Kʼaale Shoxampakko Yohannise Torruyi
3
Xinkissana Shoxampakko Yohannise mandhossi piyye Yihutanna qaghanukki okayipa isi Kʼaale Haallikkitoosi thorruya.
2 Iththorruyanakka hasi payi:
“Ahxase Moonthito qhooti itʼtʼuyti maallay cʼuppito karo Haallikkito hola!”
3 Hossi hxuumampakko Issayaase a qhoota huusu payina:
“Ikkitto qhawhito mandhito hasa payipa isi riira:
‹Onke Pogholhitoosi gharisa,
onkaadhdhe takkumma usona ashshiniisikka gheteʼisanku›” husi uso.
4 Laalle Yohannisesi ufurkko kaalanakki akkodhdhi,
kuudheʼithakka theepko ishshapadhi,
yiʼo huusukka ayyakkopa sakmo taantatte.
5 Xinkissana koro kathama Iyyerusaalemenna qaghapa koro piyye Yihutanna qaaka kaasappa koro kolle Yortanoosenna kaaʼitha qaaka kaasay Yohannise kulaki okayi.
6 Cʼuppo huususikka isi hela puutʼapa usokka kolle Yortanoosessa isi shoxatte usundhe shoxa.
7 Naqharray Feresawaadhdhepa Setukʼawaadhdhe ishshoxadhenu okaayana Yohannise iʼusundhe hiʼipa hasa na payu:
“Hune miʼaadhe puuthatte,
miirassi Haallikkito okaayana kala qhama ghoradhintennu yaxa hune qalli?
8 Lammi kodhmo cʼuppito karo Haallikkito hole haahundhi hiʼaasa kodha.
9 Pukkaqte thaahundhina ‹Appa haani Aprihaame an sheeghni› olo payeppa isa peepadhanku,
moʼo maalla payni an hunena payana Haallikko Aprihaamenu awrughinna miʼaadheesi haqise iʼalkasna.
10 Hantu kakki irkaqqoosi kaarete kulle kaleema axawwadhi,
moʼo maalla payni kaarko awsho xeesaasi ye awshi kaasay aghoxnapa haththe kitteema ak’uru.
11 Cʼuppito karo Haallikkito qhama holtennu haadhi ano shoxatte qandheetettakki an hune shoxi,
naqharray hoyekaleema okayna Nasso Kʼulkʼullopa haththettakki hune shoxni,
Uso hoyeesi uuma ghula,
yesi hxope luhhe huusunakkakki dhooqhe yeye gheeqasti.
12 Siifte xarghgho huusuna.
Uso maanghossi qawtatte qaghasi ighgharisna,
kaspoosi unkuleemi yakni,
kacʼcʼeesi kapay hatte ye ime sheeghtitakki dhilli.”
Shoxadhe Iyyesuse
13 Xinkissana Iyyesuse Yohannisettay shoxatte shoxadhenukki piyye Kalilannu haqipa kolle Yortanoose kula okayu.
14 Naqharray Yohannise:
“Ye kodhdhinti,
yeesikki Atho shoxatte yeshoxinti dhiishoy Atho mala yekula okaayti?”
Kinna payipa isi dhawrasa.
15 Iyyesuse kapay hasinna payi:
“Hxur,
kodhmo pare qaghunkito kaasaasi onkittay kodhe qhooti ine gheeqasti maallay ihhasa kodhdhita.”
Yohanisekka iʼeʼesadhipa Iyyesusesi shoxatte shoxuy.
16 Iyyesuse ishshoxadhipa qandheete kittatte lighunna hattakki moontho qhaashami,
Nasso Haallikkitokka lighno qalalakitottay oodhdhuppa Iyyesuse saappeema isi qakkadhdhana hiʼu.
17 Xinkissana ikkitto hasa paya monthikki qhaskadhi:
“Haadhi Miʼaye Hayyu ancʼikadhipa isan Usottay hxasoodha husi uso.”