Ille Ishighe Yegheeqasti
19
Iyyesusekka iʼolissaasi thorruyipa dhikkisu tupettay piyye Kalilannukki haqipa piyyessi Yihutay kolle Yortanoosenna afeete qagha kula ashshoy.
2 Waarsho kishakka Uso kala ashshoppa xaytusassa usundhe dhinnisoy.
3 Feresawaadhdheete tookke tookke Usoosi themmenukki okayeppa hasa payonkippa kasqadhonki:
“Qhawho olho kodhdhamadhi maallay naxaye thuusuusi ishighe ippayamti?”
4 Usokka hasi payipa nuholasu:
“‹Uumampakko qharitteema tʼiirakkopa xiskatto qhamu kodhipa uumussaa› huni nappaqhonku?
5 Hasakka payu:
‹Qhawho paappopa yayye thuususi ihhela hxurrapa naxaye thuusu qale kodhdhu,
usundhe lakkissakka pishko toʼoko kodhdhonki.b›
6 Hussa maallay xaysannu koru usundhe pishko toʼoko dhiishay lakki qandhikka.
Lammi he Haallikko toʼokke kodhiisi qhawho inni illena reehu.”
7 Feresawaadhdhekka inna payenna:
“Emma Muuse moʼo maallakki ‹Qhawho apayni naxaye thuusunu warakʼate ishighatteesi innu teexi payni iʼishighac› ippayipa hayu?”
8 Usokka hasinna payi:
“Muuse kulay saqqe hunena fafenna haqtiki qhama xiske hahundhi ishshightenu hune payi dhiishoy,
qharaʼitha hasa ye payamukka.
9 Anhunena paya:
qhawho naxaye thuusu ye maasu male ishighapa isi pilaththe akka kaasay immaasa,
holuppa isekka qhamu maasti kodhi,
qhawho the aʼishghi akkaka immaasa.”
10 Kolladhampawhekka inna paye:
“Apayni qhoota tʼiirakkitopa ho xiskattito hasi lighi payni akke hela hxure iwwoyya.”
11 Naqharray Iyyesuse inna payi:
“Kollinku koro innu teexamtinu patta dhiishoy koro kaasannu qandhikka.
12 Holuppa he kundhe kodhdheppa dhaladhoonkippa isi akke male qaakakki qagha,
he xarghghe qhawhitottay akundhe kodhipa isi akke male qaakakka iʼqagha,
holuppa he Ahxase Moonthito maallay akke male qaakaka iʼqagha.
Qhawho oliisi akkadhe alkasa iʼakkadha.”
Iyyesuse Miʼaadhi Saki
13 Xinkisana Iyyesuse qhamu xarghghe huusuusi miʼaadhe saappa ghapannipa nughissadhunnuki koro miʼaadhettay na kula okayi,
naqharray kolladhampawhe huusu korossi miʼaadhettay okayisa inna dheehadhe.
14 Naqharray Iyyesuse inna payi:
“Miʼaadhe iyye kula okayema olo dhawrase;
moʼo maalla payni Ahxase Moonthito hisi hasa lighoomanuye.”
15 Inna saappa xargho ghapadhipa nughissadhu tupettay haquppa ashshoy.
Kasqo Ponkorito Shorokittossinna
16 Kuyyaqako tooko qhawho toʼoki Iyyesuse kula okayipa hasa payuppa kasqadhu:
“Kollisampakko haayyu,
qagho perre ye hume sheeghe tayadhenu olho xeesa moʼo an konni?”
17 Iyyesusekka hasina payi:
“Qhoota olho xeesa kaaʼitha Moʼonukka ye kasqatti?
Waako toʼoko pattakki ho xeesaye,
naqharray karo qaghito xulle wooti payni hayidheesi tiqthadha.”
18 Qhawhossikka hasina payipa kasqadhu:
“Ata hayidhe hinka?”
Iyyesusekka hasi payipa nu holasu:
“Olo poghi;
olo maasi;
olo kereqi;
aayya olo masakkari;
19 paappopa yaaye thaahuusi kaanas;
qhawhoosi qhamo haahu kula cʼikadha.”
20 Ponkoritosikka hasina payi:
“Hayidhissa kaasaasi antiqthadhi,
olho pile moʼo ye haqhna?”
21 Iyyesusekka ina payi:
“Qhawho olho toʼokoka yena qaghika kodhdhe wooti payni,
ashshapa olho ashsheeghti kaasaasi lassoppa kodhaththisaasi teekollonu qhootomma moonthito shorokunko attaayadhintiye.
Xaysa tupettay okayappa ye kala ashshoy.”
22 Naqharray ponkoritussa qhooti shorokunko dhamma sheeghi maallay iqallithisaasi apaqhina innu qhaskatipa ashshoy.
23 Iyyesusekka kolladhampawhatte hasina payi:
“Dhuke anhune qalli,
shorokittonnu Ahxase Moonthitosa xulle innu haxay.
24 Anna holipa isan hune qalla:
shorokitto Ahxase Haallikkito kula xullinana kaanta kaala bhaaqhqhe marfatena xullinaki woyyina,”
25 Kolladhampawhekka iʼolissa apaqhenna uumi dhahxhxeppa hasa payonki:
“Lammi yaxa dhine alkasna?”
26 Iyyesuse usundhe kulakki eemmadhipa hasa na payu:
“Oli qhawhonu ye alkasami,
naqharray Haallikkonu olho kaasay iʼalkasama.”
27 Xinkissana Petʼiroose hasinna payi:
“Haadhi ine olho kaasakki an hela hxurripa ho kala ashshoninna moʼo an tayanaani?”
28 Iyyesusekka inna payi:
“Dhuke an hune qalli,
xinkessi qhaatʼe qhawthawhe okayeppa Ano Miʼaye Qhawhito qakkatte kaanastatesa qakkadhana hunissa ye kaleema ashshite qakkathadhe hudhdhanpa lakkisa aqakkanteppa kaffessi Israʼeelatte hudhdhanpa lakkisa qhaqhitte qhaqhanku.
29 Qhawho makaxko hayyu maallay mannadhdheesi taakki qharummaadhepa qassawheesi taakki alawweesi taakki paappopa yaayeesi taaki miʼaadheesi taakki pashsheesi hela hxuri kaasay,
xarghgho 100 iʼakkanni,
holuppa qagho perre ye hume sheeghenna tayadhu.
30 Naqharray koro kisha ho inthawi ikkeetna,
koro keetikka iʼinthawna.”