Yihuta Iyyesusessi Likkasepa Teexenu Qhamu Parakaradhe qale ghari
22
Xinkissana Paalesi Dhilankito Faasikaa ana payiki iitʼuyi.
2 Rafisampawhe kʼeesadheetepa kollisampawhe hikkate qhooti waarsho ghaape maallay Iyyesusessi malaala qhamu ghapneppa poghonkinuki onke na gheeqadhe.
3 Kolladhampawhessi hudhdhanpa lakkina kittatte tookko kodhdha,
Yihuta Askʼoroottay ana payi kitteemi nasso magha xulli,
4 Yihutaka Iyyesuseesi qhamu malaala likkasnipa teexunukki karo intawampawhe kʼeesadheetepa koro Manne Kʼulkʼulawhe tiqtateesa kula ashshipa na qale torruyadhu.
5 Usundhekka qallitisattay ihxasoodheppa kodhattesikka qhamunu teexnenu naqale gharonki.
6 Usokka likkasepa teexenu ina qale ghari tupettay kuyyaqako waarsho yena taayyamnippa isinu gharraasi isi tiqtadha.
Esse Dhikkatate
7 Xaysa tupettay Paalesi Dhilankito anaorpo Faasika saqhni hxafi.
8 Iyyesusekka Petʼiroosepa Yohannisenaki hasa payipa eraku:
“Esse paale Faasikasi qhama yinaaninu ashshindhapa ine gharisanku”.
9 Usundhekka inna payenna:
“Ahaama gharisnanikka wooti?”
10 Usokka inna payina:
“Akkatama kula xullankuna qhawho sightettay qandhe dhooqhasa allighghinteye,
mannissa uso naamaghi kula nakala ashshindha.
11 Paappo manneetena hasa payanku:
‹Kollisampako iʼiyana:
«Mannesi manneete kittatte qagha kolladhampawhe haayyu illay esse Faasikay annayinaani hinka.»›
12 Usokka mannessi manneete saappeete qagha ghandhaqa anaqafte qafisiki hune hiʼaasniye haama ine gharisa.”
13 Usundhekka qhamosi Iyyesuse nuqalli kula iʼashsheppa na hxafonki,
yiʼosi Faasikaasika haama gharisonki.
14 Saate ihxaftina Iyyesuse erkampawhesi huusu qali esse kapeema qakkadhi,
15 hasakka napayu:
“Rakkosi an akkanina qharaʼita essi Faasikaasi huneqale yiʼenu umateki andharrai,
16 kulay anhunena payana,
Ahxase Haallikkito haki dhikkanti saasa lanka Faasikisi anu yinikka.”
17 Quktesikka akkuppa ikalataysadhi tupettay hasa napayu:
“Haadhippa hune kaasay ille hxafasoonku,
18 Anhunena iyyaana,
Ahxase Haallikkito haki okayti saasa kuyyunu koru lanka qukte aʼawsho woynattena tʼiipisi anu qukni.”
19 Dhilantakkosikka akkuppa kalataysadhu,
ghoodhdhupa hasa napayuppa nuteexu;
“Haadhi husika sakankosi Haayyu hune maallay teexamna,
husisa hela yetaaya.”
20 Qhamusa kula esse tupettay qukteesikka akkuppa hasa napayu:
“Haadhi quktikka kʼeeqhtesi Tayyu hune maallay ellay katape qhawtite.”
21 “Naqharray qhawhossi likkasnapa yeteexu haadhi yeqalli taanko kula shokki.
22 Ano Miʼaye qhawhitokka qhamosi qhariteema iyyepayamti kula anfarra,
naqharray qhawhusa likkasnapa yeteexu ihe ooyi.”
23 Usundhekka qhawhusa yaxa qhamu kodhdhisaki illena kakasqadhe paaye.
24 Holuppa Usundhena kittatte yaxa qhamu ighulisa arenu isi ille tamakadha.
25 Iyyesusekka hasinna payi:
“Nukusaadhdhessi koro Ayhutatte ye kodhdhunna waarsho huusundhiisi humnattakki rafise,
rafisampawhisakka Koro-Kodhmo-Xeesa-Kodhadha (Xorxawe) kippaayyame.
26 Kapay hune qhamussa kula qandhikka;
husana kaanta qhawho hunena kittatte qharunko kodhdhi qhamo qaso kula,
qhawho korossi rafisakka qhamo kodhampakko kula ikodhdha.
27 Emma keeni qhawho yiʼo kapa qakkadhipa qhawho kodhadhana hunka ghula?
Qhawhusa yiʼo kapeema qakkadhi qaandhi?
Naqharray Ano hunena kittatte qhamo qhawho kodhadha kula.
28 Hunekka rakko haayyu kaasanna yeqale akkokisateppa ghayyonkuma huni yela kaanta ashshonku.
29 Qhamu Paappo Haayyu yeesi poklumisi kula Anokka Ahxase Tayyusa anhune poklumisna.
30 Hussakka Ahxase Tayyuna yiʼo hayyusi qhama yiinteppa qukankunu,
holuppa qakkattaedheema qakkadhankupa kaffesi Israeelatte hudhdhanpa lakkisa qhaqhitte qhaqha nkunnu.”
31 Iyyesuse ihholipa hasa payu:
“Simioone,
Simioone,
Orriththo kulay qhamo akaspo hayyuyi kula huneesi hayyuyenuki waatatami.
32 Naqharray Ano dhukkaysadhe taahu qhamu ye hola patintinukki anho ghissadhi,
athokka aholti payni qharumaadhdhepa qassawhe haahuusi dhiktis.”
33 Simioonekka inna payi:
“Pogholho haayyu ano kulay,
ho qale shappamepa fartenukka an gharsadhi.”
34 Iyyesusekka inna payi:
“Petʼiroose,
kulay anhola payana kuyyu lukkalakko yeghuughunna qharʼita izzaxtakki ayeemarmadhinti.”
35 Iyyesusekka hasi payipa usundhe kasqadhu:
“Keenni kuyyaqakosi anhunena iʼyina korojopa karatʼite pana hxobhaadhdhe olo dhooqhadhina olho hunena qhacʼi iʼqagha?”
Usundhekka inna payenna:
“Olho toʼokokaki ye inena qhacʼukka.”
36 Usokka hasinna payi:
“Naqharray hantu qhawho korojopa karatʼite sheegha qagha payni idhdhoqhadhi,
qhawho ye pilawo sheeghikka ilaalle tuusuusi lasapa pitmadhu.
37 Moʼo malla payni qhamossi payami:
‹Maghawhe qali dhihami› pa athooxoyb yeema dhikkadhe gheeqasa,
karaykka olhossi aqhoota haayyu kaaʼita tooxina dhikkate tuusu ihxafti.”
38 Kolladhampawhesi huusu inna payenna:
“Pogholho haani,
haadhi pilawwo lakki qagha” Usokka inna payina:
“Ihxafna”.
Iyyesuse Qhamu Qupo Ekerkitosa Qissadhi
(Maat. 26:36-46; Mar. 14:32-42)
39 Iyyesuse qhamosi qharro kula ghissootenukki lighipa Qupo Ekerkito kula ashshoy,
Kolladhampawhesikka Uso kaleemi ashshe.
40 Ixxaytossina hxafenna inna payi:
“Teemmatteema qhamu huni xullintenu ghissadha”.
41 Usundhena kalla xayto awrukko ahatapnipa ahxafaso kula ghaqiti sikapuyuppa piyyeema ghulladhdhuppa hasa payupa ghissadhu:
42 “Aappa haayyu,
woʼoko Haahu payni shullu rakkitoosi yela miintatte akki,
naqharray woʼoko haayyu qandhimma haahu iyye kodhdha.”
43 Iʼhasa payina erkampatte moontonu Usoosi armadhipa dhiktisi.
44 Qhooti miiri rakkadhi maallay uumatteki ghissadhipa siipokka qhamo kʼeeqhtate isi ppiyyeema natʼiqha.
45 Ghissootesina ihhaqipa kolladhampawhe kula okayunna usundhe qhooti azane na naqati maallay hepiʼadhesi hxafi.
46 Usokka inna payi:
“Teemmatteema qhamu huni xullintenu haqapa ghissadhanku.”
Ghapame Iyyesuse
47 Iyyesuse iqallitate qaghana,
kolladhampawhessi huusu hudhdhanpa lakkina kittatte hossi Yihuta ana payiki waarsho kishanukki inthawipa Iyyesuse mayyenu nakula itʼtʼuyu.
48 Naqharray Iyyesuse inna payi:
“Yihuta,
Ano Miʼaye Qhawhitosiki ammayyitakkottay likkastipa teexay?”
49 Kolladhampawhesi Iyyesuse qale qagha olissa kodhdhamadhaasi ihhienna hasi napaye:
“Pogholho haani,
anpilawoota usundhe qhitʼna?”
50 Usundhena kittatte qhawho tookko kodhampakko kʼeesitosi kʼeesadheete ghulana qhaamte miskite qhaqhi.
51 Naqharray Iyyesuse inna payi:
“Into hxur,
lanka olho hasa lighana olo holi.”
Qhawhosinna qhamte tuusuusi saʼadhuppa dhinisu.
52 Xaysana intawampawhe kʼesadheetepa korossi Manne Kʼulkʼullawhe tiqadha pana xaadhighghesi piyyatte Uso ghapenu okayenna Iyyesuse hasinna payi:
“Qhamo qhawho koro sara aghapi kulakki ayye ghapenu pillawaadhdhepa dhaymidhdhe dhooqhattepa hxafoonku?
53 Kuyyaqako kaasay Ammanne Kʼulkʼullawhatte hune kollisapa isan hune qale qaghana qhawho yeema xarghgho haqisi ye qaghikka,
naqharray husi kuyyaqako haahundhipa hotukanko napoghlumni.”
Petʼiroose Qhamu Iyyesusessi Marmadhi
54 Xaysa tupettay Iyyesusessi ighghapepa kʼeesitosi kʼeesadheete ghulana manne huusu kula ashshonkittay.
Petʼiroosekka ikkeetipa sikaapnonu isinna kala ashshapa,
55 Petʼiroose korossi mannisana ghintate hatte folsadha kapeemi qakkadhi.
56 Shette kodhampatte manneete Petʼiroose ho hatte foolsadhaasi tayipa uuma eemopa hasa napayi:
“Aniya qhawhuka Uso qalli qaghi.”
57 Naqharray uso hasi payipa marmadhoy:
“Ato shetti,
ano kulay anu Uso arikka”.
58 Iʼokoto salina qhawho pile holi uso hiʼuppa hasa napayu:
“Atokka usundhe qale qaghti.”
Naqharray Petʼiroose inna payi:
“Ato qhawhu,
kulay ano qandhikka.”
59 Saate tootte kula ghaqitikki salina qhawho pile okayipa tomooma eemoppa iʼuso upadhi tupettay hasa payu:
“Qhawhu qhawho piyye Kalilanna qhooti kodhdhi maallay dhukkeema Uso qalli qaghi.”
60 Naqharray Petʼiroose hasinna payi:
“Ato qhawhu kula qhawhusa aqallitiisi anu arikka.”
Haannay qalliitesisi ye dhikisunna lukkalakko haattakki quughi.
61 Pogholhokka illaghghamipa Petʼirooseessi emmu;
Petʼiroosekka kʼaalsi Pogholho Iyyesuse napayina:
“Kuyyu lukkalakko yequughunna qharaʼita izzaxtakki ayye marmadhintiisi” Iʼhela taayi.
62 Petʼiroosekka seeto korakki lighipa uuma ooyoy.
Foolissadhdhe Qhamu Iyyesusena Xikke
(Maat. 26:67-68; Mar. 14:65)
63 Korossi Iyyesusessi shapipa isi tiqadhakka inna palashooodhipa tubhbhatho paayyu.
64 Ehxhxeesikka nashudhonkippa isi hasa napapaya:
“Into hxuuma qalladh,
yaxa ho shoqhi?”
65 Olho kishakka isinna qalladhapa dhafkottay isi dhaghisa.
Iyyesuse Qhamu Koro-Qhaqhite-Qhagha Minteema itʼtʼuyi
66 Xayto iqhqhay tupettay xaadhighghe piyyattepa intawampawhe kʼeesadheete pana kollisampawhe hikkatte illeemi hollepa Iyyesusessi Korossi-Qhaqhite-Qhagha miinteema itʼoosonki.
67 Usundhekka hasi payeppa kasqadhonki:
“Atokki Kristoose?
Into ine qalli” Iyyesusekka hasinna payi:
“Anhune qallina payni huni yela dhukkaysadhinte.
68 Anhune kasqanna payni huniye holasinte.
69 Naqharray hantunu paayyatti Ano Miʼaye Qhawhito Haallikkito miskitto kaaqila anqakkani.”
70 Xinkissana koro kaasay inna payi:
“Eeppa,
kati Ato Miʼaye Haallikkito?”
Usokka hasinna payi:
“Qhama Miʼaye Haallikkito kodhdhisa hune qalli.”
71 Usundhekka hasi paye:
“Xaynu koru misikiraadhdhe pile he moyto ine gheeqasa?
Haadhi ine pako huusuna qhaame haanitakki an apaqhniye.”