Iyyesusesi Shittottaka Shiini
14
Paʼalesi Faasikappa the Dhilankitoa kaanasenu kuyyaqako lakki haqhina inthawampawhe kʼeesadheetepa kollisampawhe hikkattekka Iyyesusessi qhamu ghapneppa dhohmuntettay poghonkinukki onke gheqadhe.
2 Ikkodhtama kapay hasi illena papaye:
“ Ikkuyaqako paʼalatenna kodhde hxurta;
moʼo maalla payni waarsho paqhato haqisna.”
3 Usokka qhawhossi ghodhdhe Pittaaniyana qaaka qharro lemtʼe na qaghti ho Simiʼoonenna manneeti qaghi,
yiʼoosika anu itʼtʼosuppa isi yiʼana xiskkatakko tootte shitto ho ana pay nartoose ho uuma xeesa xorto huusukka uuma na shooshipa oshoqonoka nahoqhus pilkʼaatesi awrukko alpastʼiroosena akkodhdhittay dhooqhipa okayittay,
pilkʼaatesiisi ghoodhippa shittosiisi Iyyesusena pukkaqateema elisi.
4 Korossi xaytusana qaghana kittatte tookke tookke hasi payeppa miiroodhokippa xiskkatosiisi meethuyonki:
“Shittussa moʼo maallakki hasa lathu xarkishami?
5 Tinaare dhippa issaxna ghuta saamaka lasipa kodhaththisaasi axiyyawhenu qhooto payni iwyya ahxay.”
6 Naqharray Iyyesuse hasina payi:
“Hxura!
Moʼo ihhune kontipa isa rakkisanku?
Isse kulay olho xeesa iyye kotti.
7 Xiyyawhe kuyyaqe kaasay qhooti hune qale ghayyine maallay usundheesi kuyyaqako awwoote kaasay kʼarkʼare aʼalkasnanku.
Naqharray Ano kuyyaqe kaasay hune qale anu ghayyinikka.
8 Isekka olhonu alkasamnasikki kotti;
pishko haayyusika maayte qharaʼita gharisenu shittottay shiini.
9 Dhuke anhune qalli,
ote xeesaasi apiyye qhaatʼe kaasay torruyana oli xiskattu kottiisi ahela thaaynappa isanu thorruyna.”
Yihuta Iyyesuse Likkasenukki Inthawampawhe Kʼeesadheete Qale Qhari
10 Hossi kolladhampawhe hudhdhanpa lakkina kittatte tookko kodhdha Askʼoroonththu Yihuta Iyyesusessi likkasepa teexenukki karo inthawampawhe kʼeesadheete kulai ashshi.
11 Usundhekka iʼolisa apaqhenna ihxhxasoodheppa kodhaththe nu teexenu kippo nu teexonki.
Usokka Iyyesusessi likkasepa teexenu kuyyaqako nu gharraasi isi tiqithadha.
Esse Pogholhito
12 Paʼalesi Dhilankito ana Orpo Faasika saqhni kuyyaqako payyotatena kolladhampawhe Iyyesuse kulakki okayeppa hasa na payonki:
“Esse paʼale Faasikasi ahaama an ashshinaanipa ho gharisaanikka wooti?”
13 Usokka kolladhampawhe huusuna kittatte qhawho lakkina hasina payipa eraku:
“Kathama kula ashshindha,
haahakka qhawho sightettay qandhe dhooqhasa ahxhxafinteye Uso kaleema ashshindha.
14 Mannisa uso na xullisa na kula xullankuppa paappo manneetena hasa na payanku:
‹Kollisampakko iʼiyyana:
«Mannessi ahayhithonu gharrapa isa kolladhampawhe haayyu illay esse Faasika yiinani hinka?»›
15 Usokka mannessi manneete saappeete qagha ghandhaqa agharisipa anaqafte qafusikki hune hiʼaasniye.
Haama ine gharisa.”
16 Kolladhampawhesikka katamassi kulaki ashshepa qhamosi Iyyesuse nu qalli kula na hxafonki.
Yiʼosi Faasikaasikka haama gharisonki.
17 Xayto iʼawnuyina Iyyesuse kolladhampawhessi hudhdhanpa lakki qali okayi.
18 Iyyiito yiankina Iyyesuse hasina payi:
“Dhuke an hune qalli;
hunisa ye qale yiito yiana kittatte qhawho tookko illikasnapa ye teexu,
qhawhusakka hantu ye qalli esse yiʼi.”
19 Usundhe kaasannukki dhakaatipa pukkaqate pukkaqatenu isi hasa papayanki:
“Ata ano an kodhdhinim?”
20 Usokka hasi napayi:
Hunisa 12 na kittatte hussa ye qale taanko kula xargho oodhasa;
21 Ano Miʼaye Qhawhito qhamosi aqhoota haayyu tooxi kula an farra,
naqharray qhawhussa Ano Miʼaye Qhawhitoosi likkasnapa ye teexu ihhe ooyi!
Qhawhussa ye dhaladhu payni nu woyya.”
22 Iʼiyyankina Iyyesuse dhilantakko iʼakkipa kalataysadhu;
ghoodhdhuppa kolladhampawhe huusuna hasa payuppa nu teexu:
“Haadhi husi sakanko haayyu.”
23 Qukteesikka akkuppa ikkalataysadhi tupettay nu teexu;
usundhe kaasakka qukonki.
24 Holuppa hasa na payu:
“Haadhi husi kʼeeqhtesi thayyu koro kisha maallay ellay katape qhawtitte.
25 Dhuke an hune qalli:
Hakan awshossi woyne qhawtitatte atʼiipisi Ahxase Haallikkitona qukni saasa xaynu koru lanka quktiisi an qukni.”
26 Iqhqhalithakko nassawnkito qhaalladhe tupettay iʼashsheppa Ghupo Ekerkito sappeema hadhdhonki.
Iyyesuse Petʼiroose Qhamu Uso Marmanisa qharriteemi qalli
27 Iyyesusekka hasinna payi:
“Qhamossi apayina ‹Kooshshitoosi an shoqhna,
qeemme irrpankosikka illena kala pullamonki›b kula hune kaasay kalapkunna ayye marmananku.
28 Naqharray an fartatte haqi tupettay piyye Kalilassa an hune inthawni.”
29 Petʼiroosekka hasina payi:
“Hisi kaasakki ho hxurrapa ghoradhonki kaki payni ano anu ho hxurri.”
30 Iyyesusekka hasina payi:
“Dhuke anho qalli,
kallapkunnau lukkalakko lakkittay ye quughuna qharaʼitha issaxtakki ayye marmadhinti.”
31 Petʼiroosekka ikkokisipa na payu:
“Fartte kaki kodhdhinti payni anho qale farra dhiishoy moʼo kaki payni anu ho marmanikka.”
Kolladhampawhe tookkekka isi qhamu huusu papaya.
Iyyesuse Ketesemaanessi Ghissadhi
32 Xaysa tupettay Iyyesusepa kolladhampawhatte huusu xayto ana payi Ketesemaane kulakki ashshe,
hasakka napayu:
“Hune xaysa ghayyindhama Ano an ashshina ghissadhaye.”
33 Petʼiroosepa Yaykʼoope pana Yohannisesikki he kala ooqipa ashsho asanepa cʼanakʼame paayyu.
34 Holuppa hasana payu:
“Hakan farri saasa napse thaayyu uumi asanti,
hassasa ghayyindhapa kokisadhaku.”
35 Okkotto usundhena kanta xighghupa piyyeema ghulladhuppa iʼalkasamna payni saatisay qhamunna sarpintinu hasa paayyupa ghissadhu:
36 “Appa Appa,
Hoosi olho kaasay ihho alkasamaye shullu rakkitoosi yela mintatte akki;
naqharray woʼoko haayyu qandhimma ihhaahu kodhdha”.
37 Iholi okayunna he piʼaadhesi hxafipa Petʼiroosena hasa payu:
“Ata Simiʼoone appiʼaati?
Mala saate toottekakki kokkisadhe malaalti?”
38 “Qhamu huni theemmatteema xullintenu kokisadhapa ghissadhanku;
nasso ighgharima sakanko tardhampako.”
39 Iholi ashshoppa ghissootesi payyotatte ghissadhina holuppa ghissadhu.
40 Ihholipa lanka na kula holunna ehxhxe huusundhi piʼaattetakki naghapame maallay he piʼaadhesi hxafi.
Olhunnu holasesikka ye hela sheeghe.
41 Tara issaxakka holuppa hasana payu:
“Thannu rafapa hxaysadhanku!
Ikodhdhiti,
haadhi saatesi ihxhxafti,
Ano Miʼaye Qhawhito xarghe cʼuppolawhattesa likasnipa ye teexu.
42 Qhawhossi likkasnapa ye teexukka iʼokaayaye;
haqapa ashshini”.
Ghapame Iyyesuse
43 Iyyesuse qallithessiisi haannay ye dhikisunna kolladhampawhessi huusu 12 na kittatte tookko kodhdhi Yihuta ana payi miinakalti okayi.
Uso qalekka koro kisha ho pillawaadhdhepa dhaymidhdhe dhooqhadha qagha;
korussaasikka intawampawhe kʼeesadheetepa kollisampawhe hikkatte pana xaadhighe piyyatte eraki.
44 Hossi likkasnapa teexu korossinna hasinna payipa nughudhdhu:
“Qhawhussa ammayyini usoye ghapapa kokkisankuppa ashshonkuttay.”
45 Usokka miinakalti Iyyesuse kula itʼtʼuyipa:
“Kollisampako haayyu!”
Na payuppa mayyu.
46 Korossikka Iyyesuseessi ighghapipa shapu.
47 Korossi xaytusana shikkaarana kittatte tookko pilawwoosikki yukipa aylitto kʼeesitto kʼeesadheete ghulana qhamte ghoxu.
48 Iyyesusekka hasina payi:
“Qhama qhawho koro sara aghapi kulakki ayye ghapenu pillawwaadhdhepa dhaymidhdhe dhooqhattepa okayanku?
49 Ammanne Kʼulkʼullawhatte kuyyaqako kaasay hune kollisapa isan hune qale qaakanna huniye ghaponku;
naqharra husi Kʼaalessi Matʼaaffe Kʼulkʼullawhatte kittatte qaghaki dhikkadha.”
50 Kolladhampawhesi huusu kaasakka Iʼuso hxurepa ghoradhonki.
51 Ponkoritho tookko ho laalle urkuyipa isi Iyyesuse kaleema ashsha qagha.
Korossika iʼuso ghapina,
52 laalle thuususi ihhela kʼuripa heneqitte sorruppa pinnu.
Iyyesuse Qhaqhitte nuki itʼtʼuyi
53 Iyyesuseesi karo manne kʼesito kʼeesadheete ghula kulakki ashshettay,
xaytusanakka intawampawhe kʼeesadheetepa xaadhighghe pana kollisampawhe hikkatte kaasakki haamatte illa holi.
54 Petʼiroose ikkeetipa sikapnonu isinna kala ashshapa ho kʼesitossi kʼesadhdheete ghulana manneete na qale hxafoy.
Immannesinna hxafina korossi sape tiqadha kapeemi qakkadhipa isi hatte folsadha.
55 Intawampawhe kʼesadhdheetepa Korossi-Qhaqhitte-Qhaqha kaasay qhamu Iyyesuse poghnenu misikiradhe inna gheeqe,
naqharray ye tayonki.
56 Koro kishaka aayyadhe inna masakari,
ikkodhdhitama kapay misikirunko huusundhi yeʼille lighi.
57 Koro tookko tookko ihhaqipa hasa payuppa ayyaadhe na masakaru:
58 “Qhawhu ihhasa payanaki an apaqhni:
‹Ano Manne Kʼulkʼullawhi axarghe qhawhitottay ghupaadhiisi an pullapa hola kuyyaqako issxasa pilawhe he xargho qhawhito yeghupadhuusi ghupadha.›”
59 Ikkodhdhitama kapay misikirunko huusundhi yeʼille lighikka.
60 Kʼeesittosi kʼeesadheete ghula usundhe miinteemi haqi shikkaaruppa hasa payuppa Iyyesusessi kasqadhu:
“Olho koru hooma qalli kaasanna olho toʼokoka athu holasinti?”
61 Naqharray Uso ikʼkʼampayima olho toʼokoka yenu holasu.
Hantukka kʼeesittosi kʼeesadheete ghula hasi payipa Uso kasqadhu:
“Atho Haallikkoosi Sakamina Miʼaye Huusu Kristoose?”
62 Iyyesusekka ina payina:
“Ee,
Ano Miʼaye Qhawhito an Haxnottay miskitto Haallikkito kaaqila qakkadhanaki aye hiʼinte.
Holuppa an moonthiki urratettay holipa isan okaayanaki ayye hiʼinate.”
63 Kʼesittosi Kʼesadheete Ghula laalle thuusu ihhela kaaqipa hasa payu:
“Xaynu koru misikiraadhe pile hemoyto gheeqasa?
64 Haadhi lammi idhdhaghisto hasa lighaasi Haallikkooma qalladhana aʼapaqhte;
lammi mali hune lighti?”
Usundhe kaasay:
“Fartte Uso gheeqasa!”
Kippayeppa na qhaqhonki.
65 Xinkisana koro tookko waawi na thuffe paayyi,
ehxhxekka na shapokippa isi thuthubhapa isi hasa na papaya:
“Into hxuuma qalladh!”
Koro sape tiqadhakka isi kakanaqasadhapa ashshonkittay.
Petʼiroose Iyyesusessiki Marmadhi
66 Petʼiroose ighghintate karo kalunna qaghana kodhampawhesi kʼeesito kʼeesadheete ghulana kittatte shette toottte uso kula okayi;
67 Petʼiroose ihhaththe foolsadhana hiʼippa tomooma eemoppa hasa na payi:
“Athokka Iyyesusessi katama Naazrate qale aʼokayti.”
68 Naqharray uso hasi payipa marmadhoy “Anu arikka,
olha qalliti yeye xuli.”
Ighghintate seeto kula lighina lukkalakko haatakki quughi.
69 Kodhampatesikka ihholti Petʼirooseessi lanka tayipa korossi xaytusana shikkaarana hasa payi:
“Qhawhuka kulay ho usundhe qale qagha!”
70 Naqharray uso lankanakka ihholi marmadhoy.
Iʼokoto salina korossi xaytusana shikkaarana kittatte qhawho tookko Petʼiroosena hasina payi:
“Atho qhama qhawho piyye Kalilanna kodhdhitisa karay qalliithe thaahuttay aʼupthama maallay dhukkeema atho ho usundhe qale qagha.”
71 Naqharray uso inna payi:
“Qhawhusa aqalliiteesi anu ari!”
pa he qhiicʼpe akutadhe paayyu.
72 Hattay lukkalakko lankaki quughi.
Petʼiroosekka lukkalakko iʼquughina kʼaalessi Iyyesuse na payi “Lukkalakko lakkittay yequughunna qharaʼita issaxtakki ayeemarmadhintiisikki” hela thaayipa uuma ooyoy.