Koro Ayihutatte Iyyesusessi Qhamu Poghe Woʼi
26
Iyyesuse iqallitisa kaasaasi torruyipa dhikkisu tupettay kolladhampawhe huusuna hasina payi:
2 “Kuyyaqako lakki tupettay paale Faasikay qhamu kodhdhitisa aʼaranku,
Ano Miʼaye Qhawhito maskʼalaama dhisamenuki aye likkasnipa teexu.”
3 Xinkissana intawampawhe kʼeesadheetepa xaadhighghe piyyatte rafisampako kʼeesadheete Kʼayyafa anapayina manneemi illa hole.
4 Iyyesusessi dhohmuntettay ghapepa poghenu suladhonki.
5 “Naqharray waarsho kiteʼita paqhatho haqnaye kuyyaqako paalatena ikkodhdhe hxura” kipayepa illa hxulonki.
Xiskathosi Iyyesusessi Shittottay Shiinti
6 Iyyesuse qhawhossi ghodhdhe Pittaaniyana qaaka Simioonenna ana payi lamtʼe naqaghtina manneeti qaghi.
7 Iyyesuse yiʼo anu itʼoosipa isi yiʼana xiskatho tootte shitto xorto uuma na shooshi pilkʼate alpastʼiroose anapayttay Uso kula okayipa shittosiisi pukkaqate tuusu saappeema elisi.
8 Kolladhampawhe iʼolissaasi hiʼenna hasi payeppa miirodhonki:
“Shittusa moonuki latu xarkishami?
9 Ahxay shittuusi xorto dhammasa alasnipa kodhatisaasi xiyawhenu aqhootoy!”
10 Iyyesusekka olhu payeesi inna ʼaripa hasa na payu:
“Xiskatuusi moonukka rakistenku?
Ise kulay olho xeesa iyye kotti.
11 Moʼo maalla payni xiyyawhe kuyaqqe kaasay hune qalli qaakne,
naqharray Ano kuyaqqe kaasay hune qale Anu aqaakni.
12 Ise shittusi huye saappeema elisti maaytenu ye gharisenu.
13 Dhuke an hune qalli,
piyye qhaatʼe kaasay aʼote xeesasi torruyana oli xiskatu kottiisi ana hela taayna.”
Yihuta Qhamu Iyyesuse Likkasepa Teexenu Ghari
14 Xaysa tupettay kolladhampawhessi hudhdhanpa lakkina kittatte tookko kodhdha,
Yihuta Askʼoroottay intawampawhesi kʼesadheete kulakki ashshipa hasa na payu:
15 “Usoosiki alikkasipa hune teexa payni hune moʼo ayye teexinte?”
Usundhekka pirraadhe anaasate kodhdhi hudhanko izzaxkia nu teexe.
16 Usokka Iyyesusessi likkasepa teexenu kuyyaqako nu gharraasi isi tiqitadha.
Iyyesuse Paale Faasikanna Kolladhampawhe Huusu Qalli Yiʼo Yiʼi
17 Paalesi Dhilankitona kuyyaqako payyotatena kolladhampawhe Iyyesuse kulakki okayeppa hasa na payonki:
“Yiʼo paale Faasikaasi ahaama an ho gharisaanika wooti?”
18 Usokka ina payi:
“Akatama kula xullankuna qhawhooma hxafinteyye qhawhusana hasa na paya:
‹Kollisampako iʼiyyaa «Xeere hayuki hxafiye;
paale Faasikaasi kolladhampawhe haayyu illay haahuna manneema alikkasnaani.»›”
19 Kolladhampawhekka qhamosi Iyyesuse nu qalli kulakki ashsheppa yiʼosi Faasikaasi haama gharisonki.
20 Xayto iʼawnuyina Iyyesuse kolladhampawhessi huusu hudhdhanpa lakki illakki yiʼonu qakkadhi.
21 Iyyiʼosi yiʼankina Iyyesuse hasina payi:
“Dhuke an hune qalli,
hunina kittatte qhawho tookko illikkasnapa ye teexu.”
22 Usundhekka iqallitisa apaqhenna qhooti uuma murruke maallay hasi payeppa pukkaqatte pukkaqatte Uso kasqadhonki:
“Pogholho haayyu ata anom?”
23 Usokka iholi hasa na payu:
“Qhawho likkasnapa ye teexu,
husi ye qale taanko kula xarghgho shokkisipa isi akkadha.
24 Ano Miʼaye Qhawhito qhamossi aqhoota haayyu tooxi kula an farra,
naqharray qhawhusa Ano Miʼaye Qhawhitoosi likkasnapa teexu ihe ooyadhi!
Qhawhusa ye dhaladhu payniki nu woyya.”
25 Yihutasi likkasnapa Uso teexukka hasi payipa kasqadhu:
“Kollisampako,
ata anom?”
Iyyesusekka ina payi:
“Qhamusa atho payti kula.”
Esse Pogholhito
(Mar. 14:22-26; Lukʼ. 22:15-20; 1Kʼor. 11:23-25)
26 Iyyiʼana Iyyesuse dhilantaku akkipa ikkalataysadhi tupettay ghoodhdhuppa kolladhampawhe huusunu teexuppa hasana payu:
“Haadhipa yiʼonku;
husi sakanko haayyuye.”
27 nakalakka qukteesi akkuppa ikkalataysadhi tupettay hasa payuppa nu teexu:
“Haadhi hune kaasay husina quka;
28 husi kʼeeqhte taayyu katape qhawtitatte qoota cʼuppo koro kishana hxurasenu ellay.
29 Anhune qalla:
haka Ahxase Paappo hayyuna hune qale awsho woyne atʼiipi qhawtito qukni saasa,
xaynu koru qukti woynate anu qukni.b”
30 Ikkoladhec tupettay iʼashsheppa Ghupo Ekerkito saappeema hadhdhonki.
Iyyesuse Marmadhe Petʼirooseki Qharriteema Qalli
31 Nakaleema Iyyesuse hasina payi:
“Kallapkunna hune kaasay ayye marmankuppa ghoradhanku,
moʼo maalla payni hasi payamtipa tooxamoy:
‹Koshshitoosi an shoqhna;
qeemme irpankussakka pullamonki.d›
32 Naqharray fartatte an haqi tupettay piyye Kalilasa an hune inthawni.”
33 Xinkisana Petʼiroose hasinna payi:
“Hisi kaasakki ho hxuripa ghoradhonki kaki payni ano moʼokka payni anu ghorani!!”
34 Iyyesusekka hasi na payi:
“Dhuke anho qalli kalapkunna lukkalakko ye quughuna qharaʼita izzaxtakki ayee marmadhinti.”
35 Naqharray Petʼiroose ina payi:
“Fartekaki kodhdhinti payni anho qale farra dhiishay moʼo kaki payni anu ho marmanikka!”
Kolladhampawhe tooke kaasakka isi hasa kodhdha.
Iyyesuse Keetesemaanemi Ghissadhi
36 Xaysa tupettay Iyyesuse kolladhampawhe huusu qali xayto Keetesemaane ana payi kula ashshi.
Ihhaa hxafenna kolladhampawhatte hasinna payi:
“Hune xaysa ghayyindhama Ano xaysa korasa an ashshinipa ghissadhaye.”
37 Petʼiroosepa dhelle Zeptiwoose lakkiisiki he kala ooqipa ashshoy;
nu dhakaadhepa cʼanakʼame paayyu.
38 Hasakka na payu:
“Hakan farri saasa napse thaayyu uumi azantiye,
kokisadhapa hassasa ye qale ghayyonku”.
39 Okoto usundhena kalla xighghuppa ghulladhdhuppa hasa payuppa ghissadhu:
“Appa haayyu,
iʼalkasamna payni rakku iyyela lighgha;
naqharray qhamo woʼoko Hayyu kula ye kodhdhuna qamo woʼoko Haahu kula ikkodhdha.”
40 Iholi kolladhampawhessi kula holunna he piʼaadhesi hxafipa Petʼiroosena hasa payu:
“Saate toʼotekaki ayye qale kokisadhe malaalte?
41 Temmatteema qhamu huni xullintenu kokisadhapa ghissadhanku.
Nasso ighgharima sakanko tardhampakko.”
42 Lankaka ashshoppa hasa payupa ghissadhu:
“Appa Haayyu rakku ye yela lighghini payni iwwoʼo haahu kodhdha.”
43 Hanthukka kolladhampawhessi kula holunna qhooti piʼaatte usundhe ghapti maallay he piaadhesi hxafi.
44 Haama usundhe hxuruppa ashsho ghissootessi qharaʼita ghissadhiisi isxa ghissadhu.
45 Xaysa tupettay kolladhampawhessi kulaki holipa hasana payu:
“Hannakka arafanku naʼa?
Ahxaysadhanku naʼa?
Haadhi saatesi iʼitʼuyti,
Ano Miʼaye Qhawhito xarghghe cʼuppolawhattesa aye likkasnipa teexu.
46 Qhawhossi likkasnapa yeteexuka iʼokaaya.
Haqapa ashshini!”
Ghapame Iyyesuse
47 Ihusaasi qalladhana kolladhanpawhesi hudhdhanpa lakkina kittatte tookko kodhdhi Yihuta ana payi iʼokayi.
Uso qalekka koro kisha ho pillawwadhepa dhaymidhdhe dhooqhadha okayi.
Usundhissaasika intawampawhe kʼeesadheetepa xaadhighghe piyyatte eraki.
48 Hossi likkasnapa teexu korossina hasinna payi nughudhdhu:
“Qhawhusa ammayyini usoye Usoosi ghapa.”
49 Usokka minakalti Iyyesuse kula itʼtʼuyipa hasa payupa mayyu:
“Kollisampakko,
nakayho ihho kodhdha.”
50 Iyyesusekka hasina payi:
“Qhawho haayyu,
lammi olho annu okaytiisi kodh!”
Xinkissana korossi Iyyesuse kulakki okayipa ghapuppa shapu.
51 Xinkissana hessi Iyyesuse qale qaghana kittatte qhawho tookko ishokki pilawwo yukuppa aylitosi intawampako kʼesadheetena qhamte qhaqhu.
52 Iyyesusekka hasina payi:
“Pilawwo hahuusi konkoneema holas,
koro pillawaadhe haqisa pillawaadhetakki farrini.
53 Iʼgheeqasa payni ahxay Ano Paappo haayyusi anu kasqanippa Uso Erkampatadhdhe orxankito he kumaadhdhe dhammasa adhihi ye eraku?
54 Lammi hasi kodhdhiti payni kʼaalessi Matʼaaffe Kʼulkʼullawhatte kittatte iyyana:
‹Rakko akkadhe Uso gheeqasa› mali dhikkadhinti?”
55 Xinkissana Iyyesuse waarshosinna hasinna payi:
“Qhamo qhawho koro sara aghapi kulaki ayye ghapenu pillawaadhdhepa dhaymidhdhe dhooqhatteppa hxafonku?
An kuyyaqako kaasay manne Kʼulkʼullawhattena hune kollisapa isan hune qale qaakana huniye ghaponku.
56 Naqharray oli kaasay olhunamaallay kodhdhamadhi,
kʼaalessi hxuumampawhe tooxe qhamu dhikkadhintinu.”
Xinkissana kolladhampawhe kaasay Iʼuso hxureppa ghoradhonki.
Iyyesuse Koro-Qhaqhite-Qhagha Minteemi itʼtʼuyi
57 Xaysa tupettay korossi Iyyesuse ghapi xaytosi kollisampawhe Tampattepa xaadhighghe piyyatte illa hole kʼeesito kʼeesadheete ghula Kʼeyyafa ana payina manne kulakki ashshettay.
58 Petʼiroose kapay ikkeetipa sikapnonu isinna kalla ashshapa haka qhawhossi kʼeesito kʼeesadheete ghula Kʼeyyafa ana payina ghinte saasa nakala hxafoy;
olho kodhdhamanaasikka eemenu ghinte kula xulluppa korossi mannissa tiqadha kapeema qakkadhu.
59 Xinkissana intawampawhe kʼesadheetepa [xaadhighghe piyyatte] pana Korossi-Qhaqhite-Qhagha kaasay Iyyesuseesi poghasenuki misikiradhe ayya gheeqe.
60 Koro ayyadhe masakara ho kisha iʼitʼtʼuya kaki payni misikirunko qhaqhitte fartattesa Uso hxafasnaasi yenatayonki;
dhikkatatte misikiraadhdhe lakki na itʼtʼuyi.
61 Misikiraadhdhesika hasi paye:
“Qhawhu iyyana:
‹Manne Kʼulkʼullawheesi Haallikkitoosi an pullapa kuyyaqako izzxasa ghupadhe alkasa.›”
62 Xinkisana Kʼesitosi Kʼesadheete ghula ishshikkaaripa hasa payu:
“Olho koru hooma qalli kaasanna olho toʼokoka atu hela holasinti?”
63 Naqharray Iyyesuse ikʼampayi.
Hantuka Kʼesitosi Kʼesadheete ghula hasina payi:
“Makaxko Haallikko qaghitotakki anho akutadhi,
Ato Miʼaye Haallikkito Kristoose payni ine qalli!”
64 Iyyesusekka hasina payi:
“Ee,
qhamussa atho qalliti kula.
Naqharray an hune kaasannu qalla,
xaynu koru Ano Miʼaye Qhawhito humna haayyuttay Haallikkito miskitto kaaʼila an qakkadhanaki ayyehiʼinte,
laadhdhi ammontikki urratettay okaayanakki ayyehiʼinte.e”
65 Xinkissana Kʼesitosi Kʼesadheete ghula laalle tuusu iʼhela kaaghipa hasa payu:
“Haadhi Haallikkoomi qalliite dhaghsatito qalladhi!
Hunekka dhaghsatusaasi aʼapaqhte,
xaynu koru misikiraadhdhe pile hemoyto ine gheeqasa?
66 Mali hune lighti?”
Usundhekka:
“Farte Uso gheeqasa!”
Kippayeppa nu holasonki.
67 Xinkissana waawi miinteema natuffeppa isi tutubha;
koro tookkoka iʼkakkanaqasadhapa isi hasa napapaya:
68 “Kristoose into hxuuma qalladh:
‹Yaxa ho shoqhi?›”
Petʼiroose Qhamu Iyyesuse Marmadhi
69 Xaysa tupettay Petʼiroose ihho kʼeesitosi kʼeesadheete ghulana ghintate qakkadhana shette tootte uso kula okayipa hasa napayi:
“Atokka Iyyesusesi piyye Kalila qale aghaqti!”
70 Uso kapay hasi payipa koro kaasa miinteema marmadhoy:
“Olissa apayti anu ari!”
71
Ihharratte lighana kodhampate pilaatte holi hiʼippa korossi xaysana qaghana hasa payi: “Qhawhuka Iyyesusessi Naazrate qalli qaghi!”
72 Naqharray Petʼiroose “Qhawhusa aqalliti anuarikka!
kippayipa akuttettay laanka maramadhoy: ”
73 Iʼokkoto salina hantukka koro xaytusana shikkaara Petʼiroose kulakki itʼtʼuyipa hasa napayu:
“Dhukeema qhama usundhe qale qaghtisa qalliite taahuttay aupthamay!”
74 Usokka “Ano kulay qhawhusaasi anu ari” kippayipa isi akutadhapa isiheqhiicʼana:
lukkalakka hattakki quughi.
75 Xinkissana Petʼiroose olhossi Iyyesuse napayi:
“Lukkalakko ye quughunna qharaʼita izzaxtakki ayyemarmadhintiisi.”
Ihhela taayipa seeto kula lighuppa uuma ooyoy.