Iyyesuse Kaanaste Dhammatakki Katama Iyyerusalame Kula Xulli
21
Iʼiyyerusaaleme kula iʼitʼuyeppa ghodhdhesi Ghupo Ekerkitona kaanta qaghay Petefaake ana payina hxafonkinna Iyyesuse kolladhampawhe lakkina hasinna payipa eraku:
2 “Ghodhdhisa hunena miinatte qagha kula ashshindha,
xaytusana ahxafte payni harre te ashapi te miʼayye illay qaghasa hxafinteyye ishighapa ye kula okaasanku.
3 Yaxakakki huneema olo qalla payni ‹Pogholhonuki gheeqasti› napaya.
Usokka hattakki hune teexniye.”
4 husakka hossi Hxuumampakottay hasa payamipa tooxamoya qhamu dhikkanninu:
5 “Miʼaye Tʼiyyoonena hasa napayi
‹Haadhi Nughusa haahi toodhi kodhdhinipa harrepa miʼaye harrattesa hadhdhuppa hekula okayu.›”
6 Kolladhampawhesikka iʼashsheppa qhamosi Iyyesuse nuqalli kula kodhonki.
7 Harresiisi miʼaye thiisi illay okasonkippa laalladhdhe huusundhiisi nasaappeema qafonkippa Iyyesusekka hadhdhuppa nasappa qakkadhu.
8 Waarshosina koro kisha laallaadhe huusundhiisiki onkeema qafi,
koro tookkoka kaareti qharre ghoghondhipa isi onkeema qafa.
9 Waarsho inthawipa ho keetikka
“Hosaynab,
miʼaye Taawitenu!
Ho makaxko Pogholhitottay okaaya ho sakami,
Hosayna,
ghuta moontitoka!c
” Kippayeppa isiriira.
10 Iʼiyyerusaleme kula xullina koro katamisana qagha kaasay idhdhahxipa isi hasa paya:
“Ata husi yaxa?”
11 Waarshokka hasi payipa nuholasu:
“Husi kulay hxuumampakko Nazratesi piyye Kalilana kittatte qaghanu okayi Iyyesuse.”
Iyyesuse Manne Kʼulkʼullawhe Kulaki Ashshi
12 Iyyesuse ghinte Manne Kʼulkʼullawhatte kulaki okayipa koro xaytusana moore lassadhapa isi xorghadha kaasaasi ghoru;
koro kodhatte oohadhana tʼarapeesadhdhepa koro qalalo lassadhana qakkatadhdhe lallaaghoy.
13 “Iyyesusekka hasi payi:
‹Manne hayyu,
manne ghissootatte kipayamne› apayipa tooxoydhune naqharray horro sarampawhe naabhadhameka kotte!”
14 Iyyesuse Immannessi Kʼulkʼullawhattena ghayyana taafawhepa tonnawhe Uso kula okayipa dhinnisoy.
15 Naqharray intawampawhe kʼeesadheetepa kollisampawhe tampatte dhahxhxootessi Iyyesuse kodhdhipa olhossi miʼaadhe Manne Kʼulkʼullawhattena kitate payenna:
“Hosayna Miʼaye Taawitenu!”
pa isiriirasi ihhiʼenna immiiroodhe;
16 Hasakka na payonki:
“Olho miʼaadhisa payeesi aʼapaqhay?”
Iyyesusekka ina payi:
“Ee,
anapaqha,
kʼaalessi iyyanna:
‹Dhellepa miʼaadhe hanna shurana
pakoomi kalata gharisiisie› huni nappaponku intaa?”
17 Haama usundhe hxuruppa katamana kittattekka lighuppa ghodhdhesi ana payi Pittaaniya kula ashshoppa haaha rafu.
Kaarkkosi Pelese Anapayi Awsho Yenaqaghi
18 Iyyesuse sinkatho awnettay ihhaqipa katama Iyyerusalame kula isiholana ipuffi.
19 Onkate kaantakka kaarkko laasite ligha ho ana pelesef payi tayuppa nakula ashshoy,
naqharray qhooti ye awshu maallay aahxe malettay awshitakko toʼokkokka ye natayu,
hussa maallay kaarkkosina hasina payi:
“Xaynu koru awshitakko innihola qaghu.”
Kaarkkosikka hattakki haxawi.
20 Kolladhampawhekka iʼolissa hiʼenna uumi dhhxhxepa hasa payongi:
“Ata!
Karku pelesatte malaali haattay haxawi?”
21 Iyyesusekka hasinna payi:
“Dhuke an hune qalli,
apayni saqakotakka dhukkaysattepa isihuni heghatte payni olho karku pelesatesa kodhdhamadhi patta qandhimma ghupunnakaki anna paytena:
‹Xaytuna roppamipa kala paso kitta hatapama› payni ikkodhdhamanna.
22 Dhukkaysadhe ashsheeghte payni olho aghissatte kaasay aʼakkananku.”
Kasqo Qhoota Humna Iyyesuse Kaa’ita Itʼtʼuyi
23 Iyyesuse ghinte Manne Kʼulkʼullawhatte kulakki okayipa isi koro kollisana intawampawhe kʼeesadheetepa xaadhighghe piyyatte Uso kulakki okayeppa hasa payonkippa kasqadhonki:
“Oli kaasay wanuko hnkatakka kotti?
Wanukusa yaxa hoteexi?”
24 Iyyesusekka hasi payipa nuholasu:
“Anokka kasqo tookko anhune kasqanni;
apayni hune olissa ye holasi payni Anokka oli kaasaasi wanuko hunkattay qhama kodhdhisa an hune qallina.
25 Shoxatte Yohannise ahanuki okayti?
Montonum korito kaanta?”
Usundhekka hasi payeppa illena laaqadhonki:
“‹Montonukki okayti› anna payni payni ‹Lammi moonu isi huni dhukkaysadhonku?›
Kiʼinena payni.
26 ‹Korito kaanta› kanna payni payni,
koro kaasay Yohanniseesi qhamo hxuumampakkito qhooti dhihadhi maallay,
waarshossiki anghaapni.”
27 Hussa maallay “Ini arrikka” kinna payeppa nu holasonki.
Usokka ina payina:
“Lammi Anokka oli kaasaasi wanuko hunkatay qhama kodhisa anu hune qallinikka.”
Lighnossi Dhelle Lakkina
28 Nakaleemakka Iyyesuse hasi napayi:
“Mali hune lighti?
Qhawho tookko ho dhelle lakki sheegha qagha,
usundhissana miʼaye tookko kula ashshoppa hasa na payu:
‹Miʼaye haayyu,
kuyyu pashossi dhishto woynatte kula ashshapa kodhmo kodhay.›
29 Miʼayesikka ‹Anuwoʼi› kinna payi.
Ikkodhdhitama kapay haani innu dhakaatipa kodhmossi kula ashshoy.
30 Paappossi miʼaye lanka kulaki ashshipa qhamossi kula hayu,
miʼayisakka ina payi:
‹Paappo haayyu eʼe anashshina› naqharray yeashshukka.
31 “Lammi dhellissa lakkina hunkaki hayo paappo huusuna kodhi?”
Usundhekka hasi payeppa nuholasonki:
“Miʼayissa payyootatte!”
Iyyesusekka hasina payi:
“Dhuke anhune qalli,
koro kʼaratʼo sooqapa hemammaasa Ahxase Haallikkito kula xulleete ihune intawna.
32 Shoxampakko Yohannise onke pare qaghunkitoosi hune hiʼaasenuki hune kula okayi,
hune kapay huni dhukkaysadhonku,
hekʼaratʼo sooqapa hemamasa kapay idhdhukkaysadhe.
Hune kapay hussasi ahiitekka payni cʼuppito kala huni holonkupa Haallikko dhukkaysadhanku.
Lighno Koro Dhishto Woynatte Hxayyadhina
33 “Into lighno pilakko apaqhqhasindha.
Qhawho tookko ho pashooma dhishto woynatte dhishadhi qagha,
usokka pashosiisi ohinuppa hxoohxono ana awsho woynatte tʼiipniisikka qhotoppa gharisu,
tayho tiqtetekka na ghupadhu;
xaysa tupettay pashossi woynatteesi koro gharisnanu hxayyuppa piyye pilaatte kula ashshoy.
34 Leeqidhesi ana awsho woynatte yuuti qhooti hxafe maallay tayuutiisi qhamu akkinenu aylaadhdhe huusuusi korossi hxaayadhi kula eraku.
35 Korossi hxaayadhikka aylaadhdhessi huusuusi ighappepa tookkoosi tubhbhonki,
tookkoosi poghonki,
tookkoosika awrughetay hattaponki.
36 Uso hantuka iholi ayladhdhe hessi qharaʼitanu ghulaasi nakula eraku.
Korossi hisaasikka qhamossi tokkate kulakki kodhe.
37 Dhikkatatte ‹Miʼaye haayyuusi ikkaanasna› kippayipa miʼaye huusuusi eraku.
38 Naqharray usundhe miʼayeesiisi ihiʼenna hasi payeppa suladhonki:
‹Husi kulay dhaxalmakkosi huusuye,
okaayya poghnipa pashussa huusuusi tayni!›
39 Hussa maallay ghaponkipa pashosi dhishto woynatena kittatte lihasonkipa poghonki.
40 Lammi paapusa pasho dhishto woynatena iʼokayi payni ho mala usundhe pasina ihune lighti?”
41 Usundhekka ina payenna:
“Iʼokaynapa koro maghakusaasi ye qhararsadhu male paahxuppa koro pile he pashusa dhishto woynatena awsho saati gheqastina nu eraknanu hxayyu.”
42 Nakaleemakka Iyyesuse hasina payi:
“Kʼaalesi Matʼaafa Kʼulkʼullitog kittatte:
‹Awrukossi koro manne ghubhadha iishi ihholipa awrukko dhikita manne ghapa kodhdhu,
hussakka kodhmo Pogholhito,
ehxhxe haaninuka dhahxhxoote›payasi huni napaponku intaa?
43 “Hussa maallay hasa anhunena payi,
Ahxase Haallikkito ihunena akkamnappa waarsho awsho awshinanu teexami.
44 [Qhawho awruku saappeema rani immusuqhsuqhna,
yaxakka ho awrukusa na saappeema laaghami kapay iyyoqhamna.”]