Dhaladhe Iyyesuse
2
Perrisana piyyaadhdhe ahxase Roome rafisti kaasanna koro qhamu makaxxe huusundhi tooxasanipa dhihamonu Awkistʼoosea Kʼesaareb hayo illihasi.
2 Hussakka Perressi Kʼernewoose piyye Sooriya rafisina dhihakkussa waarshito ho payyootatte.
3 Hussa maallay qhawho kaasay makaxko huusu tooxasadhenu xayto inna dhaladhi kula ashshoy.
4 Yoosefekka sanynye Taawithe qhooti kodhdhi maallay kathamassi piyye Kalilanna kittatte qagha Naazrathenukki haqipa karo kathamassi piyye Yihutanna kittatte qagha kathama Taawithe Petheleheeme kula ashshoy.
5 Yoosefekka makaxko huusu tooxasenu xaantessi thuusu irrapadhipa sheeghoy Mariyaame illakki ashshe.
6 Ihaaha Peetheleheeme ghayyana Mariyaamena xeere dhaleete na hxafi;
7 miʼaye qharitho hiisi shambho dhali.
Kacʼarettay shudhi,
xayto hayhitho na rafi qhooti ye tayadhonki maallay maahxatho ana qhollenu qashko teexisa+ \fr 2:7 \ft ABAALESINNA foto widh apaalesina manker raffisi.
Koshnampawhepa Erkampataadhdhe
8 Piyyissana koshnampawhe he awne liqqakito qeemme irpanko koshakki qagha.
9 Erkampatte Pogholhito tutuppe iʼusundhe kula okaytipa nu armadhippa kaanaste Haallikkitokka na kaaʼitha hammakko hammasi,
usundhekka uuma ghaaponki.
10 Naqharray erkampatte hasa inna payti:
“Olo ghaapemma ote xeesay the waarshsho kaasasi hxasooniisikki an hune qallenu okayiye.
11 Kuyyu kathama Taawithessa Dhinisampakko hune dhaladhi,
Usokka Pogholho Kristoose.
12 Olitakka arinte,
Miʼaye ho akacʼarettay urkeesipa maahxaththo qholenu ana qashko teexina sappeete isi rafasikki ahiʼinte.”
13 Erkampataadhdhe kishakki moonthito erkampattessi qale tutuppe armadhi,
hasa payoonkippa isi Haallikko kaanasa:
14 “Haallikkonu kaanaste kuta moonthito.
Nakayhokka koro piyyatte Waako na hxasoodhinu ikkodhdha!”
15 Erkampattadhdhessi iʼusundhena kaanta laaghghameppa moontho kula ashshonki tupettay koshnampawhekka hasi illena papaye:
“Petheleheeme kula ashshinipa olissa kodhdhamadhipa Pogholho ine qalluusi eemni!”
16 Usundhdhekka hattakki haqeppa ashshonki.
Mariyaamepa Yoosefe,
miʼayesikka keero qholetena mahxatho qhole na qandhe qukenna kitatte ho rafasa hxafonki.
17 Ihiʼe tupettay olhossi aqhoota Miʼayissa kaaʼitha anu qalli kaasaasi thorruyonki.
18 Koro olissa koshnampawhe qalle apaqhi kaasay idhdhahxhxi;
19 Naqharray Mariyaame olissa kaasasi saqako hiisi kitteema ghapattipa isi hela ghaghadhay.
20 Koshnampawhessikka olhosi anu qalli kaasaasi qhamosi anu qallisa qhooti hiʼe maallay olhossi iʼapaqheppa hiʼonki kaasannu Haallikkoosi ikaanaseppa kalataysadhonkippa holonki xaytossi huusundhi kula ashshonki.
Iyyesusesi Manne Kʼulkʼulawhe Kulakki Aʼashshittay
21 Miʼayeesikka kuyyaqko setten ihxhxafasina ikkarasisec;
makaxkossi erkampatte Haallikkito haannay ye sheghamunna qharriteema qalliti kula Iyyesuse ana payu.
22 Qhamossi Tampe Muuse kula kuyyaqko alheesatte dihxafina Yoosefepa Mariyaamekka Miʼayeesiisi Pogholhonu itʼoosenukki kathama Iyyerusaaleme kula ashshettay.
23 Hussakka hossi tampe Pogholhitosa hasa payamipa tooxamoy dhikkisenu:
“Ho shambho qharitho kodhdhi kaasay Pogholhonu ho reehammie ikkodhdha”.f
24 Holuppa Hikke Pogholhitona “hxarpitakko lakki,
taakinti cʼiwcʼiwitte qhalalakito lakki” qhamu payamtisag Pogholhonu teexakko itʼoosonki.
Simiʼoone Iyyesusesi Ihiʼi
25 Xinkissana qhawho ana payi Simiʼoone ho piyye Iyyerusaalemattena qagha,
usokka ho dhinko Israʼeelateesi tiqthadha,
ho pare qaghapa qhawho kokkisadha qagha,
Nasso Kʼulkʼullokka usona saapete.
26 Uso Kristoosessi Pogholho erakiisi ye hiʼunna qhamu ye farrisa Nasso Kʼulkʼullo nu qalli.
27 Usoosikka kuyyakussana Nasso Haallikkito haqisipa karo Manne Kʼulkʼulawhe kula ashshoy.
Yoosefepa Mariyaamekka qhamosi hikke payti kula kodhenu Miʼayeesittay karo ghinte Manne Kʼulkʼullawhate kula okayonkittay.
28 Simiʼoonekka miʼayessiisikki uyyipa sakaradhuppa hasa payuppa Haallikkoosi kaanasu:
29 “Pogholho,
qhamossi ayye katape xulti kula hantu aylitho haahuusi nakayhottay laaghi!
30-31 Ehxhxe hayyukka dhinkossi akkoro kaasay miinteema gharistiisi ihiʼe.
32 Usokka korossi Ayhutatte ye kodhdhu qhamu xayto hiinenu hammakko innu kodhdhini,
waarsho haahu Israʼeelenukka kaanaste.”
33 Yoosefepa Mariyaamekka olissa Miʼayissa kaaʼitha qallamittay idhdhahxhxe.
34 Simiʼoonekka iʼusundhe saki tupettay yaaye Thuusu Mariyaamena hasina payi:
“Haadhi miʼayi waarsho Israeelattena kittatte he kishanu haqepa hekishanu rane innu kodhdhini,
holuppa koro Uso tooranukka milikite ikodhdhini.
35 He kishana olho saqko kitteema na bhadhamiisi na armatheesenu,
holuppa napse thaahikka pillawo azanatte hela dhothna!”
36 Holuppa sheththessi Fanuʼeele sanynye Aserenna kodhdhay Hxumampattessi Hanna ana payi haaha qagha,
isekka the uuma keeshuyti.
Shetunkottay iʼakkatina tʼiirakko hiisi qale perko taxxanki aakti.
37 Haki perko 84 hxafasti saasa;
awnepa kuyyaqate the Manne kʼulkʼullawhatena ye rehamuna yiʼo male ghissotettay kodhadhay,
the tʼiirakko nafari.
38 Xinkissana isekka iʼokaytipa Haallikko kalataysadhi,
korossi dhinko Iyyerusaaleme tiqthadha kaasannukka qhoota Miʼayissa kaaʼitha thorruyi.
39 Yoosefepa Mariyaamekka tampessi hikke Pogholhitona payamti kaasaasi idhdhikkise tupettay,
kathamassi huusundhi piyye Kalilanna kittatte qagha Nazrate kulakki hole.
40 Miʼayessikka ikkaanipa kʼalpoodhoy.
Arnanetakka hoqhqhu.
Kaanaste Haallikkitokka Usona saappeete.
Iyyesuseesi Manne Haallikkito Kulakki ashshettay
41 Yoosefepa Mariyaamekka paale Faasikah kaanasenukki perko perkooma Iyyerusaaleme kula ashshaye.
42 Iyyesusekka perko hudhdhanpa lakki ihxhxafasina,
qhamosi qharro kula paalessi faasika kulakki ashshey.
43 Paalessiisi idhdhikkiseppa manne huusundhi kula isi holana Miʼayessi Iyyerusaalemeema ihaqhi,
ahxke huusu kapay qhamu haqhisa ye aronki.
44 Usundheesi ho na qale qaghakki nu lighipa onke kuyyaqko tookito ashshonki.
Naqharray qhamu ye usundhe qale qaghisa iʼare tupettay iʼashsheppa mannaadhdhe ahxkadhdhe huusundhipa dhaliththo huusundhina kaanta gheeqe paayyonki.
45 Idhdhape tupettay innigheeqana Iyyerusaaleme kula holonki.
46 Kuyyaqko isex tupettay ashshonki ghinte Manne kʼulkʼullawhattena ho kollisampawhe qale qakkadhapa isi usundhe apaqhasapa isi usundhe kasqadhaasi tayonki.
47 He Uso apaqhe kaasay arno huusupa Olhunna kasqadhiisi nu holase thuusuttay idhdhahxhxe.
48 Ahxke huusukka Iʼuso hiʼenna xinkissana yaaye thuusu hasinna payti:
“Ata Miʼaye haayyu,
man hola konnippa hasa ine kodhay?
Kulay paappo haahupa ano arakkannippa isan ho gheghgheeqani.”
49 Usokka hasi payipa nu holasu:
“Ata moʼo maallakka ye gheghgheeqte?
Manne Paappo haayyuna tayame qhamu ye gheeqastisa huni arte?”
50 Naqharray usundheesi olissa innu qalli ye nuxulukka.
51 Xaysa tupettay ihhaqipa usundhe qale Nazrate kula ashshoy;
olhunapaye kaasaasi isinna apaqha;
olissa kaasaasi yaaye thuusu saqkoomi ghapati.
52 Iyyesusekka Haallikkopa korito miintatte arnanepa shikkartepa kaanastettakki ghohi.