Wonkele Iyyesus Kristoose Yohannise Tooxi
Iyyesuse Kʼaale Perre Ye Hume Sheeghenna
1
Paayyootatte Kʼaale qagha;
kʼaalissakka Haallikkito kaantaakki qaghti;
kʼaalissakka Haallikko.
2 Kʼaalisakkaa paayyotatte Haallikkito kaantaakki qaghti.
3 Olho kaasay Kʼaalissattakki uumami,
olho uumami kaasanna kittatte olho toʼokokkakki ho Kʼaalissay male uumami ye qaghikka.
4 Kʼaalisattay qagho qagha;
qaghusakka hammakko korito.
5 Hammakkokka tukkankito kittatte ihhaahi,
tukkankokka ye Uso kamu.
6 Qhawho ana payi Yohannise ho Haallikko erakikki qagha.
7 Koro kaasay misikirinko huusuttay qhamu dhukkaysanninu,
Uso qhoota hammakito thorruyenukki okayi.
8 Qhoota hammakito torruyenuki okayi dhiishay uso hammakko qandhikka.
9 Hammakko dhukatte ho koro kaasannu haahisna piyye qhaatʼe kula okaaya.
10 Usokka piyye qhaatʼinnakki qaghi;
piyye qhaatʼekka Usottaakki uumame;
naqharray piyye qhaatʼe ye Uso are.
11 Dhaliththo Huusu kulakki okayi,
naqharray dhaliththo Huusu ye Uso akkadhu.
12 Ikkodhdhitama kapay he Uso akkadheppa makaxko Huususi dhukkaysadhonki kaasannu Miʼaadhe Haallikkito kodhdhenu ghulno innu teexi.
13 Usundhisakka Haallikkito idhaladhe dhiishay sanynye qhawhitonab taaki woʼoko tʼiirakkitona ye dhaladhonki.
14 Kʼaalisakka qhawho ikkodhdhiti,
teexakko Haallikkitopa dhukkettay hoqhqhippa ine kittatte qaakoy;
kaanastessi Miʼaye toʼokito ghuta Appana kaanta qaghaasikka hiʼaani.
15 Yohannisekka ikkitto dhammattaakki hasa payipa hela qallu:
“‹Qhawhossi an hunena iyyina ye kaleemati okayni haadhi husi Uso›,
yela qhara’ita qhooti qaghi maallay umatteki ye ghuli.”
16 Ine kaasay teexakkossi Usooma hoqhqhinakki an teexakko saappa teexakko akkanni.
17 Hikke Muuse kaakkorukki teexamti,
naqharray horxunte Haallikkitopa dhuke Iyyesus Kristoose kaakkorukki okaye.
18 Qhawho toʼokkokka ho Haallikkoosi hiʼi apar ye qaghi,
ikkodhdhitama kapay Miʼaye huusu toʼokossi Haallikko Appana kaanta qaghaki okayipa koronu hiʼaasu.
Misikirunko Shoxampakko Yohannise
19 Yohannise qhamu yaxa kodhdhisa kasqatesenukki rafisampawhe koro Ayhutattena Iyyerusaalemenu Uso kula kʼeesadhdhepa korossi sanynye Lewinna kodhdhasi nakula erakenna Yohannise hasi payipa masakaru,
20 “Ano Kristoose qandhikka.”
dhishoy ye marmadhukka.
21 Usundhekka ihholleppa hasa na payonkippa kasqadhonki:
“Emma atho yaxaghe?
Atho Eliyaase?”
Usokka inna payi:
“Ano Eliyaase qandhikka”.
“Emma Atho hxuumampakkossi?”
“Ano hxuumampakkossi qandhikka” kippayipa nu holasu.
22 Hussa maallay dhikkattatte usundhekka inna payenna:
“Emma atho yaxaghe?
Korossi ine erakinu qhoota haahu kaaʼitha moʼo anna paynanippa nu holasaani?”
23 Usokka inna payina:
qhawhossi hxuumampakko Issayaasec payina:
“Onke Pogholhitoosi gheteʼisa” payinapa ikkitto dhammattay isi mandhito riira› kulay ano.”
24-25 Feresaawadhdheesi aʼerakina kittatte tookke tookke inna payenna:
“Eepa apayni atho Kristoose taaki Eliyaase taaki hxuumampakkokki athukodhdhu payni,
moʼo mallakki ashoxatte shoxti?”
26 Yohannisekka hasi payipa nu holasu:
“Ano shoxatte qandheetettakki an shoxima naqharray Qhawho huniʼartekki hunena kittatte shikkaara.
27 Qhawhussakka suro hxopadhdhe huusuna ishighekakki yeye gheeqastikki ye kalema okaaayya an hunena payi husi Uso.”
28 Olissa kaasay xaytu na kodhdhamadhi kathamassi Pithaniya kollessi Yohannise na shoxatte shoxi Yortanoosenna afe koray.
Orppo Haallikkito
29 Ha qhayna sinkato Iyyesuse Iyohannise kula okaayana Yohannise ihiʼipa hasa payu:
“Haadhi Orppossi Haallikkito cʼuppo piyye qhaatʼete patisna.
30 ‹Hossi Ye kala okayna yela qharaʼitha qhooti iqaghi maallay uuma iyye ghuli› an paypa hune qalla husi Uso,
31 anokakki anu Uso arikka,
emma naqharray Uso waarsho Isra’eelattenu qhamu iʼarmaninukki an shoxadhe qandhetettay koro shoxenu okayi.”
32 Nakaleemakka Yohannise hasi payipa masakaru:
“Nasso Kʼulkʼullo lighno qalalakitotaakki ghuta moonthonu oodhdhipa isi Uso saappa qakkadhanakki an hiʼi.
33 Anokka anu Uso ari,
emma naqharray hossi qhamu an shoxatte qandhetettay koro shoxninu ye eraki iyyela payina ‹hossi Nasso Kʼulkʼullo iʼoodhdhina okayipa Uso saappeema qakkadhu hossi shoxatte Nasso Kʼulkʼullottay koro shoxna Uso›.
34 Anokka olissaasi an hiʼi maallay Uso qhamu Miʼaye Haallikkito kodhdhisa an qallina.”
Kolladhanpawhessi Iyyesuse Paayyootatte
35 Haqhayna sinkato Yohannise kolladhampawhe huusu lakki illakki holipa isi xaytusana shikkaara.
36 Yohannise Iyyesuse ixxaysa kaaʼita lighghanakki hiʼipa hasa payu:
“Haadhi orpo Haallikkito!”
37 Kolladhampawhessi huusu lakkikka olhossi uso qallisikki apaqheppa Iyyesuse kala ashshonki.
38 Iyyesusekka illaghghammipa hessi Uso kala ashshaasi emmuppa hasa na payu:
“Mo’o aghgheeqte?”
Usundhekka hasi payeppa nu holasonki:
“Reppi,
xankana qaakti?”
Reppi payyo kollisampakko.
39 Usokka inna payina:
“Okayapa eemonku.”
Usundhekka kuyyaqkussana iʼashsheppa xaytossi inna qaakisikka eemonkippa na qale nakayoonki,
xinkisana saate hudhdhanki hxafinti.
40 Kolladhanpawhessi lakki olho Yohannise qalliisi apaqheppa isi Iyyesuse kala ashshana kittatte tookko Simiʼoonessi Petʼiroose ana payina qaso huusu Intriyaase.
41 Intiriyaasekka qharittemi qharunko huusu Simiʼoone kulakki ashshipa hasa na payu:
“Kulay Mesisiisi an tayni.”
Mesi payyo kristoose.”
42 Xaysa tupettay Iyyesuse kulakki okayittay.
Iyyesusekka iʼemmipa hasa na payu:
“Atho miʼaye Yonay Simiʼoone,
lammi xaynu koru Kefa ahola payni”.
Kefa payyo Petʼiroose taakinti awrukko siimmiko.
Iyyesuse Qhamu Filpʼoose Pana Natinaʼeelesi Ooqi
43 Haqhayna sinkato Iyyesuse piyye Kalila kulakki ashshanko woʼi,
Filipoosesemakka hxafoppa hasa na payu:
“Yekalema okay!”
44 Filipoosekka qhamo Intriyaaseppa Petʼiroose kula qhawho kathama Peethesaytanna.
45 Filipoosekka Nathinaʼeelesikki tayipa hasa na payu:
“Qhamossi Muuse Matʼaaffe hikkattesa,
hxuumampawhekka Matʼaaffe Hxuumassa qhoota huusu tooxe,
Miʼaye Yoosefe Iyyesuse Naazirateesiki an tayni.”
46 Naqharray Nathinaʼeele ippayina:
“Kathama Naazirathenna olho xeesa taayame alkasna?”
Filipoosekka inna payi:
“Into okaypa eemoy!”
47 Nathinaʼeelekka iʼokayina Iyyesuse iʼuso hiʼipa qhoota huusu hasa payu:
“Haadhi qhawho yemaghno yena qaghi,
dhuke qhawho piyye Israʼeelattena!”
48 Nathinaʼeeleka:
“Xankannakka ayye arti?”
Kinna payipa kasqadhu.
Iyyesusekka hasi payipa nu holasu:
“Kulay Filipʼoose yeho ooqunna qharaʼitha adhishtakko pelesattena kalla qaghannakki anho hiʼi.”
49 Nathinaʼeelekka inna pay:
“Kollisampakko,
Atho Miʼaye Haallikkitoʼ Atho Nukusa Israʼeelatte.”
50 Iyyesusekka hasi na payi:
“Qhoota anhola payina dhishtakko pelesattena kalakki anho hiʼi maallakki aʼdhukkaysati?
Olho olinna ghula haannakki ahhiʼinti!
51 Dhuke,
dhuke an hune qalli,
moontho iqhqhashamapa Erkampatadhdhe Haallikkitokka Ano Miʼaye Qhawhito saappeema ihadhdhapa isi odhanakki ahiʼinte.”