3 Naqharray usundhe ighghapepa thubhbhonkippa heneqitte hela ghoronki.
4 “Lankakka holuppa ayle pileesi eraku,
korossi qhothadhakka pukkaqateemi bhaqhaseppa palamisonki.
5 “Nakaleemakka ippilaakko erakina ippoghe;
he kisha iʼerakina tookkeesi iththubhbhe,
tookkeesi ippaaxe.
6 “Hantukka qhawho ihhollipa erakuki sheeghi,
ususakka miʼayesi huusu icʼcʼikadhi.
‹Miʼaye haayyuusi ikkaanasnaki.›
Payipa dhikattate usoosi eraku.
7 “Naqharray korossi qhothadha hasi payi:
‹Husi kulay tayampakossi.
Okaya poghnipa pashu iʼineesi haqha.›
8 Hussa maallay ghaponkippa poghonki,
pashosi dhishto woynattena kittatte lihasonkippa kʼuroonki.
9 “Lammi paapusa pasho dhishto woynattena mukonni?
Uso iʼokayna qhothampawhisaasi bheqhuppa dhishthusa woynateesikka koro pilenu teexu.
10 Kʼaalessi Matʼaafa Kʼulkʼullito kittatte iyyana:
‹Awrukossi koro manne ghupadha dhafi ihholi
awrukko dhikita manne ghapa kodhdhu.a
11 Husi kodhmo Pogholhito,
ehxhxe haanina miintatteka dhahxhxoote ikkodhdhi.›b”
12 Lighnussa iqqalladhi qhamu qhoota huusundhi kodhdhi iʼupadhe maallay ghape inna woʼe,
naqharray waarshosikki ghaapeppa hxuroonkippa ashshonki.
Kasqo Qhoota Kʼeesarenu Kipirro Kappare Kaaʼitha Itʼtʼuyi
13 Nakala Iyyesuseesi olhu qalladhittay tʼalafenukki Feresawaadhdhepa koro Herotiisena kittatte koro tookko tookko Uso kula erake.
14 Okayonkippa hasa napayonki:
“Kollisampakko haani,
Atho qhama qhawho dhukatte kodhdhitisa an arraani,
miinte qhawhito eemettay yaxanukka athu lighghatikka,
dhuke onke Haallikkitoosikka koro kollisti.
Emma Kʼesaarenuc kipirro kappare ighgheeqasam ye gheeqasti?
An texnaanmi an dhawrinaani?
15 Inne an kapparaanmi ini kappare?”
Naqharray Iyyesuse hepaseese thuusundhiisikki na arripa hasana payu:
“Moonukka ye themmite?
Into santipe toottettay okayapa ye hiʼasanku.”
16 Usundhekka santipe ana tinaare payitakki nu okaye.
Usokka hasina payipa kasqadhu:
“Qhawho santipina qagha yaxaasikki lighi,
makaxko santipissa atooxi haaxa?”
Usundhekka inna payenna:
“Ho Kʼesaare.”
17 Iyyesusekka hasi payipa nu holasu:
“Ho Kʼesaaresi Kʼesaarenu teexa,
ho Haallikkitoosikka Haallikkonu teexa.”
Usundhekka qallithessi innu holasittay idhdhahxe.
Kasqo Qhoota Haqamakko Koro Farrina Kaaʼitha Itʼtʼuyi
18 Xaysa tupettay Setukʼawaadhesi,
payana koro farri haqamakko ye sheeghina kittatte tookke tookke Iyyesuse kulaki okayeppa hasa na payonkippa kasqadhonki:
19 “Kollisampakko haani,
Muuse kulay hasi payipa tooxoy:
‹Qhawho tookko naxaye akkipa miʼaye ye dhalunna faru payni qaso huusu innaxayisana xullapa qhawhusa farinu sanynye ghaqu.›d
20 Lammi manne tookkatte shambho taxxanki qagha,
usundhisana qharunko huusundhi naxaye iʼakkipa ye sanynye ghaqquna faru.
21 Ho nakala qaghakka naxulluppa ye miʼaye nadhalunna faru;
ho izzxakka qhamussa kulakki kodhi.
22 Shapossi taxxani onke hasa lighattakki naxuxulleppa sanynye ye qaghonkina farronki,
dhikkatatte xiskathosikka iffarti.
23 Lammi usundhisa taxxan qhooti aʼakke maallay kuyyaqako koro farri haqina naxaye taaxaki kodhdhinti?”
24 Iyyesusekka hasi payipa nu holasu:
“Hune Matʼaaffe Kʼulkʼullawhepa humna Haallikkitoosi qhooti huni arte maallaki adhdhadhapite qandhi?
25 Koro farri ihhaqi payni qhamo erkampathadhdhe moonthito kulakki kodhdhini dhiishoy ye akkini,
ye akkannikka.
26 Naqharray qhoota haqamakko koro farrina kaaʼitha Haallikko hatte ghusakitona kittatte sipinattay Muusema moʼo qhamunna qaladhiisi Matʼaafa Muusena kittatte huni napaponku intaa?
Hussakka Haallikko hasi payi:
‹Ano Waako Aprihaamepa Waako Yisihaakʼe pana Waako Yaykʼoope.›
27 Hussa maallay Haallikko Waako ho koro qaghottay qaghana dhiishoy ho koro farrina qandhikka;
naqharray hune uuma adhadhappite.”
Hayo Kaasanu Ghula
28 Iʼille tamakadhana kollisampawhe Hikkatena kittatte qhawho tookko apaqhi,
Iyyesuse qhamu onke xeesattay usundhe holasisa iʼarripa Iyyesuse kula itʼtʼuyupa hasana payuppa kasqadhu:
“Hayo hayadhdhe kaasannu ghula hunka?”
29 Iyyesusekka hasi payipa nu holasu:
“Hayo hayaadhdhe kaasannu ghula haadhi husi:
‹Israeele apaqhasa!
Pogholho Haallikko haani,
Pogholho toʼokko;
30 Atokka Haallikko Pogholho haahuusi saqako haahu kaasattay,
napse thaahu kaasattay,
kʼalpe thaahu kaasattay,
humna haahu kaasattay cʼikadha.›e
31 Holankaka haadhi husi:
‹Ghormitto haahusi qhamo pukkaqate thaahu kula cʼikadha.›f
Hayidhdhi lakkinu ho ghula pilaakko ye qaghi.”
32 Kollisampakkosi Hikkatteka Iyyesusena hasina payi:
“Kollisampako haayyu olisa aqalliti ixxeesa,
hussa aʼiitina Haallikko toʼoko malettay pile ye qaghi dhuke.
33 Usoosi saqakko huusu kaasattay,
[napse thaahu kaasattay,]
kʼalpe thaahu kaasattay,
humna haahu kaasattay cʼikadha,
holuppa ghormitto haahusikka pukkaqate thaahu kula cʼikadha,
teexakko adhili pana teexakidhdhe pile Haallikkonu itʼtʼoosatte kaanta haayyu lakkisi tiqithadhe ighghula.”
34 Iyyesusekka kollisampakkossi Hikkatte qhamu thaayhottay nuholasi ihhiʼipa hasana payu:
“Atho ho,
Ahxase Haallikkitona sikaapuyti qandhikka.”
Xaysa tupettay yaxakka ho Uso kasqadhenu shahxumi ye qaghi.
Kristoose Miʼaye Haaxa?
35 Iyyesuse Immanne Kʼulkʼullawhatte ghintatte koro kollisana hasi payipa kasqadhu:
“Keenni kollisampawhe Hikkatte moʼo maallakki payenna ‹Kristoose miʼaye Taawite›?
36 Taawite Innasso Kʼulkʼullottay qalladhana:
‹Haallikko Pogholho haayyuna inna payina parakaraadhdhe haahuusi haka luhhe haahu kalay laaghni saasa yela miskitho kaqqila qakkadh.›g
37 Emma Taawite pukkaqate thuusuna Pogholho inna payi payni mali miʼaye huusu kodhdhe alkasni?”
Ihhasa qalladhana waarsho kisha hxasotakki apaqhqhasi.
Kollisampawhe Hikkatepa Feresawaadhdheete Kalla Hetiqithadhe
38 Ikkollisana hasi payi:
“Kollisampawhessi Hikkate lallaadhe sikapooma urkeesadhapa isi xayto kaasay ashshanko woʼapa xayto mooratenakka isi xasatto cʼikadhaba kalla he tiqithadhindha.
39 Holuppa usundhe manne ghissootattena kallaka xayto kaanasami,
manne ana yiʼo gharisnakka qakkatte kaanasamti gheeqe.
40 Koronu he hiʼasenukka ghissoote thuusundhiisi isi sikapoosanki,
mannadhdhe xiske tʼiire nafaritinakki heneqe kodhe,
korussa qhaqhitte uuma ghulakki akkanni.”
Teexakko Xiskattosi Tʼiirakko Nafarina
41 Iyyesusekka Manne Kʼulkʼullawhattena saatʼine ana teexakko teexi miinteemi qakkadhipa waarsho issatʼineema pirradhdhe yakkana isi eema;
shorokke kishay pirradhdhe dhammaki na yaake.
42 Xiskattako teekolatte the tʼiirakko nafarikka iʼokaytipa pakkanna lakkiisi na kitteema yaaki.
43 Iyyesuse kolladhampawhe huusuusi iʼooqipa hasana payu:
“Dhuke an hune qalli koru saatʼine kitteema pirradhdhe yaaki kaasanna kaanta xiskato teekolatti tʼiirakko nafari ighghulastipa na kitta yaaki.
44 Moʼo maalla payni koro kaasay olhu sheeghinaki qhootipa ho haqhiisi teexu,
ise kapay inni teekolatte kodhdhitina olho toʼokokka yena haqhasunnaki olhu sheeghti kaasaasi akkitipa hela teexi.”