Xiskatho Xiyyatesi Yeʼolo Sheeghti
21
Iyyesuse ishshokkipa emmadhunna shorokke Manne Kʼulkʼullawhattena issatʼineema teexakko yakkanaki hiʼi.
2-3 Holuppa xiskaththo teekolatte tetʼiirakko nafari ipakkanaadhdhe lakkisi satʼinesisa qadhdhana hiʼuppa hasa payu:
“Dhuke an hune qalli,
koru kaasanna kaanta xiskaththo teekolatti tʼirakko nafari ho ghulaasiki teexti.
4 Moʼo malla payni koru kaasay olhu sheeghinaki qhootipa ho haqhiisi teexu,
ise kapay olhu sheeghti kaasaasiki teexti.”
Olho Perre Dhikkatatena Kodhdhamana
(Maat. 24; Mar. 13)
5 Kolladhampawhesi huusuna kittatte tookke hasi payeppa isi torruyadhanki:
“Manne Kʼulkʼullawhi hemala hasa xeesa?
Awrughghe xeesoomapa teexakko Haallikkitotakki ghuptame” kinna payina Iyyesuse hasinna payi:
6 “Kuyyaqako olissa aʼhiite kaasay yepulamupa awrughissa aʼille sappeema theeli ye pullamokina yehasa haqhniki okayina.”
7 Usundhekka hasi payeppa kasqadhonki:
“Kollisampako haani,
ata olissa kaasay parakki kodhdhamani?
Holuppa qhamo ikkodhdhamanisa milikite mootakka arraani?”
8 Usokka inna payi:
“Qhamu huni dhappamintenu hetiqitadhindha,
koro kisha:
‹Ano Uso› holuppa:
‹Kuyaqqekka iʼitʼtʼuye› kippayneppa makaxko haayyuttay okayonki,
naqharray hune olona kala ashshe.
9 Qhoota orxankitopa qhoota maghno koritoosi aʼapaqhte payni olo muruke,
tiyye waarshito apaqhte payni olomurrukeemma oli qharitteema dhikkadhe na gheeqama,
ikkodhdhitama kapay dhikkate hattay ye kodhamadhinti.”
10 Nakaleema hasinna payi:
“Waarshokka waarshooma,
ahxasekka ahxaseemi haqinti”
11 Titito dhamma kodhdhamanna,
laaqe pana udhume piyyaadhdhe qawni qawnisa kodhdhamanna,
holuppa olho haxa hokoro ghaapisa moontito kodhdhamanna.
12 Naqharray olissa kaasay ye kodhamadhunna qharaʼita,
koro ihune ghappina,
ihune ghoghorakka,
manne ghissoote koro Ayhutattepa manne shappeete kulakka ihune dhaana;
rafisampawhepa nukusaadhdhe miinteemakka ihune itʼtʼoosna.
13 Hussa kaasay qhoota Makaxko Haayyu maallakki ihuneema hxafni,
hussakka qhoota Haayyu masakarenu faroote xeesa ihune kodhdhini.
14 Hussa maallay inna payonkuna ata moʼo anqallannanipa isa qharriteema rakadhankuma oliisi saqakkooma ghapadha.
15 Moʼo maalla payni qalliitepa arnane korussa hune toora ye holase alkasnesikki an huneesi teexniye.
16 Ahxkaadhdhe haahundhipa qassawhepa qharumaadhdhepa dhalitto pana hessi aʼille cʼikatekka ihune likkasnapa hune teexonki,
hunena kittatte tookkesi ipaxananki.
17 Qhoota makaxko Haayyu maallay koro kaasakki hune shikkina.
18 Naqharray kaso pukkaqate taahundhina qaghana kittatte toʼokokaki yena panni.
19 Dupaytetakki Akkokisatteppa shikkaaranku payni napsaadhdhe haahundhiisi appinisananku.
20 “Iyyerusaaleme kuyaqaku foolisadhdhe orixankitottay qhoramtipa hiankunna pate hiisi qhamu itʼtʼuyesa arindha.
21 Xinkisana koro piyye Yihutanna qagha ikkaro ghuppeete ghoradha,
koro katamana poorkottay qaghakka seeto kula illigha,
koro katamana seetottay qaghakka katama kitta innixullu.
22 Moʼo malla payni olho athooxi kaasay qhamu dhikkanninu husi perre haalotatte.
23 Xinkissana yaayyaadhdhe sheeghomapa hemiʼaadhe shurrasha ihe ooyadhe.
Moʼo malla payni piyyeema rakko dhamma kodhdhamanna,
waarshusakka miira Haallikkito na okayna.
24 Koratetaakki aʼusundhe paaxni,
koro Ayhutatte ye kodhdhukka usundhe poojuyonki.
Iyyerusaalemekka haaki perre koro Ayhutatte kodhdhunna dhikkanne saasa usundhetakki rafisna(oghaminti).
25 Oqhqhayepa leeqqo pana xuske moontitona olho koro dhahxhxisaki na armanna,
waarsho piyyatte qaakaka tititopa koxmakko pasito apaqhettay immurruknapa tupe hela dhaponki.
26 Humnaadhdhe moontitokka qhooti lelleehne maallay,
korokka ippaynana ata tannu qhaatʼisa moʼona okaynapa murukettay xerkonki.
27 Xinkissana Ano Miʼaye Qhawhito humnapa kaanaste dhammattay anurratettay okaayyaana iyye hiina.
28 Apayini olissa kaasakki kodhdhamadhe paayyi payni dhinko haahundhikka qhooti itʼtʼuyi maallay gheteapa shikkaaranku,
qila payankuppa eemonku.”
29-30 Nakaleemakka hasi payipa lighnuusi nu qallu:
“Into kaarkko pelesattepa kaare kaasaasi eemindha,
apayni qharre huusundhiki nafucʼukipa hiʼanku payni oypako qhamu itʼtʼuyisa aʼarranku.
31 Qhamusa kula olho hasa lighooma kodhdhamadhe paayyipa hiʼanku payni Ahxase Haallikkito qhamu itʼtʼuytisa arindha.
32 Dhuke anhune qalli,
oli kaasay haki dhikkani saasa dhalati yelighghini.
33 Moontopa piyye issarpina,
naqharray Kʼaale Tayyu moʼokaki payni yesarpintikka.”
34 Nakaleemakka Iyyesuse hasi payipa nuqallu:
“Yiʼopa qukte naqsadhettay hexarkishepa qaakko piyyinu heghadhettay saqqe haahundhi qhamu yetardhineppa kuyyaqakussa qhamo siple tutuppe olo ghapa kula huna okayunnu hetiqitadhindha.
35 Moʼo malla payni olissa koro piyyatte qaaka kaasaasi okayniye,
36 lammi maghnusa okayina kaasanna kala qhama pinintepa Ano Miʼaye Qhawhito miinteema shikkaare alkasankunu kuyyaqako kaasay kokisadhapa ghissadhanku.”