Milikitaadhe Perre Dikkatate
24
Iyyesuse ighghinte manne Kʼulkʼullawhattena lighana kolladhampawhe huusu Manne Kʼulkʼullawhessi aʼawrughettay ghupadhi nu hiʼasenuki na kula itʼtʼuye.
2 Naqharray Uso hasi payipa nuholasu:
“Oli kaasaasi ahiʼanku?
Dhuke an hune qalli,
awrughissa aʼille saappeema teeli ye pullamonkina ye hasa haqhne.”
3 Iyyesuse Ghupo Ekerkitona saappeete iqakkadhana kolladhampawhe huusu Uso kulakki okayeppa kasqadhonki:
“Olissa parakki kodhdhamanni?
Milikite mootaki an laanka okaye taahupa perre dhikkatatte arraani?”
4 Iyyesusekka hasi payipa nu holasu:
“Yaxakka qhamu ye hune dhappisninnu he thiqthadhindha!
5 Moʼo maalay payni koro kisha ippayna:
‹Ano Kristoose› pa makaxko Hayyuttay okayuppa koro kishaasi dhappisu.
6 Qhoota orxankitopa ote orxankito aʼapaqhinte,
olissa kaasay kodhdhamadhenu kitte naagheeqama,
ikkodhdhitama kapay dhikkatte ye taamuye husittay qhamu huni murrukintenu he tiqithadhindha
7 Moʼo maalla payni waarshokka waarshoomi haqani,
ahxaseka ahxaseemi haqinti;
piyyaadhdhe qawni qawnina laaqepa titito kodhdhamanna.
8 Kapay olissa kaasay qhuuqhayte paayyootatte.
9 “Xinkissana rakkonukki likkasneppa hune teexonki,
ihune paaxnaka,
qhoota Makaxko Hayyu maallay waarsho kaasanna miinatte he shikkamtekka kodhdhinte.
10 Xinkisana koro kisha dhukkaysadhe tuusundhiisi marmadhetakki dhappamni,
fartenukka isi ille lilikkasapa,
isi ille papaaxakka.
11 Hxuumampawhe ayya he kishaki haqanapa koro kishaasi dhappisonki.
12 Maghno naqina haqati cʼikno koro kishana ishshalalla.
13 Naqharray qhawho haka dhikkatte saasa kokisadhi uso dhinna.
14 Waarsho kaasannu qhamu misikkire kodhdhintinu otessi xeesay Ahxase Haallikkitona piyye qhaatʼe kaasanukki atorruyni.
Xinkissana dhikkate iʼokaynay.”
Rakko Uuma Magha
15 “Lammi qhamosi hxuumampakko Tanieelettaya qallamti kula:
apayni ‹lokmesi koro patisnaki› xayto kʼulkʼullawisa shikkaarippa hiʼanku payni;
qhawho nappapa ihela taaya!
16 Xinkissana koro piyye Yihutanna qagha ikkaro ghuppeete ghoradha.
17 Qhawho manneete saappeete qaghakka manneete kala maahxatto akkenu inni oodhdhu.
18 Qhawho pashito qaghakka laalle akkadhenu inni hollu.
19 Xinkissana yayyadhdhe sheeghomapa he miʼaadhe shurrasha ihe ooyadhe!
20 Lammi ghoradhe taahundhi katanko kitteema taakinti kuyyaqako hxaysinkitona qhamu ye kodhdhintinu ghissadha.
21 Xinkissana haka piyye qhaatʼe uumamenu paayyatti haka hantu saasa olho apari ye kodhdhamadhupa karo miinattekka ye kodhdhamanni rakko uuma magha kodhdhamanna.
22 Kuyyaqissaki ye mahxnaonki payni ahxay qhawho toʼokkoka ho dhinna ye qaghni,
naqharray koro qholami maallay kuyyaqisa immahxnaʼna.
23 “Xinkissana yaxakakki hunena payna ‹Haadhi Kristoose hassi qaghi› taakkinti ‹Xaysa koranakki qaghi› payni olo dhukkaysadhi.
24 Moʼo maalla payni kristoosaadhdhe aayyappa hxumampawhe aayyakki haqana,
innu alkasama payni hessi qholameesikaki dhappisenu milikitaadhdhe kaanoomapa olho koro dhahxhxisa konne.
25 “Haadhi an intoosipa hune qalla.
26 Hussa maallay yaxakaki hunena payina ‹Haadhi mandhito iʼqaghi› payni olo nakula ashshe,
‹Haadhi kompito kitati qaghi› payni olo dhukkaysadhe.
27 Qhamo ghawwaqako xayto oqhqhaye lighanu ibhaqhi payni oqhqhaye xulla saasa xayto haahisi kula okaye Ano Miʼaye Qhawhitonakka qhamussa kula.
28 Allaqatho xayto oloku naafarisa iʼilla holi.”
Laanka Hole Kristoose
29 “Kuyyaqissa rakkito tupettay hattay oqhqhaye iʼimnay,
leeqokka hammakko huusuusi ye teexnikka,
xuske moontitokka ihhayyina,
humnaadhe moontitokka illelehna.
30 Xinkissana milikite Ano Miʼaye Qhawhitonakki moontito hiine,
koro piyyatte qaaka kaasay iʼooyna,
Ano Miʼaye Qhawhitokka urratepa humna pana kaanaste dhammattay an okaayanakki ye hiine.
31 Uso erkampatadhdhe he kataane uuma quugha yoqhaki erakni,
usundhekka hessi karo salaxtay qholameesikki moontito hinaasenu haka hinaase saasa illeema holasne.”
Lighno Dhishtakko Pelesattena
32 “Lighnoosi kaarkko pelesattena kolladha;
apayni qharre hiisiki na fucʼukipa aahxekka na martaxonki payni xinkisana oypako qhamu itʼtʼuyisa aʼarranku.
33 Qhamusa kula olissa kaasaasi ahiite payni hussa okaye,
Ano Miʼaye Qhawhitona uuma qhamu mankaxxeema itʼtʼuytisa arindha.
34 Dhuke anhune qalli,
oli kaasay haki dhikkani saasa dhalati ye lighinikka.
35 Moontopa piyye ipanna,
Kʼaale Taayyu kapay moʼo kaki payni ye patinti.”
Yaxaka Okaye Iyyesusessi Ye Ari
36 “Naqharray kuyyaqakussapa saatissa Paappo malettay erkampatadhdhe moontitoka ikkodhdhe Miʼayeka ikkodhdha yaxakka ho ara ye qaghi.
37 Qhamossi perre Noohenna kodhdhiti kula Ano Miʼaye Qhawhitokka an okaayana qhamussa kulakki kodhdhinti.
38 Qandhe patitate ye okayonkinna qharaʼita Noohe haki markapeema xullini saasa koro iyyiʼapa isi quka,
iʼille akkapa isi illa akkateesa.
39 Haki qandhe patitate okayneppa kaasaasi ooshonki saasa qhamu ye hela sheeghe kula,
okaye Ano Miʼaye Qhawhitonaka qhamussa kulakki kodhdhintti.
40 Xinkissana qhawho lakki ille qalli pashito kodhanne;
tookko iʼakkamna,
tookko ihaqhna.
41 Xiske lakki qhutʼmatte yooqhne,
tootte iʼakkamnay,
tootte ihaqhnay.
42 Hussa maallay Pogholho haahundhi kuyyaqako hunkanna qhamu okayni qhoota huni arte maallay upadhapa tiqitathonku.
43 Naqharray oliisi arindha,
paappo manneete kereqeko awne saate tinkana qhamu okaynisi ari payni iʼupanapa tiqadho ahxay.
44 “Hussa maallay hunekka gharsadhapa tiqitathonkuma Ano Miʼaye Qhawhitokka saate huni hela sheeghtenakki an okayniye.”
Lighno Kodhampakko Dhukkaysatamapa maghakito
45 “Lammi aylitto dhukatte arnane sheeghapa pogholho isi koro huusunu saati gheeqastina qhamu yiʼo yiashninu xawwana yaxa?
46 Aylito Pogholho iholina olhossi anu hayi kodha hohe poghadhi.
47 Dhuke an hune qalli,
kodhatti sheeghi kaasasa iʼuso xawwanni.
48 “Naqharray aylitto maghakusa ‹Pogholho haayyu hattay ye okaynimma iʼolanna› kippayipa isi dhihadhapa
49 aylaadhesi iʼillettay kodhadheesi tubhbhatho paayyuppa koro hxahxayoodha qale isi yiapa isi quka payni,
50 pogholho kuyyaqaku ye dhihadhupa saati ye hela sheeghinaki okaynipa
51 lakkisa kaaquppa itʼa huususikka koro he papaseesa qale kodhdhu;
xaysanaka ooyepa ilghe illa qhume kodhdhamanna.”