Wonkele Iyyesus Kristoose Luukʼaase Tooxi
Wonkele Luukʼaase
1
Thoofiloosesi kaanasamti,
olho ine kitta dhikkadhiisi hiʼaasa xayna qharaʼitha koro kisha tooxi;
2 he erkusaasi ine sarpisekka he paayoottatte ehxhxettay hiʼeppa Kʼaale thuusuna kodhampawhe kodhdhonki.
3 Ladhdhi Ano paayyootenu olho kaasay an uuma eemi tupettay thorri qhamu iʼille kala gharessa hoossi tooxenu olho xeesa ikkodhdhipa ye ximpadhu.
4 Olho anna maallay hasa kodhi olissa akkollatti qhamu dhuke kodhdhisa qhama arintinnu.
Erkampatte Dhaladhe Shoxampakko Yohanniseesi Qhamu Qalliti
5 Perressi Herodhiise nukusa piyye Yihutanna a kodhdhina,
kʼeesadhdhe qhottakko Apiyanna tookko kodhdhi kʼesitto Zekariyaase ana payi qagha;
xiskatto thuusu Elsapeetʼekka qhamo huusu the sanynye Aroonenna.
6 Usundhe lakkikka miinte Haallikkitona he pare qagha,
hayopa hikke Pogholhitoosikka meete male isi tiqthadha.
7 Ikkodhdhitama kapay Elsapeetʼe qhooti dhoopante kodhdhiti maallay miʼaye ye sheeghti,
holuppa usundhekka he kekkeshuye.
8 Kuyyaqko tookko Zekkariyaase Manne Haallikkitona kodhadhenukki qhootatte uso dhaghghaptina
9 qhamo tampe kʼeesadheete kula Manne Kʼulkʼullawhe kala xullepa tankare kuutenu itʼa uso akuy.
10 Xinke atankare kuutina waarsho kaasay ghinte kalakki kodhdhipa isi ghissadha.
11 Erkampatte Haallikkito xaytossi ana tankare kuutina xarghgho miskititottakki shikkaartipa Zekkariyaasenu armadhi,
12 Zekkariyaasekka ihhiʼina immurukipa uuma ghaapoy.
13 Naqharray erkampatte Haallikkito hasi na payti:
“Zekkariyaase,
olo ghaapima ghissoote thaahu ihho apaqhsamtiye!
Xiskatto thaahu Elsapeetʼe miʼaye shambho ihho dhalinti,
makaxko huusukka Yohannise anna payinti.
14 Usottay hxasopa he poghadhe ho kodhdhina,
he kishakka dhaladhe thuusuttay ihxhxasoonna;
15 usokka Pogholhito miinatte ho kaanasami ikkodhdhini;
tʼayye woynattekka ikkodhdha qukte koro hxayyesaasi ye qukni,
ippoorko yaaye thuusuna qaghanu paayyatti Nasso Kʼulkʼullottakki hoqhqhini.
16 Uso koro Israʼeelattena he kishaasi karo Pogholho Haallikko huusundhi kulakki holasni;
17 saqqe appadheetesi karo saqqe dhelleete kula,
heye eʼe payeesikka karo arnane koro pare qaghana kula holasenu,
Waarsho Pogholhonu kodhdhina gharisenu Nasso Kʼulkʼullopa humnassi Eliyaasena qaghatakki Usona miinaʼiha ashshini.”
18 Zekkariyaase erkampatte Haallikkitona inna payi:
“Olissa qhamu dhuke kodhdhisa mala an arri?
Ano xadhighto,
xiskatto thaayyukka ikeeshuyti.”
19 Erkampatte Haallikkitokka hasi paytipa nu holasi:
“Ano,
erkampatte Kapreelessi Haallikko miinta shikkaaray;
oti xeesay ho qallenukki an Haallikkito kaanata erkami.
20 Oli anho qallipa isi dhikkanna qhoota athu dhukkaysadhu maallay haaka olissa dhikkanni saasa qhawho mumi akkodhdhinti,
qalliithekka athu alkasinti” ki inna payti.
21 Kuyyaqkussana Zekkariyaase Manne Kʼulkʼullawhetena kala qhooti oladhipa isi yelighi maallay moonu qhamu oladhisa waarsho idhdhahxhxipa isi tiqadha.
22 Illighi tupettay korooma qalladhe ye alkasu;
qhooti xarghghettay qalladhi maallay Manne Kʼulkʼullawhatte kalla Haallikko olho miintaʼitha kodhdhamanna qhamunnu hiʼaasi iʼare;
xaysa tupettay ho muumi ikkodhdhipa oladhu.
23 Zekkariyaase kodhmossi manne Haallikkitona idhdhikkisi tupettay manne huusu kulakki qaaki.
24 Xaysa tupettay xiskatto thuusu Elsapeetʼe ishsheeghtipa leeqayo hxupin he bhadhi.
25 Isekka hasi payti:
“Pogholho haayyu olho xeesa iyye kodhi,
kuyyaqkossi iyye emminakki hxurakko huusuttay korito kittatte meethe haayyuusi ye patiisi.”
Erkampatte Kapreele Dhaladhe Iyyesuseesi Qhamu Maariyamenu Qalliti
26 Elsapeetʼe ishsheeghti tupettay leeqqo tapponna Haallikko erkampatte thuusu Kapreelesikki kathamassi piyye Kalilanna qagha ana payi Nazrete kula eraki.
27 Huna kula erkamtikka sheththessi qhawho sanynye Taawithenna kodhdhi Yoosefe ana payinu rapathamti thessi ye tʼirakko aru ana payi Mariyaame kula.
28 Erkampattekka xaytossi ise qaghti kulakki xullitipa hasa na payi:
“Atho thessi cʼikatamti nakayho ihhe kodhdha,
Pogholho he qale,
Atho xiskeete kittatte the sakamti.”
29 Mariyaamekka thorrisattay uumi muruktipa hasa payippa isi hela ghadhay:
“Husi xasaththo mala ligha?”
30 Erkampattekka hasinna payti:
“Mariyaame,
olo ghaapima Haallikkito miintatte akkaanaste tayattiye!
31 Lammi ashsheeghnappa Miʼaye shambho dhalay,
makaxko huusukka Iyyesuse anna payti.
32 Usokka ho dhamma ikkodhdhini,
Haallikkosi Olho Kaasanna Ghulana Miʼaye Huusu ippayamni,
Haallikkokka poghlunte paappo huusu Taawitheesikki nu teexni.
33 Manne Yaykʼoope sappeemakka perre ye hume sheeghekki poghlumni.
Ahxase thuusukka dhikkatte ye sheeghti.”
34 Mariyaamekka erkampatte inna payti:
“Ano tʼiirakko anu arina oli mali kodhdhamadhe alkanni?”
35 Erkampattekka hasi paytipa nu holasi:
“Nasso Kʼulkʼullo heema okayna,
Haallikkossi Olho Kaasanna Ghulana Humna huusukki he qale kodhdhina,
hussa maallay ho hela dhalanna Kʼulkʼullitto Miʼaye Haallikkitokki payamni.
36 Haa,
dhaliththe thaahi Elsapeetʼekka qharro dhoopante ana payi,
hantu miʼaye shambho ishsheeghtipa leeqqo thappi hxafasoy.
37 Olho Haallikkoosi malaala ye qaghi!”
38 Xaysa tupettay Mariyaame hasi na payti:
“Haa,
ano kodhampatte pogholhitoye,
qhamo atho payti kula iyye kodhdha.”
Lammi erkampattessikka inna kaanta laaghghamitipa ashshoy.
Mariyaame Qhamu Elsapeetʼeesi Eemmiti
39 Kuyyaqkussana Mariyaame haattakki haqtipa kathamassi ghuppete piyye Yihutanna qagha kula ashshoy.
40 Manne Zekkariyaase kula xullippa Elsapeetʼenu xasi.
41 Elsapeetʼekka xasatho Mariyaameesi iʼapaqhtina miʼayesi poorko hiisina kittatte qagha sorradhdhi,
Elsapeetʼekka Nasso Kʼulkʼulottakki hoqhqhiti.
42 Ikkitto dhammattakka hasa payipa riiri:
“Atho the xiskeete kittatte kaanasamti,
ho hela dhalanakka ho sakami.
43 Yayye Pogholho haayyuna ye emmenu ye kula okayi payni yeesi kaanaste dhamma;
44 ikkitto xasaththo haahina an apaqhina miʼayessi poorko haayyuna qaghakka hxasotakki sorradhdhi.
45 Olhu Haallikko qalli ho kodhdhamanna qhamu kodhdhisa qhoota dhukkaysatti maallay Atho the mala he poghatti.”
Qhaallitakko Mariyaame
46 Mariyaamekka hasi payti:
“Napse thaayyu Haallikkoosikki kaanasti!
47 Nasso haayyukka Haallikko kʼorisha hayyutakki hxasotti,
48 Haallikko dhafame ayliththe thuusuna ihiʼi.
Kuyyunu paayyatti dhalatha kaasay,
‹Atho the sakamti› yela payni.
49 Haallikko Humnampakko yeettay olho dhamma ikkodhi;
Makaxko huusukka kʼulkʼulliththo.
50 Koro Haallikko ghaapa kaasannu hxurakko huusu
dhalathanu haaka dhalatha saasa innu konni.
51 Tʼihile Thuusu dhikitatakki humna ye hiʼaasi;
pepolawheesi dhihatoote thuusundhi illay pulu.
52 He koro rafisaasi poghlunte thuusundhina iʼoodhdhasi
He takkummaasi kaanaste thuusuttay qila qila paasu.
53 He pufheesi olho xeesattakki dhalxasi;
shorokkeesi kapay xarghghe heneqqe illaaghi.
54 Hxurakko huusuusikki hela thaayipa
Israʼeele kodhampakko huusu kodhdhi kʼarkʼaru;
55 husikka qhamossi appaadhdhe haaninu iqalli kula,
kʼaalessi kippito Aprihaame pana sanynye thuusunu haaka perre ye hume sheeghessa dhikkisenu.”
56 Mariyaamekka leeqqo isex kula ghaqqikki Elisapeetʼe kapeema gheyyiti tupettay manne hisi kulakki holti.
Dhaladhe Shoxampakko Yohannise
57 Elsapeetʼena xeere dhaleete na hxafipa miʼaye shambho dhali.
58 Ghormaadhdhe thiisipa dhaliththo hiisi Haallikko qhamu ihxurakko dhaqqamma nu kodhisa iʼapaqheppa hxaso hiisisi na qale qhottadhonki.
59 Kuyyaqko settentonna miʼayissa qhama karazninub okayonkittay,
makaxkokko ho paappo huusu Zekkariyaasekka isi nu kodhe woʼa.
60 Naqharray yaayye thuusu ippaytina:
“Yekodhdhinti Yohannise ana payni.”
61 Usundhekka inna payenna:
“Dhalitho haahina kittatte qhawho makaxkussattay aʼooqi ye qaghi.”
62 Xaysa tupettay paappo huusuusi hasi payeppa milikithettay kasqadhonki:
“Makaxko miʼaye haahuna yaxa ana paynikka wooti?”
63 Zekariyaasekka olho inna tooxnisikki xarghottay na kassadhipa:
“Makaxko huusu Yohannise” paayuppa na tooxoy.
Hussa maallay koro kaasay olissattay dhaxxu.
64 Pako huusukka haattakki na qhaashamipa Haallikko kaanasuppa qalladhekka paayyu.
65 Gormaadhdhe thuusu kaasay uumi ghaapti,
otisakka ghuppessi piyye Yihuta kaasayki qhaskati.
66 Koro olissa apaqhi kaasay hasi payipa isi saqko kittekata dhihadha:
“Ata miʼayi moʼo ikkodhdhini thannu?”
Moʼo maalla payni,
dhukeema humna Pogholhito uso qale qagha.
Hxuuma Zekkariyaase qalladhi
67 Paappo miʼayeesinna Zekkariyaase,
Nasso Kʼulkʼulotaakki hoqhqhipa hasa payuppa hxuuma qalladhu:
68 “Haallikko Pogholho Israʼeelatte ihhxafipa
waarsho huusuusi aylunkito kaalla lihasu maallay ho kaanasami ikkodhdha;
69 Dhinisampakko dhikitaasikki sanynye
kodhampako huusu Taawithena c ine haqisi,
70 hussakka qhamossi kedhdhay pako
hxuumampawhe kʼulkʼullawhettay qallami kula;
71 Xargho parakaradhdhessi haani ine qhipana kallakki ine pinnisi.
72 Olhunna maallay hasa kodhi hxurakkossi huusu appaadhdhe haaninu hiʼaasipa
katape kʼulkʼullitesiisi thaayisenu.
73 Akuttessi paappo haani Aprihaamenu akutadhiisi hela thaayenu;
74 katapissakka xarghghe parakaradhdhe haanina kaalla qhama lighnaanippa
ghaapko male nu kodhadhaaninu;
75 perre haani kaasanna Haallikkito miintatte kʼulkʼullunkopa pare qaghunkottay qaake qhama an alkasnaninu!
76 Holuppa atho miʼayi,
Haallikkossi olho kaasanna ghulana hxuumampakko huusu kappayaminti.
Onke Pogholhito gharisenu na qharaʼitha aʼashshinti.
77 Pogholhokka waarshonu cʼuppo hxurettay arno dhinkito innu teexni.
78 Hxurakkossi Waako haani xeesana paayyatti,
oqhqhaye sinkato moonthikki ine lighi.
79 Hussakka korossi thukkankito qaakapa isi kaasse fartattena kaalla qaaghanu hammakko qhamunnu haahisninu,
lughghe haanisikka onke nakayhito kula qhamunnu intawninu.”
80 Miʼayesikka ighghohi,
Nasso Kʼulkʼullottay dhikitu,
haaki waarsho Israʼeelettenu armanni saasa mandhito qakoyyi.