Iyyesuse Kollisampawhe Hikkattepa Feresawadhdhe siki Meetuyi
23
Xaysa tupettay Iyyesuse waarshopa kolladhampawhe huusuna hasina payi:
2 “Kollisampawhe Hikattepa Feresawaadhdhe qakkatte Muusesi qakkadhea.
3 Hussa maallay olhu hunena paye kaasaasi kodhapa tiqadhonku,
naqharray olho usundhe kodheesi olo kodhe,
moʼo maalla payni usundhe olhu qalleesi ye kodheye.
4 Dhooqhqho riqishaasikki koro saappeema hadhdhase,
naqharray usundhe ghoqakkota kaki ye kohxe.
5 Kodhmo huusundhi kaasay koronu hiʼaasnenuki kʼaale tooxeppa olho tunko ligha ho ghandhaqa kitteema qadhdhonkipa isi laalladhe ghissootattesika isi sikaaposadha.
6 Manne ana yiʼo gharisnakka xayto kaanasami cʼikadhe,
manne huusundhi ghissootattena kallakka qakkatte kaanasamti,
7 xayto mooratenakka xasatto pana koro kaasay qhamunu kakahinipa ‹Kollisampakko haani› napayunuki woʼe.
8 Naqharray Kollisampakko haahundhi toʼoko qhooti kodhdhipa hune kaasay qassawhepa qharumadhe illa kodhdhanku maallay ‹Kollisampawhe› olo payame.
9 Holuppa qhoota moontito Appa sheeghte maallay,
piyyina yaxanakka ‹Appa› ina payonkuppa isa ooqanku.
10 Ho hunena ghula Kristoose patta qhooti kodhdhi maallay ‹he ghulooma› olo payameppa isa ooqamanku.
11 Qhawho hunena kittatte ghula ikkodhampakko hune kodhdha.
12 Qhawho he ghulasa ippalamna,
naqharray qhawho he takoosa ikkaanasamna.”
13 “Hune hehe papaseesa kollisampawhe Hikkattepa Feresawadhdhe he ooyindha!
Moʼo malla payni koro Ahxase Moontitosa qhamu ye xullininnu qhootana mankaxxe kʼupte maallay,
hune pukkaqate thaahundhina huni xullinte,
he xullinanakka anna dhawrasanku.”
14 [“Hune hehe papaseesa kollisampawhe Hikkattepa Feresawaadhdhe he ooyindha!
Moʼo malla payni mannaadhdhe xiske tʼiire nafaritinaka heneqe haqaste,
koronu he hiʼasenukka ghissoote sikaapooste maallay qhaqhitte maghaki hune tiqadha.]
15 “Hune hehe papaseesa kollisaampawhe Hikkattepa Feresaawadhdhe he ooyindha!
Moʼo malla payni qhawho toʼokkoosi dhukkaysadhe taahundhi kula hollesenu pasopa piyyaadheʼita aʼashite,
aholaste tupettay maghno hahundhina kaanta xargho lakki amaghakko kottepa hatte Kahanematenu isa gharisanku!
16 “Hune intawampawhe tatafte,
he ooyindha!
Moʼo malla payni ‹Qhawho Manne Kʼulkʼullawhetakki akutadhi payni rakko yena qaghi;
naqharray workʼesi Manne Kʼulkʼullawhatte qaghatakki akutadhi payni ighapamna› appayte.
17 Hune qeepawhepa taafawhe,
warkʼisapa Manne Kʼulkʼullawhissa warkʼisaasi kʼulkʼullessena hunka ghula?
18 Laadhdhi aʼiyankunna:
‹Qhawho xayto ana teexakko teexitakki akutadhi payni ye olo sheeghi,
naqharray teexakkosi xayto ana teexakko teexina saappeete qaghatakki akutadhi payni akutisattay ighapamna.›
19 Hune taafawhe,
teexakkopa xaytusa teexakko kʼulkʼullesana hunka ghula?
20 Hussa maallay qhawho yaxakka ho xayto teexakitottay akutadhi xaytusa teexakitopa olissa xayto teexakitona sappeete qagha kaasataakki akutadhi.
21 Yaxakka ho manne Kʼulkʼullawhettay akutadha Manne Kʼulkʼullawhepa Haallikkosi Mannisana qaakatakki akutadhi.
22 Ho moontottay akutadhakka qakkatte Haallikkitopa hossi qakkatisana qakkadhatakki akutadhi.
23 “Hune hehe papaseesa,
kollisampawhe Hikkattepa Feresaawadhdhe he ooyindha!
Moʼo malla payni kʼimaamepa keeppe pana pisopilanakki axargho hudhdhana tookko teexte,
naqharray olhossi ghula Hikkatte qaghaasi ahela hxurrte,
usundhisakka qhaqhitte dhukatatepa hxurakkopa dhukkaysatame,
ahxay hisisikka huni hxuronkuna tokisasikka kodhe hune gheeqasa.
24 Hune intawampawhe taafte,
olho aquktena kittatte raasitakko ahela tiqatteppa kapay olho kaala kula ghaqi dhammaasi isa loqhqhanku.
25 “Hune hehe papaseesa kollisampawhe Hikkattepa Feresawaadhdhe he ooyindha!
Moʼo malla payni shullopa tankito settoosi anna shoxankuppa naqharray kittatte saropa koqolunko nahoqhqhu.
26 Ato Feresawitto taafakko,
qharritteema shullopa taankito kitte nashoxma xaysa tupettay seetokka ho xeesa ina kodhdhiniye.
27 “Hune hehe papaseesa kollisampawhe Hikkattepa Feresawaadhdhe he oyindha!
Moʼo malla payni hawlesi apiyye piqattay siripa seeto patta isinna xeesapa kitte kapay meqhqhe koro farripa lokme kaasattay hoqhqhkusikka lighte.
28 Holuppa seetito korito miintatte he pare qagha lighte,
naqharray kitte thaahundhi pasastepa maghnotakki hoqhqhti.
29 “Hune hehe papaseesa kollisampawhe Hikkattepa Feresaawadhdhe he ooyindha!
Moʼo malla payni hawle hxuumampawhatte gharistepa isa awrughesi koro pare qaghanu ghaqqiisi sirankupa
30 isa iyyankuna:
‹Kedhdhay perre appadhdhe haaninaki an qaghni payni ahxay kʼeeqhte hxuumampawhatte elisenu usundhe qale ini kodhdhooni›.
31 Lammi husittay korossi hxuumampawhe paaxina miʼaadhe huusundhi qhama kodhdhitesa hune he qalli.
32 Laadhdhi kodhmossi appaadhdhe haahundhi paayyeesi hune dhikkisa.
33 Hune tawwidhdhe,
miʼaadhe puutatte qhaqhittesi hatte Kahanematena kalla mala pinne alkasinte?
34 Hussa maallay haadhi Ano hxuumampawhepa arnanampawhe pana kollisampawhe Hikkattesikki anhune kula erakni,
usundhissana kittatte tookke tookkeesi appaxnanku,
tookkeesi maskʼalaama dhiste,
hipaasikka mannaadhe haahundhi ghissootattena atubhanku,
katama tookkonu tookko kulakki isa ghoghoranku.
35 Hussa maallay kʼeeqhte Apeelesi pare qaghanu paayyatti haka miʼayye Perakiyu Zekariyaase Ammanne Kʼulkʼullawhe pa xaytossi ana teexakko teexi kitteema poghte saasa kʼeeqhtesi koro pare qaghana piyyeema elti kaasa maallay akasqathamnku.
36 Dhuke an hune qalli qhaqhiti kaasay dhalatisa inna okynay.”
Iyyesuse Qhamu Katama Iyyerusalamenu Ooyi
37 “Ato Iyyerusaaleme,
Iyyerusaaleme,
te hxuumampawhe paaxay,
hahe kula erakisikka awrughettay isa hattapay,
tara meʼitakki an qhamo lukkalite cʼiwcʼiwaadhe hiisisi hoolo kaleematte holsati kula miʼaadhe haahisi he kula holase woʼi,
naqharray hune aʼishte.
38 Lammi manne haahundhi ihunena qonna.
39 Anhune qalla,
haka paytena:
‹Ho makaxko Pogholhitottay okaaya ho sakami› saasa;
laanka huniye hiʼinte.”