Lighnossi Ihaadhe Hudhdhanna
25
Nakaleema Iyyesuse hasi payi:
“Xinkissana Ahxase moonthito ihaadhdhe hudhdhan he hammakko qhawsisadheppa xaantitto akkadhenu righadhonkiki lighti.
2 Usundhisana kittatte hxupin qeepawhe,
hxupin arnanampawhe.
3 Qeepawhissa hammakkoosi idhdhooqhadhekka payni laampaasi ye nakala sheeghadhonki.
4 Arnanampawhe kapay hammakko huusundhi kaleema laampaasi maahxatho pilettakki nakala sheeghadhe.
5 Xaantitto qhooti oladhi maallay usundhe kaasaasikki piʼaate ghaptipa piʼaadhonki.
6 “Naqharray parakitte ikkitto iyya:
‹Haadhi xaantitossi iʼokaayaye haqapa akkadhanku› ki qhaskadhi.
7 Xinkissana ihaadhdhessi kaasay ihhaqeppa hammakko huusundhiisi gharsadhonki.
8 Ihaadhe qeeppessi hasi payeppa arnanampawhessi kasqadhoki:
‹Hammakko haani iʼinena imnaye akko maʼala laampa haahundhina ine qhotta!›
9 Arnanampawhessi kapay hasi payeppa nu ho lasonki:
laampa haani inepa huneesi ye hxafniye ashshindhapa koro lassana na pithmadhanku.›
10 Illaampa pithmadhate ashshenna xaantittossi iʼokay.
hessi gharsadhekka xaanttittossi qali karo mannessi ana yiʼo xantaadhdhenu gharisi kula xulleppa mankaxxekka akʼupoy.
11 “Xaysa tupettay ihaadhe tookkesikka okkotu olladhdheppa okayonki isi hasa kodhdha:
‹Pogholho haani!
Pogholho haani!
Into mankaxxe ine qhaash!›
12 Uso kapay hasi payipa nu holasu:
‹Dhuke an hune qalli,
anu hune ari!›
13 Lammi kuyyaqakopa saateesi huni arteye upadhapa tiqthadhonku.”
Lighno Qhawho Izzax Anu Kodhate Qhootina
14 “Qhamusa kula Ahxase Moontito qhawho piyye pile kula ashshankooma haqipa aylaadhe huusuusi he kula ooquppa kodhatti sheeghi qhamu kodhanetanu nuqhootokki lighti.
15 Usundhe kaasannu kodhatte ana meklite payiisikki qhamo alkase tuusundhi kula nu qhooti;
qhawho tookkonu,
meklitea hxupinki teexi,
tookkonukka meklite lakki,
hoisxanukka meklite tootte innu teexipa piyye pile kula ashshoy.
16 Hossi meklite hxupin akadhi haattakki ashshi xoruyuppa meklite hxupin nakalla lihasu.
17 Kodhampakosi meklite lakki akkadhika iʼashshi xoruyuppa meklite lakki nakalla lihasu.
18 Naqharray qhawhossi meklite tootte akkadhi iʼashshi piyye qhotopa meklitesi pogholhitoosi maayu.
19 “Pogholhossi iʼuuma oladhi tupettay aylaadhesi huusu kulakki holipa kodhattesiisi naqale dhihe paayyu.
20 Aylittosi meklite hxupin akkadhi meklite hxupinki nakalla lihasipa okayu hasa na payu:
‹Pogholho haayyu,
haadhi meklite hxupinki ayyeteexti;
kapay meklite hxupinki annakalla lihasi!›
21 Pogholhossi huusukka inna payi:
‹Pare,
atho aylitto dhukaysatamapa ho xeesa;
qhoota olho takkassattay dhukkaysathamti maallay olho dhammasa anho xawwanniye hxaso Pogholhito qhoottadhenu xulli!›
22 “Holuppa aylittosi meklite lakki akkadhikka iʼokayipa hasa payu:
‹Pogholho haayyu,
haadhi meklite lakkiisiki ayye teexti,
an xoruyina meklite lakkisikki anna kalla lihasi!›
23 Pogholhossi huusukka ina payina:
‹Ato aylitto dhukkaysatamapa ho xeesa;
olho takkassattay qhoota dhukkaysatamti maallay olho dhammasa anho xawwanniye hxaso pogholhito qhootadhenu xulli!›
24 “Aylittosi meklite tootte akkadhikka iʼokayipa hasa na payu:
‹Pogholho haayyu,
atho ho atu pooxadhuna ghimadhapa atu pulluna isa illa holsadha,
qhawho shahxakko qhama kodhdhitisa anho ara,
25 hussa maallaki anghaapipa meklite taahuusi ashsho piyye kaleema maayaye haadhi kodhatte taahu yela akki!›
26 Naqharray Pogholhossi hasi payipa nu holasu:
‹Ato aylitto maghakkopa ho kodhmo shikka!
Anu pooxadhuna qhamo an ghimadhipa xayto anuna pulluna isan illa holsadhasa aʼaray?
27 Ahxay xinke an holina qhama kodhatte taayyu olho nakalla lighi illay akanninu koro xoruyanu teexe ho gheeqasa.
28 Lammi Kodhatisaasi na akkapa qhawhossi meklite hudhdhan sheeghanu teexanku.›
29 “Moʼo malla payni ho sheeghanu anaanu padhawna,
innu naqanakka;
naqharray hoye sheeghina hussa qaghaasikka ana akkina.
30 Aylitu latuusi tukkankussa kala ghintate ooyepa ilghe illaqhume naqaghe kula lihasapa kʼuranku.”
Qhaqhite Dhikkatatte
31 “Ano Miʼaye Qhawhitokka kaanaste tayyuttay an erkampatadhdhe kaasa illay okaayana qakkattesi tayyu kaanasamtisa an qakkani.
32 Waarshidhdhe kaasay ye miinteemi illa holle,
Anokka qhamosi koshshito qeemmeesi taleete kittatte reehi kula,
waarshidheesi illenakalla reeho.
33 Qeemmeesi miskitottay,
taleesi pixattetakki An shikkarashni.
34 Xinkissana Nukusitusa hessi karo misikattay qaghana hasa inna payni:
‹Hune hessi Paappo haayyu hune saki,
okayapa Ahxasessi piyye qhaatʼe uumamenu paayyatti hune gharsamtiisi tayanku!
35 Moʼo malla payni An puffina ayye yiʼashte;
an dheepodhdhina ayye qukiste;
hayhitto An kodhdhina ayye akkate;
36 laalle An dhapina ayye urkeeste;
An udhamina ayye udhansatte;
An shapamina ayye kasqate.›
37 Xinkissana he pare qagha hasa inna payne:
‹Pogholho haani ata parakka puffitipa ho hiʼaanipa ho yiashooni?
taakki Parakka dheepootipa ho hiʼaanippa ho qukisaani?
38 Parakka hayhito kodhdhitipa ho hiaanippa manne haanisa ho akkadhaani?
Parakka laalle dhaptipa ho urkesaani?
39 Parakka udhamti taaki ashshapamtipa ho hiaanippa ho kasqadhaani?›
40 Nukusisakka hasi paynipa nu holasu:
‹Dhuke an hune qalli,
hisi korito kalla qhacʼooma haayyu kodhdhena qhawho tookko olho tookko kotte payni hussa qhama yeesi kotte kula!›
41 “Nakala hessi pixattetay qaghana hasa inna payni:
‹Hune he qhiicʼamte,
yela kanta pata!
Hattesi perre ye hume sheeghena Orrittopa erkampatadhdhe huusunu gharsamti kula ashshindha.
42 An puffina huni ye yiashonku;
An dheepodhina huni ye qukisonku.
43 Hayhito An kodhdhina huni ye akkadhonku;
laalle An dhapina huni ye urkeesonku;
An udhamina huni ye udhansadhonku;
anshapamina huni ye kasqadhonku.›
44 Usundhekka hasi payneppa nu holasonki:
‹Pogholho,
ata paraka puffiti taakinti paraka dheepooti;
taakinti paraka ahhayhitto kodhdhiti taakinti paraka laalle dhapti;
paraka udhamti;
taakinti paraka ashshapamtipa ho hiaanipa isi ini ho kasqadhooni?›
45 Xinkisana Usokka hasi paynipa nu holasu:
‹Dhuke an hunena payi,
olho hisi hayyu korito kalla qhacʼoomana kittatte qhawho tookkonu huni kodhonku kaasay qhamu yeesi huni kodhonku kula.›
46 Hussa maallay usundhe ikkaro qhaqhitte perre ye hume sheeghe kula ashshana koro pare qagha kapay karo qagho perre ye hume sheeghe kulakki ashshini.”