Lighno Koro Kodhmo Hxaayyansadhina
20
“Ahxase Moonthito,
qhawho pasho dhishto woynatteesi kodhampawhenu hxaayenu sinkato awnettay lighiisikki lighti.
2 Usokka qhawho kaasannu hxayye kuyyaqako tookkito tinaare toote toote qhamu nu teexninuki ille xule,
kodhampawhesisikka pashossi dhishto woynatte kula eraku.
3 “Issaate izzax kula ghaqqi hxafnana koro hoye kodhmo kodhina morittatte shikkaarasi tayuppa hasa na payu:
4 ‹Hunekka pashossi haayyu dhishtito kula ashshindhapa kodhmo kodhankumma hxayye hune gheeqasaasi an hune teexnaye.›
5 Usundhekka ihhaqeppa pashossi dhishto woynatte kula ashshonki;
holuppa saate tappipa saate kollanakka ashshoppa qhamussa koro pileesi hxaayyu.
6 Issaate 11 kula ghaqiti hxafnana onkaʼitha lighuppa koro ho ye kodhmo kodhina shishikaarasa hxafoppa hasa na payu:
‹Kuyyu moʼo hune tayipa isi huni kodhmo kotte?›
7 Usundhekka hasi payeppa nu holasonki:
‹Kulay qhawho ine hxayyinaasikki an dhapni.›
Usokka inna payi:
‹Lammi hunekka pashossi haayyu dhishto woynatte kula ashshindhapa kodhadhanku.›
8 “Xayto iʼawnuyina paappossi pasho dhishto woynattena qhawhossi kodhmo kodhaththesaasi iʼooqipa hasa na payu:
‹Korossi kodhmo kodhadhiisi ooqpa hessi dhikkatatte okayessa paayyappa he qharaʼitha hxaayyansadhe kaasannu hxayyesi huusundhi inna kodhadheesi nu teexay.›
9 Hussa maallay korossi 11 hxaayyansadhi iʼokayipa tinaare tootte tootte akkadhu.
10 Hessi qharitteema hxaayyansadhekka iʼokayenna koro hxayye ghula akkannakki nu lighti,
naqharray usundhekka tinaare tootte tootte iʼakkadhe.
11 Ikkodhathesiisi akkadhanna hasi payeppa paapposi dhishto woynattesa qhurumrumonki:
12 ‹Korussa tupenu okayi saate toʼotte pattakki kodhadhi,
naqharray inesi sinkato paayynipa haki awnuyti saasa oqhqhaye ineema tʼoqhippa tardhaani qalekki ahxhxaayye haani kula ghaqqi usundheesi teexti.›
13 Qhawhosikka kodhampawhesina kittatte qhawho tookkito hasina payi:
‹Qhawho hayyu,
moʼo an hola dhappi,
hxaayye kuyyaqkko tookkito tinaare tootte qhama ho teexninukki an illexulli qaandhi?
14 Hussa maallay hxaayye haahu akadhpa ashshoy,
hussa anhoosi teexi kula ghaqi hossi tupenu okayinukka teexe woʼoko haayyu.
15 Kodhatte thaayyuusi olho an woʼi kaasattay kodhe anu alkasni?
Atam kati qhoota an horxito kodhdhi maallaki hola maghti?›
16 “Hussa maallay koro keeti i’inthawna koro inthawikka ikkeetina,
[He ooqame he kisha;
he qholame kapay he qhacʼa.]”
Iyyesuse Rakko Usooma Hxafnaasi Izzxa Iqqalli
17 Iyyesuse katama Iyyerusaaleme kula iʼashshapa isi onkatte qaghana kolladhampawhe huusu 12 si qawnki he kula ooqipa hasa na payu;
18 “Haadhi Iyyerusaaleme kulakki an ashshinaani,
Ano Miʼaye Qhawhitoosi intawampawhe kʼeesadheetepa kollisampawhe Hikkattenukki ye likkasneppa teexonki,
usundhekka qhaqhitte fartatte iyyeema qhaqhne.
19 Qhamu yela xikkineppa ye karafonkippa maskʼalaamakka ye dhisonkkinuki koroye koro Ayhutatte kodhdhunu ye likkasneppa ye teexonki;
naqharray kuyyaqako isxanna fartatte an haqna.”
Dhelle Zeptiwoosena Yayye Tuusundhi
20 Xinkissana yaaye dhelle Zeptiwoosenakki dhelle hiisi illay Iyyesuse kula okayipa namiinta ghulladhipa qhamu olho tookko nukoninu waatadhi.
21 Usokka ina payina:
“Moʼo awooti?”
Isekka ina payti:
“Dhelli hayyu lakkiisi Ahxase Thaahuna tookkoosi miskitto kaaqila tookkoosikka pixxatte kaaqila qhamu qakkannenu nupayi!”
22 Iyyesuse kapay inna payi:
“Olho aghissateesi huni arte,
quktesi rakkito an qukniisi ye qale quke aʼalkasnanku?”
Usundhekka ina paye:
“Ee,
an alkasnaani!”
23 Usokka ina payi:
“Karayka quktisay thaayyu rakkitoosi aquknanku,
naqharray miskittopa pixxatte thaayyu kaaqila he qakkanna hessi Paappo Hayyu nu gharisi dhiishoy Ano qandhikki teexna.”
24 Kolladhampawhesi hudhdhan iʼolissaasi apaqhenna dhelle lakkisisa inna miiroodhe.
25 Iyyesusekka illeemi usundhe holasipa hasa na payu:
“Rafisampawhessi koro ye koro Ayhutatte kodhdhu rafisa waarsho huusundhisa qhamu poghulumeppa intawampawhe huusundhikka isi humnattay usundhe rafisasa aʼaranku.
26 Naqharray hunena kittatte hasa kodhe ye gheeqasti;
hussana kaanta qhawho hunena kittatte ghule woʼa qagha payni ihhuneesi kodhampako kodhdha.
27 Laadhdhi qhawho hunena ghule woʼa ihhune ayle kodhdha.
28 Qhamusa kula Ano Miʼaye Qhawhitokka qhamu koro Ye kodhaninu qandhimma qhama koronu kodhannipa he kishanu napse thaayyuusi murra kodhapa teexanukki an okayi.”
Iyyesuse Qhamu Taafawhe Lakkissi Dhinnisi
29 Iyyesusepa kolladhampawhe huusu katama Iyyarkona kittatte illigheppa isi ashshana waarsho kisha Uso kala ashsha.
30 Xaytusanakka qhawho lakki taafawhe onkatte hinaseete qakkadha,
Iyyesuse iʼusundhe kaaʼita lighghana iʼapaqheppa hasa Payonkippa riironki.
“Pogholho haani,
miʼaye dhaawite akko maʼala ine qhararsadh!”
31 Waarshokka qhamu kʼampaynenukki usundhe qheeri,
naqharray usundhe “Pogholho haani,
miʼaye dhaawite akko maʼala ine qhararsadh!”
Kippayeppa uuma riironki.
32 Iyyesusekka ishshikkaaripa usundhe ooqupa hasa na payu:
“Moʼo anhune konni woote?”
33 Usudhekka:
“Pogholho haani,
ehxhxe qhamu ine qhashamnekki an wooni.”
34 Iyyesusekka iqhararsadhipa ehxhxe huusundhiisi naghaghappadho,
ehxhxe huusundhikka haattay xayto hiʼonki,
Uso qalekka ashshonki.