Iyyesuse qandhesikki Tʼayye Woynatte Kodhi
2
Kuyyaqko isxanna kathamassi piyye Kalilanna kittatte qagha Kʼaana ana payinakki manne xantadheete qaghe,
yaaye Iyyesusekka isi haaha qaghay.
2 Iyyesusepa kolladhampawhe huusukka mannissa xantadheete kulakki aʼusundhe ooqi.
3 Mannessi xantadhdheetena tʼayye woynatte qhooti humti maallay Iyyesusena yaaye thuusu hasi na payti:
“Kulay tʼayye woynatte ina humti!”
4 Iyyesusekka yaaye thuusuna hasi na payi:
“Atho xiskattuy ata moʼo an hela sheeghi?
Xeere hayyu haannay ye tamonkiye.”
5 Xinkissana yaaye thuusu kodhapmpawhessi xaytusana qaghana hasi na payiti:
“Olho Uso hunena pay kaasaasi kodha.”
6 Koro piyye Ayhutattena qhooti tampe alheesate sheeghe maallay sighghe aʼawurughete kodhdhi sighghe kaanoma tappi xaysanna qagha,
sighghissa kaanoma kaasay qandhe kuppakko lakki lakki taaki kuppakko issex issexki ghapadhe.
7 Iyyesusekka kodhampawhessinna hasi na payi:
“Sighghissasa qandhe na hoqhqhasha” usundhekka qhamossi na payi kula pakke saasa na hoqhqhashonki.
8 Xaysa tupettay Iyyesuse kodhampawhesinna hasi na payi:
“Into hoqqapa inthawampakkossi manne yiʼitonu teexanku.”
Usundhekka hoqqonkippa nuteexonki.
9 Inthawampakkossi manne yiʼitonakka qandhessi tʼayye woynatte kodheesi lokodhu.
Ikkodhdhitama kapay xaytunu okaytiisi yeʼarukka,
naqharray kodhampawhessi qaandhissa meeghe iʼara.
Hussa maallay intawampakkossi manne yiʼitona akkampakkosikki ooqipa hasa na payu:
10 “Koro kaasay tʼayye woynatte soorasikki qharitteema koro itʼtʼoosipa hayhithokka iquki tupettay theye sortiisi isi koronu teexi,
naqharray atho tʼayye woynatte soorasi haka hantu saasa aʼolthisti.”
11 Iyyesuse dhahxhxootaadhdhe kaasanna tiisi dhahxhxoote paayyootatesiki ikathama piyye Kalilanna kittatte qagha ana Kʼaana payisa kodhdhi,
onke hasa lighattakki ikkaanaste thuususikka hiʼaasipa kolladhampawhe huusukka Uso dhukkaysadhonki.
12 Xaysa tupettay Iyyesuse yaaye thuusupa qassawhe+ \fr 2:12 \ft Qassawhe (dhelle huusundhi) huusu pana kolladhampawhe huusu illakki karo piyye Kʼifirnahoome kula oodhdhi,
haamattekka kuyyaqqe qhacʼa oladhonki.
Iyyesuse Manne Haallikkito Igharisi
13 Paalessi Faasika koro Ayhutattena qhooti iitʼuyti maallay Iyyesuse katama Iyyerusaaleme kulakki ashshi.
14 Koro Manne Kʼulkʼullawhatte ghintatte qholepa qeemme pana qalalosi lassa holuppa he qakkadheppa isi kodhaththe oʼohadhasa hxafi.
15 Xinkisana suro akki soohxadhuppa qeemmepa qholessi ghinte Manne kʼulkʼullawhattena alassi kaasaasi lihhasoy.
Holuppa korossi kodhaththe oohadhanakka kodhaththe thuusundhiisi na pulloy,
tʼarabheesadhdhe huusundhiisikka na lallaaghoy.
16 Korossi qalalo lassadhana inna payi:
“Olissa xaysanna patisa!
Manne Paappo hayyuna olo xayto ana moore xorghadhi kodhe!”
17 Xinkissana kolladhampawhe huusu olhossi “Yokunte Ammanne Haahunoosi sheeghi qhamo hattate iyyedhiltia” paayyamipa tooxamosikki ihhela taaye:
18 Xaysa tupettay rafisampawhe koro Ayhutattena Iyyesusena hasi na paye:
“Atho qhama humna sheeghtisa dhahxhxoote mala lighaasikki aʼine hiʼaasinti?”
19 Iyyesusekka inna payi:
“Manne kʼulkʼullawhisi pulama Ano an holapa kuyyaqko ise kitta ghupaadhaye.”
20 Usundhdhekka iholleppa hasa na payonki:
“Ghupe Manne kʼulkʼullawhinna perko hudhanko salaxpa tappi poghenna Atho mala kuyyaqko isexsa aghghupadhe alkasinti?”
21 Naqharray Iyyesuse olissa iyyina Manne kʼulkʼullawhe qhoota pishko huusu kaaʼita iqqalli.
22 Hussa maallay Iyyesuse iffartatte haqi tupettay kolladhampawhessi huusu qhamu iʼolissaasi qallisa ihhela thaaye,
hussa maallay olhossi Matʼaafadhdhe payeppa Kʼaalessi Iyyesuse qallisikka dhukkaysadhonki.
Iyyesuse Saqqe Koro Kaasanakki Ari
23 Iyyesuse dhahxhxootaadhdhe ikkuyyaqko paale Faasikanna kathama Iyyerusaalemessa kodhi koro kisha qhooti hiʼi maallay Iʼuso dhukkaysadhe.
24 Naqharray Iyyesuse koro kaasaasi qhooti ari maallay ye usundhe dhukkaysadhi.
25 Uso olho saqko qhawhitona kittatte qaghaasi qhooti ari maallay Usoosi qhoota qhawhito nu qalle ye koro gheeqastikka.