Iyyesuse Qissootati Kollisi
11
Kuyyaqako tookko Iyyesuse xayto toʼonaki ghissadhi,
ighghissotessi dhikkisi tupettay kolladhampawhessi huusuna kittatte tookko inna payi:
“Pogholho haayyu,
Yohannise qhamu kolladhampawhe huusuusi ghissoote kollisi kula Atokka ghissoote ine kollis.”
2 Iyyesusekka inna payi:
“Aghissadhankuna hasa paya:
Appa haani [moontito qaaka],
Makaxko Haahu ikʼkʼulkʼullawwa;
Ahxase Taahu iʼokayta,
[Woʼoko Haahu qhamu moontooma kodhdhi kula piyyeemakka ikkodhdha].
3 Yiʼo haani kuyyaqakitoosi kuyyaqako kuyyaqakooma ineteex.
4 Koro inena dhappinu qhama hxurri kula,
cʼuppo haanisikka ine hxur.
Teemmatteema oloine xulleesima [maghnito ine pinnis.]”
5 Nakaleemakka Iyyesuse kolladhampawhessi huusuna hasinna payi:
“Lighnonu hunena kittatte qhawho tookko ho dhalitto sheeghapa dhalitusa huusu awne para kitte uso kula okayuppa:
‹Dhalitto haayyu maʼala dhilantakko izzax yepasanma,
6 Hayhitto onkenu ye okayipa olhannu teexni isi anu sheeghi› napayuppa isiwaatadha payni,
7 lammi dhalitusa manneete kalla qagha:
‹Maʼala oloye rakkisima mankaxxe akʼupi,
dhellekka hassa ye qalli rafe,
hussa maallay haqepa dhilantakkosi awooti hoteexe anualkasni› inna payina?
8 Anhunena payana qhoota dhalunkitonu kaki haqepa nuteexe ye woʼukka payni qhooti kasqo kokisi maallay olho gheeqasa kaasay innu teexna.
9 “Hussa maallay Anokka hasa an hunena payi,
ghissadhama ihune teexamnayye,
gheeqama atayanakuye,
mankaxxekka koxisama ihune qhaashamnaye.
10 Moʼo malla payni qhawho ghissadha kaasannu itteexamna,
qhawho gheeqadha ittayanna,
qhawho mankaxxe koxisanukka innu qhashamna.
11 Hunena kittatte qhawho paappo kodhdhipa miʼaye huusu inna dhilantakko kasqadhana honu awrukko teexa yaxa?
Inna hxaaritte kasqadhana tawwo innu teexna?
12 Taakinti inna ʼukaaxitte kasqadhana kaytakko innu teexna?
13 “Lammi hune hemaghawhe kodhdhiteki miʼaadhe haahundhinu olho xeesa teexe ara payni Paappo haahundhi moontito qagha he Uso ghissadhanu Nasso Kʼulkʼullo malakki ye ghulasnippa nuteexu?”
Iyyesusepa Pielzepule
(Maat. 12:22-30; Mar. 3:20-27)
14 Kuyyaqako tookko Iyyesuse qhawho nasso maghakko ho koro muumisa naqaghinaki nassossi maghaasi lihasi,
nassossi maghaka inna lighi tupettay qhawhossi muumikka i’qalladhi.
Waarshokka dhahxhxu.
15 Naqharray korussana kittatte tookke tookke ipaya:
“Kulay nassidhdhissa maghaasi hossi rafisampako nassidhdhe maghana kodhdhi Pielezepuletakki lihasi.”
16 Koro tokkoka Uso temme woʼipa qhamu moontito olho koro dhahxhxisa nuhiʼasninu kasqadhu,
17 Naqharray Iyyesuse dhihattoote tuusundhisikki inna aripa hasa napayu:
“Ahxase ille qhoqhoota kaasay ippannay,
qhamussa kula ahxke tookke ille qhoqhoota payni ipullamnanki.
18 Seetʼana iʼille qhoqhoota payni Ahxase tuusu mali shikkaare alkasinti?
Naqharray hune aʼiyankuna nasso maghaasi Pielezepuletakki lihasi.
19 Lammi Ano Nassidhdhe maghaasi Pielezepulettay lihasa payni,
dhelle haahundhi yaxattakki lihase?
Hussa maallay dhelle haahundhiki huneema qhaqhitte qhaqhna.
20 Lammi Ano ghoqakko Haallikkitottay Nassidhdhe maghaasi lihasa payni Ahxase Haallikkito hune kula qhamu iitʼuytisa arindha.
21 “Apayini qhawho tookko hodhikita maahxe orixankito pareema shapadhipa isi manne huusuusi tiqitadha payni olhu sheeghi nakayhotakki innutiqitamni.
22 Naqharray qhawho pilakko ho usoosi dhikitatte ghulaki okayipa usoosi putu payni maahxesi huusu orxankito ikippadhiisi inna ʼakkinapa olhu sheeghikka nasaru.
23 “Qhawho ye qale ye kodhdhu kaasay iyye toora,
qhawho ye qale ye illa holsadhikka ippulla.
Nasso Magha Qhamu Lanka Holipa Isi Qhawhooma Xulli
(Maat. 12:43-45)
24 “Nasso magha qhawhito illighi payni xayto inna hxaysani ighgheeqipa xayto qandhe yena qaghe piyye haxawtina isi lalaghama,
naqharray xaytoinna hxayisaniisi idhapi payni hasi payi ‹An ashshinapa mannessi haayyu anna lighi kula hola›.
25 Iholi okayunna mannessi he ooshamepa gharonkisa ihxhxafi.
26 Xaysa tupettay iʼashshinapa Nassidhdhe magha pilawhe taxxan he usona maghnito ghulaasi ooquppa okayuttay.
Usundhekka qhawhossi qharo uso na qaghisa xullonkippa is haaha qaakai.
Hussa maallay qagho qhawhusana hoqharrona kaanta hantu ho ghulatakki xarkishamni.”
Hepoghadhe Dhukatte
27 Iyyesuse ihasa qalladhina xiskatakko tootte korossina kittatte hasa payipa uuma riiri:
“Yayyisay ho dhaltipa Hoshurashoy temala hepoghatti.”
28 Naqharray Iyyesuse inna payi:
“Qhawho Kʼaale Haallikkitoosi apaqhqhasipa isi kodhmito nakeesaki hohe poghadhi.”
Dhahxhxoote Yonaase
(Maat. 12:38-42)
29 Waarsho Uso kapeemi illaholipa naqunna Iyyesuse hasi pay:
“Dhalati maghakko,
dhahxhxooti hiʼe woʼi.
Naqharray dhahxhxoote hxuumampakko Yonaase malettay pileesi olonu hiʼasni.
30 Moʼo malla payni Yonaase qhamu koro katama Nenewwennu milikite kodhdhi kula Ano Miʼaye Qhawhitoka dhalatinu milikite annu kodhdhini.
31 Pogholtesi piyye karo Hakalanna qhooti arnane Selemoonesi apaqhenu piyye sikaapanu hxafti maallay kuyyaqako qhaqhitatena koro dhalatina qalli haqintipa na qhaqhitte qhaqhi.
Hantu kapa haadhi ho Selemoonenu ghula hasi qaghi.
32 Kuyyaqako qhaqhitatena koro katama Nenewwenna ihaqanapa dhalatisa qhaqhitte qhaqhu.
Moʼo malla payni Yonaase Kʼaale inu qalliisi iʼapaqhepa Haallikko kula holonki,
naqharray haadhi ho Yonaasenu ghula hassi qaghi.”
Hammakko Dhakintate
(Maat. 5:15; 6:22-23)
33 Nakaleemakka Iyyesuse hasi payi:
“Qhawho hammakko hammasapa isi xayto yeʼarmadhisa xawwadhi taakinti taanko isina qhupapa yaxaka ye qaghi;
laadhdhi koro manne kala xulla qhamu xayto hiininu hammakkoosi xayto armadha sappeema axawwadhi.
34 “Ehxte taahu hammakko pishkito.
Ehxte taahu te xeesa kodhdhi payni pishko haahu kaasay ho haaha ikodhdhini,
naqharray ehxte taahuki te udhama payni pishko haahu kaasakka tukkanko ikodhdhini.
35 Hussa maallay hammakusa haahu qhamu yehola tukkaninu hepankadh.
36 “Lammi dhakinte taahu kaasanna tukkanko yenaqaghi payni dhakinte taahu kaasay tehaahapa tehammakkottay hoqhqhiti kodhdhinti.”
Iyyesuse Feresawaadhdhe Pana Kollisampawhe Hikke Muusena Qhamu Dheehi
(Maat. 23:1-36; Mar. 12:38-40; Lukʼ. 20:45-47)
37 Iyyesuse hasi payipa qalladhu tupettay feresawito tookko piifenu ooqi,
piifesisi yiʼenu karo manne feresawitito kula xullupa anuyiʼo itʼtʼoosu.
38 aIyyesuse qhooti qharriteema yehela xarghghe shoxuna iyyiʼo yiʼi maallay feresawito idhdhahxhxi.
39 Hussa maallay Iyyesuse hasinna payi:
“Hune he Feresawaadhdhe kodhdhite shullopa taankito seetosi annashoxanku,
kapay poorko haahundhisa saropa maghno huna hoqhqhi.
40 Hune qeeppe!
Haallikkussa seeto uumi poorkosi kati yeuumu?
41 Olho [shullo haahundhipa taanko haahundhina] kittatte qaghaasi xiyyawhenu teexama xaysa tupettay olho kaasay hoxeesa ihune kodhdhiniye.
42 “Hune Feresawaadhdhe heooyindha!
Moo malla payni karo tokottay kʼimaamepa tʼiladhama pana dhishto takkumma kaasannaki ateexakko teexte,
karo tokottay qhaqhitte dhukatatepa cʼikno Haallikkitoosi ahela hxurte,
hoqaghaasi huni hxuronkuna ahxay tookkoosika kodhe hune gheeqasa.
43 “Hune he Feresawaadhdhe kodhdha heooyindha!
Moo malla payni manne haahundhi ghissootattena kala qakkatte kaanasamti,
xayto mooratenaka xasatho acʼikate.
44 Hawlesi yearmadhepa koro nasaappaʼita isi ashsha kula qhoota lighte maallay heooyidha!”
45 Kollisampawhe Hikkatena kittatte tookko Iyyesusena inna payi:
“Kollisampako haayyu,
hussa payyo ineesikka dhaghghisti”
46 Iyyesusekka hasinna payi:
“Hune he kollisampawhe Hikkatte kodhdha he oyadhindha!
Moʼo malla payni dhooqho righishaasiki akkoro sappeema hadhastepa hune kapay dhooqhusaasi ghoqakotakaki huni kohxte.
47 Hxuumampawhessi appadhdhe haahundhi paxeenu hawlaadhe qhoota ghariste maallay he ooyidha!
48 Lammi qhoota hxuumampawhessi appaadhdhe haahundhi paxeenu aʼhawlaadhdhe huusundhi gharistepa kodhmossi huusundhi maghaasi isannaqale kodhanku maallay hune holipa heema qallanku.
49 Hussa maallay Arnane Haallikkito hasi paye ‹Hxuumampawhepa erkampawhe Hayyuusiki an usundhe kula erakni,
tookke tookkesi ipaxna,
hibhaasi ighoghora.›
50 Hussa maallay piyye qhaatʼe haki uumamenu paayyatti kʼeeqhte hxuumampawhatte tuqhqhamti kapeema dhalatikki kasqatamna.
51 Dhuke anhune qalli haka Apeelenu paayyatti haka Zekariyaasesib Ammanne Haallikkito kala xayto ana teexakko teexi kapeema poghi saasa kʼeeqhtisay tuqhqhamti kuyyaqako qhaqhitatena dhalatikki na kapa kasqatamna.
52 “Hune kollisampawhe Tampatte he ooyidha!
Moʼo malla payni kʼulfe arnitosikka sheeghte,
naqharray pukkaqate taahundhina huni xulloonku,
he xullinanakka anna dhawraste.”