Lighno Yiʼo Akkeetena
22
Iyyesuse ihholipa lighnottay hasa payuppa nu qallu:
2 “Ahxase Moontito,
nukusa akke miʼaye huusunu yiʼo gharisisikki lighti.
3 Nukusasikka koro anu qalliisi qhamu yiʼosi kula oqnenukki aylaadhe huusu eraki,
naqharray korossi yiʼusa kula okaye ye woʼu.
4 Hantukka ihholipa aylaadhdhe pilena hasa payuppa eraku:
‹Korossi anuqalli kula ashshindhapa hasa napayanku:
«Haadhi,
yiʼossi akkeete angharisisa,
qardhawwepa qhole koopeesika an saqhqhi,
olho kaasakka ighghari,
hussa maallay yiʼossi akeete kula okaya!»›
5 Hessi ayiʼonu ooqi kapay idhafepa qhawho tookko pasho kula,
tookkoka moore kula ashshoy,
6 Tookkeka aylaadhdhesiisi ighappepa naxikkayonkipa bheqhonki.
7 “Xinkissana nukusasi immiroodhipa qhipanpawhe na erakkuppa ashonki korossi aylaadhe huusu poghghiisi paaxonki,
katama huusundhiisikka hattettay dhilloy.
8 “Xaysa tupettay aylaadhdhesi huusuna hasinna payi:
‹Haadhi yiʼosi akkeete ighghari,
naqharray korossi aʼooqi ho yiʼusanu gheeqasa ye kodhdhu.
9 Hussa maallay onke dhamma kula ashshindhapa qhawho atayte kaasaasi yiʼossi agharisi kula ooqanku.›
10 “Aylaadhdheka onkadhdhe kulakki ashsheppa qhawho ittaye kaasay he maghoomapa he xeesoomaasi illeema holasonki,
hussa maallay hayhitto mannessi akkeete kaleema hoqhqhu.
11 “Naqharray nukusasi iʼhayhitosi yiʼonu ooqami emmenu manne kala ixullina,
qhawho tookko ho ye laalle rukmakito urkuyuusiki tayi.
12 Hasakka napayu:
‹Qhawho haayyu,
laalle rukmakitoosi atu urkuyunna mala hassa kala xulliti?›
Qhawhossi kapay iʼkʼampayi.
13 Nukusasikka kodhampawhe huusuna hasinna payi:
‹Xarghghepa luhhe nashapapa ghinte kula lihasankuppa tukkanko kitteema kʼuranku,
xaytusanaka ooyepa ilghe illa qhume kodhdhamannaye.›
14 “Moʼo maalla payni he ooqame he kisha,
naqharray he qholame he qhacʼa.”
Kasqo Kipirrito
15 Xaysa tupettay Feresawaadhdhe iʼashsheppa qhamu qalliiti qalladhittay Iyyesuse tʼalafnenu suladhonki.
16 Kolladhampawhe huusundhiisikka Herotiisena koro huusu illay Uso kula erakkonki;
usundhekka ashshonki hasa payonkippa kasqadhonki:
“Kollisampako haani,
Ato qhama qhawho dhukatte kodhdhitisa anho araani,
miinte qhawhito eemettay yaxanuka atu lighghati.
Dhuke onke Haallikkitoosikki akollisti.
17 Into ine qalli,
Kʼesaarenu kipirro kappare igheeqasam ye gheeqasi?”
18 Naqharray Iyyesuse dhohmunte tuusundhiisikki naʼaripa hasa na payu:
“Hune hehe papaseesa,
moʼo maallaki ayye temmite?
19 Into santipisa akipirronu teexinteesi ye okaasa.”
Usundhekka saanttipe ana tinaarea payitakki nu okaye.
20 Usokka hasi payipa usundhe kasqadhu:
“Qhawho santipinna qaghapa makaxko ana tooxi haaxa?”
21 Usundhekka inna paye:
“Ho Kʼesaare”.
Usokka hasi payipa nu holasu:
“Lammi ho Kʼeesaaresi Kʼeesarenu teexa,
ho Haallikkitoosika Haallikkonu teexa.”
22 Usundhekka qallitisaasi iʼapaqhena idhdhaxxe,
hela hxuronkippa ashshonki.
Kasqo Fartate Haqe Kaaʼita Itʼtʼuyi
23 Kuyyaqakusana korossi Setukʼawaadhdhe anapayi fartatte haqamakko ye qaghi payaki Iyyesuse kula okayipa hasa napayonkippa kasqadhonki:
24 “Kollisampako:
Muuse kulay iʼinena payi qhawho miʼaye ye dhalunakki fari payni qaso huusu innaxayisana xullapa qhawhusa farinu sanynye ghaqqu.
25 Manne toʼona shambho taxxanki qagha.
Usundhissana kittatte qharunko naxaye iʼakkipa miʼaye ye dhalunna faru,
hussa maallay qasossi uso kala qaghakka naxayessi tuusuna xullu.
26 Qhamusa kula ho nakala qaghakka,
ho isxakka,
haka qhawho taxxan saasa naxuxullokippa farronki.
27 Usundhe kaasay iffarre tupettay naxayesikka iffarti.
28 Usundhe kaasay qhooti na xhuxhulle maallay kuyyaqako koro farri haqina usundhisa taxxanna kittatte hunkanukki naxaye kodhdhinti?”
29 Iyyesuse hasi payipa nuholasu:
“Hune Matʼaaffe Kʼulkʼullawhepa humna Haallikkitoosi qhooti huni arte maallay adhdhapanku.
30 “Fartate haqamakko tupettay koro qhamo erkampattadhe moontito kulakki kodhdhini dhiishay ye ille akkinikka.
31-32 Kʼaalesi Haallikko qhoota fartatte haqamakko kaaʼita hunena payi:
‹Ano Haallikko Aprihaamepa ho Yisihaakʼe pana ho Yaykʼoopeb› huni nappaponku inta?
Moʼo malla payni Haallikko Waako koro qaghitona dhiishay ho koro farrina qandhikka.”
33 Waarshokka iʼolissaasi apaqhina kollise tuusuttay idhdhahxhxi.
Hayo Hayidhe Kaasanu Ghula
34 Feresawaadhdhe Iyyesuse qhamu Setukʼawadheesi olhu qalline dhapsipa kʼampayoonkiisi iʼapaqheppa illeema holonki.
35 Usundhisana kittatte kollisampakko Hikkatte tookko Iyyesusesikki teemme woʼipa hasa payuppa kasqadhu:
36 “Kollisampako,
hayo hayidhdhe kaasannu ghula hunka?”
37 Usokka hasina payi:
“‹Pogholho Haallikko haahuusi saqako haahu kaasattay,
napse taahu kaasattay,
kʼalpe thaahu kaasattay cʼikadhac›
38 hayu ho kaasanna ghulapa ho paayyootatte.
39 Hayo husi ligha ho lankakka ‹qhawhoosi qhamo haahu kula cʼikadhad›
40 Hikkepa hxuumampawhe kaasakka hayo lakki sappeemi ghuptame.”
Kristoose Yaxa
41 Feresawaadhdhe iʼilleema holenna Iyyesuse hasi payipa usundhe kasqadhu.
42 “Qhoota Kristoose mali hune lighti?e
Uso Miʼaye haaxa?”
Usundhekka:
“Miʼaye Taawite.”
Kinna payeppa nu holasonki.
43 Usokka hasina payi:
“Emma Taawite inasso Haallikkitottay hoqhqhina moonuki ‹Pogholho› napayipa ooqu?
44 ‹Haallikko Pogholho hayyuna:
«Parakaradhdhe hahuusi luhhe haahu kalay
hakan holasni saasa yela miskitto koray qakkadh»f kina pay.›
45 Hussa maallay Taawite ‹Pogholho› napayipa ooqu payni mali miʼaye huusu kodhdhe alkasni?”
46 Xinkissana qhawho olho toʼokkokka nuholasi taaki kuyyaqkussanu koru qhawho yaxakka ho Uso kasqadhenu shahxumi ye qaghikka.